Trosolwg

Mae lwfansau cyfalaf yn fath o ryddhad treth i fusnesau. Maent yn gadael i chi ddidynnu holl werth eitem, neu ran ohono, o’ch elw cyn i chi dalu treth.

Gallwch hawlio lwfansau cyfalaf ar gyfer:

  • offer
  • peiriannau
  • cerbydau busnes, er enghraifft faniau, lorïau neu geir busnes

Gelwir y rhain yn ‘offer a pheiriannau’.

Mae’r canllaw hwn hefyd ar gael yn Saesneg.

Os ydych yn unig fasnachwr neu’n bartneriaeth, efallai y bydd modd i chi ddefnyddio system symlach o’r enw’r sail arian parod (yn agor tudalen Saesneg) yn lle hynny.

Mathau o lwfansau cyfalaf ar gyfer offer a pheiriannau

Gallwch hawlio gwahanol symiau, yn dibynnu ar ba lwfans cyfalaf a ddefnyddiwch.

Y lwfansau cyfalaf (a elwir hefyd yn lwfansau offer a pheiriannau) yw:

Os yw eitem yn gymwys ar gyfer mwy nag un lwfans cyfalaf, gallwch ddewis pa un i’w ddefnyddio.

Cyfrifo gwerth eich eitem

Yn y rhan fwyaf o achosion, y gwerth yw’r swm a dalwyd gennych am yr eitem. Defnyddiwch y gwerth marchnadol (y swm y byddech yn disgwyl ei gael amdano wrth ei werthu) yn lle hynny os yw’r naill neu’r llall o’r canlynol yn berthnasol:

  • roeddech yn berchen arno cyn i chi ddechrau ei ddefnyddio yn eich busnes
  • roedd yn rhodd

Costau busnes eraill

Rydych yn hawlio cost pethau nad ydynt yn asedion busnes mewn ffordd wahanol. Mae hyn yn cynnwys:

  • costau rhedeg eich busnes o ddydd i ddydd
  • eitemau rydych yn eu prynu a’u gwerthu fel rhan o’ch masnach
  • taliadau llog neu gostau cyllid am brynu asedion

Hawliwch y costau hyn fel treuliau busnes os ydych yn unig fasnachwr neu’n bartneriaeth, neu didynnwch y costau oddi wrth eich elw fel cost busnes os ydych yn gwmni cyfyngedig.

Lwfansau cyfalaf eraill

Yn ogystal ag offer a pheiriannau, gallwch hefyd hawlio lwfansau cyfalaf am y canlynol: 

Os ydych yn rhoi eiddo preswyl ar osod

Dim ond os yw’r canlynol yn berthnasol y gallwch hawlio am eitemau sydd i’w defnyddio mewn eiddo preswyl:  

  • mae gan yr adeilad fwy nag un uned breswyl, er enghraifft bloc o fflatiau  
  • byddant yn cael eu defnyddio mewn darn cymunedol o’r adeilad  

Er enghraifft, gallwch hawlio am fwrdd neu lifft a fydd yng nghyntedd y brif fynedfa mewn bloc o fflatiau.