Help i dalu am ofal plant
Addysg a gofal plant yn rhad ac am ddim i blant 2 oed
Gall eich plentyn 2 oed gael gofal plant yn rhad ac am ddim os ydych yn byw yn Lloegr ac yn cael un o’r budd-daliadau canlynol:
- Cymhorthdal Incwm
- Lwfans Ceisio Gwaith ar sail incwm
- Lwfans Cyflogaeth a Chymorth (ESA) yn ymwneud ag incwm
- Credyd Cynhwysol, a bod incwm eich cartref yn £15,400 y flwyddyn neu lai ar ôl treth, heb gynnwys taliadau budd-dal
- elfen warantedig y Credyd Pensiwn
- Credyd Treth Plant, Credyd Treth Gwaith (neu’r ddau), a bod incwm eich cartref yn £16,190 y flwyddyn neu lai cyn treth
- estyniad 4 wythnos y Credyd Treth Gwaith (y taliad a gewch pan fyddwch yn gorffen bod yn gymwys ar gyfer Credyd Treth Gwaith)
Mae’r canllaw hwn hefyd ar gael yn Saesneg.
Gall plant 2 oed hefyd gael gofal plant yn rhad ac am ddim os yw’r canlynol yn wir:
- maen nhw’n cael gofal gan awdurdod lleol
- mae ganddynt gynllun addysg, iechyd a gofal (EHC)
- maen nhw’n cael Lwfans Byw i’r Anabl
- maen nhw wedi gadael gofal o dan orchymyn mabwysiadu, gorchymyn gwarcheidwadaeth arbennig neu orchymyn trefniadau plentyn
Efallai y bydd yn rhaid i chi dalu am gostau ychwanegol fel prydau bwyd, clytiau neu deithiau.
Cysylltwch â’ch darparwr gofal plant neu eich cyngor lleol (yn Saesneg) i gael gwybod mwy.
Os nad ydych yn ddinesydd y DU ac nad ydych yn cael hawlio budd-daliadau
Os yw’ch statws mewnfudo yn dweud bod gennych ‘dim hawl i arian cyhoeddus’, efallai y byddwch yn dal i gael gofal plant sy’n rhad ac am ddim i’ch plentyn 2 oed. Mae’n rhaid i chi fyw yn Lloegr ac ni all incwm eich aelwyd fod yn fwy na:
- £26,500 i deuluoedd y tu allan i Lundain sydd ag un plentyn
- £34,500 i deuluoedd yn Llundain sydd ag un plentyn
- £30,600 i deuluoedd y tu allan i Lundain sydd â dau neu fwy o blant
- £38,600 i deuluoedd yn Llundain sydd â dau neu fwy o blant
Ni allwch fod â mwy nag £16,000 mewn cynilion neu fuddsoddiadau.
Cysylltwch â’ch darparwr gofal plant neu gwiriwch gyda’ch cyngor lleol (yn Saesneg) os nad ydych yn siŵr a allwch gael gofal sy’n rhad ac am ddim.
Cymru, yr Alban a Gogledd Iwerddon
Mae cynlluniau gwahanol yng Nghymru, yr Alban (yn agor tudalen Saesneg) a Gogledd Iwerddon (yn agor tudalen Saesneg).