Rhoi gwybod i CThEF am gymhorthdal Ardoll Newid yn yr Hinsawdd
Rhowch wybod am ddyfarniadau cymhorthdal ar gyfer yr Ardoll Newid yn yr Hinsawdd i CThEF, gan ddefnyddio ein ffurflen ar-lein.
Cyn i chi roi gwybod, darllenwch ‘Gwiriwch pryd i adrodd am gymorth treth newid yn yr hinsawdd’ er mwyn:
- cyfrifo’ch dyfarniadau cymhorthdal ar gyfer Ardoll Newid yn yr Hinsawdd
- gwirio pryd mae angen i chi roi gwybod amdanynt i CThEF
Yr hyn y bydd ei angen arnoch
Bydd angen i chi gadarnhau a ydych yn rhoi gwybod fel:
- cyfranogwr fel rhan o Gytundeb Newid yn yr Hinsawdd
- yn weithredwr o dan y gwasanaeth rheilffordd â mynediad agored
Bydd angen i chi roi gwybod i ni am y canlynol:
- enw a chyfeiriad eich cwmni
- rhif cofrestru TAW eich cwmni
- nifer y cyflogeion yn eich busnes
- a yw’ch busnes wedi’i ymgorffori a’i gofrestru yng Ngogledd Iwerddon
- y math o weithgaredd busnes megis nwyddau neu wasanaethau lle defnyddir y cymhorthdal yn bennaf, a gwybodaeth am y sector
- y rhanbarth sydd wedi elwa fwyaf o’r cymhorthdal
- swm y cymhorthdal y mae’ch busnes wedi’i gael ar gyfer y cyfnod adrodd gofynnol, wedi’i dalgrynnu i lawr i’r bunt agosaf
Llenwi’r ffurflen ar-lein ar gyfer busnesau sydd wedi cofrestru ar gyfer TAW
Os ydych yn fusnes endid unigol, bydd angen i chi roi gwybod am eich dyfarniad cymhorthdal drwy’ch cofrestriad TAW.
Os ydych yn rhoi gwybod am fanylion dyfarniad cymhorthdal ar gyfer busnes mewn grŵp TAW:
- mae’n rhaid i chi adio cyfanswm y cymorthdaliadau perthnasol a ddaeth i law at yr holl fusnesau yn y grŵp TAW a rhoi gwybod am y ffigur hwnnw os ydych uwchlaw lefelau’r trothwy
- nodwch enw’r aelod cynrychioliadol yn unig pan fyddwch yn rhoi gwybod
Os ydych yn fusnes endid unigol sydd â chofrestriad adrannol, nodwch enw’r endid cyfreithiol unigol, yn hytrach nag aelodau’r adran.
Rhoi gwybod am gymorthdaliadau
Os ydych yn gynrychiolydd o’r cwmni
Bydd angen Dynodydd Defnyddiwr (ID) a chyfrinair ar gyfer Porth y Llywodraeth arnoch. Os nad oes gennych Ddynodydd Defnyddiwr (ID), gallwch greu un pan fyddwch yn mewngofnodi am y tro cyntaf.
Os ydych yn asiant
Bydd angen y Dynodydd Defnyddiwr (ID) a’r cyfrinair ar gyfer Porth y Llywodraeth y gwnaethoch eu defnyddio wrth gofrestru am y cyfrif gwasanaethau asiant. Gallwch greu cyfrif gwasanaethau asiant os nad oes gennych un. Mae’n bosibl y byddwn hefyd yn gofyn i chi nodi manylion eich asiant â llaw.
Os byddwch yn cyflwyno’r ffurflen ar-lein ac yna’n sylweddoli’ch bod wedi gwneud camgymeriad, cwblhewch hi eto. Dim ond y ffurflen ddiweddaraf a llenwch y byddwn yn ei phrosesu.
Cysylltwch â CThEF i gael help
Cysylltwch â ni drwy e-bost: energy.taxes@hmrc.gov.uk:
- os ydych wedi methu’r dyddiad cau ar gyfer adrodd am flwyddyn galendr, neu rydych yn credu y byddwch yn methu’r dyddiad hwn
- os oes gennych unrhyw gwestiynau ynghylch adrodd am gymorthdaliadau Ardoll Newid yn yr Hinsawdd