Digwyddiadau bwyd neu fwyd anifeiliaid: galw a thynnu cynhyrchion yn ôl
Beth i’w wneud
Casglwch wybodaeth am y digwyddiad ac ewch ati i olrhain eich cyflenwyr a’ch cwsmeriaid busnes, fel eich bod chi’n gwybod pa fwyd neu fwyd anifeiliaid yr effeithir arnynt a beth yw’r risgiau i ddefnyddwyr.
Yna, mae’n rhaid i chi wneud y canlynol:
- tynnu’r bwyd neu’r bwyd anifeiliaid yn ôl o’r gadwyn gyflenwi ar unwaith
- cyhoeddi rhybudd i alw’r cynnyrch yn ôl os yw wedi cyrraedd defnyddwyr neu anifeiliaid
- dweud wrth dîm diogelwch bwyd eich awdurdod lleol neu awdurdod iechyd porthladd
- dweud wrth yr Asiantaeth Safonau Bwyd (ASB) am y digwyddiad os yw eich busnes wedi cael ei gymeradwyo gan dîm milfeddygol yr ASB
- dweud wrth eich awdurdod lleol neu’r ASB os yw’r cynnyrch wedi’i ddosbarthu y tu allan i’r DU
- cymryd camau i atal digwyddiadau yn y dyfodol
Os na fyddwch chi’n mynd i’r afael â digwyddiad, gallai eich busnes gael ei atal rhag cynhyrchu bwyd neu fwyd anifeiliaid. Gallech gael dirwy neu, mewn achosion difrifol, gael eich erlyn.
Bydd eich awdurdod lleol yn rhoi gwybod i dîm digwyddiadau’r ASB. Gallwch hefyd roi gwybod i’r ASB eich hun os yw’r bwyd neu’r bwyd anifeiliaid eisoes wedi cyrraedd defnyddwyr neu anifeiliaid.
Mae’r canllawiau hyn hefyd ar gael yn Saesneg (English).
Tynnu cynhyrchion yn ôl
Rhaid i chi dynnu fwyd neu fwyd anifeiliaid sydd wedi’i labelu’n anghywir, nad yw’n cydymffurfio, neu sy’n anniogel yn ôl o’r gadwyn gyflenwi. Gwnewch hyn ar unwaith, cyn iddo gyrraedd defnyddwyr neu anifeiliaid.
Rhaid i chi ddweud wrth unrhyw fusnesau eraill rydych chi wedi gwerthu’r bwyd neu’r bwyd anifeiliaid iddynt am y digwyddiad. Nodwch y canlynol:
- pa gynnyrch a swp yr effeithir arno
- pam mae’r cynnyrch wedi’i dynnu’n ôl
- beth dylen nhw ei wneud nesaf, er enghraifft dychwelyd y cynnyrch neu gael gwared arno’n ddiogel
Galw cynhyrchion yn ôl
Os yw’r bwyd neu’r bwyd anifeiliaid eisoes wedi cyrraedd defnyddwyr neu berchnogion anifeiliaid, mae angen i chi alw’r cynnyrch yn ôl.
Rhaid i chi gysylltu â defnyddwyr. Rhannwch wybodaeth gywir am y canlynol:
- manylion y cynnyrch, fel yr enw, y maint, y dyddiadau ‘ar ei orau cyn’ neu ‘defnyddio erbyn’ a chod y swp
- delwedd o’r cynnyrch
- y rheswm dros alw’r cynnyrch yn ôl
- beth dylen nhw ei wneud os ydyn nhw wedi prynu’r cynnyrch, gan gynnwys a yw’n ddiogel ei fwyta, a ddylen nhw ei ddychwelyd ac a allan nhw gael ad-daliad
- sut i gael gwared ar y cynnyrch yn ddiogel – siaradwch â’ch awdurdod lleol am hyn
- ble i gael rhagor o wybodaeth
Rhaid i chi gyfathrebu â defnyddwyr yn effeithiol. Gallech ddefnyddio posteri yn eich siop, eich gwefan, cyfryngau cymdeithasol neu gyfathrebiadau marchnata. Gallech hefyd gysylltu â sefydliadau defnyddwyr, cleifion neu alergeddau penodol.
Os ydych chi wedi gwerthu’r cynnyrch i fusnes arall, dywedwch wrtho am roi gwybod i’w gwsmeriaid fod y cynnyrch wedi’i alw yn ôl.
Defnyddiwch y dogfennau templed hyn i’ch helpu i alw cynnyrch yn ôl.
Beth i’w wneud â bwyd a bwyd anifeiliaid anniogel
Os bydd gennych fwyd neu fwyd anifeiliaid sy’n anniogel, sydd wedi’i labelu’n anghywir, neu nad yw’n cydymffurfio, dylech wneud y canlynol:
- storio bwyd anniogel ar wahân i fwyd diogel
- labelu’r bwyd yn glir
- bod â chynllun ar waith ar gyfer delio â bwyd anniogel sy’n cael ei ddychwelyd atoch chi
- cael gwared ar y bwyd yn ddiogel – siaradwch â’ch awdurdod lleol a dilyn cyfreithiau gwaredu gwastraff perthnasol, gan gynnwys y rhai ar gyfer cynhyrchion anifeiliaid
- dogfennu’r hyn rydych chi’n ei wneud gyda’r bwyd, gan gynnwys sut rydych chi’n cael gwared arno’n ddiogel
Efallai y byddwch chi’n gallu gwneud y bwyd neu’r bwyd anifeiliaid yn ddiogel, er enghraifft trwy ail-labelu bwyd fel ei fod yn nodi ei fod yn cynnwys alergen. Rhaid i chi gael caniatâd gan dîm diogelwch bwyd eich awdurdod lleol neu awdurdod iechyd porthladd cyn i chi wneud hyn.