Gwasanaeth Cynhaliaeth Plant
Beth yw cynhaliaeth plant
Mae cynhaliaeth plant yn cwmpasu sut bydd costau byw eich plentyn yn cael eu talu pan na fydd un o’r rhieni’n byw gyda’r plentyn. Mae’n cael ei wneud pan fyddwch wedi gwahanu oddi wrth y rhiant arall neu os nad ydych erioed wedi bod mewn perthynas.
Mae hwn yn drefniant ariannol rhyngoch chi a rhiant arall eich plentyn. Gwneud trefniadau i weld eich plentyn yn digwydd ar wahân.
Mae’r canllaw hwn hefyd ar gael yn Saesneg (English).
Mae’n rhaid i chi gael trefniant cynhaliaeth plant os yw’ch plentyn o dan 16 oed (neu o dan 20 oed os ydynt mewn addysg llawn amser).
Mae’r ddau riant yn gyfrifol am gostau magu eu plant, hyd yn oed os nad ydynt yn eu gweld.
Mewngofnodi i’ch cyfrif Gwasanaeth Cynhaliaeth Plant os oes gennych un yn barod.
Opsiynau ar gyfer trefnu cynhaliaeth plant
Gallwch drefnu cynhaliaeth plant:
- yn breifat rhwng rhieni, os yw’r ddau riant yn cytuno
- drwy’r Gwasanaeth Cynhaliaeth Plant
Gall y Gwasanaeth Cynhaliaeth Plant:
- gyfrifo swm i’w dalu
- trefnu taliadau a chymryd camau os nad yw rhiant yn talu
- datrys anghytundebau ynghylch pwy yw y rhieni
- ceisio dod o hyd i’r rhiant arall os nad ydych chi’n gwybod ble maen nhw
Os nad ydych am i riant arall eich plentyn gysylltu â chi neu eich plentyn
Gallwch ddefnyddio’r Gwasanaeth Cynhaliaeth Plant i drefnu cynhaliaeth plant os nad ydych am i riant arall eich plentyn wybod eich lleoliad neu wybodaeth bersonol.
Sut mae’n effeithio ar fudd-daliadau
Ni fydd taliadau cynhaliaeth plant yn effeithio ar unrhyw fudd-daliadau rydych chi a’ch plant yn eu cael, gan gynnwys Credyd Cynhwysol. Ni fydd yn rhaid i chi dalu unrhyw dreth arnynt.