Gwneud newid i’ch cymeradwyaeth ar gyfer cynhyrchwyr cynhyrchion alcoholaidd (APPA)
Rhoi gwybod i CThEF am newidiadau i’ch APPA.
Ynglŷn â’r ffurflen hon
Mae’n rhaid i chi roi gwybod i CThEF am newidiadau i’ch cymeradwyaeth ar gyfer cynhyrchwyr cynhyrchion alcoholaidd (APPA), neu gais APPA.
Gallwch ddefnyddio’r ffurflen hon i roi gwybod i ni am newidiadau i’r canlynol:
- manylion y busnes a manylion cyswllt
- perchnogaeth a’r sawl sydd â chyfrifoldeb dros y busnes
- y gwaith cynhyrchu a manylion y safle
Mae ffurflenni gwahanol os oes angen i chi wneud y canlynol:
- rhoi gwybod i CThEF eich bod am dynnu eich cais APPA yn ôl
- wneud cais i ganslo eich APPA
Pan fydd angen i chi roi gwybod i ni am newid
Mae’n rhaid i chi roi gwybod i ni am unrhyw newid i’ch APPA cyn gynted â phosibl.
Bydd angen i chi roi gwybod i ni am rai newidiadau cyn iddynt ddigwydd ac eraill o fewn 14 diwrnod calendr.
Darllenwch adran 4.25 o’r canllaw technegol ar gyfer cynhyrchion alcoholaidd (yn agor tudalen Saesneg) i ddysgu pryd mae angen i chi roi gwybod i CThEF am bob newid.
Os na fyddwch yn rhoi gwybod i ni am newidiadau, mae’n bosibl y codir cosb arnoch.
Yr hyn y bydd ei angen arnoch
I wneud newid, bydd angen i chi nodi’r manylion canlynol:
- eich enw a’ch manylion cyswllt
- eich statws busnes presennol a’ch manylion
- eich ID APPA, os oes un gennych
Os nad oes gennych ID APPA, bydd angen i chi nodi’r canlynol:
- enw’r busnes
- Cyfeirnod Unigryw y Trethdalwr (UTR)
- cyfeirnod cyflwyno APPA
Os oes angen i chi newid manylion eich busnes a manylion TAW
Dim ond y manylion busnes sydd wedi newid sydd angen i chi roi gwybod i ni amdanynt, megis:
- enw, enw’r cwmni neu’r enw masnachu
- eich dyddiad geni
- rhif Yswiriant Gwladol
- cyfeiriad, cyfeiriad busnes neu gyfeiriad masnachu
- rhif y cwmni
Mae angen i chi roi gwybod i ni a yw’r busnes wedi’i gofrestru ar gyfer TAW ac os felly, y rhif cofrestru TAW.
Os oes angen i chi newid manylion endid cyfreithiol neu berchnogaeth
Mae’n rhaid i chi roi gwybod i ni am y canlynol:
- enw newydd neu enw’r busnes, os yw’n berthnasol
- dyddiad cwblhau disgwyliedig
Os yw’ch manylion perchnogaeth wedi newid, bydd hefyd angen i chi roi gwybod i ni am y canlynol:
- pobl sydd â chyfrifoldeb dros y busnes
- gofynion cyfreithiol ar gyfer trin alcohol
Os oes angen i chi newid manylion am eich gofynion cyfreithiol ar gyfer trin alcohol
Mae angen i chi roi gwybod i ni am unrhyw berson sy’n berchen ar y busnes, yn ei reoli neu’n ymwneud â gweithredu’r busnes hwnnw, sydd naill ai o dan y Deddfau Tollau Tramor a Chartref:
- wedi cael ei ddyfarnu’n euog o drosedd
- wedi cael nwyddau wedi eu hatafael ganddo
Byddwn yn cysylltu â chi i ofyn am y manylion os na fyddwch yn eu nodi yn y ffurflen hon.
Os oes angen i chi newid manylion cynhyrchu neu fanylion safle
Dim ond am y manylion cynhyrchu a fydd yn newid sydd angen i chi roi gwybod i ni amdanynt, megis:
- y math o alcohol rydych chi’n ei gynhyrchu
- y dyddiad y byddwch yn dechrau neu’n gorffen cynhyrchu
- ffigur blynyddol o ran cynhyrchu
Os ydych wedi newid eich manylion cynhyrchu, efallai y bydd angen i chi ddarparu cynllun busnes a diweddaru manylion eich safle.
Ar gyfer pob safle sy’n berthnasol, bydd angen i chi ddarparu’r canlynol:
- cyfeiriad
- math o gynnyrch alcoholaidd a fydd yn cael ei storio neu ei gynhyrchu
- y gweithgareddau yn ymwneud â phob math o gynnyrch alcoholaidd
- ID APPA unrhyw gynhyrchydd arall y bydd y busnes yn rhannu’r safle ag ef
- cynllun y safle
Efallai y bydd hefyd rhaid i chi roi gwybod i ni am y canlynol:
- cynhyrchwyr cynhyrchion alcoholaidd cysylltiedig
- symud cynhyrchion alcoholaidd, oni bai eich bod yn gynhyrchydd bach ar gyfer seidr
Gwneud newid i’ch APPA
Ar-lein
I wneud newid i’ch cymeradwyaeth, bydd angen i chi fewngofnodi gan ddefnyddio’ch Dynodydd Defnyddiwr (ID) a’ch cyfrinair ar gyfer Porth y Llywodraeth.
Dim ond un ffurflen sydd angen i chi ei anfon gyda’r holl newidiadau sydd angen i chi eu gwneud.
Gallwch gadw’r hyn rydych wedi’i wneud a dod yn ôl ato’n nes ymlaen.
Ar ôl i chi anfon y ffurflen, byddwch yn cael e-bost cadarnhau gyda chyfeirnod cyflwyno.
Os na allwch ddefnyddio’r ffurflen ar-lein
Os na allwch ddefnyddio’r ffurflen ar-lein, gallwch roi gwybod i ni am newid i’ch cymeradwyaeth drwy anfon llythyr.
Cysylltwch â ni drwy ysgrifennu at CThEF (yn agor tudalen Saesneg).
Ar ôl i chi anfon y ffurflen
Rydym yn anelu at adolygu’r ffurflen a diweddaru’ch APPA o fewn 45 diwrnod gwaith, ond bydd hynny’n dibynnu ar ba mor gymhleth yw’r newid.
Efallai y bydd hi’n cymryd hirach os bydd angen i ni ofyn am ragor o wybodaeth.
Updates to this page
-
The ‘If you cannot use the online form’ section has been updated to remove emailing as a way to make a change to your APPA.
-
Welsh translation added.
-
First published.