Treth Enillion Cyfalaf: yr hyn yr ydych yn talu’r dreth arno, cyfraddau a lwfansau
Canfod a oes angen i chi dalu
Mae’n rhaid i chi dalu Treth Enillion Cyfalaf pan fyddwch yn gwerthu ased, os yw cyfanswm eich enillion trethadwy dros eich lwfans Treth Enillion Cyfalaf blynyddol.
Cyfrifo cyfanswm eich enillion trethadwy
-
Cyfrifwch yr ennill ar gyfer pob ased (neu ar gyfer eich cyfran chi o ased, os ydyw mewn perchnogaeth ar y cyd). Gwnewch hyn ar gyfer yr eiddo personol (yn agor tudalen Saesneg), y cyfranddaliadau (yn agor tudalen Saesneg), yr eiddo, asedion busnes (yn agor tudalen Saesneg) neu gryptoasedion (yn agor tudalen Saesneg) rydych wedi’u gwaredu yn y flwyddyn dreth.
-
Adiwch yr enillion o bob ased at ei gilydd.
-
Didynnwch unrhyw golledion caniataol.
Mae’r flwyddyn dreth yn rhedeg o 6 Ebrill i 5 Ebrill y flwyddyn ganlynol.
Bydd angen i chi roi gwybod am Dreth Enillion Cyfalaf, a’i thalu os yw’ch enillion trethadwy dros eich lwfans.
Os yw cyfanswm eich enillion yn llai na’r lwfans rhydd o dreth
Does dim rhaid i chi dalu treth os yw cyfanswm eich enillion trethadwy yn llai na’ch lwfans Treth Enillion Cyfalaf.
Os ydych wedi’ch cofrestru ar gyfer Hunanasesiad, mae angen i chi roi gwybod am eich enillion ar eich Ffurflen Dreth os oedd cyfanswm y swm y gwnaethoch werthu’r asedau amdano yn fwy na:
- £50,000 o’r flwyddyn dreth 2023 i 2024 ymlaen
- 4 gwaith yn fwy na’ch lwfans – ar gyfer y blynyddoedd treth cyn blwyddyn dreth 2023 i 2024
Mae rheolau gwahanol ar gyfer rhoi gwybod am golled.
Os ydych yn ddibreswyl
Mae angen i chi roi gwybod i CThEF pan fyddwch yn gwerthu eiddo neu dir (yn agor tudalen Saesneg) hyd yn oed os yw’ch enillion yn is na’r lwfans di-dreth neu os ydych yn gwneud colled. Nid yw pobl sy’n ddibreswyl yn talu treth ar enillion cyfalaf eraill.