Hawlio lwfansau cyfalaf

Neidio i gynnwys y canllaw

Lwfans buddsoddi blynyddol

Gallwch ddidynnu gwerth llawn eitem sy’n gymwys ar gyfer lwfans buddsoddi blynyddol (LBB) oddi wrth eich elw cyn treth.

Os byddwch yn gwerthu’r eitem (yn agor tudalen Saesneg) ar ôl hawlio LBB, efallai y bydd angen i chi dalu treth.

Yr hyn y gallwch ei hawlio

Gallwch hawlio LBB ar y rhan fwyaf o offer a pheiriannau hyd at swm yr LBB.

Yr hyn na allwch ei hawlio

Ni allwch hawlio LBB ar gyfer y canlynol:

  • ceir busnes

  • eitemau roeddech yn berchen arnynt am reswm arall cyn i chi ddechrau eu defnyddio yn eich busnes

  • eitemau a roddir i chi neu i’ch busnes

Hawliwch lwfansau ar bapur (yn agor tudalen Saesneg) yn lle hynny.

Swm yr LBB

Swm yr LBB yw £1 filiwn.

Newidiadau i’r LBB

Mae swm yr LBB wedi newid sawl gwaith ers mis Ebrill 2008.

Os newidiodd yr LBB yn ystod y cyfnod rydych yn hawlio amdano, mae angen i chi addasu’r swm yr ydych yn ei hawlio (yn agor tudalen Saesneg).

LBB Unig fasnachwyr/Partneriaethau Cwmnïau cyfyngedig
£1 filiwn O 1 Ionawr 2019 O 1 Ionawr 2019
£200,000 1 Ionawr 2016 – 31 Rhagfyr 2018 1 Ionawr 2016 – 31 Rhagfyr 2018
£500,000 6 Ebrill 2014 – 31 Rhagfyr 2015 1 Ebrill 2014 – 31 Rhagfyr 2015
£250,000 1 Ionawr 2013 – 5 Ebrill 2014 1 Ionawr 2013 – 31 Mawrth 2014
£25,000 6 Ebrill 2012 – 31 Rhagfyr 2012 1 Ebrill 2012 – 31 Rhagfyr 2012
£100,000 6 Ebrill 2010 – 5 Ebrill 2012 1 Ebrill 2010 – 31 Mawrth 2012
£50,000 6 Ebrill 2008 – 5 Ebrill 2010 1 Ebrill 2008 – 31 Mawrth 2010

Cewch lwfans newydd ar gyfer pob cyfnod cyfrifyddu.

Os yw’ch cyfnod cyfrifyddu yn fwy neu’n llai na 12 mis

Addaswch eich LBB os yw’ch cyfnod cyfrifyddu yn fwy neu’n llai na 12 mis.

Er enghraifft

Os yw’ch cyfnod cyfrifyddu yn 9 mis, bydd yr LBB yn 9/12 x £1,000,000 = £750,000.

Efallai y bydd angen i chi addasu’r swm rydych yn ei hawlio (yn agor tudalen Saesneg) hefyd os newidiodd yr LBB yn ystod y cyfnod hwnnw.

Mae’r rheolau’n wahanol os yw’ch cyfnod cyfrifyddu yn hirach na 18 mis (yn agor tudalen Saesneg) neu os oes gennych fwlch neu orgyffwrdd rhwng cyfnodau cyfrifyddu.

Pryd y gallwch hawlio

Gallwch ond hawlio LBB yn ystod y cyfnod y gwnaethoch brynu’r eitem.

Y dyddiad y gwnaethoch ei phrynu yw:

  • pan wnaethoch lofnodi’r contract, os yw’r taliad yn ddyledus cyn pen llai na 4 mis

  • pan fydd y taliad yn ddyledus, os yw’n ddyledus fwy na 4 mis yn hwyrach

Os byddwch yn prynu rhywbeth o dan gontract hurbwrcasu, gallwch hawlio am y taliadau nad ydych wedi’u gwneud eto pan fyddwch yn dechrau defnyddio’r eitem. Ni allwch hawlio ar y ffioedd na’r taliadau llog.

Os yw’ch busnes yn cau, ni allwch hawlio LBB am eitemau a brynwyd yn ystod y cyfnod cyfrifyddu terfynol. Yn hytrach, mae angen i chi nodi taliad mantoli neu lwfans mantoli ar eich Ffurflen Dreth ar gyfer y flwyddyn yr ydych yn cau eich busnes. Darllenwch fwy am sut i hawlio lwfansau cyfalaf.

Os nad ydych am hawlio’r gost gyfan

Os nad ydych am hawlio’r gost gyfan, er enghraifft mae gennych chi elw isel, gallwch hawlio:

Eitemau rydych hefyd yn eu defnyddio y tu allan i’ch busnes

Ni allwch hawlio gwerth cyfan yr eitemau rydych hefyd yn eu defnyddio y tu allan i’ch busnes os ydych yn unig fasnachwr neu’n bartneriaeth. Ewch ati i ostwng y lwfansau cyfalaf rydych yn eu hawlio gan faint o ddefnydd rydych yn ei wneud o’r ased y tu allan i’ch busnes.

Er enghraifft

Rydych yn prynu gliniadur am £600. Rydych yn ei ddefnyddio y tu allan i’ch busnes am hanner yr amser. Caiff swm y lwfansau cyfalaf y gallwch ei hawlio ei ostwng 50%.

Os ydych yn gwario mwy na swm yr LBB

Hawliwch lwfansau ar bapur (yn agor tudalen Saesneg) ar unrhyw swm uwchben yr LBB. Os bydd un eitem yn mynd â chi uwchben swm yr LBB, gallwch rannu’r gwerth rhwng y mathau o lwfans.

Partneriaethau cymysg

Dim ond ar gyfer partneriaethau lle mae’r holl aelodau’n unigolion y mae LBB ar gael.

Mwy nag un busnes neu fasnach

Os ydych yn unig fasnachwr neu’n bartneriaeth, a bod gennych fwy nag un busnes neu fasnach, mae pob busnes fel arfer yn cael LBB.

Byddwch ond yn cael un LBB os yw’r busnesau:

  • yn cael eu rheoli gan yr un person

  • ar yr un safle neu’n cynnal gweithgareddau tebyg

Os oes dau neu fwy o gwmnïau cyfyngedig yn cael eu rheoli gan yr un person, dim ond un LBB maent yn ei gael rhyngddynt. Gallant ddewis sut i rannu’r lwfans buddsoddi blynyddol.

Sut i hawlio

Hawliwch ar eich Ffurflen Dreth. Darllenwch fwy am sut i hawlio lwfansau cyfalaf.

Argraffu'r canllaw cyfan