Ffurflenni Treth Hunanasesiad
Pwy sy’n gorfod anfon Ffurflen Dreth
Mae’n rhaid i chi anfon Ffurflen Dreth os, yn ystod y flwyddyn dreth ddiwethaf (6 Ebrill i 5 Ebrill), roedd unrhyw un o’r canlynol yn berthnasol:
- roeddech yn hunangyflogedig fel ‘unig fasnachwr’ ac wedi ennill mwy na £1,000 (cyn tynnu unrhyw beth y gallwch hawlio rhyddhad treth arno)
- roeddech yn bartner mewn partneriaeth fusnes
- roedd yn rhaid i chi dalu Treth Enillion Cyfalaf pan wnaethoch werthu, neu ‘gael gwared ar’, rywbeth a wnaeth gynyddu mewn gwerth
- roedd yn rhaid i chi dalu’r Tâl Treth Budd-dal Plant Incwm Uchel ac nid ydych yn ei dalu drwy TWE
- rydych yn weithiwr oddi ar y gyflogres (yn agor tudalen Saesneg) sy’n ad-dalu benthyciad myfyriwr neu ôl-raddedig
Efallai y bydd hefyd angen i chi anfon Ffurflen Dreth os oes gennych unrhyw incwm sydd heb ei drethu, megis:
- arian o roi eiddo ar osod
- cildyrnau (‘tips’) a chomisiynau
- incwm o gynilion, buddsoddiadau a difidendau
- incwm tramor
Gwirio a oes angen i chi anfon Ffurflen Dreth
Gallwch wirio a oes angen i chi anfon Ffurflen Dreth os nad ydych yn siŵr.
Mae’n rhaid i chi roi gwybod i CThEF erbyn 5 Hydref os oes angen i chi lenwi Ffurflen Dreth ar gyfer y flwyddyn flaenorol a bod un o’r canlynol yn wir amdanoch:
- heb gyflwyno Ffurflen Dreth o’r blaen
- wedi cofrestru o’r blaen, ond nid oedd angen i chi gyflwyno Ffurflen Dreth ar gyfer blwyddyn dreth 2024 i 2025
Gallwch roi gwybod i CThEF drwy gofrestru ar gyfer Hunanasesiad.
Rhesymau eraill dros anfon Ffurflen Dreth
Gallwch ddewis llenwi Ffurflen Dreth er mwyn:
- hawlio rhai rhyddhadau Treth Incwm
- profi eich bod yn hunangyflogedig, er enghraifft i hawlio Gofal Plant sy’n Rhydd o Dreth neu Lwfans Mamolaeth
- talu cyfraniadau Yswiriant Gwladol gwirfoddol