“Mae Cymru ar agor i fusnes”
Gweinidogion Swyddfa Cymru yn cefnogi Wythnos Twristiaeth Cymru
Chirk Castle
O’i llwybrau beicio mynydd cyffrous i’w phensaernïaeth hanesyddol fawreddog a’i hamgueddfeydd sy’n llawn chwedlau hanesyddol, bydd Gweinidogion Swyddfa Cymru yn tynnu sylw at y ffaith fod Cymru ar agor i fusnes, wrth iddynt ddathlu dechrau Wythnos Twristiaeth Cymru (22 Chwefror – 3 Mawrth).
Mae Wythnos Twristiaeth Cymru 2014 yn wythnos llawn digwyddiadau i ddathlu ac arddangos bwrlwm a safon profiadau ymwelwyr a gwerth y diwydiant twristiaeth i economi Cymru.
Daw’r ymweliadau hyn yn ystod blwyddyn pan fydd llygaid y byd ar Gymru, wrth i Westy’r Celtic Manor baratoi i groesawu arweinwyr y byd i Uwch Gynhadledd NATO 2014. Bydd Abertawe a Sir Gaerfyrddin hefyd yn talu teyrnged i’w mab enwocaf drwy gynnal cyfres o ddigwyddiadau i ddathlu canmlwyddiant Dylan Thomas.
Bydd Gweinidogion Swyddfa Cymru i gyd yn dathlu Wythnos Twristiaeth Cymru eleni drwy ymweld â chyrchfannau i dwristiaid hyd a lled y wlad, gan dynnu sylw at y ffaith bod Cymru ar agor i fusnes, er gwaethaf y tywydd yn ddiweddar.
Dywedodd David Jones, Ysgrifennydd Gwladol Cymru:
Mae cynyddu twristiaeth yn y Deyrnas Unedig yn flaenoriaeth allweddol i’r Llywodraeth hon, ac mae sicrhau cyfran fwy o wariant y twristiaid rhyngwladol rydyn ni’n eu denu yn her allweddol i Gymru.
Mae’r sector twristiaeth yn gwneud cyfraniad allweddol at les cymdeithasol ac economaidd Cymru, ac mae’n hanfodol ein bod yn gwneud popeth o fewn ein gallu i ddenu ymwelwyr o gartref a thramor i brofi ein diwylliant a’n hanes cyfoethog.
Y llynedd, amcangyfrifir bod economi twristiaeth yng Nghymru wedi cyfrannu £6.9 biliwn i GDP y DU, gan gynnal dros 200,000 o swyddi yng Nghymru. Yn ystod tri chwarter cyntaf 2013, daeth 702,000 o ymwelwyr o dramor i Gymru, gan wario £289miliwn.
Bydd yr Ysgrifennydd Gwladol yn mynd i Gastell y Waun, Wrecsam gyda Llysgennad Indonesia, Ei Ardderchogrwydd Mr. Teuku Mohammad Hamzah Thayeb, yn ystod Wythnos Twristiaeth Cymru, gyda’r nod o hyrwyddo rhai o brif atyniadau twristiaeth Cymru i ymwelwyr o dramor.
Byddant yn cael eu croesawu gan Reolwr yr Eiddo, Shane Logan a Rheolwr y Tŷ a’r Casgliadau, a fydd yn eu tywys ar daith o amgylch gerddi ac ystafelloedd swyddogol eiddo’r Ymddiriedolaeth Genedlaethol.
Mae’r Ysgrifennydd Gwladol ar daith fasnach ym Malaysia ar hyn o bryd, yn cwrdd ag arweinwyr busnes allweddol i ddatblygu’r cysylltiadau busnes sy’n bodoli yn ogystal â rhai newydd, ac edrych ar ragor o gyfleoedd i gwmnïau a sefydliadau o’r DU weithio yn y ddau ranbarth.
Ychwanegodd:
Mae Swyddfa Cymru’n gweithio’n galed gartref a thramor i hyrwyddo Cymru fel cyrchfan ar gyfer twristiaeth a buddsoddi.
Yn dilyn llwyddiant y Gemau Olympaidd yn 2012, fe wnaethom lansio’r ymgyrch GREAT yn 2013, i farchnata Prydain ar ei gorau, o ran twristiaeth, masnach, creadigrwydd a buddsoddi, i weddill y byd. Mae gan Gymru gymaint i ddenu ymwelwyr, a rhaid i ni wneud yn siŵr bod ymwelwyr o dramor yn ein hystyried ni pan fyddan nhw’n bwriadu dod i’r Deyrnas Unedig.
Bydd y Gweinidog yn Swyddfa Cymru sy’n gyfrifol am dwristiaeth, y Farwnes Jenny Randerson, yn ymweld â dau o brif gyrchfannau twristiaeth ardal Casnewydd – gan dynnu sylw at yr atyniadau i dwristiaid y bydd cynrychiolwyr yn gallu eu gweld yn ystod Uwch Gynhadledd NATO yn ddiweddarach eleni.
Bydd yn mynd i Amgueddfa Genedlaethol y Lleng Rufeinig yng Nghaerllion cyn cael ei thywys ar daith o amgylch eiddo’r Ymddiriedolaeth Genedlaethol sy’n dyddio i’r ail ganrif ar bymtheg, Tŷ Tredegar, gan Justin Albert, Cyfarwyddwr Ymddiriedolaeth Genedlaethol Cymru.
Dywedodd y Farwnes Randerson:
Mae Wythnos Twristiaeth Cymru yn ein hatgoffa ni am y cyfleoedd sydd ar gael ar garreg ein drws yn ogystal ag annog mwy o ymwelwyr i ddod i Gymru.
Un o’r heriau pwysig i Gymru yw sicrhau bod mwy o’r arian sy’n cael ei wario gan dwristiaid o dramor yn y DU yn dod i Gymru, ac mae’n hollbwysig bod Llywodraeth y DU a Llywodraeth Cymru yn cydweithio i gyflawni hyn.
Bydd NATO ei hun yn cynnig cyfleoedd gwych i hyrwyddo Cymru i’r byd. Rhaid i ni sicrhau bod pawb sy’n dod yma’n mynd yn ôl adref gyda neges glir ynghylch popeth sydd gan Gymru, ei phobl a’i thirwedd nodedig i’w gynnig i weddill y byd. Rwy’n falch iawn o gael cyfle i gael cipolwg o’r hyn y bydd y cynrychiolwyr yn gallu eu gweld pan fyddan nhw’n dod i Gymru ym mis Medi.
Bydd un o Weinidogion Swyddfa Cymru, Stephen Crabb, yn mynd allan i’r awyr agored fel rhan o’i ymweliadau yn ystod Wythnos Twristiaeth Cymru.
Bydd Mr Crabb yn mynd ar ei feic i fwynhau rhai o’r 23 darn o lwybrau beicio mynydd yn BikePark Wales, Merthyr Tudful.
Agorodd BikePark Wales ym mis Awst 2013, a dyma’r ganolfan llwybrau mynydd bwrpasol, fasnachol, ar raddfa fawr, gyntaf yn y DU, ac mae eisoes yn dod yn atyniad pwysig i dwristiaid. Daeth dros 20,000 o ymwelwyr yno yn ystod y pum mis cyntaf ar ôl agor.
Yna bydd y Gweinidog yn mynd ar daith o amgylch Distyllfa Penderyn, enillydd Gwobr Twristiaeth Rhanbarthol yng Ngwobrau Twristiaeth Cenedlaethol Cymru 2013. Mae Distyllfa Penderyn y Cwmni Wisgi Cymreig, wedi sefydlu ei hun fel gwir atyniad i dwristiaid yng Nghymru, yn ogystal ag fel un o allforion busnes mwyaf llwyddiannus y wlad.
Bydd Mr Crabb yn mynd ar daith o amgylch y ddistyllfa ac yn cwrdd â’r rheolwr gyfarwyddwr, Stephen Davies.
Dywedodd Gweinidog Swyddfa Cymru, Stephen Crabb AS:
Mae Wythnos Twristiaeth Cymru’n rhoi cyfle i ni godi ymwybyddiaeth am yr amrywiaeth o atyniadau sydd gan drigolion Cymru ar stepen eu drws.
Pa un a ydyn ni’n teithio ar ddwy olwyn neu ar ddwy droed, mae gennyn ni gyfleusterau o’r radd flaenaf mewn amrywiaeth eang o weithgareddau twristiaeth awyr agored, sy’n dangos beth sydd gan Gymru i’w gynnig i ymwelwyr yn ei hamgylchedd naturiol.
Gyda digon i’w wneud a’i weld o dan do ac yn yr awyr agored, rydyn ni’n edrych ymlaen at groesawu ymwelwyr i Gymru drwy gydol y flwyddyn.
Nodiadau i Olygyddion
-
Cynhelir Wythnos Twristiaeth Cymru rhwng 22 Chwefror a 02 Mawrth 2014
-
Mae Cynghrair Twristiaeth Cymru, llais y diwydiant twristiaeth yng Nghymru, yn cydlynu Wythnos Twristiaeth Cymru, mewn cydweithrediad â’r diwydiant. Cynhelir Wythnos Twristiaeth Cymru bob blwyddyn i godi proffil y diwydiant twristiaeth yng Nghymru a thynnu sylw at ba mor werthfawr ydyw o ran cynhyrchu incwm a’r cyfleoedd y mae’n eu cyflwyno ar gyfer swyddi a gyrfaoedd.
-
Yn 2012, lansiodd VisitBritain ei raglen fwyaf uchelgeisiol ers deg mlynedd ar gyfer marchnata twristiaeth: “GREAT Britain You’re invited”. Nod yr ymgyrch yw dangos i’r byd bod Prydain ar agor i fusnes; ei fod yn lle gwych i ymweld ag o, i fyw ynddo ac i fuddsoddi ynddo.