Skip to main content

Gwneud hawliad i’r llys am arian

Sgipio cynnwys

Llog ar hawliadau am arian

Efallai y gallwch hawlio llog ar yr arian sy’n ddyledus i chi.

Mae swm y llog y gallwch ei hawlio yn dibynnu ar ba mor hir y mae’r arian wedi bod yn ddyledus i chi. Gall llog barhau i gronni nes bydd eich hawliad wedi’i dalu, ei setlo neu fod y llys wedi gwneud penderfyniad arno.

Os ydych am hawlio llog, rhaid i chi ei gynnwys yn eich hawliad.

Os ydych yn hawlio llog

Gall yr unigolyn neu’r busnes rydych yn hawlio arian ganddo (y ‘diffynnydd’) gytuno i dalu’r llog:

  • pan fydd yn talu’r hawliad
  • fel rhan o gytundeb setlo (er enghraifft, drwy gyfryngu

Os na allwch chi a’r diffynnydd ddod i gytundeb, bydd y llys yn penderfynu a ddylid dyfarnu llog. Bydd penderfyniad y llys yn dibynnu ar ffactorau megis:

  • y math o hawliad
  • unrhyw gontract rhyngoch chi a’r diffynnydd
  • pa mor hir y mae’r arian wedi bod yn ddyledus i chi

Gwirio a oes angen i chi gyfrifo’r llog

Os ydych yn gwneud hawliad ar-lein, bydd y llog yn cael ei gyfrifo ar eich rhan.

Fel arfer, bydd angen i chi gyfrifo’r llog eich hun os ydych yn gwneud hawliad drwy’r post.

Os nad ydych yn gwybod swm yr hawliad

Rhaid i chi wneud hawliad drwy’r post os nad ydych yn gwybod yr union swm – ni allwch wneud hawliad ar-lein.

Bydd angen i chi amcangyfrif y swm rydych yn ei hawlio neu adael y blwch ‘swm a hawlir’ yn wag.

Bydd y llys yn penderfynu faint o arian sy’n ddyledus i chi ac unrhyw log sy’n berthnasol i’ch hawliad.

Os ydych yn hawlio llog ar gyfraddau gwahanol

Dim ond ar un gyfradd y gall y gwasanaeth ar-lein gyfrifo llog.

Os ydych yn hawlio llog ar gyfraddau gwahanol am gyfnodau gwahanol, bydd angen i chi gyfrifo’r llog eich hun a gwneud eich hawliad drwy’r post.

Os ydych angen cyfrifo’r llog

Y gyfradd fel arfer yw 8%.

Os ydych yn fusnes sy’n gwneud hawliad yn erbyn busnes arall, mae yna ffordd wahanol o godi llog ar daliad masnachol hwyr.

I gyfrifo’r gyfradd:

  1. Cyfrifwch y llog blynyddol: cymerwch y swm rydych yn ei hawlio a’i luosi gyda 0.08 (sy’n 8%).

  1. Cyfrifwch y llog dyddiol: rhannwch eich llog blynyddol o gam 1 gyda 365 (y nifer o ddyddiau mewn blwyddyn).

  1. Cyfrifwch gyfanswm y llog: lluoswch y llog dyddiol o gam 2 gyda’r nifer o ddyddiau y mae’r ddyled wedi bod yn ddyledus.

Enghraifft

Os yw £1,000 yn ddyledus i chi:

  • y llog blynyddol fyddai £80 (1000 x 0.08 = 80)
  • dylech rannu £80 gyda 365 i gael y gyfradd ddyddiol: tua 22c y dydd (80 / 365 = 0.22)
  • ar ôl 50 diwrnod byddai’r swm yn £11 (50 x 0.22 = 11)