Defnydd o Ddeallusrwydd Artiffisial (AI) mewn Tystiolaeth Achoswaith
Canllawiau ar ddefnyddio deallusrwydd artiffisial (AI) fel rhan o unrhyw apel, cais neu arholiad sy'n cael ei ymdrin gan yr Arolygiaeth Cynllunio.
Yn berthnasol i Loegr a Chymru
Mae’r Arolygiaeth yn deall y gellir defnyddio AI i gefnogi ein gwaith, a gellir gwneud hyn yn gadarnhaol pan gaiff ei ddefnyddio’n briodol ac yn dryloyw. Oherwydd datblygiad parhaus gallu a chymhwysiad AI byddwn yn cadw’r canllaw hwn dan adolygiad.
Cewch ddefnyddio deallusrwydd artiffisial (AI) i helpu paratoi’r wybodaeth a anfonwch at yr Arolygiaeth Gynllunio os byddwch yn dilyn y canllaw hwn sy’n esbonio beth ddylech ei ddweud wrthym pan ddefnyddiwyd AI i greu neu newid unrhyw ran o’ch cyflwyniad yn sylweddol.
Rydym yn gofyn am yr wybodaeth hon fel y gall yr Arolygwyr ddeall tarddiad a thriniaeth y deunydd y maent yn ei asesu. Mae hyn yn eu helpu i wneud penderfyniadau teg, tryloyw ac wedi’u rhesymu’n dda. Mae’r gofynion wedi’u cynllunio i fod yn syml ac i beidio â bod yn faich.
Nid oes angen i chi ddweud wrthym am offer arferol megis gwirio sillafu, awgrymiadau gramadeg, offer fformatio, neu swyddogaethau hygyrchedd.
‘Rheol euraidd’ ar gyfer unrhyw ddefnydd o AI yw bod yn rhaid i chi ddefnyddio AI yn gyfrifol. Eich cyfrifoldeb chi yw sicrhau bod yr wybodaeth a gynhyrchir yn gywir ac yn briodol.
Pryd y mae angen i chi ddweud wrthym am ddefnydd o AI
Dylech ddweud wrthym os ydych wedi defnyddio AI i:
- drafftio neu ailysgrifennu testun yn sylweddol
- cynhyrchu crynodeb neu ddadansoddiad
- cynhyrchu neu newid delweddau neu fideos
- chreu cynnwys sy’n mynd y tu hwnt i fformatio neu gyflwyniad syml
Sut i ddarparu eich datganiad
Dim ond datganiad byr sydd ei angen.
Gellir ei gynnwys yn eich e-bost clawr, llythyr neu fel rhan o’ch datganiad a/neu dystiolaeth ysgrifenedig.
Beth i’w gynnwys yn eich datganiad
Nodwch yn gryno:
- Fod AI wedi’i ddefnyddio.
-
Pa offeryn a ddefnyddiwyd.
Er enghraifft, CoPilot, chatGPT, midjourney neu gymhwysiad arall. - Beth y’i defnyddiwyd ar ei gyfer a sut y’i defnyddiwyd.
Er enghraifft, os defnyddiwyd i ddrafftio gwrthwynebiad yn gyffredinol neu ran benodol o wrthwynebiad.
Er enghraifft, os oes unrhyw ddelweddau neu fideos wedi’u cynhyrchu neu eu newid, nodwch pa rannau sydd wedi newid. - Pa wiriadau a wnaethoch a’ch bod yn cymryd cyfrifoldeb am gywirdeb y cynnwys.
Partïon proffesiynol
Disgwylir i bartïon proffesiynol gymryd cyfrifoldeb am gywirdeb a chyfreithlondeb y deunydd a gyflwynant.
Os ydych yn aelod o gorff proffesiynol, dylech hefyd ddefnyddio AI yn unol â’ch cod ymarfer proffesiynol. Gellid ymgorffori’r cyngor uchod ar yr hyn i’w gynnwys yn eich ardystiad.
Partïon â diddordeb
Gall partïon â diddordeb ddefnyddio AI i helpu drafftio neu gyfieithu eu sylwadau. Os gwnewch hynny, rhowch ddatganiad byr yn dweud hynny.
Dilynwch y cyngor uchod ar yr hyn i’w gynnwys yn eich datganiad, gan sicrhau eich bod yn glir am gymryd cyfrifoldeb am yr hyn a anfonwch, er enghraifft:
“Rwyf wedi defnyddio AI i helpu drafftio’r sylwadau hyn. Yn benodol, defnyddiais Microsoft CoPilot i fy helpu i ddrafftio fy sylwadau ar y polisïau cynllunio. Rwyf wedi’u gwirio ac rwy’n gyfrifol am yr hyn a ddywedir.”
Pam rydym yn gofyn am yr wybodaeth hon
Mae darparu datganiad byr yn helpu’r Arolygydd i ddeall sut y cafodd y deunydd ei gynhyrchu a’i asesu’n deg.
Er bod AI yn offeryn defnyddiol iawn, nid yw’r canlyniadau a roddir bob amser yn berffaith. Mae AI hefyd yn gallu creu sylwadau neu dystiolaeth ffug, neu fathau eraill o destunau a delweddau ffug.
Dylai’r camau a nodwyd uchod eich helpu i ystyried sut rydych wedi defnyddio AI yn eich cyflwyniadau. Dylai hefyd helpu i liniaru’r risg o ychwanegu baich ychwanegol / amser diangen i’r achos. Mae hyn yn bwysig gan y gallai defnydd amhriodol gael ei ystyried yn enghraifft o ymddygiad afresymol, a chodi’r posibilrwydd o ddyfarnu costau.
Drwy ddilyn y canllaw hwn, byddwch yn helpu ni, ein Harolygwyr, a phobl eraill sy’n rhan o’r broses i ddeall tarddiad, pwrpas a chywirdeb yr wybodaeth. Bydd hyn yn helpu pawb i’w dehongli a’i deall yn briodol.
Diogelu data a gwybodaeth sensitif
Peidiwch â rhoi gwybodaeth sensitif neu bersonol i mewn i offer AI cyhoeddus. gweler ICO.org.uk am ddiffiniadau’r termau hyn
Cyswllt
Os oes angen rhagor o gymorth arnoch ynghylch sut i ddarparu’r wybodaeth hon, cysylltwch â’r tîm achos perthnasol gan ddefnyddio’ch cyfeirnod achos.
Dylid cyfeirio unrhyw gwestiynau eraill trwy ein Tîm Gwasanaethau Cwsmeriaid.
Updates to this page
-
To update our existing guidance in line with evolving AI use by our customers and translation added
-
First published.