Ardrethi busnes
Llety hunanddarpar a llety gwyliau
Mae bod yn gymwys i dalu ardrethi busnes yn dibynnu ar faint o nosweithiau y mae eich eiddo ar gael i’w osod bob blwyddyn a faint o nosweithiau y cafodd ei osod mewn gwirionedd.
Bydd Asiantaeth y Swyddfa Brisio (VOA) yn cyfrifo gwerth ardrethol eich eiddo yn seiliedig ar ei fath, maint, lleoliad, ansawdd a faint o incwm rydych chi’n debygol o’i wneud o’i osod.
Mae yna reolau gwahanol os yw eich eiddo yn yr Alban neu os yw eich eiddo yng Ngogledd Iwerddon.
Os yw eich eiddo yn Lloegr
Bydd yn cael ei ystyried fel eiddo hunanddarpar a’i brisio ar gyfer ardrethi busnes os oedd y ddau ganlynol yn wir dros y 12 mis diwethaf:
-
roedd ar gael i’w osod am gyfnodau byr yn fasnachol am o leiaf 140 noson yn gyfan gwbl
-
cafodd ei osod mewn gwirionedd am o leiaf 70 noson
Yn ogystal, rhaid i chi fod yn bwriadu gwneud eich eiddo ar gael am gyfnodau byr yn fasnachol am o leiaf 140 noson yn y 12 mis nesaf.
Os mai dim ond un eiddo rydych chi’n ei osod yn Lloegr a bod ei werth ardrethol yn llai na £15,000, efallai y byddwch chi’n gymwys i gael rhyddhad ardrethi busnesau bach.
Os yw eich eiddo yng Nghymru
Bydd yn cael ei ystyried fel eiddo hunanddarpar a’i brisio ar gyfer ardrethi busnes os oedd y ddau ganlynol yn wir dros y 12 mis diwethaf:
-
roedd ar gael i’w osod am gyfnodau byr yn fasnachol am o leiaf 252 noson yn gyfan gwbl
-
cafodd ei osod mewn gwirionedd am o leiaf 182 noson
Yn ogystal, rhaid i chi fod yn bwriadu gwneud eich eiddo ar gael am gyfnodau byr yn fasnachol am o leiaf 252 noson yn y 12 mis nesaf.
Gwiriwch a ydych chi’n gymwys ar gyfer rhyddhad ardrethi busnesau bach yng Nghymru.
Dywedwch wrth y VOA eich bod yn gymwys i dalu ardrethi busnes
Os ydych chi’n talu’r Dreth Gyngor ar hyn o bryd ar eich eiddo hunanddarpar, ond ei fod wedi bodloni’r meini prawf ar gyfer ardrethi busnes, gallwch ddweud wrth y VOA trwy lenwi ffurflen.
Mae ffurflenni gwahanol ar gyfer:
Ar ôl i chi ddechrau talu ardrethi busnes, anfonir ffurflen atoch bob blwyddyn i gadarnhau eich bod yn parhau i fodloni’r meini prawf. Os na fyddwch yn bodloni’r meini prawf, byddwch yn cael eich symud o ardrethi busnes i’r Dreth Gyngor.