Atwrneiaeth barhaus: gweithredu fel atwrnai

Neidio i gynnwys y canllaw

Cofrestru atwrneiaeth barhaus

Rhaid i chi gofrestru’r atwrneiaeth barhaus (EPA) cyn gynted ag y bo’r rhoddwr yn dechrau colli galluedd meddyliol.

  1. Dywedwch wrth y rhoddwr, ei deulu ac atwrneiod eraill eich bod yn bwriadu cofrestru’r EPA.

  2. Gwnewch gais i gofrestru’r EPA.

  3. Talwch y ffi.

Dweud wrth bobl eich bod am gofrestru

Dylech lawrlwytho a llenwi ffurflen EP1PG, a’i hanfon at:

  • y rhoddwr
  • o leiaf tri aelod o deulu’r rhoddwr sy’n gymwys – rhaid iddyn nhw fod yn 18+ oed a gyda galluedd meddyliol
  • unrhyw atwrneiod a benodwyd ‘ar y cyd ac yn unigol’ ond nad ydynt yn gwneud cais i gofrestru’r EPA

Rhaid ichi ddweud wrth y tri aelod teulu cyntaf sy’n gymwys, o’r rhestr ganlynol. Os nad oes aelod o’r teulu yn y categori, dylech symud ymlaen i’r nesaf. Rhaid i chi geisio dweud wrth aelodau’r teulu yn y drefn hon:

  • gŵr, gwraig neu bartner sifil y rhoddwr
  • plant y rhoddwr (gan gynnwys plant wedi eu mabwysiadu ond nid llys-blant)
  • rhieni’r rhoddwr
  • brodyr a chwiorydd y rhoddwr (gan gynnwys hanner brodyr a chwiorydd)
  • gŵr neu wraig weddw neu bartner sifil sy’n goroesi plentyn y rhoddwr
  • wyrion ac wyresau’r rhoddwr
  • neiaint a nithoedd y rhoddwr (plant brodyr a chwiorydd llawn y rhoddwr)
  • neiaint a nithoedd y rhoddwr (plant hanner brodyr a chwiorydd y rhoddwr)
  • modrybedd ac ewythrod y rhoddwr (brodyr a chwiorydd llawn rhiant y rhoddwr)
  • cefndryd neu gyfnitherod cyntaf y rhoddwr (plant modrybedd ac ewythrod y rhoddwr sy’n frodyr a chwiorydd llawn i riant y rhoddwr)

Rhaid i chi ddweud wrth yr holl bobl mewn categori os ydych yn dweud wrth un, er enghraifft, os yw 1 o’r 3 perthynas yr ydych yn dweud wrthynt yn ŵyr neu wyres ac mae gan y rhoddwr 15 o wyrion / wyresau eraill, rhaid i chi ddweud wrth y 16 ohonynt.

Os ydych yn aelod o’r teulu ac yn atwrnai, byddwch yn cyfrif fel un o’r bobl y mae’n rhaid dweud wrtho, ond rhaid i chi hefyd ddweud wrth bobl eraill yn eich categori.

Rhaid i chi wneud eich gorau i ddod o hyd i’r bobl y mae’n rhaid dweud wrthyn nhw. Os na allwch ddod o hyd i’w cyfeiriad neu os nad oes tri pherthynas yn fyw, rhaid dweud wrth Swyddfa’r Gwarcheidwad Cyhoeddus pan wnewch gais i gofrestru.

Gall y bobl y dywedwch wrthynt wrthwynebu i’r cofrestru. Mae ganddynt 35 diwrnod i wrthwynebu o’r dyddiad y maent yn cael y ffurflen.

Gwneud cais i gofrestru

Dylech lawrlwytho a llenwi ffurflen gais EP2PG.

Cyn gynted ag y dywedwch yn swyddogol wrth bobl am eich bwriad i gofrestru, rhaid anfon y ffurflen i Swyddfa’r Gwarcheidwad Cyhoeddus.

Office of the Public Guardian
PO Box 16185
Birmingham
B2 2WH

Defnyddiwch gyfeiriad gwahanol os ydych yn aelod o wasanaeth cludo DX Exchange.

Office of the Public Guardian
DX 744240
Birmingham 79

Dylech gynnwys y ffurflen EPA wreiddiol neu gopi ardystiedig os collwyd yr un wreiddiol.

Bydd hefyd angen i chi dalu’r ffi.

Ffioedd

Mae’n costio £82 i gofrestru EPA, oni bai eich bod yn gwneud cais am help i dalu ffioedd (LPA120).

Anfonwch siec am y ffi berthnasol a’i gwneud yn daladwy i ‘Swyddfa’r Gwarcheidwad Cyhoeddus’. Cofiwch roi enw’r rhoddwr ar gefn y siec.

Pa mor hir y mae cofrestru’n ei gymryd

Fel arfer, bydd yr EPA yn cael ei chofrestru rhwng 8 a 10 wythnos ar ôl i chi anfon y ffurflen gais a dweud wrth y teulu. Bydd yn cymryd mwy o amser os oes rhywun o’r teulu’n gwrthwynebu.

Argraffu'r canllaw cyfan

Cynnwys cysylltiedig