Anfon data car i CThEM: cynnwys buddiannau car a buddiannau tanwydd car yn y gyflogres
Sut i roi gwybod am ddata car i Gyllid a Thollau EM (CThEM) pan fo buddiannau car a buddiannau tanwydd car wedi'u cynnwys yn y gyflogres.
Trosolwg
Rhaid i gyflogwyr sydd wedi cofrestru i gynnwys treuliau a buddiannau trethadwy cyflogeion anfon y symiau trethadwy i Gyllid a Thollau EM (CThEM), drwy ddefnyddio Cyflwyniad Taliadau Llawn (FPS).
O 6 Ebrill 2017 ymlaen, gall cyflogwyr sydd wedi cofrestru anfon gwybodaeth am y ceir a ddefnyddir gan gyflogeion i CThEM yn wirfoddol. Mae hyn yn debyg i anfon gwybodaeth ar ffurflen P46 (Car), gan gyflogwyr nad ydynt yn cynnwys buddiannau yn y gyflogres.
O 6 Ebrill 2018 ymlaen, bydd yr wybodaeth hon yn orfodol os ydych yn gyflogwr sydd wedi cofrestru i gynnwys buddiannau yn y gyflogres pan fo car a thanwydd car ar gael i’r cyflogai.
Rhaid i gyflogwyr nad ydynt wedi cofrestru erbyn 6 Ebrill barhau i lenwi ffurflen P46 (Car).
Cael gwybod pa wybodaeth i’w hanfon
Mae’r rhestr isod yn dangos pa wybodaeth sydd ei hangen (os yw’ch meddalwedd cyflogres yn cydweddu):
- gwneuthuriad a model y car
- dyddiad y cofrestrwyd yn gyntaf
- allyriadau carbon deuocsid (CO2)
- milltiroedd allyriadau sero
- math o danwydd
- rhif adnabod y car
- pris wedi’i gyfrifo
- o ba ddyddiad roedd y car ar gael
- tan ba ddyddiad roedd y car ar gael
- arian parod cyfwerth neu’r swm perthnasol
- y dyddiad pan ddarparwyd tanwydd am ddim
- arian parod Cyfwerth neu’r enillion a aberthwyd yn gyfnewid am y tanwydd
- dyddiad y tynnwyd y tanwydd am ddim yn ôl
- dangosydd y diwygiad
Llenwi’r blychau
Mae’r penawdau isod yn dangos pa wybodaeth i’w chyflwyno yn y FPS cyntaf sy’n cynnwys treth wedi’i chynnwys yn y gyflogres.
Gwneuthuriad a model y car
Nodwch wneuthuriad a model y car a ddarperir.
Allyriadau CO2
Nodwch y ffigur allyriadau CO2 cymeradwy a ddangosir ar y Dystysgrif cofrestru cerbyd (V5C). Does dim angen ffigur CO2 ar gyfer:
-
ceir a gofrestrwyd gyntaf cyn 1998
-
rhai ceir prin sydd wedi’u mewnforio o dramor
Rhowch ‘X’ yn y blwch ar gyfer y ceir hyn.
Dyddiad y cofrestrwyd yn gyntaf
Rhaid i’r dyddiad a nodwyd fod yn heddiw neu’n gynharach. Gellir gweld y dyddiad y cofrestrwyd yn gyntaf ar eich dogfen V5C.
Milltiroedd allyriadau sero
O 2020 i 2021 Os oes gan gar ffigur allyriadau CO2 sy’n 1-50g/km, bydd yn rhaid i chi nodi milltiroedd allyriadau sero’r car. Dyma’r pellter mwyaf mewn milltiroedd y mae’n bosibl gyrru yn y modd trydan heb ailwefru’r batri.
Gall cyflogwyr gael yr wybodaeth hon gan y cwmni ceir ar brydles neu gan ddarparwr y fflyd.
Os ydych yn berchen ar y cerbyd, gallwch ddod o hyd i’r ffigur milltiroedd allyriadau sero ar Dystysgrif Cydymffurfio eich cerbyd.
Math o danwydd
Os ydych yn cyfrifo gwerth trethadwy ar gyfer blwyddyn dreth 2019 i 2020, dewiswch:
- ‘F’ ar gyfer ceir diesel sy’n bodloni safon Ewro 6d (a elwir hefyd yn RDE2)
- ‘D’ ar gyfer pob car diesel arall
- ‘A’ ar gyfer pob car arall
Ar gyfer 2019 i 2020, bydd gwybodaeth ar gael gan yr Asiantaeth Trwyddedu Gyrwyr a Cherbydau (DVLA) er mwyn eich galluogi i wybod a yw car yn bodloni safon Ewro 6d drwy ei Gwasanaeth Ymholiadau Cerbydau ar-lein ar gyfer ceir a gynhyrchwyd ar ôl mis Medi 2018. Yn yr un modd, mae gwybodaeth safon Ewro 6d ar gael ar y ffurflen V5C ar gyfer ceir a gofrestrwyd o 1 Medi 2018 ymlaen.
Rhif adnabod y car
Mae’r blwch hwn yn eich helpu i adnabod pa gar rydych wedi’i ddyrannu i gyflogai, e.e. pan gaiff yr un modelau eu darparu. Awgrymwn eich bod yn nodi rhif cofrestru’r car.
Pris wedi’i gyfrifo
Nodwch y pris wedi’i gyfrifo. Y pris wedi’i gyfrifo yw pris sylfaenol y car ynghyd â phris unrhyw ategolion. Yna, tynnwch i ffwrdd unrhyw gyfraniad cyfalaf a dalwyd gan y cyflogai. Ni chaiff taliadau ar gyfer defnydd preifat, neu symiau eraill ‘a gyfrannwyd’, eu cynnwys yn y cyfrifiad hwn.
O ba ddyddiad roedd y car ar gael
Nodwch y dyddiad pan oedd y car ar gael am y tro cyntaf yn y FPS nesaf pan gaiff y cyflogai ei dalu. Dylech nodi 6 Ebrill yn y FPS cyntaf os oedd y car ar gael o’r dyddiad hwnnw.
Os oedd car newydd neu gar arall ar gael ar ôl anfon y FPS olaf ar gyfer blwyddyn dreth, dylech ddefnyddio’r FPS gyntaf yn y flwyddyn dreth newydd a nodi 6 Ebrill ar gyfer ‘ar gael o’.
I weld pa dreth sy’n daladwy ar gyfer y cyfnod roedd y car ar gael yn y flwyddyn dreth flaenorol, dylech ailgyfrifo’r swm trethadwy a’r dreth sy’n ddyledus. Yna, anfonwch y rhain ynghyd ag unrhyw ddiwygiad i’r cyflog trethadwy mewn FPS neu Ddiweddariad Blwyddyn Gynharach (EYU).
Tan ba ddyddiad roedd y car ar gael
Nodwch y dyddiad olaf roedd y car ar gael. Ni allwch nodi dyddiad sydd ar ôl 5 Ebrill mewn FPS ar gyfer yr un flwyddyn dreth.
Os nad oes car ar gael bellach ar ôl anfon y FPS olaf ar gyfer blwyddyn dreth, does dim rhaid i chi anfon FPS wedi’i ddiwygio ar gyfer data car yn y flwyddyn dreth nesaf. Byddai dyddiad ‘ar gael tan’ cyn 6 Ebrill yn cael ei wrthod.
Ni ellir anfon FPS mis 1 fel diwygiad ar gyfer data car â dyddiad 31 Mawrth arno. Er enghraifft, os mai 20 Mawrth oedd y dyddiad cyflog olaf, a doedd y car ddim ar gael o 31 Mawrth ymlaen.
Rhaid diwygio’r symiau trethadwy wedi’u cynnwys yn y gyflogres ar gyfer y FPS olaf yn ystod blwyddyn dreth, neu rhaid eu cynnwys fel rhan o EYU i ddangos y swm trethadwy diwygiedig. Mae hyn oherwydd y bydd y cyflogai wedi talu’r swm anghywir o dreth yn seiliedig ar argaeledd y car tan 31 Mawrth.
Arian parod cyfwerth neu’r swm perthnasol
Nodwch yr arian parod cyfwerth disgwyliedig neu’r swm perthnasol wrth anfon gwybodaeth am y tro cyntaf mewn FPS.
Y swm perthnasol yw’r ffigur trethadwy pan fo cyflogai’n ildio’i hawl i gael cyflog er mwyn cael buddiant yn lle hynny, megis car cwmni.
Y dyddiad pan ddarparwyd tanwydd am ddim
Nodwch 6 Ebrill ar gyfer y dyddiad os darparwyd tanwydd am ddim o ddechrau’r flwyddyn dreth. Fel arall, nodwch ddyddiad yn ystod y flwyddyn dreth pan rydych wedi cytuno i ddarparu tanwydd am ddim.
Arian parod cyfwerth neu’r enillion a aberthwyd yn gyfnewid am y tanwydd
Nodwch yr arian parod cyfwerth disgwyliedig neu swm yr enillion a aberthwyd yn gyfnewid am y tanwydd sydd ar gael i gyflogai.
Y swm a aberthwyd yw swm yr enillion a aberthwyd er mwyn cael buddiant tanwydd car yn lle hynny.
Y dyddiad y tynnwyd y tanwydd am ddim yn ôl
Nodwch y dyddiad y tynnwyd y tanwydd am ddim yn ôl. Os cafodd y tanwydd am ddim ei dynnu’n ôl ar ddiwedd y flwyddyn dreth flaenorol, ond ni chaiff ei ddarparu yn y flwyddyn dreth newydd, peidiwch â llenwi’r blwch hwn.
Diwygiadau a chywiriadau
Mae’r penawdau isod yn dangos sut i gywiro neu ddiwygio cyflwyniad.
Dangosydd y diwygiad
Dylech nodi ‘Iawn’ os oes angen cywiriad yn ystod y flwyddyn dreth ar gyfer y blychau canlynol:
- gwneuthuriad a model y car
- dyddiad y cofrestrwyd yn gyntaf
- allyriadau CO2
- milltiroedd allyriadau sero
- math o danwydd
- rhif adnabod y car
- pris wedi’i gyfrifo
- o ba ddyddiad roedd y car ar gael
- tan ba ddyddiad roedd y car ar gael
- arian parod cyfwerthneu’r swm perthnasol
- y dyddiad pan ddarparwyd tanwydd am ddim
- arian parod cyfwerth/swm a aberthwyd yn gyfnewid am y tanwydd
- dyddiad y tynnwyd y tanwydd am ddim yn ôl
Yna, nodwch y manylion diwygiedig ar gyfer un neu ragor o’r blychau uchod yn y FPS nesaf yn y flwyddyn dreth. Os oes angen i chi gyflwyno newid i ddata car yn unig ond ddim manylion cyflog a threth, dylech:
- adael y blychau ‘cyflog yn ystod y cyfnod’ yn wag
- gynnwys y manylion cyflog a threth hyd yma ar gyfer y flwyddyn
Os na thelir incwm yn ystod y cyfnod cyflog nesaf, rhaid i chi roi gwybod am y newid i’r data car yn unig. Er enghraifft, os telir y cyflogai’n afreolaidd.
Os daw data car anghywir i’r amlwg ar ôl i chi anfon y FPS olaf, dylech anfon y manylion cywir yn y FPS cyntaf yn y flwyddyn dreth newydd, os yw’r car ar gael o hyd. Ni ddylid defnyddio dangosydd y diwygiad.
Cywiriadau
Dim ond yn y FPS nesaf yn ystod y flwyddyn dreth y dylid nodi cywiriadau i wybodaeth am ddata car. Ni allwch roi gwybod am ddiwygiadau i ddata car mewn EYU.
Gwneuthuriad a model y car
Os ydych wedi rhoi disgrifiad anghywir, gwnewch y newidiadau ac anfon y wybodaeth gywir.
CO2
Os ydych wedi nodi’r ffigur CO2 anghywir, dylech ddewis ‘Iawn’ ar gyfer dangosydd y diwygiad ac anfon y ffigur CO2 cywir yn eich FPS nesaf.
Os byddwch yn dod o hyd i’r ffigur CO2 anghywir ar ôl diwedd y flwyddyn dreth, gwnewch yn siŵr fod y FPS cyntaf ar gyfer y flwyddyn dreth newydd yn dangos y ffigur cywir os yw’r car yn dal i gael ei gynnwys yn y gyflogres.
Math o danwydd
Os ydych wedi cyflwyno’r llythyren anghywir ar gyfer y math o danwydd, anfonwch yr un cywir yn eich FPS nesaf a dewiswch ‘Iawn’ ar gyfer dangosydd y diwygiad.
Os yw’n dod i’r amlwg bod y math o danwydd yn anghywir ar ôl diwedd y flwyddyn dreth, gwnewch yn siŵr fod y FPS cyntaf ar gyfer y flwyddyn dreth newydd yn dangos y math cywir, os yw’r car yn dal i gael ei gynnwys yn y gyflogres.
Rhif adnabod y car
Os ydych wedi sylweddoli bod cofnod yn anghywir, cyflwynwch y manylion cywir yn eich FPS nesaf a dewiswch ‘Iawn’ ar gyfer dangosydd y diwygiad.
Pris wedi’i gyfrifo
Os yw’r pris wedi’i gyfrifo yn anghywir, dylech ddewis ‘Iawn’ ar gyfer dangosydd y diwygiad a chynnwys y pris newydd yn y FPS nesaf.
O ba ddyddiad roedd y car ar gael
Os yw’r dyddiad ‘ar gael o’ yn anghywir, dylech ddewis ‘Iawn’ ar gyfer dangosydd y diwygiad a chynnwys y dyddiad newydd yn y FPS nesaf.
Tan ba ddyddiad roedd y car ar gael
Os sylweddolir, nes ymlaen, bod y dyddiad hwn yn anghywir, dylech ddewis ‘Iawn’ ar gyfer dangosydd y diwygiad a chynnwys y dyddiad newydd yn y FPS nesaf cyn diwedd y flwyddyn dreth.
Arian parod cyfwerth/swm perthnasol
Os nad yw’r car ar gael bellach, neu os yw’r arian parod cyfwerth neu’r swm perthnasol yn anghywir, dylid newid yr arian parod cyfwerth neu’r swm perthnasol yn y FPS nesaf, a rhoi gwybod amdano fel diwygiad.
Y dyddiad pan ddarparwyd tanwydd am ddim
Os yw’r dyddiad y rhoddir gwybod amdano yn anghywir, dylid anfon diwygiad a nodi dyddiad diwygiedig. Os caiff y tanwydd am ddim ei dynnu’n ôl, nid yw hynny’n ddiwygiad. Dylech lenwi’r blwch ‘dyddiad y cafodd y tanwydd am ddim ei dynnu’n ôl’.
Arian parod cyfwerth neu’r enillion a aberthwyd yn gyfnewid am y tanwydd
Dylid diwygio’r blwch hwn os yw’r arian parod cyfwerth neu swm yr enillion a aberthwyd yn gyfnewid am y tanwydd yn anghywir, neu os yw argaeledd y tanwydd yn newid.
Y dyddiad y tynnwyd y tanwydd am ddim yn ôl
Os oedd y dyddiad a nodwyd gennych mewn FPS blaenorol yn yr un flwyddyn dreth yn anghywir, anfonwch y cywiriad fel diwygiad.
Dyddiad y cofrestrwyd yn gyntaf
Os ydych wedi nodi’r dyddiad y cofrestrwyd yn gyntaf yn anghywir, dylech ddewis ‘Iawn’ yn y dangosydd diwygiadau, a nodi’n gywir y dyddiad y cofrestrwyd yn gyntaf yn eich Cyflwyniad Taliadau Llawn (FPS) nesaf.
Milltiroedd allyriadau sero
Os ydych wedi nodi’r milltiroedd allyriadau sero yn anghywir, dylech ddewis ‘Iawn’ yn y dangosydd diwygiadau, a nodi’r milltiroedd allyriadau sero cywir yn eich Cyflwyniad Taliadau Llawn (FPS) nesaf.
Diweddarwyd ddiwethaf ar 6 April 2020 + show all updates
-
Amendments and corrections information updated for zero emission mileage and date first registered.
-
Car fuel type information amended for the 2020 to 2021 tax year.
-
Car fuel type information amended for the 2019 to 2020 tax year.
-
Updated with information for RDE2 (also known as Euro 6d) compliant diesel cars for tax year 2018 to 2019.
-
Guidance on payrolling car fuel benefits for employees has been added.
-
A Welsh language version of the guidance has been added.
-
First published.