Canllawiau

Llwybr Glyndŵr: Llwybr Cenedlaethol

Cyhoeddwyd 24 Mehefin 2026

Yn berthnasol i Loegr a Chymru

Llwybr Cenedlaethol 135 milltir (217km) o hyd yng nghanolbarth Cymru yw Llwybr Glyndŵr. Mae’n llwybr bryniog sy’n mynd dros rostir agored, tir sy’n cael ei ffermio, dros goetiroedd a thrwy goedwigoedd.  

Cafodd y llwybr ei enwi ar ôl Owain Glyndŵr, Tywysog Cymru ac arweinydd cenedlaetholgar Cymru yn yr Oesoedd Canol a gynullodd wrthryfel yn erbyn brenin Lloegr, Harri IV yn 1400.

Ynglŷn â’r llwybr 

Mae’r llwybr rhwng: 

• Trefyclo, Powys 
• Machynlleth, Powys 
• Y Trallwng, Powys 

Gallwch ddewis cerdded y llwybr cyfan, un neu ddwy o rannau penodol, neu gael hyd i lwybrau cylchol lleol sy’n cynnwys rhannau o’r llwybr.

Cewch hyd i deithiau cerdded cylchol a llinol ar wefan y Llwybrau Cenedlaethol.

Pryd i ymweld 

Mae’r llwybr ar agor drwy gydol y flwyddyn. Dylech fod yn barod am law ac eira yn y gaeaf.

Arwyddbyst ar y llwybr 

Mae’r holl Lwybrau Cenedlaethol wedi’u marcio â symbol mesen neu enw’r llwybr. Byddwch yn gweld y rhain ar hyd y llwybr, er enghraifft ar gatiau ac arwyddbyst. 

Ar Lwybr Glyndŵr fe welwch ddraig ar yr arwyddion hefyd, sef symbol Cyngor Sir Powys ar gyfer y llwybr.

Cerdded y llwybr cyfan  

• Hyd 135 milltir (217km) 
• Amser i’w gwblhau: tua 9 diwrnod - os ydych chi’n cerdded tua 15 milltir y dydd

Gallwch gerdded i’r naill gyfeiriad neu’r llall ar hyd y llwybr. Mae arwyddbyst yn dangos y llwybr i’r ddau gyfeiriad er mwyn ichi allu dewis. 

Mae’r rhan fwyaf o bobl yn dechrau’r llwybr wrth gloc y dref yn Nhrefyclo ac yn gorffen wrth y gamlas yn y Trallwng. 

Gallwch hefyd gerdded yn syth rhwng Trefyclo a’r Trallwng ar Lwybr Cenedlaethol Clawdd Offa.

Hygyrchedd ar y llwybr 

Mae Llwybr Glyndŵr yn fryniog iawn.  

Mae rhai rhannau o’r llwybr yn arw ac yn anghysbell. Efallai y bydd angen ichi ddefnyddio cwmpawd os yw hi’n niwlog yn yr ardaloedd hyn. 

Yr hyn y gallwch ei brofi ar y llwybr  

Gallwch brofi llawer o bethau ar hyd Llwybr Glyndŵr, gan gynnwys:   

• bywyd gwyllt – e.e. yn Llyn Efyrnwy a’r merlod gwyllt ger Pencoed  
• safleoedd hanesyddol a threftadaeth - fel y gwaith hynafol ar dir Castell y Blaidd  
• gwarchodfeydd natur – fel Glaslyn
• diwylliant, bwyd ac adloniant lleol 

Ar y llwybr gallwch hefyd ymweld â threfi a phentrefi bach, gan gynnwys:  

• Llanbrynmair 
• Llanwddy
• Llanidloes 
• Machynlleth

Rhannau o’r llwybr 

Gallwch dorri’r llwybr yn rhannau y gallwch gerdded ar eu hyd mewn diwrnod, neu sy’n rhoi amser ichi ymweld â phethau penodol ar y llwybr neu gerllaw.   

Ceir enghraifft isod, ond mae mwy o wybodaeth ar gael ar-lein ac mewn arweinlyfrau er mwyn helpu i gynllunio eich taith.

Trefyclo i Felindre – 15 milltir (24km) 

Mae’r llwybr yn esgyn allan o Drefyclo a thrwy goetir a chefn gwlad. Mae’n mynd tuag at rostir Beacon Hill cyn troi i lawr i Felindre.

Felindre i Abaty Cwm-hir – 15.5 milltir (25km) 

Mae’r llwybr yn esgyn i dir pori uchel a heibio fferm wynt Garreg Lwyd a Chastell y Blaidd. Yna mae’n mynd i rostir eang, agored Ysgwd Ffordd ac yna drwy goetir i Abaty Cwm-hir. 

Abaty Cwm-hir i Lanidloes – 15.5 milltir (25km) 

Byddwch yn esgyn ac yn disgyn droeon ar y rhan fryniog yma.  Mae’r llwybr yn mynd drwy dir fferm uchel, coedwigoedd, dyffrynnoedd a choetiroedd hynafol i dref Llanidloes.

Llanidloes i Ddylife – 14.5 milltir (23.5km) 

Mae’r rhan yma o’r llwybr yn dechrau drwy groesi pont dros afon Hafren. Mae’r llwybr yn parhau drwy goetir a phorfa i fwynglawdd Bryntail ac argae Clywedog. Mae’n codi’n uchel uwchben cronfa ddŵr Clywedog ac ymlaen i’r hen ffordd Rufeinig i Ddylife. 

Dylife i Fachynlleth – 14.5 milltir (23.5km) 

Mae’r llwybr yn dychwelyd i’r ffordd Rufeinig, yna i rostir uchel a heibio i lyn Glaslyn. Mae’n parhau i dref Machynlleth.

Machynlleth i Lanbrynmair – 16 milltir (25.5km) 

Mae’r llwybr yn esgyn o Fachynlleth gan ddilyn trywydd y grib. Mae’n parhau wedyn dros y bryniau uwchben Afon Twymyn cyn mynd i lawr i Lanbrynmair.

Llanbrynmair i Lanwddyn – 18 milltir (29km) 

Mae’r llwybr yn mynd drwy dref Pencoed ac i mewn i goedwig Dyfnant. Yna mae’r llwybr yn mynd i mewn i Lanwddyn gyda golygfeydd o Lyn Efyrnwy a’r argae.

Llanwddyn i Feifod – 15 milltir (24km) 

Mae’r llwybr yn gadael y gronfa ddŵr ac yn parhau ar hyd rhannau o Afon Efyrnwy, gan fynd drwy ychydig o bentrefi cyn cyrraedd Meifod.

Meifod i’r Trallwng – 11 milltir (17.5km) 

Mae’r llwybr yn cychwyn mewn coetir ac yn mynd drwy dirwedd dawel tuag at y pwynt trig ar fryn mawr Y Golfa. Mae wedyn yn disgyn yn raddol ac yn rhwydd drwy dir parc Plas Llanerchydol i dref y Trallwng.

Mapiau ar gyfer y llwybr 

Cewch hyd i:  

• fap ar wefan y Llwybrau Cenedlaethol – gallwch hefyd lawrlwytho data GPX  
• mapiau ac arweinlyfrau eraill ar-lein ac mewn print 
• teithiau cerdded cylchol a llinol ar-lein a gan eich cyngor lleol

Dyma fapiau Explorer yr Arolwg Ordnans (OS) sy’n cynnwys Llwybr Glyndŵr:  

• 201 Trefyclo a Llanandras 
• 214 Llanidloes a’r Drenewydd 
• 215 Y Drenewydd a Machynlleth 
• OL23 Cadair Idris a Llyn Tegid 
• 239 Llyn Efyrnwy a Llanfyllin 
• 216 Y Trallwng a Threfaldwyn

Gwyro neu gau rhannau o’r llwybr   

Efallai y byddwch yn dod ar draws mân wyriadau neu newidiadau i’r llwybr yn unol â’r tymor neu’r llanw. Bydd y rhain wedi’u dangos yn glir, a dylech ddilyn yr arwyddbyst ar y llwybr bob tro. 

Paratowch am eich ymweliad 

Darllenwch ganllawiau ar sut i baratoi ar gyfer eich ymweliad i gael gwybodaeth am:  

• wirio’r llwybr – gan gynnwys gwybodaeth am wyriadau neu rannau o’r llwybr sydd wedi cau  
• cynllunio eich taith
• beth i’w baratoi cyn ichi gychwyn 
• beth i’w wneud ar y llwybr

Manylion cyswllt 

Defnyddiwch y ffurflen ar-lein Llwybrau Cenedlaethol berthnasol i:  

• roi gwybod am broblem
• gofyn cwestiwn am hygyrchedd ar y llwybr
• canfod cyfleoedd i wirfoddoli

Cysylltwch â’r cyngor lleol i roi gwybod am broblem ar y llwybr, er enghraifft rhwystrau, diffyg cynnal a chadw neu arwydd camarweiniol.