Os bydd eich amgylchiadau’n newid

Dysgwch beth sydd angen i chi wneud er mwyn cadw eich manylion yn gyfredol a phryd mae angen i chi roi gwybod i CThEF am newid.

Ar ôl cofrestru ar gyfer y cynllun Troi Treth yn Ddigidol ar gyfer Treth Incwm, efallai y bydd eich amgylchiadau’n newid.

Bydd angen i chi roi gwybod i CThEF am y newidiadau hyn. Efallai mai mater o roi gwybod unwaith yn unig fydd hyn, neu efallai y byddwch chi’n rhoi gwybodaeth newydd mewn perthynas â newid.

Mae rhai newidiadau mae’n rhaid i chi roi gwybod i CThEF amdanynt drwy ddefnyddio’ch cyfrif ar-lein. Er enghraifft, os bydd angen i chi ychwanegu ffynhonnell incwm o hunangyflogaeth, eiddo neu’r ddau, neu ddod â’r ffynhonnell hyn i ben. Mae newidiadau eraill nad oes angen i chi roi gwybod i CThEF amdanynt, fel newid eich meddalwedd, ond mae’n bosibl bydd angen i chi gymryd rhai camau. 

Byddwch yn gallu rhoi gwybod i ni am y mwyafrif o newidiadau gan ddefnyddio’ch cyfrif gwasanaethau ar-lein CThEF neu gyfrif gwasanaethau asiant.

Ychwanegu ffynhonnell incwm newydd o hunangyflogaeth neu eiddo

Pryd i ychwanegu ffynhonnell incwm newydd o hunangyflogaeth neu eiddo

Bydd dim angen i chi ychwanegu’r incwm yr ydych yn ei ennill fel unig fasnachwr. Ni fydd angen i chi ychwanegu incwm o bartneriaeth, incwm o gwmni cyfyngedig, neu incwm o gyflogaeth, ond bydd yn dal i fod angen i chi gynnwys y rhain yn eich Ffurflen Dreth, os ydych yn eu cael. 

Nid oes angen i chi ddechrau cadw cofnodion digidol na chyflwyno diweddariadau chwarterol ar gyfer ffynhonnell incwm newydd o hunangyflogaeth neu eiddo yn syth, hyd yn oed os ydych eisoes yn defnyddio’r cynllun Troi Treth yn Ddigidol ar gyfer Treth Incwm. Bydd dim ond angen i chi wneud hyn ôl i chi gyflwyno Ffurflen Dreth sy’n cynnwys yr incwm hwnnw am y tro cyntaf. Mae hyn yn golygu’r canlynol: 

  • nid oes angen i chi greu cofnodion digidol na chyflwyno diweddariadau chwarterol ar gyfer y ffynhonnell incwm honno hyd nes dechrau’r flwyddyn dreth nesaf 

  • mae angen i chi roi gwybod am yr incwm yn eich Ffurflen Dreth gan ddefnyddio’ch meddalwedd sy’n cydweddu

Er enghraifft, os bydd angen i chi ddefnyddio’r cynllun Troi Treth yn Ddigidol ar gyfer Treth Incwm a’ch bod yn dechrau ffynhonnell incwm newydd o hunangyflogaeth neu eiddo ar 1 Gorffennaf 2026, byddwch yn cynnwys yr incwm hwn am y tro cyntaf yn eich Ffurflen Dreth 2026 i 2027. Mae’n rhaid i chi gyflwyno’ch Ffurflen Dreth 2026 i 2027 erbyn 31 Ionawr 2028. Ar ôl i chi gyflwyno’ch Ffurflen Dreth, bydd angen i chi ddechrau creu cofnodion digidol a chyflwyno diweddariadau chwarterol ar gyfer yr incwm hwn o 6 Ebrill 2028 ymlaen. 

Gallwch ddewis rhoi gwybod am yr incwm newydd o hyd gan ddefnyddio’r cynllun Troi Treth yn Ddigidol ar gyfer Treth Incwm o’r amser y mae’r incwm yn dechrau. Er mwyn gwneud hyn, gallwch ddewis yr opsiwn yn eich meddalwedd i newid i gyflwyno diweddariadau chwarterol o’r dyddiad y mae’r incwm yn dechrau.

Os ydych yn landlord

Os ydych eisoes yn landlord yn y DU ac yn dechrau rhoi eiddo arall ar osod yn y DU, nid yw hyn yn cael ei drin fel ffynhonnell incwm newydd. Mae hyn oherwydd bydd yr eiddo yn ffurfio rhan o’ch busnes eiddo sydd eisoes yn bodoli. Bydd eich: 

  • holl eiddo y DU yn cael eu trin fel un ‘busnes eiddo yn y DU’ — mae hyn yn cynnwys incwm o lety gwyliau wedi’i ddodrefnu yn y DU o Ebrill 2025 ymlaen

  • holl eiddo nad ydynt yn y DU yn cael eu trin fel un ‘busnes eiddo tramor’ 

Pan fydd eiddo newydd yn ffurfio rhan o fusnes eiddo sydd eisoes yn bodoli, bydd angen i chi greu cofnodion digidol ar gyfer unrhyw incwm a threuliau cysylltiedig o’r amser y byddwch yn dechrau cael rhent o’r eiddo. Bydd hyn yn berthnasol i fusnesau eiddo yn y DU a thramor.

Sut i ychwanegu ffynhonnell incwm newydd o hunangyflogaeth neu eiddo

Os byddwch yn dechrau ffynhonnell incwm newydd o hunangyflogaeth neu eiddo, bydd angen i chi wneud y canlynol: 

  1. Gwirio bod eich meddalwedd sy’n cydweddu yn gallu rhoi gwybod am eich ffynhonnell incwm newydd. 

  2. Ychwanegu’r ffynhonnell incwm newydd ar eich cyfrif gwasanaethau ar-lein CThEF.

Os ydych yn asiant, gellir gwneud hyn drwy’ch cyfrif gwasanaethau asiant.

Gofynnir i chi am fanylion ynghylch eich ffynhonnell incwm newydd, fel y dyddiad dechrau. Ar gyfer ffynonellau incwm o eiddo, dyma’r dyddiad y gwnaethoch chi ddechrau cael incwm rhent.

Ar ôl i chi ychwanegu’r ffynhonnell incwm, dylech wirio’ch meddalwedd i wneud yn siŵr bod y ffynhonnell incwm newydd yno. Os nad yw’r ffynhonnell incwm newydd yno, efallai y bydd angen i chi adnewyddu hyn yn eich meddalwedd. Yna, gallwch gyflwyno diweddariadau chwarterol ar gyfer eich ffynhonnell incwm newydd.

Ychwanegu ffynonellau eraill o incwm

Mae yna rai cofnodion nad oes angen i chi eu cadw’n ddigidol, ond gallwch ddewis gwneud hynny. Gall gadw’r cofnodion hyn yn ddigidol eich help i gael golwg cyflawn o’ch materion treth, gan y bydd eich bil treth amcangyfrifedig yn cynnwys y ffynhonnell incwm. 

Os bydd gan eich meddalwedd sy’n cydweddu’r opsiwn i wneud hyn, gallwch ddewis rhoi gwybod am ffynonellau eraill o incwm yn ystod y flwyddyn dreth, fel incwm o’r canlynol: 

  • cyflogaeth (TWE) 
  • partneriaeth 
  • difidendau (gan gynnwys y rhai o’ch cwmni’ch hun) 
  • pensiwn y Wladwriaeth, pensiwn preifat a phensiwn galwedigaethol

Os byddwch yn dewis peidio â rhoi gwybod am y ffynhonnell incwm hon yn ystod y flwyddyn dreth, bydd yn rhaid i chi gynnwys pob un ohonynt yn eich Ffurflen Dreth cyn i chi ei chyflwyno gan ddefnyddio’ch meddalwedd.

Ffynonellau incwm sy’n dod i ben

Dod â ffynonellau incwm o hunangyflogaeth neu eiddo i ben

Mae ffynhonnell incwm o hunangyflogaeth neu eiddo sy’n dod i ben yn golygu bod eich busnes wedi rhoi’r gorau i fasnachu neu eichbod chi wedi stopio cael incwm o eiddo. 

Gallwch ddefnyddio’ch cyfrif gwasanaethau ar-lein CThEF neu gyfrif gwasanaethau asiant i roi gwybod i CThEF pan fydd hyn yn digwydd gan nodi’r dyddiad y gwnaeth yr incwm o eiddo neu fusnes ddod i ben. Mae’n rhaid i chi roi gwybod i CThEF erbyn y dyddiad cau ar gyfer diweddariadau chwarterol am y cyfnod lle gwnaeth yr incwm o eiddo neu fusnes ddod i ben. Yna, bydd y ffynhonnell sydd wedi dod i ben yn cael ei chynnwys yn eich Ffurflen Dreth.

Dod ag un ffynhonnell incwm o hunangyflogaeth neu eiddo i ben

Os mai dim ond un o’ch ffynonellau incwm sy’n dod i ben, mae’n rhaid i chi roi gwybod i ni drwy ddefnyddio’ch cyfrif gwasanaethau ar-lein CThEF neu gyfrif gwasanaethau asiant. Yna bydd angen i chi gwblhau pob diweddariad chwarterol sydd heb eu llenwi ar gyfer y ffynhonnell honno o’r dyddiad pan ddaeth yr incwm ar waith. Mae hyn yn golygu’r canlynol: 

  • ni fyddwch yn cael nodynnau atgoffa i gyflwyno diweddariadau chwarterol ar gyfer y ffynhonnell honno, os ydych wedi optio i gael cyfathrebiad digidol

  • byddwch yn parhau i gael nodynnau atgoffa i gyflwyno’ch Ffurflen Dreth ar gyfer y flwyddyn 

Mae’n rhaid i chi barhau i greu cofnodion digidol a chyflwyno diweddariadau chwarterol ar gyfer unrhyw ffynhonnell incwm o hunangyflogaeth neu eiddo. 

Er enghraifft, os gwnaeth eich incwm o hunangyflogaeth neu eiddo ddod i ben ym mis Mai 2026, mae’n rhaid i chi gyflwyno’r diweddariad chwarterol erbyn 7 Awst 2026. Ni fydd angen i chi gyflwyno unrhyw ddiweddariadau chwarterol ar gyfer yr incwm hwn mwyach. Yna, bydd yr incwm o’r ffynhonnell sydd wedi dod i ben yn cael ei gynnwys yn eich Ffurflen Dreth 2026 i 2027.

Os byddwch yn rhoi’r gorau i roi eiddo yn y DU ar osod, ond yn dal i roi eiddo eraill ar osod, mae hyn yn golygu bod eich busnes eiddo yn parhau, ac nid oes angen i chi roi gwybod i CThEF.

Dod â’ch unig ffynhonnell incwm o hunangyflogaeth neu eiddo i ben

Os byddwch yn dod â’ch unig ffynhonnell incwm o hunangyflogaeth neu eiddo i ben, mae’n rhaid i chi wneud y canlynol: 

  • defnyddio’ch cyfrif gwasanaethau ar-lein CThEF neu gyfrif gwasanaethau asiant i roi gwybod i ni’r dyddiad y daeth y ffynhonnell incwm i ben 

  • cyflwyno diweddariadau chwarterol terfynol ar gyfer y cyfnod sy’n cynnwys y dyddiad y daeth yr incwm i ben 

  • cynnwys yr incwm sydd wedi dod i ben yn eich Ffurflen Dreth — mae’n rhaid i chi gyflwyno’ch Ffurflen Dreth ar gyfer y flwyddyn dreth pan ddaeth yr incwm i ben o hyd, gan ddefnyddio meddalwedd Troi Treth yn Ddigidol

Ar ôl y flwyddyn dreth pan ddaeth yr incwm i ben, ni fydd angen i chi ddefnyddio’r cynllun Troi Treth yn Ddigidol ar gyfer Treth Incwm oni bai eich bod yn dechrau ffynhonnell newydd o incwm hunangyflogaeth neu eiddo cymhwysol. Bydd dal angen i chi gadw eich cofnodion digidol i ategu’ch Ffurflen Dreth. Gallwch ddysgu pa mor hir y dylech gadw’ch cofnodion (yn agor tudalen Saesneg).

Dod â ffynonellau eraill o incwm i ben

Os byddwch yn stopio cael mathau eraill o incwm, fel incwm o gyflogaeth, pensiwn, difidendau neu log ar gynilion, nid oes angen i chi gymryd unrhyw gamau pellach yn eich cyfrif gwasanaethau ar-lein CThEF neu gyfrif gwasanaethau asiant.

Mae’n rhaid i chi roi gwybod i ni am y newidiadau hyn yn eich Ffurflen Dreth ar gyfer y flwyddyn dreth pan y gwnaeth yr incwm ddod i ben.

Gweithredu ar ran rhywun sydd wedi marw

Os bydd rhywun sy’n defnyddio’r cynllun Troi Treth yn Ddigidol ar gyfer Treth Incwm yn marw, mae ei ymrwymiadau yn dod i ben. Mae’n rhaid i’r cynrychiolydd personol roi gwybod i CThEF am y farwolaeth a gwneud yn siŵr bod unrhyw Ffurflenni Treth sydd heb gael eu llenwi yn cael eu cyflwyno. 

I gael rhagor o wybodaeth, darllenwch Ffurflenni Treth ar gyfer rhywun sydd wedi marw.

Nid oes angen i’r cynrychiolydd personol ddefnyddio’r cynllun Troi Treth yn Ddigidol ar gyfer Treth Incwm ar ran y person. Mae hyn yn golygu nad oes angen iddo wneud y canlynol: 

  • creu cofnodion digidol
  • cyflwyno unrhyw ddiweddariadau chwarterol sydd heb gael eu gwneud
  • cyflwyno unrhyw Ffurflenni Treth gan ddefnyddio meddalwedd Troi Treth yn Ddigidol

Diwygio’ch Ffurflen Dreth

Os bydd angen i chi wneud newid i Ffurflen Dreth ar ôl i chi ei chyflwyno, bydd angen i chi ddefnyddio’ch meddalwedd sy’n cydweddu. Gallwch ddiwygio Ffurflen Dreth o fewn 12 mis o’r dyddiad cau ar gyfer cyflwyno.

Pan fyddwch yn gwneud diwygiadau yn eich meddalwedd, bydd eich cyfrif gwasanaethau ar-lein CThEF neu gyfrif gwasanaethau asiant yn cael ei ddiweddaru, a bydd y newidiadau hyn yn cael eu hadlewyrchu mewn cyfrifiad treth sydd wedi’i ddiweddaru.

Os bydd angen i chi newid gwybodaeth cyn i chi gyflwyno’ch Ffurflen Dreth, dylech gywiro’ch cofnodion digidol yn hytrach na gwneud diwygiad. Gallwch ddod o hyd i’r hyn sydd angen ei wneud yn yr adran ‘Cywiro’ch cofnodion digidol’ o’r arweiniad Cofnodion digidol. 

Os gwnaethoch gyflwyno Ffurflen Dreth mewn blwyddyn dreth flaenorol ac nad oeddech yn defnyddio’r cynllun Troi Treth yn Ddigidol ar gyfer Treth Incwm, defnyddiwch yr arweiniad i wneud newid i’ch Ffurflen Dreth.

Optio allan

Os ydych wedi bod yn defnyddio’r cynllun Troi Treth yn Ddigidol ar gyfer Treth Incwm, ac mae’ch incwm cymhwysol wedi bod yn llai na’r trothwy incwm cymhwysol perthnasol am 3 blynedd yn olynol, gallwch ddewis gwneud un o’r canlynol: 

  • parhau i ddefnyddio’r cynllun Troi Treth yn Ddigidol ar gyfer Treth Incwm yn wirfoddol 
  • optio allan o’r cynllun Troi Treth yn Ddigidol ar gyfer Treth Incwm a chyflwyno Ffurflen Dreth Hunanasesiad yn lle

Bydd CThEF yn defnyddio’r wybodaeth o’ch pedwerydd diweddariad chwarterol ar gyfer y drydedd flwyddyn i wirio a allwch optio allan. Bydd CThEF yn defnyddio’r wybodaeth incwm o’r pedwerydd diweddariad chwarterol i gadarnhau bod eich incwm cymhwysol wedi bod yn llai na’r trothwy am 3 blynedd yn olynol. Os felly, gallwch optio allan o’r cynllun Troi Treth yn Ddigidol ar gyfer Treth Incwm. 

Er enghraifft, os bydd angen i chi ddechrau defnyddio’r cynllun Troi Treth yn Ddigidol ar gyfer Treth Incwm ym mis Ebrill 2026, byddwch yn gallu optio allan ar ôl diwedd blwyddyn dreth 2029 i 2030, os yw’ch incwm cymhwysol yn:

  • £30,000 neu lai ar sail eich Ffurflen Dreth 2025 i 2026 
  • £20,000 neu lai ar sail eich Ffurflen Dreth 2026 i 2027 
  • £20,000 neu lai ar sail eich pedwerydd diweddariad chwarterol ar gyfer 2029 i 2030 

Bydd angen i chi fod wedi cyflwyno’ch pedwerydd diweddariad chwarterol ar gyfer blwyddyn dreth 2029 i 2030 erbyn 7 Mai 2030. Ni fydd angen i chi ddefnyddio’r cynllun Troi Treth yn Ddigidol ar gyfer Treth Incwm ar gyfer blwyddyn dreth 2030 i 2031. 

Os byddwch yn gymwys i optio allan, bydd yr opsiwn yn ymddangos yn eich cyfrif gwasanaethau ar-lein CThEF neu gyfrif gwasanaethau asiant. Ni fydd angen i chi aros tan i chi anfon eich Ffurflen Dreth ar gyfer y drydedd flwyddyn i optio allan. 

Os byddwch yn dewis optio allan: 

Defnyddio’r cynllun Troi Treth yn Ddigidol yn wirfoddol

Rhoi gwybod am ffynhonnell incwm newydd 

Os byddwch yn defnyddio’r cynllun Troi Treth yn Ddigidol ar gyfer Treth Incwm yn wirfoddol, yna gallwch hefyd ddewis dechrau creu cofnodion digidol neu gyflwyno diweddariadau chwarterol ar gyfer unrhyw ffynhonnell incwm newydd yn syth. 

Os byddwch yn dewis cynnwys y ffynhonnell incwm newydd, mae’n rhaid i chi ei hychwanegu at eich cyfrif gwasanaethau ar-lein CThEF. 

Os bydd gwell gennych i beidio â chynnwys y ffynhonnell incwm newydd yn y cynllun Troi Treth yn Ddigidol yn syth, mae’n rhaid i chi roi gwybod am yr incwm yn eich Ffurflen Dreth. 

Cosbau i wirfoddolwyr

Ni fyddwch yn cael cosbau am gyflwyno diweddariadau chwarterol yn hwyr tra byddwch yn gwirfoddoli i ddefnyddio’r cynllun Troi Treth yn Ddigidol ar gyfer Treth Incwm. Dysgwch ragor am gosbau i’r rhai sy’n gwirfoddoli ar gyfer Troi Treth yn Ddigidol ar gyfer Treth Incwm.

Os ydych yn dod yn esempt

Os gwnaethoch gofrestru ar gyfer y cynllun Troi Treth yn Ddigidol ar gyfer Treth Incwm, ond rydych nawr wedi’i esemptio, dylech optio allan gan ddefnyddio’ch cyfrif gwasanaethau ar-lein CThEF. 

Ar ôl cofrestru ar gyfer y cynllun Troi Treth yn Ddigidol ar gyfer Treth Incwm, efallai y byddwch yn gymwys i gael esemptiad oherwydd bod eich amgylchiadau wedi newid. Gallai hyn hefyd ddigwydd os oeddech wedi cofrestru’n wirfoddol ac rydych am barhau i ddefnyddio’r cynllun Troi Treth yn Ddigidol ar gyfer Treth Incwm. 

Er enghraifft, mae’n bosibl y byddwch yn cael eich cau allan o’r byd digidol os nad yw’n rhesymol i chi ddefnyddio meddalwedd sy’n cydweddu i gadw cofnodion digidol, cyflwyno diweddariadau chwarterol neu gyflwyno’ch Ffurflen Dreth.

Dylech ddysgu a allwch gael esemptiad rhag Troi Treth yn Ddigidol ar gyfer Treth Incwm. 

Os bydd CThEF yn cadarnhau eich bod yn esempt, bydd y canlynol yn wir:

  • ni fydd angen i chi greu cofnodion digidol na chyflwyno diweddariadau chwarterol mwyach 
  • bydd yn dal i fod angen i chi roi gwybod am incwm ac enillion yn eich Ffurflen Dreth 
  • bydd eich cosbau yn newid

Os ydych yn dod yn ansolfent

Os byddwch yn parhau i gael incwm o hunangyflogaeth neu eiddo ar ôl dechrau proses ansolfedd swyddogol, bydd angen i chi ddefnyddio’r cynllun Troi Treth yn Ddigidol ar gyfer Treth Incwm o hyd. 

Os bydd gennych bwyntiau cosb am gyflwyno’n hwyr ac yn dod yn ansolfent, bydd CThEF yn ailosod cyfanswm eich pwyntiau i sero. 

Os byddwch yn parhau i gael incwm o hunangyflogaeth neu eiddo ar ôl y flwyddyn dreth pan ddaethoch yn ansolfent, bydd pwyntiau cosb a chosbau yn berthnasol i chi os byddwch yn colli dyddiad cau ar gyfer talu neu gyflwyno fel yr arfer.

Gallwch gael help os byddwch yn dod yn ansolfent (yn agor tudalen Saesneg).

Newid eich meddalwedd sy’n cydweddu

Gallwch newid y meddalwedd rydych chi’n ei defnyddio ar gyfer Troi Treth yn Ddigidol ar gyfer Treth Incwm .

Mae’n bosibl y byddwch yn defnyddio gwahanol feddalwedd sy’n cydweddu ar gyfer gwahanol ffynonellau incwm. 

Os byddwch yn newid eich meddalwedd, mae’n dal i fod angen i chi storio eich cofnodion digidol ar gyfer pob blwyddyn dreth am o leiaf 5 mlynedd o’r dyddiad cau ar gyfer cyflwyno. 

Er enghraifft, mae’n rhaid i’ch Ffurflen Dreth 2026 i 2027 gael ei chyflwyno drwy feddalwedd sy’n cydweddu erbyn 31 Ionawr 2028. Mae’n rhaid i chi gadw cofnodion digidol ar gyfer y flwyddyn dreth honno tan o leiaf 31 Ionawr 2033. 

Dylech hefyd sicrhau y gallwch gael mynediad at eich cofnodion digidol o flynyddoedd treth blaenorol. Er enghraifft, mae’n bosibl y bydd angen i chi allgludo’ch cofnodion digidol o’ch hen feddalwedd, a’u storio’n ddigidol. 

Os bydd angen help arnoch gyda phroblemau sy’n ymwneud â’ch meddalwedd, cysylltwch â’ch darparwr meddalwedd. 

Os ydych yn newid eich meddalwedd ar ôl diwedd blwyddyn dreth 

Bydd angen i chi storio’ch cofnodion digidol o flynyddoedd treth blaenorol yn ddiogel, a gallu cael mynediad atynt. 

Does dim rhaid i chi fewngludo’ch cofnodion digidol o flynyddoedd treth blaenorol i’r feddalwedd newydd. 

Os ydych yn newid eich meddalwedd yn ystod blwyddyn dreth 

Os ydych yn defnyddio meddalwedd sy’n gweithio gyda’r cynllun Troi Treth yn Ddigidol ar gyfer Treth Incwm i greu cofnodion digidol, bydd angen i chi wneud y naill neu’r llall o’r canlynol: 

  • mewngludo’ch cofnodion digidol i’ch meddalwedd newydd ar gyfer y flwyddyn dreth bresennol 
  • ail-greu’r cofnodion yn eich meddalwedd newydd 

Os ydych yn defnyddio meddalwedd sy’n gweithio gyda’r cynllun Troi Treth yn Ddigidol ar gyfer Treth Incwm i gysylltu’ch cofnodion (meddalwedd pontio), bydd angen i chi gysylltu’ch meddalwedd newydd â’ch meddalwedd cadw cofnodion. 

Mae’n rhaid i chi dynnu’r cysylltiad rhwng eich hen feddalwedd bontio a’ch cofnodion.

Newid eich asiant treth

Os byddwch yn newid, ychwanegu neu dynnu asiant treth, ni fydd eich cofnodion digidol o flynyddoedd treth blaenorol yn cael eu trosglwyddo’n awtomatig rhwng asiantau. Dylech sicrhau bod gennych fynediad at eich cofnodion digidol o flynyddoedd treth blaenorol a’u storio’n ddiogel. 

Bydd angen i chi sicrhau’r canlynol: 

  • bod unrhyw asiant treth sy’n gweithredu ar eich rhan wedi’i awdurdodi i ddefnyddio’r cynllun Troi Treth yn Ddigidol ar gyfer Treth Incwm ar eich rhan 
  • eich bod chi â’ch asiant treth yn defnyddio meddalwedd sy’n gweithio gyda’r cynllun Troi Treth yn Ddigidol ar gyfer Treth Incwm — siaradwch â’ch asiant i gael cyngor o ran pa feddalwedd i’w defnyddio
  • bod unrhyw wahanol gynhyrchion meddalwedd yr ydych yn eu defnyddio yn gweithio ar y cyd i fodloni’ch gofynion 
  • bod gan yr asiant neu’r asiantau treth sy’n gweithredu ar eich rhan fynediad at y cofnodion digidol sydd eu hangen arnynt, gan gynnwys eich cofnodion blaenorol
  • eich bod yn dileu awdurdodiad unrhyw asiant treth sy’n rhoi’r gorau i weithio i chi, fel ni fydd modd iddo weithredu ar eich rhan 

Dysgwch sut i ddewis asiantau ar gyfer y cynllun Troi Treth yn Ddigidol ar gyfer Treth Incwm.