Enillydd Gwobr Fast Growth 50 eleni’n enghraifft o arloesi ar ei orau
Hydro Industries oedd prif enillydd y gwobrau blynyddol a gynhaliwyd am yr unfed tro ar bymtheg yng Nghaerdydd ddydd Gwener, gydag Ysgrifennydd Gwladol Cymru.
Wayne Preece, CEO of Hydro Industries and Secretary of State for Wales Stephen Crabb
Dywedodd Stephen Crabb, Ysgrifennydd Gwladol Cymru:
Mae Hydro Industries yn enghraifft o arloesi ar ei orau yng Nghymru. Mae’r cwmni a sefydlwyd ychydig dros bedair blynedd yn ôl wedi gweld cyfradd twf trosiant o dros 750% yn ystod y ddwy flynedd ddiwethaf, o £258,000 i dros £2 filiwn.
Mae’r llwyddiant ysgubol hwn yn dangos y rôl hollbwysig sydd gan ein hentrepreneuriaid a’n busnesau lleol o ran creu swyddi a rhoi hwb i dwf economaidd ledled Cymru. Mae hefyd yn dangos bod ein cynllun economaidd hirdymor yn helpu i greu’r hyder a’r amodau iawn i fusnesau yng Nghymru fuddsoddi a thyfu.
Bydd Stephen Crabb yn ymweld â Hydro Industries yn Llangennech yn ddiweddarach yr wythnos hon. Mae’r cwmni’n arloesi gyda thechnoleg electro ym maes puro dŵr er budd cymunedau yn rhai o ranbarthau mwyaf difreintiedig y byd. Yn ogystal â dysgu mwy am gynlluniau’r cwmni, bydd Mr Crabb yn clywed sut mae ei dwf yn helpu cadwyn gyflenwi busnesau bach a chanolig yng Nghymru.
Dywedodd bod y talentau entrepreneuraidd a welwyd yn ystod Gwobrau Fast Growth 50, sy’n cydnabod rhai o’r cwmnïau sydd wedi tyfu gyflymaf yng Nghymru, hefyd yn argoeli’n dda ar gyfer Uwchgynhadledd Fuddsoddi Ryngwladol y DU a fydd yn dod i Gymru ym mis Tachwedd.
Ychwanegodd Stephen Crabb:
Mae gan Gymru enw da Cymru fel cartref i entrepreneuriaid talentog, ac o ran cynhyrchu rhai o’r cynnyrch a’r gwasanaethau mwyaf arloesol ar y blaned. Bydd yr Uwchgynhadledd Fuddsoddi’r mis nesaf, sy’n canolbwyntio ar y sector uwch dechnoleg, yn gyfle gwych i arddangos ein harloesedd, ein gweithlu medrus iawn a pham dylai buddsoddwyr rhyngwladol ddechrau talu sylw i Gymru.
Cliciwch yma i gael rhagor o wybodaeth am Uwchgynhadledd Fuddsoddi’r DU.