Diweddaru’ch manylion cyswllt gyda CThEF, fel asiant treth
Rhowch wybod i CThEF am newidiadau i’ch manylion cyswllt a’ch manylion ynghylch goruchwyliaeth gwrth-wyngalchu arian, fel asiant treth.
Gallwch fwrw golwg dros y manylion cyswllt canlynol, a’u diweddaru gyda CThEF:
- enw’r busnes
- cyfeiriad busnes — ni all hwn fod yn gyfeiriad blwch Swyddfa’r Post
- rhif ffôn
- e-bost
Os yw endid cyfreithiol eich busnes yn newid (yn agor tudalen Saesneg), bydd angen i chi greu cyfrif gwasanaethau asiant newydd.
Ni allwch ddiweddaru’ch manylion gyda CThEF ar gyfer y gwasanaethau TAW canlynol:
- Gwasanaeth Un Cam ar gyfer TAW
- Ad-daliadau TAW yr UE ar gyfer Asiantau
Diweddaru’ch manylion yn eich cyfrif gwasanaethau asiant
Mewngofnodwch i’ch cyfrif gwasanaethau asiant, a dewis ‘Rheoli cyfrif’.
Er mwyn i chi allu gwneud newidiadau, mae’n rhaid i chi naill ai fod yn ddefnyddiwr gweinyddol sy’n gweithio yn un o’r rolau canlynol, neu wedi’ch awdurdodi gan gydweithiwr sy’n gweithio yn un o’r rolau canlynol:
- cyfarwyddwr
- ysgrifennydd y cwmni
- unig fasnachwr
- perchennog
- partner
Gallwch ddefnyddio’ch cyfrif i wneud yr un newidiadau i’ch codau asiant ar gyfer Hunanasesiad a Threth Gorfforaeth (yn agor tudalen Saesneg). I wneud hyn, bydd angen eich codau arnoch. Mae CThEF yn anfon codau drwy’r post pan fydd eich sefydliad yn gofyn am fynediad asiant i’r gwasanaethau treth hyn.
Unwaith i chi wneud eich newidiadau, ni allwch wneud unrhyw newid arall am 4 wythnos. Bydd eich hen fanylion yn dal i ddangos yn eich cyfrif yn ystod y cyfnod hwn.
I gysylltu cyfeiriad gwahanol i’ch cod asiant ar gyfer Hunanasesiad a Threth Gorfforaeth, darllenwch yr adrannau canlynol.
Diweddaru’ch manylion cod asiant ar gyfer Hunanasesiad
Ysgrifennwch at:
Tîm Cydymffurfiad Asiantau
Cyllid a Thollau EF
BX9 1ZE
Y Deyrnas Unedig
Diweddaru’ch manylion cod asiant ar gyfer Treth Gorfforaeth
Yn yr adran ‘Ynglŷn â’ch Ffỳrm’ yn eich cyfrif ar-lein, gallwch ddiweddaru’r manylion canlynol:
- cyfeiriad eich busnes
- eich rhif ffôn
- eich e-bost
Os nad oes unrhyw newid i’r endid cyfreithiol (yn agor tudalen Saesneg), gallwch ddiweddaru enw’ch busnes drwy ysgrifennu at:
Tîm Cydymffurfiad Asiantau
Cyllid a Thollau EF
BX9 1ZE
Y Deyrnas Unedig
Diweddaru’ch manylion cod asiant ar gyfer TWE neu CIS
Dilynwch y camau hyn i ddiweddaru’ch manylion cod asiant ar gyfer TWE (Talu Wrth Ennill) neu ar gyfer Cynllun y Diwydiant Adeiladu (CIS):
-
Ffoniwch Wasanaeth Cwsmeriaid Cymraeg CThEF: 0300 200 1900.
-
Anfonwch eich rhestr o gleientiaid i’r Tîm Canolog ar gyfer Awdurdodi Asiantau er mwyn i’r tîm allu diweddaru’ch cyfeiriad newydd ar holl gofnodion eich cleientiaid.
Ysgrifennwch at:
Swyddfa Cyfraniadau Yswiriant Gwladol a Chyflogwyr
Gwasanaeth Cwsmeriaid Cymraeg CThEF
HMRC
BX9 1ST
Y Deyrnas Unedig
Bydd angen i chi gynnwys yr wybodaeth ganlynol ar eich rhestr o gleientiaid:
- eu henwau
- eu cyfeirnodau TWE y cyflogwr
- eu henwau busnes
O ran cleientiaid unigol sydd ond yn ymwneud â TWE, ac sydd heb gofnod Hunanasesiad, bydd angen i chi anfon rhestr o’u henwau a’u rhifau Yswiriant Gwladol.
Os na fyddwch yn anfon manylion eich cleientiaid, gallai copïau o ohebiaeth gael eu hanfon i’ch hen gyfeiriad ar gyfer pob cleient sydd wedi’i awdurdodi.
Diweddaru’ch manylion ynghylch goruchwyliaeth gwrth-wyngalchu arian
Mewngofnodwch i’ch cyfrif gwasanaethau asiant, a dewis ‘Rheoli cyfrif’.
Gallwch ddefnyddio’r gwasanaeth hwn i fwrw golwg dros eich manylion ynghylch goruchwyliaeth gwrth-wyngalchu arian a diweddaru’r canlynol:
- corff goruchwylio
- cyfeirnod
- dyddiad yr adnewyddiad
Updates to this page
-
We have made it clear that you cannot use a PO box address as your business address.
-
Added translation
-
First published.