Gwneud cais am ad-daliad o gyfraniadau Yswiriant Gwladol Dosbarth 2
Defnyddiwch y gwasanaeth ar-lein neu ffurflen bost CA8480 i wneud cais am ad-daliad o gyfraniadau Yswiriant Gwladol Dosbarth 2.
Sut i wneud cais
Er mwyn gwneud cais am ad-daliad o gyfraniadau Yswiriant Gwladol Dosbarth 2, gallwch wneud y canlynol:
- defnyddio’r gwasanaeth ar-lein
- llenwi’r ffurflen ar y sgrîn, ei hargraffu a’i phostio i CThEF
Gallwch wirio sut i hawlio ad-daliad ar gyfer gwahanol ddosbarthiadau o Yswiriant Gwladol.
Cyfraniadau Yswiriant Gwladol Dosbarth 2 gwirfoddol
Mae’n bosibl y byddwch yn gymwys i gael ad-daliad os gwnaethoch dalu cyfraniadau Yswiriant Gwladol Dosbarth 2 gwirfoddol ac rydych yn credu eich bod wedi gwneud camgymeriad pan wnaed y taliad.
Ni fyddwch yn gymwys i gael ad-daliad os yw’r gwall yn ymwneud â newid mewn amgylchiadau ar ôl i’r taliad gael ei wneud.
Gall ad-daliad o gyfraniadau Yswiriant Gwladol Dosbarth 2 gwirfoddol effeithio ar eich hawl i Bensiwn y Wladwriaeth a budd-daliadau eraill.
Cyn i chi wneud cais am ad-daliad:
- dylech gysylltu â’r Adran Gwaith a Phensiynau i wirio a allai effeithio ar eich hawl i Bensiwn y Wladwriaeth a sut y gallai hynny effeithio
- gallwch wirio pa fudd-daliadau eraill y mae’ch cyfraniadau Dosbarth 2 gwirfoddol yn cyfrif tuag atynt gan y gallai ad-daliad effeithio ar y rhain — dylech gysylltu â’ch Canolfan Byd Gwaith leol i wirio a fydd y budd-daliadau eraill hyn yn cael eu heffeithio a sut
Pryd i wneud cais
Dylech wneud cais cyn pen 6 blynedd i ddiwedd y flwyddyn dreth yr ydych yn hawlio ar ei chyfer. Er enghraifft, os ydych yn gwneud cais am ad-daliad ar gyfer blwyddyn dreth 2023 i 2024, dylech wneud cais cyn 6 Ebrill 2030.
Os byddwch yn gwneud cais ar ôl 6 blynedd, bydd angen i chi gynnwys rhesymau dros eich cais hwyr pan fyddwch yn gwneud cais.
Yr hyn y bydd ei angen arnoch
Bydd angen yr wybodaeth ganlynol arnoch:
- eich enw llawn
- eich cyfeiriad
- eich rhif Yswiriant Gwladol
- y rhesymau pam rydych eisiau ad-daliad
- enw’r person y dylid gwneud yr ad-daliad yn daladwy iddo (os nad chi yw hwn)
Gwneud cais ar-lein
I wneud cais ar-lein, bydd angen Dynodydd Defnyddiwr (ID) a chyfrinair ar gyfer Porth y Llywodraeth arnoch (os nad oes gennych Ddynodydd Defnyddiwr, gallwch greu un pan wnewch gais).
Byddwch yn cael cyfeirnod y gallwch ei ddefnyddio i ddilyn hynt eich ffurflen.
Gwneud cais drwy’r post
Gallwch wneud cais drwy’r post os ydych yn asiant neu ni allwch wneud cais ar-lein.
-
Casglwch eich holl wybodaeth at ei gilydd cyn i chi ddechrau. Byddwch yn llenwi’r ffurflen hon ar-lein, ac ni fydd modd i chi gadw’ch cynnydd.
-
Llenwi ffurflen CA8480.
-
Argraffwch y ffurflen a’i hanfon drwy’r post at CThEF gan ddefnyddio’r cyfeiriad post a ddangosir ar y ffurflen.
Ar ôl i chi wneud cais
Byddwn yn adolygu’ch cais.
Os bydd angen gwybodaeth bellach arnom, byddwn yn cysylltu â chi.
Gallwch wirio pryd i ddisgwyl ateb gan CThEF ar ôl i chi hawlio.
Os na chaiff eich cais ei gymeradwyo
Byddwn yn ysgrifennu atoch i roi gwybod i chi y rhesymau pam na chafodd eich cais ei gymeradwyo.
Os caiff eich cais ei gymeradwyo
Byddwn yn anfon siec atoch yn y post am eich ad-daliad.
Ar ôl i chi gael eich ad-daliad
Os oes gennych fudd-daliadau eraill (fel Credyd Pensiwn neu Gredyd Cynhwysol), bydd angen i chi roi gwybod i’r adran sy’n talu’r budd-dal i chi eich bod wedi cael ad-daliad gan CThEF. Mae hyn oherwydd y gallai ad-daliad effeithio ar eich hawl i’r budd-dal hwnnw.
Cael help
Cysylltwch â CThEF os oes angen rhagor o help arnoch.
Gallwch ein ffonio ar +44 300 200 1900 os ydych y tu allan i’r DU.