Gwasanaeth Cynhaliaeth Plant
Pryd mae cynhaliaeth plant yn dod i ben
Mae taliadau cynhaliaeth plant yn dod i ben pan fydd eich plentyn yn gadael addysg neu hyfforddiant neu’n troi’n 20 oed, pa bynnag un sydd gyntaf.
Efallai bydd angen i chi roi gwybod am newidiadau i addysg neu hyfforddiant eich plentyn ar ôl iddynt droi’n 16 oed.
Efallai bydd dal angen i’r rhiant sy’n talu gwneud taliadau ar ôl i gynhaliaeth plant arferol dod i ben os ydyn nhw wedi methu taliadau yn y gorffennol.
Pryd bydd angen i chi roi gwybod am newid mewn amgylchiadau
Mae cynhaliaeth plant yn gysylltiedig â Budd-dal Plant. Rhowch wybod i’r Swyddfa Budd-dal Plant os yw’ch plentyn:
- yn aros mewn addysg neu hyfforddiant ar ôl troi’n 16 oed
- yn dechrau cwrs addysg neu hyfforddiant newydd
- yn gadael cwrs addysg neu hyfforddiant cyn iddo ddod i ben
Pryd bydd eich taliadau yn dod i ben yn awtomatig
Bydd eich taliadau yn dod i ben yn awtomatig os yw’ch plentyn yn:
- troi’n 20 oed – bydd taliadau’n dod i ben ar ôl eu pen-blwydd
- cwblhau cwrs addysg neu hyfforddiant – bydd taliadau’n dod i ben ar ddiwrnod olaf mis Chwefror, Mai Awst neu Dachwedd (pa bynnag un sydd gyntaf)
Gwiriwch os yw addysg neu hyfforddiant eich plentyn yn gymwys
Rhaid i addysg fod yn llawn amser (mwy na chyfartaledd o 12 awr yr wythnos o astudiaeth dan oruchwyliaeth neu brofiad gwaith sy’n gysylltiedig â chwrs). Os oes salwch neu anabledd gan eich plentyn, gallant wneud llai o oriau os yw hynny’n addas iddynt.
Gall cyrsiau addysg gynnwys:
- Lefelau A neu debyg, er enghraifft Cyn-U, Bagloriaeth Ryngwladol
- Lefelau T
- TGAU
- Scottish Highers
- National 5s
- NVQs a’r rhan fwyaf o gymwysterau galwedigaethol hyd at lefel 3 - ac eithrio prentisiaethau canolradd ac uwch
- addysg gartref - os dechreuodd naill ai cyn i’ch plentyn droi’n 16 oed neu ar ôl 16 os oes ganddynt anghenion addysgol arbennig ac anableddau
- hyfforddeiaethau yn Lloegr
Rhaid derbyn eich plentyn ar y cwrs cyn iddynt droi’n 19 oed.
Mae Cynhaliaeth Plant yn dod i ben os yw’ch plentyn yn dechrau astudio cwrs ‘uwch’, fel gradd prifysgol neu Dystysgrif Genedlaethol Uwch BTEC, neu os yw cyflogwr yn talu am gwrs.
Rhaid i hyfforddiant fod yn ddi-dâl a chynnwys:
- yng Nghymru: Prentisiaethau Sylfaenol, hyfforddeiaethau neu gynllun Twf Swyddi Cymru+
- yn yr Alban: y rhaglen No One Left Behind
- yng Ngogledd Iwerddon: PEACE IV Children and Young People 2.1, Hyfforddiant ar gyfer Llwyddiant neu Sgiliau ar gyfer Bywyd a Gwaith
Ni chymeradwyir cyrsiau sy’n rhan o gontract swydd.