Cynllun Seibiant Dyledion (Lle i Anadlu): cyfrifoldebau credydwyr i'r llys
Cyfarwyddyd i gredydwyr dyled sydd wedi'i rhoi mewn 'lle i anadlu'.
Yn berthnasol i Gymru a Loegr
Mae’r Cynllun Seibiant Dyledion (Lle i Anadlu) yn rhoi hawl i rywun sydd mewn dyled broblemus gael amddiffyniad cyfreithiol rhag eu credydwyr.
Bwriad y cyfarwyddyd hwn yw eich helpu i ddeall y cynllun a’ch cyfrifoldeb i’r llys o dan y rheoliadau.
Gallwch hefyd wneud cais i’r llys i gymryd camau i adennill y ddyled, canslo neu newid y ‘lle i anadlu’, neu i dynnu dyled o le i anadlu.
Os oes gennych ddyled sy’n gymwys i gael lle i anadlu yn eich barn chi, dylech gael cyngor gan gynghorydd dyledion.
Os oes gennych unrhyw gwestiynau am le i anadlu penodol, cysylltwch â’r cynghorydd dyledion y mae ei fanylion yn yr hysbysiad a gawsoch. Peidiwch â chysylltu â’r llys.
Eich cyfrifoldebau
Atal pob cam gweithredu a rhoi’r amddiffyniadau ar waith
Os dywedir wrthych fod dyled sy’n ddyledus i chi mewn lle i anadlu, rhaid i chi atal yr holl gamau gweithredu sy’n gysylltiedig â’r ddyled honno a rhoi’r amddiffyniadau ar waith. Rhaid i’r amddiffyniadau hyn fod mewn lle nes y bydd y lle i anadlu wedi dod i ben.
Oni bai bod gennych ganiatâd gan y llys, rhaid i chi neu unrhyw un sy’n gweithredu ar eich rhan beidio â:
- chymryd unrhyw gamau gorfodi yn erbyn y dyledwr neu unrhyw un sy’n atebol ar y cyd â hwy am ddyled lle i anadlu
- cysylltu â’r dyledwr i ofyn am ad-daliad o’r ddyled honno
- cymryd unrhyw gamau i adennill y ddyled honno
Bydd y Gwasanaeth Ansolfedd yn rhoi gwybod i chi am bob dyled sy’n ddyledus i chi sydd mewn lle i anadlu a’r dyddiad y dechreuodd y lle i anadlu. Bydd y lle i anadlu yn dechrau ar y diwrnod ar ôl i fanylion y dyledwr gael eu rhoi ar y gofrestr lle i anadlu.
Os yw’r hysbysiad yn cynnwys dyddiad gorffen yna mae’r lle i anadlu yn un safonol a bydd y dyddiad gorffen 60 diwrnod ar ôl i’r lle i anadlu ddechrau. Os nad oes dyddiad gorffen, mae’n le i anadlu argyfwng iechyd meddwl.
Efallai y bydd yn bosibl bod y ddyled sy’n ddyledus i chi yn cael ei hychwanegu at le i anadlu yn nes ymlaen oherwydd dim ond ’ar ôl i’r lle i anadlu ddechrau y mae wedi’i hadnabod.
Gellir cynnwys dyledion ar y cyd mewn lle i anadlu, hyd yn oed os mai dim ond un unigolyn sy’n mynd i le i anadlu. Byddai’r ddyled ar y cyd yn dod yn ddyled lle i anadlu a byddai’r amddiffyniad rhag camau gorfodi hefyd yn berthnasol i’r bobl eraill sy’n ymwneud â’r ddyled honno. Gallwch barhau i godi llog neu ffioedd ar y bobl eraill ac nid yw’r lle i anadlu yn effeithio ar ddyledion a rhwymedigaethau’r bobl eraill sydd ganddynt yn eu henwau eu hunain.
Dywedwch wrth y llys am y lle i anadlu
Os oes hawliad wedi cychwyn yn barod, neu os oes camau gorfodi wedi dechrau cael eu cymryd, rhaid i chi roi gwybod i’r llys yn ysgrifenedig am le i anadlu sydd wedi dechrau. Rhaid i chi ddweud wrth y llys am bob dyled sydd wedi mynd i le i anadlu.
Ni fydd y llys yn chwilio am ddyledion eraill yn erbyn enw’r dyledwr. Os oes gan y dyledwr ddyledion sy’n ddyledus i chi mewn llysoedd gwahanol, rhaid i chi hysbysu pob llys.
Wrth hysbysu’r llys, rhaid i chi:
- esbonio a yw’r ddyled yn destun lle i anadlu safonol neu’n argyfwng iechyd meddwl
- roi’r dyddiad y dechreuodd y lle i anadlu, lle bo’n bosibl
- cynnwys copi o’r hysbysiad gan y Gwasanaeth Ansolfedd, lle bo modd
Gallwch anfon eich hysbysiadau i’r llys drwy’r post neu drwy e-bost. Sut i gysylltu â’r llys. Os ydych yn defnyddio platfform ar-lein i gychwyn hawliad, cyfeiriwch at y cyfarwyddyd i ddefnyddwyr ynghylch sut i gysylltu â’r llys.
Dywedwch wrth asiantau gorfodi i atal unrhyw gamau
Pan fyddwch wedi dweud wrth y llys lleol am y lle i anadlu, bydd y llys yn dweud wrth unrhyw feilïaid llys sirol sydd dan gyfarwyddyd i atal y camau gorfodi.
Rhaid i chi roi gwybod i unrhyw asiant gorfodi arall yr ydych wedi’i gyfarwyddo – mae hyn yn cynnwys swyddogion gorfodi’r uchel lys. Os na fyddwch yn gwneud hyn cyn gynted â phosibl, efallai y byddwch yn atebol am unrhyw golledion a ddaw i ran y dyledwr neu’r asiant o ganlyniad.
Os oes gwarant arestio wedi’i chodi mewn achos treth y cyngor, rhaid i gyngor y credydwr gyfarwyddo’r asiant gorfodi i beidio â gweithredu’r warant.
Os cytunwyd ar gynlluniau ad-dalu eisoes, bydd y darparwr cyngor ar ddyledion yn penderfynu a all y dyledwr fforddio talu o hyd. Ni all asiantau gorfodi orfodi’r writ na’r warant nes i’r lle i anadlu ddod i ben.
Os byddwch yn gwneud cais i ailgodi gwarant neu writ rheolaeth yn ystod lle i anadlu, bydd y llys yn gwrthod y cais.
Beth fydd yn digwydd nesaf
Mae achos llys yn parhau hyd nes bod gorchymyn neu ddyfarniad yn cael ei wneud; ac eithrio’r holl gamau gorfodi fel troi allan.
Mewn lle i anadlu ni fydd y llys yn:
- cychwyn hawliad am arian neu’n prosesu cais am help i dalu ffioedd
- prosesu dyfarniad trwy ddiffyg
- cychwyn unrhyw fath o gais gorfodi (megis gwarant, gwrit neu orchymyn arwystlo)
- parhau ag unrhyw fath o gais gorfodi a gychwynnwyd yn barod, gan gynnwys ceisiadau troi allan
- bwrw ymlaen â dyled pan fydd deiseb methdalu wedi dechrau
Mae’r rheoliadau’n caniatáu i’r llys ohebu â’r diffynnydd yn ystod lle i anadlu lle bo angen.
Bydd unrhyw gais arall a wneir gan ddyledwr yn ystod lle i anadlu yn cael ei gyfeirio at farnwr rhanbarth i benderfynu a ddylid parhau â’r cais hwnnw neu ei ohirio.
Gwrandawiadau gorfodi
Ar gyfer lle i anadlu safonol, bydd unrhyw wrandawiad a drefnwyd sy’n ymwneud â gorfodi yn cael ei ohirio cyn pen 14 diwrnod ar ôl diwedd y lle i anadlu.
Ar gyfer lle i anadlu argyfwng iechyd meddwl, ni ellir cynnal unrhyw wrandawiad a drefnwyd – bydd barnwr yn adolygu hyn os caiff ei ohirio y tu hwnt i 6 mis.
Adfeddiannu tai (troi allan)
Ar gyfer lle i anadlu safonol, bydd unrhyw droi allan a drefnwyd yn cael ei ohirio i ddim cynharach na 14 diwrnod ar ôl diwedd y lle i anadlu. Os yw’r dyledwr wedi gwneud cais i atal yr adfeddiannu, caiff y cais ei aildrefnu ar ôl diwedd y lle i anadlu ond cyn yr adfeddiannu.
Ar gyfer lle i anadlu argyfwng iechyd meddwl, ni ellir parhau â’r broses troi allan sydd eisoes wedi dechrau – bydd barnwr yn adolygu hyn os caiff ei ohirio am fwy na 6 mis. Os yw’r dyledwr wedi gwneud cais i atal yr adfeddiannu, caiff y cais ei aildrefnu ar ôl diwedd y lle i anadlu ond cyn yr adfeddiannu.
Gorchmynion arwystlo yng Canolfan Fusnes Sifil Genedlaethol
Efallai eich bod wedi gwneud cais am orchymyn arwystlo i sicrhau’r ddyled yn erbyn cartref y dyledwr neu eiddo arall. Os felly, efallai y bydd y llys wedi gwneud gorchymyn arwystlo dros dro (ICO).
Ar gyfer dyled mewn lle i anadlu safonol, bydd Canolfan Fusnes Sifil Genedlaethol yn gohirio unrhyw ICO. Os oes amser ar ôl ar eich hysbysiad o wasanaeth, neu i’r dyledwr ymateb, bydd y llys yn ychwanegu hyn at gyfnod y lle i anadlu. Yn dilyn hyn, bydd yr ICO yn cael ei gyfeirio’n awtomatig at y barnwr neu’r cynghorydd cyfreithiol i wneud gorchymyn arwystlo terfynol, oni bai eich bod yn dweud wrth y llys i beidio â gwneud hynny.
Pan fydd lle i anadlu argyfwng iechyd meddwl yn dod i ben, rhaid i chi adael i’r dyledwr gael unrhyw amser sy’n weddill i wneud unrhyw wrthwynebiadau i’r ICO i’r llys. Yn dilyn y cyfnod hwn, dylech gadarnhau’n ysgrifenedig i’r llys pryd y daeth y lle i anadlu argyfwng iechyd meddwl i ben ac a ydych yn dymuno bwrw ymlaen â gwneud yr ICO terfynol.
Ar ôl 6 mis, bydd unrhyw gais ICO lle mae lle i anadlu argyfwng iechyd meddwl yn dal i fodoli yn cael ei gyfeirio at farnwr am benderfyniad.
Pan ddaw lle anadlu i ben
Dylech roi gwybod i’r llys pan ddaw’r lle anadlu i ben. Dylech gysylltu â’r llys i ddweud wrthynt a ydych yn dymuno bwrw ymlaen â’r camau gorfodi a chyflwyno’r cais perthnasol.
Gallwch ailgychwyn camau gorfodi o’r pwynt y daeth i ben – nid oes rhaid talu ffi am hyn.
Updates to this page
-
Added information about enforcement hearings
-
Welsh translation added
-
First published.