Helpwch ffrindiau neu aelodau o'ch teulu gyda'u treth

Cofrestrwch ar-lein fel ‘cynorthwyydd dibynadwy’ er mwyn helpu ffrind neu aelod o’ch teulu i wneud y canlynol:

• gwirio ei fod yn talu’r swm cywir o Dreth Incwm
• gwirio neu ddiweddaru ei gyfrif treth personol
• gwirio neu ddiweddaru ei fuddiannau trethadwy (ceir cwmni neu yswiriant meddygol yn unig)

Rhaid i’r person yr ydych yn ei helpu ddefnyddio’r gwasanaeth i dderbyn eich cofrestriad. Os na all fynd ar-lein, mae’n bosibl y byddwch yn gallu ffonio Cyllid a Thollau EM (CThEM) ar ei ran.

Gallwch fod yn gynorthwy-ydd y gellir ymddiried ynddo ar gyfer hyd at 5 person.

Bydd y person rydych yn ei helpu yn parhau i fod yn gyfrifol yn ôl y gyfraith am ei dreth ei hunan.

Mae’r canllaw hwn hefyd ar gael yn Saesneg (English).

Er mwyn defnyddio’r gwasanaeth hwn, bydd angen i chi brofi pwy ydych drwy ddefnyddio Porth y Llywodraeth. Byddwch yn gallu cofrestru ar gyfer Porth y Llywodraeth os nad ydych wedi ei ddefnyddio o’r blaen.

Ffonio CThEM ar ran rhywun arall

Os nad yw’r person rydych yn ei helpu yn gallu mynd ar-lein, gallwch ffonio CThEM ar ei ran a thrafod unrhyw faterion treth.

Mae’n rhaid i chi fod yn yr un ystafell a’r person yr ydych yn ei helpu. Bydd CThEM yn cadarnhau pwy ydyw ac yn gwirio’i fod yn hapus i chi’i gynrychioli.

Rhaid fod gennych ei rif Yswiriant Gwladol neu gyfeirnod treth wrth law pan fyddwch yn ffonio.

Rhaid i chi fod dros 16 oed os ydych yn cyfieithu ar y pryd ar gyfer rhywun nad yw’n siarad Cymraeg na Saesneg. Mae gan linellau cymorth CThEM gwasanaethau ieithoedd tramor hefyd.

Darllenwch yr arweiniad ar wasanaethau CThEM os oes gennych chi, neu’r person rydych yn ei helpu, anabledd.