Prif Weinidog Prydain yn Ymweld a Chymru cyn tanio Erthygl 50
Theresa May yn arwyddo Bargen Ddinesig Bae Dinas Abertawe
Bydd Prif Weinidog Prydain yn ymweld â Chymru ddydd Llun (20 Mawrth) fel rhan o’r broses o ymgysylltu â’r gwledydd datganoledig cyn i Erthygl 50 gael ei thanio yn ddiweddarach y mis hwn.
Mewn cyfres o ymweliadau â gwahanol rannau o’r Deyrnas Unedig – gan gynnwys Cymru, yr Alban a Gogledd Iwerddon – bydd y Prif Weinidog yn ymgysylltu ac yn gwrando ar bobl o bob cwr o Brydain wrth i ni baratoi i adael yr Undeb Ewropeaidd fel un Deyrnas Unedig.
Mae’r ymweliad yn digwydd yr un pryd ag y mae Abertawe yn arwyddo Bargen Ddinesig hanesyddol y disgwylir iddi greu dros 9,000 o swyddi a sbarduno buddsoddiad fydd yn werth bron i £1.3bn. Mae’r fargen rhwng Llywodraeth y Deyrnas Unedig, awdurdodau lleol a Llywodraeth Cymru, yn paratoi’r ffordd ar gyfer buddsoddiad seilwaith mawr yn rhanbarth Bae Dinas Abertawe, a fydd yn amrywio o ganolfannau ymchwil i “ranbarth digidol” newydd y glannau.
Yn ystod yr ymweliad, bydd y Prif Weinidog, ynghyd â’r Ysgrifennydd Gwladol dros Adael yr Undeb Ewropeaidd ac Ysgrifennydd Gwladol Cymru, yn cwrdd â phrif Weinidog Cymru, Carwyn Jones yn ogystal â chynrychiolwyr gwahanol sectorau a busnesau.
Y prif bwynt trafod fydd sut y gall pob rhan o’r Deyrnas Unedig – gan gynnwys Cymru – wneud y gorau o’r cyfleoedd a gynigir gan Brexit. Mae marchnad allforio Cymru yn werth tua £12.3bn y flwyddyn – sy’n dangos na fu erioed well adeg i gwmnïau Cymreig allforio eu cynnyrch i wledydd tramor.
Mae Cymru eisoes yn allforio’n llwyddiannus – yn anfon adenydd awyrennau i’r byd, technoleg oeri i’r Dwyrain Canol a fformatau teledu i ddwsinau o wledydd.
Yn ôl Prif Weinidog Prydain, Theresa May:
O’m diwrnod cyntaf ar risiau Downing Street, rydw i wedi nodi’n glir fy mod yn benderfynol o gryfhau a chynnal yr Undeb gwerthfawr. Rydw i hefyd wedi nodi’n glir y byddaf yn gweithio er mwyn sicrhau bargen sy’n gweithio i’r Deyrnas Unedig yn ei chyfanrwydd wrth i ni adael yr Undeb Ewropeaidd.
Rydw i eisiau i bob rhan o’r Deyrnas Unedig allu gwneud y gorau o’r cyfleoedd sydd o’n blaenau a sicrhau bod busnesau Cymru yn gallu elwa o’r fasnach fwyaf rhydd sy’n bosibl fel rhan o Brydain sy’n masnachu’n fyd-eang.
Mae gan brifysgolion Cymru eisoes enw arbennig o dda ar lefel ryngwladol. Maent yn denu myfyrwyr tramor ac yn arloesi â phrosiectau ymchwil yma a thros y môr.
Rydw i hefyd eisiau i Gymru fod ar y blaen ym maes gwyddoniaeth ac arloesi – fel y gwelwn â’r Fargen Ddinesig arbennig hon i Abertawe heddiw.
Mae’r fargen yn enghraifft wych o’r hyn y gellir ei gyflawni pan mae Llywodraeth y Deyrnas Unedig, Llywodraeth Cymru ac awdurdodau lleol yn gweithio gyda’i gilydd er mwyn sicrhau bargen sydd o fudd i’r ddinas ac i Gymru gyfan.
Bydd Cynllun y Llywodraeth hon ar gyfer Prydain yn ceisio creu Teyrnas Unedig gryfach a thecach a gwell bargen i bobl gyffredin sy’n gweithio yng Nghymru ac ym Mhrydain.
Dywedodd Alun Cairns, Ysgrifennydd Gwladol Cymru:
Mae bargen Dinas-ranbarth Bae Abertawe yn dangos beth y mae’n bosibl ei gyflawni pan mae’r llywodraeth a’r sector preifat yn dod at ei gilydd ac yn dod o hyd i atebion lleol a all ddod â budd parhaol i ardal.
Bydd y fargen ddinesig yn adeiladu ar gryfderau’r rhanbarth a’r cyfleoedd sydd ar gael, gan helpu Abertawe i gystadlu â rhai o ddinasoedd gorau’r byd drwy dechnoleg ddigidol gyffrous.
Mae hwn yn gyfle gwych i Abertawe ffynnu ac elwa o bartneriaethau agos sy’n canolbwyntio ar sicrhau enillion gwirioneddol i ardal leol.
Nodiadau i olygyddion
Mae prif elfennau dinas-ranbarth Bae Abertawe yn cynnwys:
-
Gwerth £1.3bn o gyllid yn cynnwys £115m gan Lywodraeth y Deyrnas Unedig; £125.4m gan Lywodraeth Cymru; £396 miliwn gan fusnesau a’r gweddill yn dod o gyfraniadau gan yr ardal leol a phrifysgolion
-
Darpariaeth 100% i wasanaethau band-eang y genhedlaeth nesaf a meinciau arbrofi 5G
-
Partneriaeth gyda chwmni dur TATA er mwyn sefydlu canolfan arloesi a gwybodaeth ar gyfer dur, gan gynnwys pwyslais ar gynhyrchu dur di-garbon a chynaliadwyedd y diwydiant yn y dyfodol
-
Cyfleusterau newydd amrywiol er mwyn denu busnesau technegol a digidol i Ranbarth Digidol Dinas Abertawe a’r Glannau
