Taliad Tanwydd Gaeaf
Trosolwg
Os cawsoch eich geni cyn 28 Mehefin 1960 gallech gael naill ai £100 neu £300 i’ch helpu i dalu eich biliau gwresogi ar gyfer gaeaf 2026 i 2027. Gelwir hyn yn ‘Daliad Tanwydd Gaeaf’.
Mae’r canllaw hwn hefyd ar gael yn Saesneg (English) ac mewn fformat hawdd i’w ddarllen.
Bydd y rhan fwyaf o bobl yn cael y Taliad Tanwydd Gaeaf yn awtomatig os ydynt yn gymwys.
Os ydych yn gymwys, byddwch yn cael llythyr ym mis Hydref neu fis Tachwedd yn dweud faint fyddwch yn ei gael.
Caiff y rhan fwyaf o bobl gymwys eu talu ym mis Tachwedd neu fis Rhagfyr 2026.
Ad-dalu’r Taliad Tanwydd Gaeaf os yw’ch incwm dros £35,000
Os yw cyfanswm eich incwm dros £35,000, bydd CThEF yn cymryd eich Taliad Tanwydd Gaeaf yn ôl. Nid yw incwm eich partner yn cyfrif tuag at eich cyfanswm.
Gallwch wirio a yw eich incwm dros y trothwy a sut bydd CThEF yn ei gymryd yn ôl
Os ydych yn byw yng Ngogledd Iwerddon
Efallai y byddwch yn gymwys i gael Taliad Tanwydd Gaeaf gan Weithrediaeth Gogledd Iwerddon. Bydd yr un rheolau â Chymru a Lloegr yn berthnasol.
Os ydych yn byw yn Yr Alban
Ni allwch gael Taliad Tanwydd Gaeaf. Efallai y byddwch yn gymwys i gael taliad Pension Age Winter Heating.
Sgamiau
Efallai y byddwch yn cael galwadau ffôn, e-byst neu negeseuon destun yn honni mai gwasanaeth y llywodraeth ydynt. Os ydych yn cael neges yn gofyn am eich manylion personol (er enghraifft, manylion banc neu gyfrineiriau) gallai hyn fod yn sgam. Rhowch wybod am unrhyw beth rydych yn amau
Help arall gyda biliau gwresogi
Gallech hefyd gael:
- Taliad Tywydd Oer - os ydych yn cael rhai budd-daliadau a bod y tymheredd yn gostwng i radd sero celsius neu’n is am 7 diwrnod yn olynol
- y Gostyngiad Cartrefi Cynnes - mae hwn yn ostyngiad o £150 ar eich biliau os ydych yn cael Credyd Pensiwn neu os ydych yn byw mewn cartref incwm isel
- cymorth gan eich cyngor lleol gyda chostau byw, os ydych yn gymwys o dan y rheolau yn eich ardal.