Skip to main content

Newid eich enw trwy weithred newid enw

Sgipio cynnwys

Cofrestru gweithred newid enw gyda’r llysoedd

Gallwch roi eich enw newydd ar gofnod cyhoeddus drwy ei ‘gofrestru’ gyda’r Uchel Lys.

Gallwch gofrestru gweithred newid enw ar-lein neu drwy’r post. Mae’n costio £53.05.

Bydd cofnod cyhoeddus o’ch newid enw a’ch cyfeiriad yn cael ei gyhoeddi yn The Gazette. Os oes gennych reswm cryf pam na ddylid cyhoeddi eich manylion, eglurwch pam yn eich cais. Efallai y bydd y barnwr yn cytuno i gyhoeddi eich enw cyntaf neu gyfenw’n unig.

Fe anfonir copi o’ch hysbysiad Gazette atoch drwy e-bost neu drwy’r post.

Gall gymryd nifer o wythnosau i gofrestru gweithred newid enw. Gallwch ofyn i’r Swyddfa Gweithred Newid Enw am ddiweddariad ar eich achos 16 wythnos ar ôl i chi wneud cais.

Mae’n drosedd os ydych chi’n droseddwr cofrestredig ac nid ydych chi’n dweud wrth yr heddlu eich bod wedi newid eich enw.

Cyn i chi wneud cais

Bydd angen i chi ddarparu copi o un o’r canlynol:

  • tystysgrif geni
  • pasbort dilys
  • tystysgrif frodori

Efallai y gofynnir i chi hefyd ddarparu dogfennau ategol megis:

  • dogfennau mabwysiadu (os cawsoch eich mabwysiadu)
  • copi o’ch tystysgrif priodas neu dystysgrif partneriaeth sifil (os ydych yn briod neu mewn partneriaeth sifil)
  • cydsyniad ysgrifenedig eich gŵr, gwraig neu bartner (os ydych wedi priodi neu mewn partneriaeth sifil)
  • llythyr cydsynio (os na all yr unigolyn sy’n gwneud cais lenwi’r ffurflen ei hun oherwydd rhesymau meddygol)

Os nad yw eich dogfennau’n Gymraeg neu’n Saesneg, bydd angen i chi hefyd ddarparu cyfieithiad ardystiedig ohonynt.

Os ydych wedi ysgaru neu’n weddw 

Bydd angen i chi hefyd ddarparu naill ai:

  • llungopi o’ch dyfarniad absoliwt neu orchymyn terfynol
  • tystysgrif marwolaeth eich gŵr, gwraig neu bartner

Gwneud cais ar-lein

Byddwch angen cerdyn debyd neu gerdyn credyd i ddefnyddio’r gwasanaeth hwn. Fe ddywedir wrthych sut i dalu ar ôl i chi gyflwyno eich cais.

Dilynwch y camau hyn i gofrestru gweithred newid enw ar-lein.

  1. Gwnewch gais ar-lein.

  2. Llenwch ffurflenni LOC020, LOC021 a LOC027. Fe anfonir y ffurflenni atoch drwy e-bost.

  3. Llofnodwch ffurflen LOC020 ym mhresenoldeb 2 dyst. Llofnodwch ffurflenni LOC021 a LOC027 ym mhresenoldeb cyfreithiwr.

  4. Postiwch y ffurflenni wedi’u llenwi i’r Swyddfa Gweithred Newid Enw.

Dechrau nawr

Unwaith y byddwch wedi dechrau eich cais ar-lein, bydd gennych opsiwn i’w gadw a dychwelyd ato yn hwyrach ymlaen. Mae’n rhaid i chi gyflwyno eich cais o fewn 28 diwrnod neu bydd rhaid i chi ddechrau eto.

Os ydych o dan 18 oed, dilynwch y broses ar gyfer newid enw plentyn.

Os ydych angen cymorth i wneud cais

Os ydych angen cymorth cyfreithiol gallwch chwilio am gynghorydd cyfreithiol i’ch helpu chi.

Os ydych chi’n cael problemau technegol neu angen cyfarwyddyd ar sut i wneud cais

Swyddfa Gweithred Newid Enw
kbdeedspoll@justice.gov.uk
Rhif ffôn: 020 3936 8957 (dewiswch opsiwn 6)
Dydd Llun i ddydd Gwener, 9am i 5pm
Gwybodaeth am gost galwadau

Os nad oes gennych fynediad i’r rhyngrwyd neu os nad ydych chi’n teimlo’n ddigon hyderus i ddefnyddio’r we

We Are Group
support@wearegroup.com
Rhif ffôn: 03300 160 051
Dydd Llun i ddydd Gwener, 9am i 5pm
Ar gau ar wyliau banc
Tecstiwch FORM i 60777 a bydd rhywun yn eich ffonio’n ôl
Gwybodaeth am gost galwadau

Beth fydd yn digwydd nesaf

Bydd Gwasanaeth Llysoedd a Thribiwnlysoedd EF (GLlTEF) yn adolygu eich cais ac yn anfon 3 ffurflen atoch drwy e-bost: LOC020, LOC021 a LOC027. Bydd angen i chi argraffu a llenwi pob ffurflen. 

Mae angen llofnodi ffurflen LOC020 ym mhresenoldeb 2 dyst, a bydd angen iddyn nhw hefyd lofnodi’r ffurflen. 

Mae angen llofnodi ffurflenni LOC021 a LOC027 ym mhresenoldeb cyfreithiwr neu dyst awdurdodedig arall. Bydd angen iddyn nhw hefyd lofnodi’r ffurflenni.

Postiwch eich ffurflenni wedi’u llenwi i’r Swyddfa Gweithred Newid Enw.

Swyddfa Gweithred Newid Enw
Adran Mainc y Brenin
Ystafell E15
Y Llysoedd Barn Brenhinol
Strand
Llundain
WC2A 2LL

Unwaith y bydd eich cais wedi’i gwblhau a’i gymeradwyo, bydd y Swyddfa Gweithred Newid Enw yn selio eich gweithred ac yn ei hanfon yn ôl atoch drwy’r post. Dyma eich prawf eich bod wedi newid eich enw.

Gwneud cais drwy’r post

Darllenwch y cyfarwyddyd ar dudalen pob ffurflen cyn llenwi’r ffurflenni canlynol:

Llofnodwch ffurflen LOC020 ym mhresenoldeb 2 dyst. Bydd angen i’ch tystion hefyd ei llofnodi.

Mae angen i ffurflenni LOC021 a LOC027 gael eu llofnodi ym mhresenoldeb cyfreithiwr neu dyst awdurodedig arall. Bydd angen iddyn nhw hefyd lofnodi’r ffurflen.

Postiwch eich ffurflenni i’r Swyddfa Gweithred Newid Enw.

Swyddfa Gweithred Newid Enw
Adran Mainc y Brenin
Ystafell E15
Y Llysoedd Barn Brenhinol
Strand
Llundain
WC2A 2LL

Gwiriwch eich bod wedi llenwi’r ffurflenni’n gywir cyn i chi eu cyflwyno. Os bydd yna gamgymeriadau yn y ffurflenni byddant yn cael eu dychwelyd i chi.

Talu’r ffi

I dalu gyda cherdyn credyd neu ddebyd ffoniwch Swyddfa Ffioedd yr Uchel Lys.

Swyddfa Ffioedd yr Uchel Lys
Rhif ffôn: 020 3936 8957 (dewiswch opsiwn 1)
Dydd Llun i ddydd Gwener, 9am i 5pm
Gwybodaeth am gost galwadau

Gallwch hefyd dalu gydag archeb bost neu siec (yn daladwy i ‘Gwasanaeth Llysoedd a Thribiwnlysoedd EF’).

Fe roddir cyfeirnod ffi i chi ar ôl i chi dalu.

Beth fydd yn digwydd nesaf

Unwaith y bydd eich cais wedi’i gwblhau a’i gymeradwyo, bydd y Swyddfa Gweithred Newid Enw yn selio eich gweithred ac yn ei hanfon yn ôl atoch drwy’r post. Dyma eich prawf eich bod wedi newid eich enw.

Argraffu'r canllaw cyfan

Cynnwys cysylltiedig