Skip to main content

Y drefn ddiogelwch mewn adeilad llys neu dribiwnlys

Mae’n rhaid i chi ddilyn y drefn ddiogelwch bob tro rydych yn mynd i mewn i adeilad llys neu dribiwnlys.

Caniatewch digon o amser i wneud hyn. Efallai y bydd rhaid i chi sefyll mewn ciw rhwng 9am a 10am ar ddyddiau gwaith.

Mae yna reolau ynghylch pa eitemau y gallwch fynd efo chi.

Mae’r cyfarwyddyd hwn hefyd ar gael yn Saesneg (English).

Eitemau na chaniateir i chi fynd efo chi

Ni allwch fynd â gynnau, drylliau, cyllyll neu arfau eraill i mewn i’r adeilad.

Byddwch yn cael eich riportio i’r heddlu os byddwch yn ceisio mynd ag arf i mewn i adeilad llys neu dribiwnlys.

Ni allwch chwaith fynd ag eitemau y mae’r staff diogelwch yn credu y gellid eu defnyddio fel arf, hyd yn oed os ydych chi’n meddwl eu bod yn ddiniwed.

Mae’r rhain yn cynnwys pethau fel:

  • llafnau – siswrn, cyllell boced a rasal
  • eitemau miniog eraill – gweill a dartiau
  • gwydr – er enghraifft poteli
  • cyllyll a ffyrc metel
  • chwistrellau (oni bai bod gennych bresgripsiwn)
  • gynnau tegan ac eitemau eraill sy’n edrych fel gynnau
  • tŵls – er enghraifft sgriwdreifar, morthwyl a hoelion
  • rhaffau a chadwyni
  • alcohol
  • hylifau nad ydynt yn ddiodydd neu’n feddyginiaeth ar bresgripsiwn - fel olew, persawr, petrol leitar a chynhyrchion glanhau
  • ymbarelau hyd llawn
  • helmedau

Ni chewch ddod ag e-feiciau neu e-sgwteri i mewn i adeilad llys neu dribiwnlys.

Eitemau y caniateir i chi fynd efo chi

Cewch fynd â ffonau a chamerâu i mewn efo chi, ond ni ddylech eu defnyddio i dynnu lluniau neu ffilmio gwrandawiad.

Cewch ddod â hylif diheintio dwylo i mewn efo chi. Fe ofynnir i chi ei ddefnyddio o flaen y staff diogelwch i brofi nad yw’n niweidiol.

Diodydd

Cewch fynd â:

  • diodydd mewn cartonau neu ganiau sydd heb eu hagor
  • diodydd mewn potel, fflasg neu gwpan â chaead - ni chaniateir iddynt fod yn rhai gwydr

Os bydd eich diod wedi’i agor, neu mewn potel, fflasg neu gwpan, fe ofynnir i chi yfed rhywfaint ohono i brofi nad yw’n niweidiol.

Meddyginiaeth

Cewch fynd â meddyginiaeth ar bresgripsiwn i mewn efo chi. Rhaid bod label y fferyllydd gyda’ch enw a’r dyddiad y cawsoch y presgripsiwn ar y feddyginiaeth.

Bydd y staff diogelwch yn gwirio’r label. Ni fyddant yn cofnodi nac yn rhannu’r wybodaeth. Darllenwch fwy am sut y defnyddir eich gwybodaeth bersonol.

Gwiriadau diogelwch

Mae’n rhaid i chi gael gwiriad diogelwch fel y byddech yn cael mewn maes awyr. Gall hyn gynnwys:

  • gwacio’ch pocedi a rhoi’r cynnwys mewn basged
  • tynnu eich esgidiau, cot, menig neu het
  • gofyn i chi dynnu neu agor eich belt
  • cerdded drwy fwa diogelwch
  • cael chwiliad â llaw neu gyda sganiwr llaw

Os ydych chi’n gwisgo penwisg am resymau crefyddol neu ddiwylliannol, gallwch ofyn iddi gael ei gwirio â sganiwr llaw fel nad oes rhaid i chi ei thynnu i ffwrdd.

Os na allwch fynd â’ch eitemau i mewn efo chi

Bydd y staff diogelwch yn cadw unrhyw eitemau na allwch fynd efo chi i mewn i’r adeilad a byddant yn rhoi derbynneb i chi. Fel arfer gallwch ddefnyddio’r dderbynneb i gasglu’ch eitemau pan fyddwch yn gadael.

Cyllyll

Os oes gennych gyllell, ni fyddwch yn gallu ei chael yn ôl pan fyddwch yn gadael. Yn hytrach, bydd angen i chi ysgrifennu i’r llys o fewn 28 diwrnod.
Rhaid i’r llythyr gynnwys:

  • eich enw cyntaf ac enw olaf
  • eich cyfeiriad
  • y dyddiad a’r amser pan gymerwyd y gyllell gan y staff diogelwch
  • disgrifiad o’r gyllell
  • rhif eich derbynneb

Fel arfer byddwch yn cael eich eitemau’n ôl o fewn mis i’r llys gael eich llythyr. Efallai y bydd angen i chi ddangos dogfen adnabod sy’n cynnwys llun (megis pasbort neu drwydded yrru) pan gewch yr eitemau’n ôl i brofi eich bod chi’n 18 oed neu drosodd.

Gall rhywun sy’n gweithredu ar eich rhan ysgrifennu’r llythyr i chi, megis cyfreithiwr neu warcheidwad. Dylent gynnwys eu henw a’u cyfeiriad pan fyddant yn ei anfon.

Os bydd angen i chi ymweld â dalfa

Bydd angen i chi roi’r rhan fwyaf o eitemau electronig megis ffonau symudol, watshis clyfar, tabledi neu gofau bach i’r staff diogelwch. Efallai y cewch fynd â gliniadur a gwefrydd gliniadur efo chi i gael mynediad i ffeiliau.

Efallai y byddwch yn cael eich dewis ar hap i gael chwiliad â llaw.

Gwneud cwyn

Gallwch wneud cwyn am y ffordd y cawsoch eich trin os ydych yn anhapus â’r ffordd y cynhaliwyd chwiliad diogelwch.