Canslo eich treth cerbyd a chael ad-daliad
Canslo eich treth cerbyd drwy roi gwybod i DVLA nad yw’r cerbyd gennych bellach neu ei fod oddi ar y ffordd. Rydych yn cael ad-daliad am unrhyw fisoedd llawn o dreth sy’n weddill.
Mae’r dudalen hon hefyd ar gael yn Saesneg.
Sut i ganslo eich treth cerbyd
Mae’n rhaid ichi roi gwybod i DVLA bod eich cerbyd wedi cael ei:
- werthu neu ei drosglwyddo i rywun arall
- cymryd oddi ar y ffordd, er enghraifft rydych yn ei gadw mewn garej - gelwir hwn yn Hysbysiad oddi-ar-y-ffordd Statudol (HOS)
- diddymu gan eich cwmni yswiriant
- sgrapio yn iard sgrap cerbydau
- dwyn - bydd rhaid ichi wneud cais am ad-daliad ar wahân
- allforio y tu allan i’r DU
- cofrestru fel wedi’i eithrio rhag treth cerbyd
Nid oes unrhyw ffordd arall i ganslo eich treth cerbyd.
Beth sy’n digwydd ar ôl ichi roi gwybod i DVLA
-
Bydd DVLA yn canslo eich treth cerbyd. Os ydych yn talu drwy Ddebyd Uniongyrchol, bydd y Debyd Uniongyrchol yn cael ei ganslo yn awtomatig.
-
Byddwch yn cael siec ad-daliad yn awtomatig am unrhyw fisoedd llawn sy’n weddill ar eich treth cerbyd. Cyfrifir yr ad-daliad o’r dyddiad y bydd DVLA yn cael eich gwybodaeth. Anfonir y siec at yr enw a chyfeiriad sydd ar y llyfr log cerbyd.
Ni fyddwch yn cael ad-daliad am:
- unrhyw ffioedd cerdyn credyd
- y gordal o 5% ar rai taliadau Debyd Uniongyrchol
- y gordal o 10% ar un taliad am 6 mis
Ad-daliad am y taliad treth cerbyd cyntaf ar y cerbyd
Bydd y swm y byddwch yn cael yn ôl yn seiliedig ar ba un bynnag sydd yr is o’r canlynol:
- y taliad treth cyntaf pan gofrestroch y cerbyd
- y gyfradd ar gyfer yr ail daliad treth ymlaen
Os na fydd eich ad-daliad yn cyrraedd
Cysylltwch â DVLA os nad ydych wedi cael eich siec ad-daliad ar ôl 8 wythnos.
Os yw eich siec yn anghywir
Dychwelwch eich siec ad-daliad i DVLA os ydyw yn yr enw anghywir, a rhoi’r enw cywir iddynt.
Adran Ad-dalu
DVLA
Abertawe
SA99 1AL
Cysylltwch â DVLA os nad ydych wedi cael eich siec amnewid ar ôl 4 wythnos.