Tynnu eich cyfeiriad cartref oddi ar gofrestr Tŷ'r Cwmnïau
Sut i dynnu eich cyfeiriad cartref oddi ar y gofrestr gyhoeddus os ydych wedi'i ddefnyddio fel cyfeiriad gwasanaeth ar gyfer gohebiaeth, neu gyfeiriad cyfranddaliwr. Mae hyn hefyd yn berthnasol i PAC (LLPs) ac aelodau PAC (LLP).
Yn dilyn ymateb y llywodraeth i’r ymgynghoriad ar Dryloywder Corfforaethol a Diwygio’r Gofrestr, rydym wedi rhoi’r gorau i ddileu cofnodion a ddiddymwyd o wasanaeth Tŷ’r Cwmnïau (CHS).
Bydd cofnodion ychwanegol a ddiddymwyd ers 2010 yn cael eu rhoi yn ôl ar wasanaeth Tŷ’r Cwmnïau (CHS) o fis Ionawr 2021.
Yn flaenorol, cafodd cofnodion cwmnïau a ddiddymwyd ar wasanaeth Tŷ’r Cwmnïau (CHS) eu dileu ar ôl 6 blynedd wedi’r diddymiad. Mae’r cofnodion diddymu hyn ar gael ar hyn o bryd am 20 mlynedd ar gynnyrch eraill Tŷ’r Cwmnïau am ffi.
Os ydych yn swyddog cwmni ar hyn o bryd (neu’n flaenorol), efallai yr hoffech adolygu cofnodion eich cwmni i weld a fydd y newid hwn yn effeithio arnoch.
Pwy all wneud cais
Gellir gwneud cais i gael gwared ar gyfeiriad cartref drwy:
- unigolyn
- cwmni – ar ran cyfranddalwyr presennol neu gyn-gyfranddalwyr (aelodau)
- person sy’n cofrestru arwystl (morgais)
Ni allwch ofyn am gael gwared ar gyfeiriad swyddfa gofrestredig eich cwmni, hyd yn oed os mai eich cyfeiriad cartref ydyw.
Gwneud cais fel cwmni, neu fel person sy’n cofrestru ffi
Dim ond os yw gweithgareddau’r cwmni’n rhoi’r person, neu unrhyw un arall yn y cyfeiriad, mewn perygl o drais difrifol neu fygythiadau y gallwch wneud cais.
Er enghraifft, os yw’r cwmni’n ymwneud â sector masnach benodol o ddiwydiant.
Sut i wneud cais
Gwneud cais fel unigolyn
Cwblhewch ffurflen gais SR01.
Mae’n costio £32 i dynnu cyfeiriad o bob dogfen a restrir yn eich cais.
Mae cyfarwyddiadau llawn ar sut i anfon eich cais SR01 atom a thalu’r ffi. Byddwn yn gwrthod eich cais os na fyddwch yn talu’r ffi gywir.
Gwneud cais fel cwmni, neu berson sy’n cofrestru arwystl
Gallwch ofyn am ffurflen gais bapur drwy e-bost: dsr@companieshouse.gov.uk.
Bydd ein tîm yn eich cynghori am y broses ac yn anfon y ffurflen gywir atoch. Byddwn ond yn derbyn y ffurflenni ar y papur lliw a ddarperir.
Mae’n costio £32 i dynnu cyfeiriad o bob dogfen a restrir yn eich cais.
Anfonwch eich cais papur gydag unrhyw dystiolaeth ategol a’r ffi gywir at:
Cofrestrydd Cwmnïau
Blwch Post 4082
Caerdydd
CF14 3WE
Byddwn yn gwrthod eich cais os na fyddwch yn cynnwys y ffi gywir.
Tystiolaeth ategol
Os ydych yn gwneud cais fel cwmni neu berson sy’n cofrestru arwystl, rhaid i chi hefyd anfon datganiad o’r seiliau dros wneud y cais. Dylech hefyd gynnwys naill ai:
- tystiolaeth i gefnogi’r datganiad
- copi o’r gorchymyn llys – os yw’r llys wedi gwneud gorchymyn o dan adran 117(3)
Mae’n drosedd gwneud datganiad ffug.
Pan fyddwn yn derbyn eich cais
Byddwn yn anfon llythyr atoch i ddweud wrthych ein bod wedi derbyn eich cais. Byddwn yn gwirio’r manylion rydych wedi’u darparu ac yn adolygu eich rhesymau dros wneud y cais.
Efallai y byddwn yn gofyn i chi am ragor o dystiolaeth i gefnogi eich cais os nad oes gennym ddigon o wybodaeth. Er mwyn ein helpu i ddod i benderfyniad, byddwn hefyd yn gofyn am asesiad gan awdurdod perthnasol am natur a lefel y risg.
Unwaith y byddwn wedi prosesu eich cais, byddwn yn anfon hysbysiad atoch gyda’n penderfyniad o fewn 5 diwrnod.
Os derbynnir eich cais
Byddwn yn tynnu eich cyfeiriad o’r dogfennau a restrir yn y cais.
Os ydych yn swyddog sy’n gwasanaethu, byddwn yn disodli’r cyfeiriad.
Os nad ydych yn swyddog mwyach, neu os yw’r cwmni wedi’i ddiddymu, byddwn yn cuddio rhan o’ch cyfeiriad a dim ond yn dangos hanner cyntaf y cod post ar y gofrestr. Ar gyfer cyfeiriadau y tu allan i’r DU, dim ond y wladwriaeth neu’r dalaith a’r wlad y byddwn yn eu dangos.
Bydd yr amser y mae hyn yn ei gymryd yn amrywio yn dibynnu ar nifer y dogfennau rydych chi am eu hatal.
Byddwn yn gwrthdroi’r tynnu’n ôl os cewch eich canfod yn euog o drosedd datganiad ffug.
Os gwrthodir eich cais
Byddwn yn anfon hysbysiad atoch o fewn 5 diwrnod. Mae gennych hawl i apelio.
Sut i apelio
Gallwch apelio i’r Uchel Lys ar y sail bod y penderfyniad yn anghyfreithlon neu’n afresymol , wedi’i wneud ar sail amhriodoldeb gweithdrefnol neu fel arall yn groes i reolau cyfiawnder naturiol.
Yn yr Alban, rhaid i chi apelio i’r Llys Sesiwn.
Rhaid i chi apelio o fewn 28 diwrnod i ddyddiad hysbysiad Tŷ’r Cwmnïau. Os byddwch yn apelio ar ôl 28 diwrnod, bydd angen i’r llys fod yn fodlon bod rheswm da pam na wnaethoch apelio o fewn y cyfnod hwn.
Diweddarwyd ddiwethaf ar 5 May 2022 + show all updates
-
Added translation
-
First published.