Ad-dalu eich benthyciad myfyrwyr
Faint fyddwch chi’n ad-dalu
Mae faint fyddwch chi’n ad-dalu yn dibynnu ar eich incwm - y swm rydych yn ei ennill (gan gynnwys pethau fel bonysau a goramser) cyn treth a didyniadau eraill.
Byddwch yn ad-dalu canran o’ch incwm dros y ‘trothwy’ incwm ar gyfer eich math o fenthyciad, yn dibynnu ar ba mor aml y cewch eich talu.
Mae’r trothwyon incwm yn wahanol ar gyfer pob math o gynllun.
| Math o gynllun | Trothwy incwm blynyddol | Trothwy incwm misol | Trothwy incwm wythnosol |
|---|---|---|---|
| Cynllun 1 | £26,065 | £2,172 | £501 |
| Cynllun 2 | £28,470 | £2,372 | £547 |
| Cynllun 4 | £32,745 | £2,728 | £629 |
| Cynllun 5 | £25,000 | £2,083 | £480 |
| Benthyciad Ôl-raddedig | £21,000 | £1,750 | £403 |
Byddwch yn ad-dalu naill ai:
-
9% o’ch incwm dros y trothwy os ydych ar Gynllun 1, 2, 4 neu 5
-
6% o’ch incwm dros y trothwy os ydych ar gynllun Benthyciad Ôl-raddedig
Mae’r enghreifftiau’n dangos faint y byddech chi’n ei ad-dalu yn dibynnu ar eich incwm a’ch math o gynllun:
Enghraifft
Rydych ar Gynllun 1 ac mae gennych incwm o £33,000 y flwyddyn, sy’n golygu eich bod yn cael eich talu £2,750 bob mis.
Cyfrifiad:
£2,750 – £2,172 (eich incwm llai trothwy Cynllun 1) = £578
9% o £578 = £52.02
Mae hyn yn golygu mai’r swm y byddech yn ei ad-dalu bob mis fyddai £52.
Enghraifft
Rydych ar Gynllun 4 ac mae gennych incwm o £36,000 y flwyddyn, sy’n golygu eich bod yn cael eich talu £3,000 bob mis.
Cyfrifiad:
£3,000 – £2,728 (eich incwm llai trothwy Cynllun 4) = £272
9% o £272 = £24.48
Mae hyn yn golygu mai’r swm y byddech yn ei ad-dalu bob mis fyddai £24.
Os bydd eich incwm yn newid yn ystod y flwyddyn
Byddwch yn gwneud ad-daliad os bydd eich incwm yn mynd dros y trothwy wythnosol neu fisol ar gyfer eich cynllun (er enghraifft, os telir bonws neu oramser i chi). Gallwch ofyn am ad-daliad ar ddiwedd y flwyddyn dreth os yw eich incwm blynyddol yn llai na’r trothwy blynyddol ar gyfer eich cynllun.
Llog
Mae faint o log a godir arnoch yn dibynnu ar ba fath o gynllun yr ydych arno. Faint y codir arnoch ar hyn o bryd:
- 3.2% os ydych chi ar Gynllun 1
- 3.2% os ydych chi ar Gynllun 4
- 3.2% os ydych chi ar Gynllun 5
- 6.2% os ydych chi ar gynllun Benthyciad Ôl-raddedig
Os ydych chi ar Gynllun 2
Tra byddwch yn dal i astudio, codir llog o 6.2% arnoch. Bydd y gyfradd llog yn newid naill ai:
- ar 6 Ebrill ar ôl i chi orffen neu adael eich cwrs
- ar 6 Ebrill 4 blynedd ar ôl i’r cwrs ddechrau , os ydych yn astudio’n rhan-amser a bod eich cwrs yn hwy na 4 blynedd
Ar ôl yr amser hwn, byddwch yn dechrau talu llog yn seiliedig ar eich incwm blynyddol.
| Incwm blynyddol | Cyfradd llog |
|---|---|
| £28,470 neu lai | 3.2% |
| £28,471 i £51,245 | 3.2%, ynghyd â hyd at 3% |
| £51,245 neu fwy | 6.2% |
Mae rhagor o wybodaeth ar gael ynghylch:
- sut mae llog Cynllun 1 yn cael ei gyfrifo a chyfraddau llog ar gyfer blynyddoedd blaenorol
- sut mae llog Cynllun 2 yn cael ei gyfrifo a chyfraddau llog ar gyfer blynyddoedd blaenorol
- sut mae llog Cynllun 4 yn cael ei gyfrifo a chyfraddau llog ar gyfer blynyddoedd blaenorol
- sut mae llog Cynllun 5 yn cael ei gyfrifo a chyfraddau llog ar gyfer blynyddoedd blaenorol
- sut mae llog Benthyciad Ôl-raddedig yn cael ei gyfrifo a chyfraddau llog ar gyfer blynyddoedd blaenorol
Os ydych ar fwy nag un math o gynllun ac nad oes gennych chi Fenthyciad Ôl-raddedig
Byddwch yn ad-dalu 9% o’ch incwm dros y trothwy isaf allan o’r mathau o gynlluniau sydd gennych.
Dim ond un ad-daliad a gymerir bob tro y cewch eich talu, hyd yn oed os ydych yn talu tuag at fwy nag un benthyciad.
Enghraifft
Mae gennych incwm o £38,400 y flwyddyn, sy’n golygu eich bod yn cael eich talu £3,200 y mis.
Mae £3,200 dros drothwy misol Cynllun 1 o £2,172 a throthwy misol Cynllun 2 o £2,372.
Byddwch yn ad-dalu 9% o’ch incwm dros £2,172 y mis oherwydd dyna’r trothwy isaf allan o’r mathau o gynlluniau sydd gennych.
Cyfrifiad:
£3,200 - £2,172 (eich incwm llai’r trothwy isaf) = £1,028
9% o £1,028 = £92.52
Mae hyn yn golygu mai’r swm y byddech yn ei ad-dalu bob mis fyddai £92.
Pan fydd eich ad-daliad yn caelei rannu rhwng benthyciadau
Mae terfyn (neu ‘cap’) ar y swm y gallwch ei ad-dalu bob mis tuag at y math o gynllun gyda’r trothwy isaf.
Mae’r gwahaniaeth rhwng y trothwyon ar gyfer pob cynllun yn pennu beth fydd y cap.
Os ewch chi dros y cap, bydd gweddill eich ad-daliad yn mynd tuag at eich benthyciadau eraill.
Enghraifft
Rydych ar Gynllun 1 a Chynllun 2. Rydych chi’n ad-dalu £92 y mis.
Bydd y cap yn berthnasol i’ch benthyciad Cynllun 1 oherwydd bod ganddo’r trothwy isaf. Bydd unrhyw beth rydych chi’n ei ad-dalu dros y cap wedyn yn mynd tuag at eich benthyciad Cynllun 2.
Cyfrifiad:
£2,372 - £2,172 (trothwy Cynllun 2 llai trothwy Cynllun 1) = £200
9% (cyfradd Cynllun 1) o £200 = £18
Y cap talu misol ar gyfer eich benthyciad Cynllun 1 yw £18.
Bydd £18 o’ch ad-daliad o £92 yn mynd tuag at eich benthyciad Cynllun 1 a bydd y £74 sy’n weddill yn mynd tuag at eich benthyciad Cynllun 2.
Os ydych ar fwy nag un math o gynllun a bod gennych chi Fenthyciad Ôl-raddedig
Byddwch yn ad-dalu 6% o’ch incwm dros y trothwy Benthyciad Ôl-raddedig (£21,000 y flwyddyn) a 9% o’ch incwm dros y trothwy isaf ar gyfer unrhyw fathau eraill o gynllun sydd gennych.
Enghraifft
Mae gennych Fenthyciad Ôl-raddedig a benthyciad Cynllun 2 ac mae gennych incwm o £28,800 y flwyddyn, sy’n golygu eich bod yn cael eich talu £2,400 bob mis. Mae hyn dros y trothwy Benthyciad Ôl-raddedig o £1,750 a throthwy Cynllun 2 o £2,372.
Cyfrifiad:
£2,400 – £1,750 (eich incwm llai’r trothwy Benthyciad Ôl-raddedig) = £650
6% o £650 = £39
£2,400 – £2,372 (eich incwm llai trothwy Cynllun 2) = £28
9% o £28 = £2.52
Mae hyn yn golygu mai’r swm y byddech yn ei ad-dalu bob mis fyddai £41.
Os ydych chi’n gyflogedig ac â mwy nag un cyflogwr
Byddwch ond yn gwneud ad-daliadau o swyddi lle cewch eich talu dros y trothwy ar gyfer eich math o gynllun, nid eich incwm cyfunol.
Enghraifft
Mae gennych fenthyciad Cynllun 1 ac mae gennych 2 swydd. Cyn treth a didyniadau eraill, cewch £1,000 y mis o un swydd ac £800 y mis am y llall.
Ni fydd yn rhaid i chi wneud ad-daliadau oherwydd nad yw’r naill na’r llall yn uwch na’r trothwy o £2,172 y mis.
Enghraifft
Mae gennych fenthyciad Cynllun 2 ac mae gennych 2 swydd. Cyn treth a didyniadau eraill, cewch £2,400 y mis o un swydd ac £500 y mis am y llall.
Byddwch ond yn gwneud ad-daliadau ar yr incwm o’r swydd sy’n talu £2,400 y mis i chi oherwydd ei fod yn uwch na’r trothwy o £2,372.
Os ydych chi’n hunangyflogedig neu’n cwblhau ffurflen dreth Hunanasesiad am reswm arall
Bydd Cyllid a Thollau EF (CThEF) yn cyfrifo faint rydych chi’n ei ad-dalu bob blwyddyn o’ch ffurflen dreth Hunanasesiad. Bydd eich ad-daliadau yn seiliedig ar eich incwm am y flwyddyn gyfan.
Os ydych hefyd yn gyflogedig
Bydd faint fyddwch yn ei ad-dalu yn ddibynnol ar eich incwm cyfunol ar gyfer y flwyddyn gyfan.
Enghraifft
Mae gennych fenthyciad Cynllun 1 ac rydych yn gyflogedig ac yn hunangyflogedig. Mae gennych incwm o £32,000 y flwyddyn o’ch hunan-gyflogaeth a £10,000 y flwyddyn o swydd gyda chyflogwr.
Bydd eich ffurflen dreth Hunanasesiad yn dangos bod eich incwm cyfunol yn £42,000. Mae hyn dros y trothwy blynyddol ar gyfer Cynllun 1.
Cyfrifiad:
£42,000 - £26,065 (eich incwm llai trothwy Cynllun 1) = £15,935
9% o £15,935 = £1,434.15
Mae hyn yn golygu mai’r swm y byddech yn ei ad-dalu bob blwyddyn fyddai £1,434.15.
Os ydych eisoes wedi gwneud ad-daliadau o gyflog, bydd CThEF yn eu didynnu o’r swm y mae’n rhaid i chi ei ad-dalu.