Gwneud cais am drwydded data llysoedd a thribiwnlysoedd i drydydd parti GLlTEF
Gwnewch gais am drwydded i ailddefnyddio a chynnal dadansoddiad cyfrifiadurol ar wybodaeth a gyhoeddwyd drwy'r Gwasanaeth Gwrandawiadau Llysoedd a Thribiwnlysoedd (CaTH).
Trosolwg
Mae Gwasanaeth Llysoedd a Thribiwnlysoedd EF (GLlTEF) yn cyhoeddi rhestrau’r llysoedd a’r tribiwnlysoedd i:
- gyflawni rhwymedigaethau cyfreithiol penodol
- cynnal yr egwyddor o gyfiawnder agored
- cynorthwyo ar gyfer gweinyddu cyfiawnder
Bydd y cynllun trwyddedu trydydd partïon ar gyfer data llysoedd a thribiwnlysoedd yn cynnal yr egwyddor o gyfiawnder agored trwy:
- sicrhau mwy o fynediad a mynediad haws at ddata llysoedd a thribiwnlysoedd
- galluogi GLTEF i hwyluso’r ailddefnydd o ddata mewn ffordd dryloyw a chyfrifol ar raddfa briodol
Mae’r cynllun hefyd yn anelu at gyflawni canlyniadau sydd er budd y cyhoedd, fel:
- hyrwyddo arloesi mewn sectorau yn cynnwys technoleg ac ymchwil
- lleihau’r galw cyfreithiol nad yw wedi’i fodloni
- hybu twf economaidd
Rhaid i chi wneud cais am drwydded i gynnal dadansoddiad cyfrifiadurol o’r wybodaeth mae GLlTEF yn ei chyhoeddi ar Wasanaeth Gwrandawiadau’r Llysoedd a’r Tribiwnlysoedd (CaTH) i:
- gynnal ymchwil a gwaith datblygu
- help gyda darparu cynhyrchion neu wasanaethau
Mae dadansoddiad cyfrifiadurol yn cyfeirio at brosesu data mewn swmp ac ar raddfa sydd angen peiriant. Mae hyn yn cynnwys:
- dadanoddi gwybodaeth nad oes modd ei ddarllen gyda pheiriant
- sganio gyda rhaglen a chwilio am wybodaeth sydd wedi’i chyhoeddi
- defnyddio algorithmau i gynnal dadansoddiad
Nid yw’n cynnwys prosesu â llaw gan unigolyn, hyd yn oed os yw hyn yn cynnwys nifer fawr o gofnodion.
Sicrhewch eich bod yn darllen y canllawiau llawn ar gyfer y broses ymgeisio.
Cyn i chi wneud cais
Pan fyddwch yn gwneud cais, bydd arnoch angen uwchlwytho asesiad o’r effaith ar ddiogelu data wedi’i gwblhau.
Efallai bydd arnoch angen cynnwys neu uwchlwytho:
- dogfen bolisi priodol wedi’i chwblhau
- templed safonol cofnodi tryloywder algorithmig wedi’i gwblhau
- manylion unrhyw gynllun ardystio perthnasol
- unrhyw ddogfennau eraill sy’n berthnasol i’ch cais
Bydd arnoch hefyd angen gwirio bod eich systemau yn cyd-fynd â gofynion rhaglennu rhyngwyneb rhaglenni CaTH.
Sut i wneud cais
Gallwch wneud cais trwy ddefnyddio ein ffurflen ar-lein.
Cysylltwch â ni os nad ydych yn gallu gwneud cais ar-lein neu os oes angen cymorth i wneud cais.
Beth fydd yn digwydd nesaf
Mae panel llywodraethu’r cynllun trwyddedu trydydd partïon ar gyfer data llysoedd a thribiwnlysoedd yn cyfarfod yn rheolaidd i adolygu ceisiadau. Efallai na fydd gan y panel amser i adolygu’ch cais y tro cyntaf mae’n cyfarfod ar ôl cael eich cais.
Unwaith y bydd y panel wedi adolygu’ch cais, gall ofyn am fwy o fanylion gennych neu i gyflwyno ffurflen gais ddiwygiedig os oes gwallau neu wybodaeth ar goll. Byddwn yn cysylltu â chi i’ch hysbysu p’un a yw’r panel wedi cymeradwyo neu wedi gwrthod eich cais.
Os derbynnir eich cais, byddwn yn rhannu mwy o wybodaeth am sut i gael mynediad at y data.
Os gwrthodir eich cais ac os rydych yn credu bod gennych yr hawl i apelio, gallwch ganfod sut i apelio yn y canllawiau llawn.
Cael help gyda’ch cais
Os ydych wedi darllen yr holl ganllawiau a dal angen cymorth gyda’ch cais, cysylltwch â thirdpartydatalicence@justice.gov.uk.
Os ydych yn credu bod rhestr llys neu dribiwnlys y dylem fod yn ei chyhoeddi ar goll o’r gwasanaeth, neu os oes gennych ymholiad arall, cysylltwch â publicationsinformation@justice.gov.uk.