Rhoi gwybod i CThEF am fenthyciad myfyriwr neu ôl-raddedig yn eich Ffurflen Dreth
Os ydych yn llenwi Ffurflen Dreth Hunanasesiad, mae’n rhaid i chi ei defnyddio i roi gwybod i CThEF am eich didyniadau benthyciad myfyriwr neu ôl-raddedig.
Bydd angen i chi lenwi’r adran ad-daliadau benthyciad myfyriwr neu fenthyciad ôl-raddedig ar eich Ffurflen Dreth Hunanasesiad os rhoddodd y Cwmni Benthyciadau Myfyrwyr (SLC) wybod bod disgwyl i’ch ad-daliadau ddechrau ar neu cyn 6 Ebrill yn y flwyddyn rydych yn llenwi’ch Ffurflen Dreth ar ei chyfer.
Os ydych yn talu am fenthyciad myfyriwr a benthyciad ôl-raddedig, bydd angen i chi lenwi’r ddwy adran. Mae’n bosibl y bydd yn rhaid i chi dalu cosbau os na fyddwch yn rhoi’r wybodaeth gywir.
Os ydych yn defnyddio’r cynllun Troi Treth yn Ddigidol ar gyfer Treth Incwm, bydd angen meddalwedd sy’n cydweddu arnoch:
- i gwblhau a chyflwyno’ch Ffurflen Dreth
- sy’n gweithio gyda Benthyciadau Myfyrwyr a Benthyciadau Ôl-raddedig
Bydd eich ad-daliadau Benthyciadau Myfyrwyr a Benthyciadau Ôl-raddedig yn cael eu cyfrifo yn eich Ffurflen Dreth i chi.
Bydd eich didyniad benthyciad myfyriwr (Cynllun 1, 2 neu 4) yn cael ei gyfrifo ar sail 9% o gyfanswm eich incwm Hunanasesiad sydd dros y trothwy ar gyfer y math o gynllun ad-daliad sydd gennych.
Bydd eich didyniad benthyciad ôl-raddedig yn cael ei gyfrifo ar sail 6% o gyfanswm eich incwm Hunanasesiad sydd dros y trothwy.
Mae cyfanswm yr incwm ar gyfer Hunanasesiad yn cynnwys:
-
unrhyw incwm o gyflogaeth TWE (Talu Wrth Ennill) yr oedd gennych yn y flwyddyn dreth berthnasol — bydd eich incwm ar gyfer pob un o’r cyflogaethau yn cael ei gyfuno, hyd yn oed os oedd yr incwm o’r cyflogaethau hynny o dan y trothwy drwy TWE
-
incwm arall i’w ddatgan, megis:
-
elw o hunangyflogaeth
-
incwm o eiddo
-
incwm heb ei ennill dros £2,000
-
incwm sy’n cael ei effeithio gan sail blwyddyn dreth newydd (yn agor tudalen Saesneg) (a elwir hefyd yn ‘diwygio’r cyfnod sail’)
-
Os cawsoch eich cyflogi yn y flwyddyn dreth berthnasol, a bod eich cyflog dros y trothwy ar gyfer y math o fenthyciad neu gynllun sydd gennych, yna byddai’ch cyflogwr wedi cymryd ad-daliadau benthyciad myfyrwyr ac ôl-raddedig o’ch cyflog drwy TWE. Byddwn yn didynnu’r ad-daliadau hyn o’r swm y mae’n rhaid i chi ei ad-dalu drwy Hunanasesiad.
Os yw’r rheolau gweithio oddi ar y gyflogres yn berthnasol i chi, mae’n rhaid i chi ad-dalu’ch benthyciad myfyriwr a’ch benthyciad ôl-raddedig drwy Hunanasesiad.
Os ydych yn ad-dalu benthyciad myfyriwr (Cynllun 1, 2 neu 4) a benthyciad ôl-raddedig ar yr un pryd, bydd disgwyl i chi ad-dalu 15% o gyfanswm eich incwm sydd dros y trothwy.
Mae’r Cwmni Benthyciadau Myfyrwyr yn rhoi gwybodaeth am eich benthyciad neu’r math o gynllun sydd gennych i CThEF.
Ni fydd y Cwmni Benthyciadau Myfyrwyr yn rhoi gwybod i CThEF am falans eich benthyciad ond bydd yn rhoi gwybod i CThEF am y canlynol:
-
a ydych wedi ad-dalu’ch benthyciad yn llawn
-
a godwyd mwy arnoch nag sy’n ddyledus gennych
Bydd CThEF yn cymryd camau i ostwng neu ddileu’r didyniadau benthyciad myfyriwr neu’r didyniadau benthyciad ôl-raddedig yn eich Hunanasesiad fel nad ydych yn ad-dalu gormod.
Bydd angen i chi roi gwybodaeth am y math o fenthyciad neu gynllun sydd gennych pan fyddwch yn cyflwyno’ch ffurflen dreth Hunanasesiad ar-lein. Os byddwch yn penderfynu peidio â chyflwyno eich Ffurflen Dreth ar-lein, gallwch naill ai:
Gwybodaeth y bydd ei hangen arnoch
Yn ogystal, bydd angen i chi gael manylion am y canlynol:
-
y cynllun ad-dalu benthyciad myfyriwr neu fenthyciad ôl-raddedig sydd gennych — mewngofnodwch i’ch cyfrif ar-lein neu gwiriwch pa gynllun ad-dalu sydd gennych i ddod o hyd i’ch math o gynllun ad-dalu
-
symiau sydd eisoes wedi’u didynnu drwy’ch cyflogaeth
-
buddiannau a delir drwy’r gyflogres gan eich cyflogwr
-
grantiau’r Cynllun Cymhorthdal Incwm Hunangyflogaeth a gawsoch
Os ydych wedi cael mwy nag un swydd yn ystod y flwyddyn, bydd angen i chi adio’r ad-daliadau a ddangosir ar eich holl slipiau cyflog, yn hytrach na dim ond y rheini o’r swydd ddiweddaraf. Ni fydd eich P60 (yn agor tudalen Saesneg) yn dangos y symiau a ddidynnwyd gan gyflogwr blaenorol.
Os nad oes gennych fynediad at rai o’ch slipiau cyflog, neu bob un ohonynt, gallwch gysylltu â’r canlynol:
-
eich cyflogwr blaenorol
-
eich cyflogwr presennol
Os oedd gennych fwy nag un ffynhonnell o incwm yn ystod y flwyddyn, mae’n bosibl y bydd yn rhaid i chi dalu mwy na’ch didyniadau TWE yn unig.
Gweithio oddi ar y gyflogres
Os ydych yn destun rheolau gweithio oddi ar y gyflogres am unrhyw gyfnod yn ystod y flwyddyn dreth, bydd eich didyniadau benthyciad myfyriwr a benthyciad ôl-raddedig ar gyfer y cyfnod hwnnw yn cael eu cyfrifo drwy’ch Ffurflen Dreth Hunanasesiad.
Sut i lenwi’ch Ffurflen Dreth ar-lein
Adran 2 — ‘Rhowch wybod i ni amdanoch’
Dewiswch ‘Iawn’.
Os oedd y Cwmni Benthyciadau Myfyrwyr wedi rhoi gwybod i chi fod eich ad-daliadau am ddechrau ar neu cyn 6 Ebrill yn y flwyddyn rydych yn llenwi’ch Ffurflen Dreth ar ei chyfer, hyd yn oed os gwnaeth cyflogwr ddidynnu ad-daliadau neu os oedd eich incwm o dan y trothwy perthnasol, mae angen i chi ddewis y naill neu’r llall o’r canlynol:
-
y math o gynllun benthyciad myfyriwr rydych yn ei ad-dalu
-
benthyciad ôl-raddedig
-
y math o gynllun benthyciad myfyriwr a’r benthyciad ôl-raddedig, os ydych yn ad-dalu’r ddau fenthyciad ar yr un pryd
Mae’n bosibl bod y blychau hyn eisoes wedi’u llenwi ar eich cyfer.
Bydd systemau CThEF wedyn yn defnyddio’r wybodaeth a roddwyd gan y Cwmni Benthyciadau Myfyrwyr i gyfrifo’r swm cywir sydd angen i chi ei ad-dalu ar gyfer:
-
eich benthyciad myfyriwr
-
eich benthyciad ôl-raddedig
-
eich benthyciad myfyriwr a’ch benthyciad ôl-raddedig, os ydych yn ad-dalu’r ddau fenthyciad ar yr un pryd
Os byddwch yn newid y blychau:
-
bydd neges o rybudd yn ymddangos, yn rhoi gwybod bod y cofnod yn wahanol i’r math o gynllun neu’r benthyciad a gofnododd y Cwmni Benthyciadau Myfyrwyr — mae’r neges o rybudd yn eich cynghori i wirio’r llythyr gan y Cwmni Benthyciadau Myfyrwyr er mwyn cadarnhau’r benthyciad a/neu’r math o gynllun cywir
-
bydd cyfrifiad awtomatig yn cael ei gyhoeddi, yn rhoi gwybod bod CThEF wedi newid y benthyciad, y math o gynllun a’r effaith y mae hyn wedi’i chael ar y cyfrifiad
Bydd cofnodi’r mathau anghywir o fenthyciadau yn effeithio ar swm y benthyciad myfyriwr a’r benthyciad ôl-raddedig a godir. Bydd systemau CThEF yn dilysu’r wybodaeth a roddodd y Cwmni Benthyciadau Myfyrwyr a chyhoeddir cyfrifiad yn awtomatig sy’n rhoi gwybod am unrhyw newidiadau.
Dyma’r unig gwestiynau y mae’n rhaid i chi eu hateb os ydych yn ad-dalu’ch benthyciad myfyriwr neu’ch benthyciad ôl-raddedig, neu’r ddau ohonynt, ac nad oes gennych unrhyw incwm TWE.
Adran 4 — ‘Llenwch eich Ffurflen Dreth’
Rhowch gyfanswm y symiau a ddidynnwyd eisoes drwy’ch cyflogaeth ar gyfer y flwyddyn dreth rydych yn llenwi’ch Ffurflen Dreth ar ei chyfer. Gallwch ddod o hyd i’r symiau hyn ar eich P60 neu drwy adio’r holl ddidyniadau ar gyfer y benthyciad myfyriwr, y benthyciad ôl-raddedig, neu’r ddau ohonynt, ar eich slipiau cyflog ar gyfer y flwyddyn honno.
Mae angen i chi gofnodi’r didyniadau ar gyfer y math o gynllun benthyciad myfyriwr a’r didyniadau benthyciad ôl-raddedig ar wahân yn y blychau perthnasol.
Peidiwch â chynnwys unrhyw daliadau debyd uniongyrchol tramor na thaliadau gwirfoddol rydych wedi’u gwneud yn yr adran hon.
Mae’n bosibl bod swm yr ad-daliad a ddidynnwyd gan eich cyflogwr eisoes yn dangos yma. Mae angen i chi wirio bod y swm yn gywir, hyd yn oed os yw’n sero.
Os yw’n gywir, dewiswch ‘Iawn’ ac yna ‘Cadw ac yn eich blaen’.
Os nad yw’n gywir, dewiswch ‘Na’ a nodwch y swm cywir. Cofiwch roi gwybod i ni pam mae’r ffigur yn wahanol a chynnwys enw a dyddiad y ddogfen sy’n dangos hyn.
Byddwn yn gwirio’r swm a roddwyd yn erbyn yr wybodaeth a ddarparwyd gan eich cyflogwr.
Bydd cofnodi didyniadau anghywir yn effeithio ar y tâl benthyciad myfyriwr a benthyciad ôl-raddedig a godir, a gallai arwain at godi mwy arnoch.
Gwyliwch fideo i’ch helpu i lenwi’ch Ffurflen Dreth
Gallwch wylio fideos YouTube i’ch helpu i lenwi’r adran hon.
Gwyliwch fideo YouTube ynghylch pam mae Ffurflen Dreth yn gofyn ynghylch Benthyciadau Myfyrwyr sy’n Amodol ar Incwm (yn agor tudalen Saesneg).
Why does my tax return ask about income contingent student loans?
Gwyliwch fideo YouTube ynghylch pam mae Ffurflen Dreth yn gofyn ynghylch Benthyciad Ôl-raddedig (yn agor tudalen Saesneg).
Why does my tax return ask about postgraduate loans?
Gwyliwch fideo YouTube ynghylch sut i ddangos ad-daliadau benthyciad myfyriwr a benthyciad ôl-raddedig yn eich Ffurflen Dreth (yn agor tudalen Saesneg).
How do I show student loan and postgraduate loan repayments on my tax return?
Sut i lenwi’ch Ffurflen Dreth bapur
Blwch 1
Rhowch ‘X’ ym mlwch 1 os yw’r Cwmni Benthyciadau Myfyrwyr wedi rhoi gwybod i chi fod eich ad-daliadau wedi dechrau ar neu cyn 6 Ebrill yn y flwyddyn rydych yn llenwi’ch Ffurflen Dreth ar ei chyfer, hyd yn oed os yw’r incwm o dan y trothwy ar gyfer math y benthyciad.
Dyma’r unig gwestiwn y mae’n rhaid i chi ei ateb os ydych yn ad-dalu’ch benthyciad myfyriwr, benthyciad ôl-raddedig, neu’r ddau ohonynt, ac nad oes gennych unrhyw incwm TWE.
Blwch 2
Rhowch gyfanswm yr holl ddidyniadau benthyciad myfyriwr (Cynllun 1, 2 neu 4) a gymerwyd o’ch holl gyflogaethau drwy TWE yn ystod y flwyddyn dreth rydych yn llenwi’ch Ffurflen Dreth ar ei chyfer. Mae’r wybodaeth hon i’w gweld ar eich P60 neu drwy adio’r holl ddidyniadau (Cynllun 1, 2 neu 4) ar eich slipiau cyflog ar gyfer y flwyddyn honno.
Blwch 3
Rhowch gyfanswm yr holl ddidyniadau benthyciad ôl-raddedig a gymerwyd o’ch holl gyflogaethau drwy TWE yn ystod y flwyddyn dreth rydych yn llenwi’ch Ffurflen Dreth ar ei chyfer. Mae’r wybodaeth hon i’w gweld ar eich P60 neu drwy adio’r holl ddidyniadau benthyciad ôl-raddedig ar eich slipiau cyflog ar gyfer y flwyddyn honno.
Bydd cofnodi didyniadau anghywir yn effeithio ar y tâl benthyciad myfyriwr a benthyciad ôl-raddedig a godir, a gallai arwain at godi mwy arnoch.
Os ydych yn talu’r benthyciad myfyriwr a’r benthyciad ôl-raddedig, yna llenwch flwch 2 a blwch 3.
Defnyddio’r cynllun Troi Treth yn Ddigidol ar gyfer Treth Incwm
Mae’r cynllun Troi Treth yn Ddigidol ar gyfer Treth Incwm yn ffordd i rai unig fasnachwyr a landlordiaid roi gwybod i CThEF am eu hincwm a threuliau o hunangyflogaeth ac eiddo. Gallwch ddysgu rhagor am y cynllun Troi Treth yn Ddigidol ar gyfer Treth Incwm.
Bydd eich meddalwedd yn dangos eich cynllun ad-dalu a’r math o fenthyciad sydd gennych os yw’r canlynol yn berthnasol i chi:
-
rydych wedi cofrestru ar gyfer y cynllun Troi Treth yn Ddigidol ar gyfer Treth Incwm
-
rydych wedi awdurdodi eich meddalwedd ar gyfer y cynllun Troi Treth yn Ddigidol
-
mae’n rhaid i chi ad-dalu Benthyciad Myfyriwr neu Fenthyciad Ôl-raddedig
Os ydych yn meddwl bod yr wybodaeth yn anghywir, dylech wirio manylion eich Benthyciad Myfyriwr yn eich cyfrif ar-lein.
Anfon diweddariadau chwarterol
Bydd eich diweddariadau chwarterol yn cynnwys gwybodaeth am eich incwm a threuliau o hunangyflogaeth ac eiddo. Os oes gennych fanylion Benthyciad Myfyrwyr, bydd y rhain yn cael eu cynnwys yn awtomatig pan fyddwch yn anfon eich diweddariadau chwarterol.
Yn seiliedig ar yr wybodaeth a ddelir gan CThEF, bydd eich meddalwedd yn rhag-lenwi’r canlynol:
-
y math o gynllun Benthyciad Myfyrwyr a Benthyciad Ôl-raddedig
-
unrhyw ddidyniadau Benthyciad Myfyrwyr a Benthyciad Ôl-raddedig a gymerwyd gan eich cyflogwr, os oes gennych un
Byddwch yn gweld amcangyfrifon o’ch ad-daliadau Benthyciad Myfyrwyr a Benthyciad Ôl-raddedig os yw cyfanswm yr incwm sydd wedi’i gynnwys yn eich diweddariadau chwarterol yn uwch na’r trothwy ad-dalu perthnasol.
Mae’r canlynol yn berthnasol i’r amcangyfrifon hyn:
-
maent er gwybodaeth yn unig
-
ni fyddant yn lleihau balans eich benthyciad yn ystod y flwyddyn dreth
Os byddwch yn gorffen talu’ch Benthyciad Myfyriwr neu Fenthyciad Ôl-raddedig yn ystod y flwyddyn dreth:
-
ni fyddwch yn gweld amcangyfrifon mwyach
-
ni fydd angen talu unrhyw Fenthyciad Myfyriwr neu Fenthyciad Ôl-raddedig drwy’ch Ffurflen Dreth
Cyflwyno’ch Ffurflen Dreth
Cyn cyflwyno’ch Ffurflen Dreth gan ddefnyddio meddalwedd Troi Treth yn Ddigidol, efallai y bydd angen i chi wneud addasiadau neu ychwanegu incwm arall. Bydd eich ad-daliad Benthyciad Myfyrwyr a Benthyciad Ôl-raddedig yn cael ei gyfrifo ar sail cyfanswm eich incwm blynyddol sydd uwchlaw’r cynllun blynyddol neu’r trothwy benthyciad.
Os byddwch yn gorffen talu eich Benthyciad Myfyriwr neu Fenthyciad Ôl-raddedig yn ystod y flwyddyn dreth, ni fydd ad-daliad y Benthyciad Myfyriwr neu Fenthyciad Ôl-raddedig hwnnw yn cael ei gynnwys ar eich Ffurflen Dreth.
Os oes gennych gyflogaeth TWE ac mae didyniadau Benthyciadau Myfyrwyr neu Fenthyciad Ôl-raddedig, bydd y rhain yn cael eu tynnu oddi ar gyfanswm eich tâl Benthyciad Myfyriwr neu Fenthyciad Ôl-raddedig.
Bydd y canlynol yn berthnasol i’ch tâl Benthyciad Myfyrwyr a Benthyciad Ôl-raddedig:
-
mae’n disodli unrhyw amcangyfrifon a gyfrifwyd pan wnaethoch gyflwyno’ch diweddariadau chwarterol
-
mae’n cael ei gynnwys yng nghyfanswm eich rhwymedigaeth dreth
-
mae’n rhaid i chi ei dalu erbyn 31 Ionawr, yn dilyn diwedd y flwyddyn dreth
-
mae’n cael ei anfon at y Cwmni Benthyciadau Myfyrwyr i’w osod yn erbyn balans eich benthyciad
I gael rhagor o wybodaeth am y cynllun Troi Treth yn Ddigidol ar gyfer Treth Incwm a buddiannau a dalwyd drwy’r gyflogres, gwiriwch yr adran ‘Os oes gennych fuddiannau a dalwyd drwy’r gyflogres’.
Anfon diweddariadau chwarterol
Bydd eich diweddariadau chwarterol yn cynnwys gwybodaeth am eich incwm a threuliau o hunangyflogaeth ac eiddo. Os oes gennych fanylion Benthyciad Myfyrwyr, bydd y rhain yn cael eu cynnwys yn awtomatig pan fyddwch yn anfon eich diweddariadau chwarterol.
Yn seiliedig ar yr wybodaeth a ddelir gan CThEF, bydd eich meddalwedd yn rhag-lenwi’r canlynol:
-
y math o gynllun Benthyciad Myfyrwyr a Benthyciad Ôl-raddedig
-
unrhyw ddidyniadau Benthyciad Myfyrwyr a Benthyciad Ôl-raddedig a gymerwyd gan eich cyflogwr, os oes gennych un
Byddwch yn gweld amcangyfrifon o’ch ad-daliadau Benthyciad Myfyrwyr a Benthyciad Ôl-raddedig os yw cyfanswm yr incwm sydd wedi’i gynnwys yn eich diweddariadau chwarterol yn uwch na’r trothwy ad-dalu perthnasol.
Taliadau Debyd Uniongyrchol tramor
Os ydych wedi bod yn talu taliadau Debyd Uniongyrchol i’r Cwmni Benthyciadau Myfyrwyr pan oeddech dramor, bydd angen i’ch Ffurflen Dreth gynnwys cyfanswm eich incwm.
Caiff eich ad-daliadau benthyciad myfyriwr eu cyfrifo ar gyfanswm yr incwm hwn, ond ni fyddant yn cymryd i ystyriaeth y taliadau Debyd Uniongyrchol rydych eisoes wedi’u gwneud i’r Cwmni Benthyciadau Myfyrwyr.
Ar ôl i chi gyflwyno’ch Ffurflen Dreth, cysylltwch â’r Cwmni Benthyciadau Myfyrwyr a byddant yn rhoi gwybod i CThEF faint rydych wedi’i dalu.
Bydd CThEF wedyn yn defnyddio’r ffigur hwn i ostwng swm y dreth sydd arnoch.
Taliadau gwirfoddol
Os ydych am wneud hynny, gallwch wneud taliadau ychwanegol i’r Cwmni Benthyciadau Myfyrwyr. Mae’r taliadau gwirfoddol hyn ar wahân i symiau a gasglwyd gan eich cyflogwr neu drwy’ch Ffurflen Dreth. Ni fydd gwneud taliadau gwirfoddol yn newid y symiau a gasglwyd gan eich cyflogwr neu drwy’ch Ffurflen Dreth.
Ni allwch ddewis gwneud y taliadau ychwanegol hyn yn hytrach na’ch taliadau arferol, ac ni ellir ad-dalu taliadau gwirfoddol.
Bydd taliadau gwirfoddol yn lleihau hyd eich benthyciad yn ei gyfanrwydd, a’r llog a godir arno.
Rhagor o wybodaeth am sut i wneud taliad gwirfoddol.
Os oes gennych fuddiannau a delir drwy’r gyflogres
Ar gyfer ad-daliadau benthyciadau myfyriwr ac ôl-raddedig, ni ddylech gyfrifo buddiannau a delir drwy’r gyflogres sy’n agored i gyfraniadau Yswiriant Gwladol Dosbarth 1A yn unig.
Dyma fuddiannau’r cyflogwr sy’n cael eu cyfrif fel buddiannau a delir drwy’r gyflogres (mae hyn yn golygu bod y dreth wedi’i didynnu oddi wrth eich cyflog ac wedi’i chynnwys yn eich P60 neu’ch P45) sy’n agored i gyfraniadau Yswiriant Gwladol Dosbarth 1A:
-
ceir a faniau cwmni
-
tanwydd ar gyfer ceir a faniau cwmni
-
yswiriant meddygol a deintyddol preifat
-
nwyddau ac asedion eraill a ddarparwyd gan eich cyflogwr
Ar gyfer blynyddoedd treth 2023 i 2024 neu’n gynharach, nid oedd ein system Hunanasesiad yn gallu gwahaniaethu rhwng y buddiannau hyn a delir drwy’r gyflogres a gweddill yr incwm TWE. O ganlyniad, cynhwyswyd y rhain yn y cyfrifiadau ar gyfer ad-daliadau benthyciad myfyriwr a benthyciad ôl-raddedig.
O flwyddyn dreth 2024 i 2025, fe wnaeth CThEF ychwanegu blwch newydd at y Ffurflen Dreth Hunanasesiad i adrodd ar y buddiannau a delir drwy’r gyflogres sydd wedi’u cynnwys yn eich incwm cyflogaeth.
Dylech ddilyn y camau ar gyfer y flwyddyn dreth berthnasol os ydych chi’n llenwi Ffurflen Dreth ar-lein neu ar bapur ac mae’r canlynol yn wir:
-
rydych chi’n ad-dalu benthyciad myfyriwr neu fenthyciad ôl-raddedig
-
mae’ch cyflogwr wedi talu’ch buddiannau drwy’r gyflogres sy’n agored i gyfraniadau Yswiriant Gwladol Dosbarth 1A yn unig
Os byddwch yn llenwi Ffurflen Dreth ar-lein
O flwyddyn dreth 2024 i 2025 ymlaen, dylech wneud y canlynol.
-
Ewch i’r arweiniad ‘Llenwi’ch Ffurflen Dreth’ (adran 4), dod o hyd i’r arweiniad ‘Incwm am eich cyflogwr’.
-
Nodwch gyfanswm yr Incwm TWE a ddangosir ar eich P45 neu P60 yn y blwch ‘cyflog o gyflogwr’.
-
Nodwch ffigur y buddiannau a delir drwy’r gyflogres o ran cyfraniadau Yswiriant Gwladol Dosbarth 1A yn y blwch ‘Buddion cyflogres sydd wedi’u cynnwys yn y cyflog sy’n effeithio ar ad-daliadau eich benthyciad myfyrwyr’.
Ar gyfer blwyddyn dreth 2023 i 2024 neu’n gynharach, dylech wneud y canlynol.
-
Didynnwch y buddiannau a delir drwy’r gyflogres sy’n agored i gyfraniadau Yswiriant Gwladol Dosbarth 1A yn unig o gyfanswm eich incwm TWE a ddangosir ar eich P45 neu’ch P60 (gall eich cyflogwr roi’r ffigurau i chi os nad ydych yn siŵr).
-
Ewch i’r arweiniad ‘Llenwi’ch Ffurflen Dreth’ (adran 4), dod o hyd i’r arweiniad ‘Incwm i’ch cyflogwr’.
-
Nodwch y ffigur o gam 1 i’r blwch ‘cyflog o gyflogwr’ (blwch cyflogaeth 03).
-
Dewiswch ‘Iawn’ pan ofynnir a ydych wedi cael buddiannau trethadwy gan eich cyflogwr.
-
Yn yr adran nesaf, nodwch ffigur y buddiannau a delir drwy’r gyflogres o ran cyfraniadau Yswiriant Gwladol Dosbarth 1A yn y blwch ‘buddiannau eraill’ (blwch cyflogaeth 20).
-
Nodwch y canlynol yn y blwch ‘gwybodaeth ychwanegol’ – ‘Rwy wedi nodi fy muddiannau a delir drwy’r gyflogres yn yr adran ‘buddiannau eraill’ oherwydd fy mod i’n fenthyciwr benthyciad myfyriwr’.
Os byddwch yn llenwi Ffurflen Dreth bapur
O flwyddyn dreth 2024 i 2025 ymlaen, dylech wneud y canlynol.
-
Ewch i’r dudalen cyflogaeth SA102, nodwch gyfanswm yr Incwm TWE a ddangosir ar eich P45 neu P60 yn y blwch ‘tâl o gyflogwr’ (blwch 1).
-
Nodwch ffigur y buddiannau a delir drwy’r gyflogres o ran cyfraniadau Yswiriant Gwladol Dosbarth 1A ym mlwch cyflogaeth 1.1 ‘Buddiannau a delir drwy’r gyflogres sydd wedi’u cynnwys yn eich cyflog sy’n effeithio ar eich ad-daliadau benthyciad myfyriwr’ yn y ffurflen SA102.
Ar gyfer blwyddyn dreth 2023 i 2024 neu’n gynharach, dylech wneud y canlynol.
-
Didynnwch eich buddiannau a delir drwy’r gyflogres sy’n agored i gyfraniadau Yswiriant Gwladol Dosbarth 1A yn unig o gyfanswm eich incwm TWE a ddangosir ar eich P45 neu’ch P60 (gall eich cyflogwr roi’r ffigurau i chi os nad ydych yn siŵr).
-
Ewch i’r dudalen cyflogaeth a nodi’r ffigur hwn yn y blwch ‘cyflog o’r gyflogaeth hon’ (blwch 1).
-
Nodwch ffigur y buddiannau o ran cyfraniadau Yswiriant Gwladol Dosbarth 1A yn y blwch ‘buddiannau eraill’ (blwch 15) ar y dudalen ‘cyflogaeth’.
-
Ar ffurflen SA100, nodwch y canlynol yn y blwch ‘unrhyw wybodaeth arall’ (blwch 19) ar dudalen TR7 – ‘Mae’r ffigur a nodwyd ym mlwch 15 yn ymwneud â’m buddiannau a delir drwy’r gyflogres oherwydd fy mod i’n fenthyciwr benthyciad myfyriwr’.
Os ydych yn defnyddio’r cynllun Troi Treth yn Ddigidol ar gyfer Treth Incwm
Wrth i chi gwblhau’ch Ffurflen Dreth ar eich meddalwedd sy’n cydweddu, bydd angen i chi nodi ffigur ar gyfer y buddiannau a dalwyd drwy’r gyflogres sy’n destun cyfraniadau Yswiriant Gwladol Dosbarth 1A.
O fis Ebrill 2027 ymlaen, bydd buddiannau a dalwyd drwy’r gyflogres yn cael eu rhag-lenwi yn seiliedig ar yr wybodaeth a ddelir gan CThEF.
Enghraifft o sut i gyfrifo’ch buddiannau a delir drwy’r gyflogres, a’u nodi, ar eich Ffurflen Dreth ar gyfer blwyddyn dreth 2024 i 2025 ymlaen
Cyfanswm eich incwm ar eich P45 neu’ch P60 yw £50,000 (gan gynnwys buddiant car cwmni). Mae’ch cyflogwr yn cadarnhau taw swm y ‘buddiant’ yw £10,000 ar gyfer y car cwmni.
Byddech yn nodi £50,000 yn y blwch ‘tâl o’r gyflogaeth’ (Ffurflen Dreth ar-lein) neu yn y blwch ‘tâl o’r gyflogaeth hon’ (Ffurflen Dreth bapur).
Byddech yn nodi £10,000 yn y blwch ‘Buddiannau a delir drwy’r gyflogres sydd wedi’u cynnwys yn y cyflog ac sy’n effeithio ar eich ad-daliadau benthyciad myfyriwr’.
Enghraifft o sut i gyfrifo’ch buddiannau a delir drwy’r gyflogres, a’u nodi, ar eich Ffurflen Dreth ar gyfer blwyddyn dreth 2023 i 2024 neu’n gynharach.
Mae cyfanswm eich incwm ar eich P45 neu’ch P60 yn £50,000 (gan gynnwys buddiant car cwmni). Mae’ch cyflogwr yn cadarnhau bod y buddiant car cwmni’n £10,000.
Mae hyn yn golygu mai ffigur eich incwm TWE yw £40,000, ac mai ffigur y ‘buddiannau’ yw £10,000.
Byddech yn nodi £40,000 yn y blwch ‘tâl o’r gyflogaeth’ (Ffurflen Dreth ar-lein) neu yn y blwch ‘tâl o’r gyflogaeth hon’ (Ffurflen Dreth bapur).
Byddech yn nodi £10,000 yn y blwch ‘buddiannau eraill’ (Ffurflen Dreth ar-lein a phapur).
Updates to this page
-
A section for 'Using Making Tax Digital for Income Tax' has been added. The 'If you have payrolled benefits in kind' section has also been updated to include information about Making Tax Digital for Income Tax.
-
YouTube video links 'Why does my tax return ask about income contingent student loans?', 'Why does my tax return ask about postgraduate loans?' and 'How do I show student loan and postgraduate loan repayments on my tax return?' have been updated.
-
Guidance updated to confirm if the off‑payroll working rules (IR35) apply to you, you must repay your student and postgraduate loans through Self Assessment.
-
YouTube video links 'Why does my tax return ask about income contingent student loans?', 'Why does my tax return ask about postgraduate loans?' and 'How do I show student loan and postgraduate loan repayments on my tax return?' have been updated.
-
A new example for 'how to work out and enter your payrolled benefits in kind on your tax return for the 2024 to 2025 tax year onwards' has been added.
-
Tax year dates and guidance have been added to the section 'If you have payrolled benefits in kind.'
-
Information added to confirm that the Student Loans Company will not tell HMRC your loan balance. Link to 'How do I show Student Loan and Postgraduate Loan repayments on my tax return?' has been updated.
-
Information added to confirm that the Student Loans Company will advise HMRC if you have overpaid or repaid your loan and that HMRC will take action to reduce or remove loan deductions when this happens. Information added to confirm you will need to tell HMRC details of any student loan or postgraduate loan repayment plan you are on when completing your Self Assessment tax return.
-
Added translation
-
Information added about how to complete your tax return if you receive payrolled benefits in kind from your employer.
-
Information added on how to request a SA100 paper form
-
The guide has been updated to include student loan Plan 4.
-
YouTube videos to help you fill in your tax return have been added.
-
Information about 'Off-payroll working' and PGL has been added.
-
This guide has been amended for the 2019 to 2020 tax year.
-
Information about overseas Direct Debit payments has been added.
-
This guidance has been updated with information on how to give details of your Student Loan on an online tax return.
-
Added translation
-
First published.