Apelio eich prawf gyrru
Gallwch apelio at lys ynghylch eich prawf gyrru os nad oedd eich arholwr wedi dilyn y gyfraith, ond ni ellir newid canlyniad eich prawf.
Yn berthnasol i Gymru, Loegr a Scotland
Gallwch apelio at lys os credwch na ddilynodd eich arholwr gyrru’r gyfraith ynghylch sut y mae’n rhaid iddynt gynnal profion gyrru.
Ni all y llys newid canlyniad eich prawf. Os byddwch yn ennill eich apêl, gallant benderfynu y dylech naill ai’n:
- cael sefyll eich prawf eto am ddim
- derbyn ad-daliad o ffi eich prawf
Mae’n bosibl y bydd yn rhaid i chi dalu costau cyfreithiol sylweddol os byddwch yn colli’ch apêl.
Mae’n fwy cyflym ac yn haws gwneud cwyn i’r Asiantaeth Gyrwyr a Safonau Cerbydau (DVSA) os oes gennych brawf na ddilynodd eich prawf y gyfraith.
Sicrhau bod gennych sail i apelio n erbyn y penderfyniad
Gallwch dderbyn cyngor cyfreithiol i’ch helpu i sicrhau a oes gennych sail i apelio.
Gallwch apelio os na ddilynodd eich arholwr gyrru’r gyfraith. Mae hyn yn cynnwys enghreifftiau fel:
- ni wiriodd yr arholwr eich golwg ar ddechrau’r prawf
- fe wnaethoch dreulio llai na 30 munud ar y ffordd
- ni ofynnodd yr arholwr i chi wneud ymarfer bacio
- ni ofynnodd yr arholwr y cwestiynau ‘dangoswch i mi, dywedwch wrthyf’
Ni allwch apelio os na chyflawnwyd rhywbeth oherwydd i’r arholwr ddod â’r prawf i ben oherwydd bod eich gyrru’n beryglus.
Gwiriwch y darnau hyn o ddeddfwriaeth i gael y rhestr lawn o’r hyn roedd yn rhaid i’ch arholwr gyrru ei gynnwys:
- adran 40 y Rheoliadau Cerbydau Modur (Trwyddedau Gyrru) 1999 (fel y’u diwygiwyd)
- atodlen 8 y Rheoliadau Cerbydau Modur (Trwyddedau Gyrru) 1999( (fel y’u diwygiwyd)
- rhan 2 y Rheoliadau Cerbydau Modur (Trwyddedau Gyrru) 2005 os sefoch brawf cymhwyso fel hyfforddwr gyrru cymeradwy (ADI)
Rhesymau na ddylech apelio
Ni fydd eich apêl yn llwyddiannus os:
- ydych yn anghytuno â chanlyniad eich prawf
- ydych yn anghytuno â barn eich arholwr gyrru
- ydych yn credu nad oedd yn deg bod yr arholwr wedi nodi camsyniad peryglus neu ddifrifol
- nad oeddech yn hoffi eich arholwr gyrru
- oeddech yn teimlo’n sâl yn ystod y prawf
- oedd eich car wedi torri i lawr yn ystod y prawf
- oedd defnyddiwr arall y ffordd wedi gwneud rhywbeth o’i le ac na wnaethoch ymateb iddo’n gywir
Mae proses wahanol i wneud cwyn ynghylch eich arholwr gyrru, er enghraifft, os oeddech yn meddwl eu bod yn anghwrtais i chi. Ni all y DVSA newid canlyniad eich prawf.
Apelio yn erbyn y penderfyniad
Mae sut rydych yn apelio yn erbyn y penderfyniad yn dibynnu ar ble rydych yn byw.
Lloegr a Chymru
Cysylltwch â’ch llys ynadon lleol o fewn 6 mis ar ôl eich prawf gyrru i apelio yng Nghymru a Lloegr.
Yr Alban
Cysylltwch â’ch llys sirol lleol o fewn 21 niwrnod ar ôl eich prawf gyrru i apelio yn yr Alban.
Pa wybodaeth sydd angen i chi ei rhoi
Dywedwch wrth y llys eich bod am apelio am eich prawf gyrru o dan adran 90 y Ddeddf Traffig Ffyrdd 1988.
Os byddwch yn apelio yn erbyn canlyniad prawf cymhwyso fel ADI, mae angen i chi apelio o dan adran 133 y Ddeddf Traffig Ffyrdd 1988 yn lle hynny.
Pan fyddwch yn llenwi unrhyw ffurflenni llys ynghylch pwy rydych yn apelio yn ei erbyn (‘y diffynnydd’), defnyddiwch y manylion hyn:
Central Policy
DVSA
1 Unity Square
Nottingham
NG2 1AY
Pan fyddwch yn apelio, bydd o gymorth os byddwch yn esbonio:
- pa adran o’r gyfraith na ddilynodd yr arholwr gyrru
- ym mha fodd na ddilynodd yr arholwr gyrru’r gyfraith
Mynd i’r apêl
Bydd y llys yn ysgrifennu atoch gyda’r manylion ynghylch pryd y cynhelir y gwrandawiad. Bydd y llythyr yn dweud wrthych beth i’w wneud ar y diwrnod.
Bydd barnwr, ynad neu siryf yn gwrando ar eich apêl yn y llys.
Gallwch ofyn i gyfreithiwr i’ch cynrychioli yn y gwrandawiad, ond fel arfer bydd yn rhaid i chi eu talu.
Bydd y llys fel arfer yn gwrthod eich apêl os na fyddwch yn mynd i’r gwrandawiad.
Rhoi tystiolaeth
Efallai y gofynnir i chi:
- sut rydych yn meddwl na ddilynodd yr arholwr gyrru’r gyfraith yn ystod eich prawf
- rhoi tystiolaeth
- ateb cwestiynau am eich prawf (a elwir yn ‘groesholi’)
Yn y mwyafrif o achosion, bydd gan y DVSA gynrychiolydd cyfreithiol yn y llys. Mewn rhai achosion, mae’n bosibl y bydd yr arholwr gyrru yn y gwrandawiad hefyd i roi tystiolaeth ac ateb cwestiynau.
Yr hyn sydd angen i chi ei ddangos i’r llys
Mae angen i chi brofi ei bod yn fwy tebygol na pheidio na ddilynodd yr arholwr gyrru’r gyfraith.
Derbyn canlyniad eich apêl
Fel rheol bydd y llys yn dweud wrthych am ganlyniad eich apêl ar ddiwedd y gwrandawiad.
Os byddwch yn ennill eich apêl
Ni all y llys newid canlyniad eich prawf os byddwch ychi’n ennill eich apêl.
Bydd yn dyfarnu y dylech naill ai:
- cael sefyll eich prawf eto am ddim
- derbyn ad-daliad o ffi eich prawf
Bydd y DVSA yn cysylltu â chi os byddwch yn ennill eich apêl.
Os byddwch yn colli’ch apêl
Bydd angen i chi drefnu a thalu am sefyll eich prawf gyrru eto os byddwch yn colli’ch apêl.
Mae’n bosibl y bydd yn rhaid i chi dalu costau cyfreithiol sylweddol os byddwch yn colli’ch apêl.
Updates to this page
-
Updated the address details to use for DVSA when filling in any court forms.
-
Added translation