Sut i brofi eich hunaniaeth ar gyfer Tŷ’r Cwmnïau yn Swyddfa’r Post
Sut i gwblhau eich gwiriad hunaniaeth mewn Swyddfa’r Post, ar ôl i chi nodi manylion eich dogfen adnabod â llun ar-lein.
1. Nodwch fanylion eich dogfen adnabod â llun a dewiswch Swyddfa’r Post
Nodwch y manylion o’ch dogfen adnabod â llun gan ddefnyddio gwasanaeth Cwblhau eich gwiriad hunaniaeth ar gyfer Tŷ’r Cwmnïau a dewiswch pa Swyddfa’r Post yr hoffech ymweld â hi.
2. Lawrlwythwch eich llythyr cwsmer Swyddfa’r Post
Byddwch yn cael e-bost cadarnhau gyda dolen i lawrlwytho eich llythyr cwsmer i’ch dyfais. Gallwch hefyd ofyn am gopi wedi’i bostio, ond gall gymryd hyd at 6 diwrnod gwaith iddo gyrraedd.
3. Ewch i Swyddfa’r Post gyda’ch llythyr a dogfen adnabod â llun
Ewch â’ch llythyr cwsmer (ar eich dyfais neu wedi’i argraffu) a’ch dogfen adnabod â llun wreiddiol i Swyddfa’r Post sy’n cynnig y gwasanaeth hwn. Gallwch fynd i unrhyw Swyddfa’r Post sy’n cynnig cwblhau gwiriad hunaniaeth yn y gangen, hyd yn oed os nad dyma’r un a ddewisoch ar-lein.
Rhaid i chi:
- fynd â’ch dogfen adnabod â llun wreiddiol – ni allwch ddefnyddio llungopi na delwedd ddigidol
- fynd i Swyddfa’r Post erbyn y dyddiad a ddangosir yn eich llythyr cwsmer – fel arfer mae hyn tua 15 diwrnod o’r dyddiad y daeth eich e-bost cadarnhau i law
Os gofynnoch am gopi o’ch llythyr wedi’i bostio, bydd gennych lai o amser i fynd i Swyddfa’r Post cyn y dyddiad a ddangosir. Os byddwch yn methu’r dyddiad ar eich llythyr, bydd angen i chi ddechrau’r broses o brofi eich hunaniaeth eto.
4. Sganiwch eich cod QR
Bydd aelod o staff Swyddfa’r Post yn sganio’r cod QR ar eich llythyr. Mae hyn yn cadarnhau eich bod yn cwblhau gwiriad hunaniaeth ar gyfer Tŷ’r Cwmnïau. Mae’r gwasanaeth hwn am ddim.
5. Tynnwch eich llun a sganiwch eich dogfen adnabod
Bydd aelod o staff Swyddfa’r Post yn tynnu eich llun ac yn sganio eich dogfen adnabod â llun.
6. Arhoswch am eich canlyniad
Byddwch yn cael e-bost gan GOV.UK One Login gyda chanlyniad eich gwiriad hunaniaeth, fel arfer o fewn 1 diwrnod o fynd i Swyddfa’r Post. Bydd yr e-bost yn cynnwys dolen i fewngofnodi i’ch GOV.UK One Login. Ar ôl i chi fewngofnodi, byddwch yn dychwelyd i wasanaeth Tŷ’r Cwmnïau i weld eich canlyniad.
Os oedd eich gwiriad hunaniaeth yn llwyddiannus, byddwch:
- yn gweld neges sy’n dweud ‘Rydych eisoes wedi profi eich hunaniaeth’
- angen dewis ‘Parhau’ i weld eich cod personol Tŷ’r Cwmnïau
- yn gallu gweld eich cod personol yn adran ‘Rheoli cyfrif’ eich cyfrif Tŷ’r Cwmnïau
Os oedd eich gwiriad hunaniaeth yn aflwyddiannus, bydd yr e-bost yn rhoi gwybod beth i’w wneud nesaf.
Updates to this page
-
Welsh language version added.
-
First published.