Dathlu diwylliant a llwyddiant Cymru gyda Thywysog Cymru
Bydd Ei Uchelder Brenhinol Tywysog Cymru yn dod ag arweinwyr byd a phobl leol at ei gilydd i arddangos y gorau o Gymru yn Uwchgynhadledd NATO
Celtic Manor Resort
Bydd y derbyniad, sy’n cael ei gynnal gan y Tywysog ar gais Llywodraeth Ei Mawrhydi, yn digwydd yng Ngwesty’r Celtic Manor yng Nghasnewydd ddydd Iau 4 Medi. Bydd hefyd yn gyfle i Lywodraeth Ei Mawrhydi ddiolch i bobl o bob rhan o Gymru a fydd wedi bod yn ymwneud â threfnu’r cynulliad mwyaf o arweinwyr y byd a welwyd yn y DU erioed.
Bydd y Prif Weinidog, Prif Weinidog Cymru, Carwyn Jones ac Ysgrifennydd Gwladol Cymru, Stephen Crabb, yn ymuno â’r Tywysog yn yr achlysur lle bydd y gwesteion yn cael blas ar Gymru ac adloniant gan rai o sêr y byd cerddorol yng Nghymru.
Mae cynrychiolwyr o’r Cynghorau lleol, y byd busnes, plant ysgol a chadetiaid wedi cael eu gwahodd i fod yn rhan o’r achlysur ynghyd ag enillwyr Gwobrau ‘Points of Light’ a Gwobrau Dewi Sant o Gymru.
Dywedodd Stephen Crabb, Ysgrifennydd Gwladol Cymru:
Mae Cymru yn genedl hyderus ac allblyg ac mae’n destun balchder i ni ein bod yn cynnal yr Uwchgynhadledd NATO hanesyddol hon.
Mae’r derbyniad hwn dan arweiniad Tywysog Cymru yn gyfle i ni hyrwyddo Cymru i’r byd ac i ddiolch i’r gymuned leol am eu croeso anhygoel.
Cynhelir yr Uwchgynhadledd yng Nghasnewydd, yng Ngwesty’r Celtic Manor ar 4 a 5 Medi 2014. Mae’n gyfle gwych i hoelio sylw’r byd ar Gymru sydd eisoes ag enw da iawn yn y sector masnachol – o weithgynhyrchu i arloesi, ac o wyddorau bywyd i cyber – a phrifysgolion ardderchog sy’n cyfrannu at hyn.
Gwahoddwyd chwe deg o wladweinyddion o aelod-wladwriaethau NATO, a chenhedloedd sy’n bartneriaid i NATO, i ddiwrnod agoriadol yr Uwchgynhadledd ac i’r derbyniad gyda’r nos.
Rhagor o wybodaeth am Uwchgynhadledd NATO yng Nghymru 2014 neu dilynwch gyfrif Twitter swyddogol yr uwchgynhadledd @NATOWales
Diweddarwyd ddiwethaf ar 26 August 2014 + show all updates
-
Added translation
-
Added translation
-
Added translation
-
First published.