Uwchgynhadledd NATO yn creu gwaddol parhaol
Ysgrifennydd Gwladol Cymru Stephen Crabb yn ysgrifennu i'r Western Mail ar etifeddiaeth Uwchgynhadledd NATO.
Yr wythnos hon, mae Cymru wedi bod yn gartref i Uwchgynhadledd NATO hanesyddol.
Yn ystod y dyddiau diwethaf, rydym wedi cadarnhau ein gallu i groesawu digwyddiadau rhyngwladol o’r radd flaenaf. Rydym wedi dangos ein croeso Cymreig unigryw i arweinyddion byd ac wedi anfon y neges glir a chroyw ein bod ar agor i fusnes.
Fel gwlad, dylem fod yn eithriadol o falch ein bod wedi derbyn yr her hon ac wedi darparu Uwchgynhadledd mor arwyddocaol a phwysig: y gynulleidfa ddiplomataidd fwyaf o arweinwyr byd yn y DU a’r mwyaf difrifol o bosibl ers ffurfio cynghrair NATO yn 1949.
Ar bob cam o’r ffordd rydym wedi dangos ysbryd a gallu entrepreneuraidd Cymru. Ni fyddai Uwchgynhadledd NATO wedi bod yn bosibl heb gryfder a chefnogaeth busnesau Cymru. Mae arweinwyr byd yn dychwelyd adref yn ymwybodol o’r sgiliau, y talent a’r arbenigedd sydd ar gael yng Nghymru ac ehangder ac ansawdd y cynnyrch a’r gwasanaethau rydym yn eu darparu. Mae miloedd o blith cyfryngau’r byd wedi gweld y wlad hardd hon ar ei gorau ac mae ein treftadaeth gyfoethog a’n tirweddau godidog wedi cael eu gweld ar draws y byd.
Fu ein proffil byd-eang erioed mor uchel.
Felly ydy, mae Uwchgynhadledd NATO wedi’n gosod ar y map rhyngwladol ac wedi rhoi hwb i’n heconomi. Rwy’n benderfynol o adeiladu ar hyn. Rhaid i waddol Uwchgynhadledd NATO gynnwys hyrwyddo potensial Cymru fel man gwych i fuddsoddi ynddi a hefyd ar gyfer busnes, twristiaeth ac addysg.
Dyna pam y mae Uwchgynhadledd Fuddsoddi’r DU sy’n dod i Gymru ar 21 Tachwedd mor bwysig. Mae Cymru yn gartref i rai o gwmnïau rhyngwladol mwyaf llwyddiannus y byd. Bydd yr Uwchgynhadledd Fuddsoddi yn siop ffenestr i’r busnesau hynny er mwyn annog darpar fuddsoddwyr newydd hefyd i fuddsoddi yng Nghymru. Bydd y gynhadledd hon yn dangos pam y mae Cymru yn wlad mor wych i fuddsoddi ynddi. Bydd yn canolbwyntio’n benodol ar y sector uwch dechnoleg, maes lle y mae gennym enw da am ragoriaeth.
Byddwn yn gwahodd uwch swyddogion o gwmnïau rhyngwladol i’r Uwchgynhadledd Fuddsoddi er mwyn i fusnesau yng Nghymru gael cyfle uniongyrchol i ymchwilio i gyfleoedd allforio newydd. Mae Cymru yn wlad uchelgeisiol gydag economi ddeinamig, sy’n gallu diwallu anghenion y gymuned fusnes ryngwladol. Mae gennym darged i ddyblu allforion y DU erbyn 2020 a bydd yr Uwchgynhadledd yn dod â chyfleoedd newydd a fydd yn galluogi busnesau Cymru i’n helpu i gyrraedd y targed hwnnw.
Rwyf wedi datgan bob amser y dylai Uwchgynhadledd NATO ddarparu gwaddol economaidd parhaol i Gymru. Yr wythnos hon, cyhoeddodd Llywodraeth y DU gontract newydd gwerth £3.5 biliwn i gyflenwi cerbydau newydd i Fyddin Prydain a fydd yn cael eu dylunio gan General Dynamics UK yn ne Cymru. Bydd y contract yn cynnal 1,300 o swyddi peirianyddol yng nghadwyn gyflenwi’r cerbyd blaengar hwn ac ar draws y DU mewn diwydiannau amddiffyn allweddol. Drwy ddenu buddsoddiadau newydd a chynyddu allforion o Gymru, bydd yr Uwchgynhadledd Fuddsoddi’n helpu i sicrhau economi gryfach i Gymru.
Yfory, bydd y digwyddiadau a oedd yn gysylltiedig ag Uwchgynhadledd NATO yn dod i ben gyda chyfle i’r cyhoedd gwrdd â’r lluoedd arfog ym Mae Caerdydd. Bydd yn gyfle i ystyried y gwaith hollbwysig y mae’n Lluoedd Arfog yn ei wneud, a’u haberth, a chydnabod yn ddiolchgar y ddyled aruthrol sydd arnon ni iddynt i gyd. Mae’n ffordd briodol o derfynu wythnos hanesyddol.
Yr haf hwn, rydym wedi dangos sut y gall Cymru ddod ynghyd i ddarparu’r digwyddiad unwaith-mewn-oes hwn. Mae wedi’n hatgoffa ni, ac wedi dangos i’r byd, beth sy’n gwneud Cymru yn wych. Byddwn yn gweithio gyda’n partneriaid i wneud yn siŵr fod gwaddol yr
Uwchgynhadledd yn para, bod mwy o swyddi’n cael eu creu, y ceir mwy o fewnfuddsoddi a bod ein gwlad uchelgeisiol yn aros ar y llwyfan byd-eang.
Rhagor o wybodaeth am Uwchgynhadledd NATO yng Nghymru 2014 neu dilynwch gyfrif Twitter swyddogol yr uwchgynhadledd @NATOWales