Galwad am dystiolaeth wedi'i lansio ar sut i ddiogelu ceir clasurol ar gyfer y dyfodol a chefnogi gyrwyr
Dweud eich dweud ar newidiadau posibl i gofrestru cerbydau hanesyddol, clasurol, a cherbydau a drosir yn drydanol.
- gall y diwydiant ceir clasurol a selogion gyrru helpu i lunio polisi’r dyfodol ar sut i amddiffyn eiconau moduro a’u gwneud yn addas ar gyfer yr oes fodern
- gallai cofrestru Aston Martin DB5 steil James Bond ar ôl iddo gael ei adfer neu ôl-osod modur trydan i’r DMC DeLorean eiconig ddod yn haws, gan gefnogi swyddi yn y diwydiant ceir clasurol gwerth £18 biliwn
- mae’n dilyn y Cynllun ar gyfer Gyrwyr a’r buddsoddiad mwyaf erioed o £8.3 biliwn i ailwynebu ffyrdd lleol ledled Lloegr, wrth i’r llywodraeth barhau i gefnogi gyrwyr
Gall selogion ceir a’r diwydiant nawr ddweud eu dweud ar sut i ddiogelu ceir clasurol eiconig fel y DMC DeLorean, MkII Jaguar ac Aston Martin DB5 James Bond am ddegawdau i ddod.
Heddiw (9 Mai 2024), mae’r llywodraeth yn lansio galwad am dystiolaeth i gasglu barn ar sut y gellir cadw ceir clasurol a hanesyddol ar gyfer cenedlaethau’r dyfodol a rhoi hwb i swyddi yn y sector ceir clasurol gwerth £18 biliwn.
Ers y 1980au, mae polisïau ar sut mae ceir clasurol yn cael eu cofrestru ar ôl cael eu hadfer a’u huwchraddio wedi aros yr un fath i raddau helaeth, ac nid ydynt yn cyfrif am wella cerbydau hanesyddol gyda thechnoleg fodern.
Bydd yr alwad am dystiolaeth gan yr Asiantaeth Trwyddedu Gyrwyr a Cherbydau (DVLA) yn gofyn i yrwyr, selogion ceir clasurol a’r diwydiant rannu eu cynigion i helpu cerbydau hanesyddol i’r 21ain ganrif, gan flaenoriaethu diogelwch ar y ffyrdd a chadw cofnodion cerbydau cywir.
Gallai newidiadau ei gwneud hi’n haws cofrestru cerbydau i gydnabod eu gwerth yn llawn wrth ddiogelu darpar brynwyr, addasu ceir clasurol i wella eu perfformiad a’u hôl-osod â threnau pŵer trydan.
Gydag Aston Martin DB5 eiconig James Bond, MkII Jaguar yr Arolygydd Morse a’r DMC DeLorean a adeiladwyd ym Melffast o ‘Back to the Future’ wedi’u hymgorffori’n gadarn mewn diwylliant poblogaidd, mae’r alwad heddiw am dystiolaeth yn gyfle i selogion ceir clasurol a’r diwydiant moduro ddweud eu dweud ar sut y gall y rhain ac eiconau moduro eraill barhau i fod yn enghraifft o ragoriaeth Brydeinig yn y DU ac ar draws y byd.
Gall cadw ceir clasurol yn well hefyd helpu i yrru twristiaeth i sioeau ceir clasurol eiconig fel Goodwood Revival. Gyda’r diwydiant ceir clasurol yn cyflogi tua 113,000 o bobl fedrus ac yn werth £18 biliwn y flwyddyn, bydd yr alwad am dystiolaeth yn helpu i gefnogi swyddi yn y diwydiant ceir treftadaeth ac yn helpu i dyfu’r economi.
Dywedodd yr Ysgrifennydd dros Drafnidiaeth, Mark Harper:
Nid yw’r ffordd yr ydym yn adfer ac yn diogelu ceir clasurol wedi cadw i fyny â’r oes a’r technolegau sy’n esblygu, a dyna pam rydym yn galw ar y diwydiant ac ar selogion i ddweud eu dweud ar y ffordd orau o ddiogelu’r clasuron Prydeinig hyn am ddegawdau i ddod.
Ochr yn ochr â’n cynnydd uchaf erioed o £8.3 biliwn i ailwynebu ffyrdd lleol a’r Cynllun 30 Pwynt ar gyfer Gyrwyr, yr alwad heddiw am dystiolaeth yw rhan ddiweddaraf cynllun y llywodraeth i gefnogi gyrwyr, cefnogi swyddi medrus, a thyfu’r economi.
Yr alwad am dystiolaeth yw’r mesur diweddaraf i gefnogi gyrwyr ledled y wlad, yn dilyn £8.3 biliwn i ailwynebu ffyrdd ledled Lloegr, yr hwb ariannol mwyaf erioed i gynnal a chadw ffyrdd lleol wrth inni fynd i’r afael â thyllau yn y ffordd a gwella ffyrdd lleol.
Mae’r llywodraeth hefyd yn cyflawni dros fodurwyr drwy’r Cynllun ar gyfer Gyrwyr, gan gynnwys sicrhau bod cynlluniau traffig fel Cymdogaethau Traffig Isel a therfynau cyflymder 20mya yn cael eu hymrwymo gan bobl leol, ymgynghori ar fesurau i atal cynghorau rhag trin gyrwyr fel ‘peiriannau pres’ a chyflymu’r broses o gyflwyno mannau gwefru cerbydau trydan i’r rhai sy’n dewis newid.
Bydd gyrwyr hefyd yn gallu mwynhau siwrneiau llyfnach yn dilyn cyflwyno mesurau newydd i fynd i’r afael â gwaith stryd aflonyddgar, gyda chwmnïau cyfleustodau sy’n caniatáu i waith or-redeg wynebu dirwyon cynyddol, a allai gynhyrchu hyd at £100 miliwn yn ychwanegol i wella ffyrdd lleol.
Dywedodd Julie Lennard, Prif Weithredwr DVLA:
Wrth i dechnolegau esblygol barhau i wella’r ffordd y gellir addasu ac adfer cerbydau clasurol, hanesyddol ac wedi’u hail-adeiladu, rydym am sicrhau ein bod yn cadw’r polisïau a’r prosesau cofrestru ar gyfer y cerbydau hyn yn gyfredol.
Dyma un o’r nifer o ffyrdd yr ydym yn ceisio gwneud pethau’n haws ac yn symlach i’n cwsmeriaid ac rydym am annog selogion a’r unigolion a’r sefydliadau hynny sydd â diddordeb ac arbenigedd brwd i rannu eu barn gyda ni.
Ymholiadau cyfryngau ffyrdd
Ymholiadau’r cyfryngau 0300 7777 878
Switsfwrdd 0300 330 3000