Darparu ar gyfer y Gymru Gymraeg: Llywodraeth y DU yn lansio canllawiau cyfathrebu dwyieithog
Ysgrifennydd Gwladol Cymru yn cyhoeddi canllaw newydd mewn digwyddiad ar y cyd yn yr Eisteddfod gyda Comisiynydd y Gymraeg
Mae Ysgrifennydd Cymru Alun Cairns wedi lansio canllawiau newydd ar gyfer adrannau Llywodraeth y DU wrth gynllunio a darparu gweithgarwch cyfathrebu dwyieithog sydd wedi’i anelu at gynulleidfaoedd yng Nghymru. Cafodd y canllawiau, sef y cyntaf o’u math ar gyfer Llywodraeth y DU, eu cyhoeddi gan Aled Roberts, Comisiynydd y Gymraeg, mewn digwyddiad cydweithredol ar ddydd Llun [5 Awst] ym mhafiliwn S4C yn yr Eisteddfod Genedlaethol yn Llanrwst.
Mae’r canllawiau wedi cael eu cymeradwyo gan swyddfa’r Comisiynydd, yn ogystal â Gwasanaeth Cyfathrebiadau’r Llywodraeth, y corff proffesiynol ar gyfer pobl sy’n gweithio mewn swyddi cyfathrebu ledled y llywodraeth. Mae argymhellion ac arferion gorau i’w gweld yma ynghylch creu cynnwys dwyieithog o ansawdd mewn meysydd sy’n cynnwys digwyddiadau, ymgynghoriadau ac ymgyrchoedd.
Mae Deddf yr Iaith Gymraeg yn rhoi dyletswydd ar sefydliadau cyhoeddus i drin y Gymraeg a’r Saesneg yn gyfartal wrth ddarparu gwasanaethau i’r cyhoedd yng Nghymru. mae 11 o adrannau Llywodraeth y DU yn gweithredu cynlluniau iaith Gymraeg eu hunain o ganlyniad i’r Ddeddf, gyda mwy yn dilyn yn fuan.
Bwriad y canllawiau newydd yw ategu’r cynlluniau Cymraeg adrannol hyn, gan ddarparu enghreifftiau ymarferol er mwyn sicrhau bod cyfathrebwyr yn gwella ansawdd yr allbwn dwyieithog ac yn galluogi dinasyddion a busnesau ym mhob rhan o Gymru i fynd ati’n well i ymgysylltu â gwaith adrannau Llywodraeth y DU.
Dywedodd yr Ysgrifennydd Gwladol, Alun Cairns:
Yng Nghymru, mae dyletswydd arnom ni i gynrychioli’r cynulleidfaoedd rydyn ni’n eu gwasanaethu. Mae’r Gymraeg yn un o ieithoedd y DU ac i lawer o bobl, mae’n rhan annatod o’u hunaniaeth, i’r rheini sy’n ei siarad yn rhugl ac i ddysgwyr hefyd.
Mae Llywodraeth y DU wedi ymrwymo i gefnogi’r uchelgais o gael miliwn o siaradwyr Cymraeg erbyn 2050. Bydd y canllawiau hyn yn helpu’r bobl sy’n gweithio ar draws y ddwy lywodraeth yng Nghymru ac yn Whitehall i’n helpu ni i gyflawni’r targed, drwy sicrhau bod yr iaith yn cael ei gweld a’i chlywed, ac yn bwysicaf oll, ei bod yn hygyrch.
Dywedodd Aled Roberts, Comisiynydd y Gymraeg:
Rydym yn croesawu y gwaith sydd wedi ei wneud ar y canllaw newydd hwn. Mae’n cynnwys enghreifftiau o arfer da ac argymhellion a’r gobaith ydy y bydd yn sicrhau fod y Gymraeg yn cael lle blaenllaw wrth gynllunio a chynnal digwyddiadau, ymgyrchoedd hyrwyddo a negeseuon ar gyfryngau cymdeithasol yng Nghymru.