Canllawiau

Grant Swyddi Ieuenctid: Canllaw grant

Diweddarwyd 30 Mehefin 2026

Yn berthnasol i Loegr, yr Alban a Chymru

1. Cyflwyniad

Lansiwyd y Grant Swyddi Ieuenctid ar 30 Mehefin 2026 ledled Prydain Fawr. Mae’r Cynllun hwn yn cefnogi cyflogwyr drwy gynnig grant o £3,000 i gyflogwr cymwys sy’n cyflogi person ifanc cymwys am isafswm cyfnod cyflogaeth o 16 wythnos. Gallwch wneud cais am y Cynllun drwy wasanaeth Find a Grant Llywodraeth y DU yn Youth Jobs Grant - Find a Grant .

Rydym wedi cynllunio’r Cynllun i fod yn agored ac yn hygyrch, gan sicrhau y gall cyflogwyr a phobl ifanc cymwys gymryd rhan yn y Cynllun yn hawdd ac elwa o’r grant.

Mae’r ddogfen hon yn nodi gwybodaeth bwysig i gefnogi cyflogwyr sy’n cymryd rhan i wneud cais i’r Cynllun a bodloni amodau’r grant. Dylid ei ddarllen ar y cyd â Thelerau ac Amodau’r Cynllun sydd ar gael yn Grant Swyddi Ieuenctid. Os bydd unrhyw wrthdaro rhwng y dogfennau hyn, bydd telerau’r Telerau ac Amodau yn cymryd blaenoriaeth. Mae hyn yn cynnwys yr holl ddiffiniadau perthnasol fel y’u cyflwynir yn Nhelerau ac Amodau’r Cynllun.

Bydd unrhyw ddata personol eich gweithwyr, cynrychiolwyr cwmni neu eraill a ddarperir gennych yn cael ei ddefnyddio yn unol â’r datganiad preifatrwydd sydd wedi’i leoli yn Privacy Policy - Find a Grant a Privacy Notice for Spotlight Counter Fraud Checks - GOV.UK.

Mae DWP yn cadw’r hawl i wneud newidiadau i’r Cynllun ar gyfer swyddi gwag newydd lle bo angen i sicrhau ei fod yn parhau i gydymffurfio, yn gyflawnadwy ac yn diogelu arian cyhoeddus. Pan fydd hyn yn wir, bydd grantiau’n destun i Delerau ac Amodau’r Cynllun o’r dyddiad y cyflwynir swyddi gwag a byddant yn parhau i fod yn destun i’r amodau hynny trwy gyfnod cyflogaeth y person ifanc sy’n cymryd rhan.

Rhaid derbyn newidiadau i Delerau ac Amodau’r Cynllun drwy’r ffurflenni swyddi gwag a byddant yn berthnasol i swyddi gwag newydd. Bydd y fersiwn Telerau ac Amodau diweddaraf bob amser ar gael yn Grant Swyddi Ieuenctid yn ogystal â’r dyddiadau y mae’n berthnasol.

Mae’r Llywodraeth yn cadw’r hawl i ddod â’r Cynllun hwn i ben neu ei newid. Os yw’r Cynllun yn dod i ben neu os bydd swm y grant yn newid, bydd y Llywodraeth yn anelu at roi 4 wythnos o rybudd o’r newid yn Grant Swyddi Ieuenctid.

2. Grant Swyddi Ieuenctid

2.1 Trosolwg o’r cynllun

Mae’r Cynllun wedi’i gynllunio i gefnogi cyflogwyr i recriwtio pobl ifanc, sydd, ynghyd â’r Gwarant Ieuenctid ehangach, yn mynd i’r afael â lefelau uchel o ddiweithdra ac anweithgarwch ieuenctid. Mae’r Grant Swyddi Ieuenctid yn Gynllun ar wahân i’r Gwarant Swyddi. Er bod y ddau hyn yn dod o dan Warant Ieuenctid y Llywodraeth, mae ganddynt amcanion gwahanol ac maent yn gwasanaethu gwahanol garfannau o bobl ifanc. Mae gwybodaeth am y Gwarant Ieuenctid a’r Warant Swyddi ar gael yn: Adeiladu Eich Gweithlu yn y Dyfodol.

Nod y Cynllun yw cefnogi hyd at 60,000 o gyfleoedd swyddi dros 3 blynedd, tua 20,000 y flwyddyn ar gyfer y flwyddyn ariannol hon (BA 2026/2027) a’r 2 flynedd ariannol ganlynol, gan gau i swyddi gwag newydd ym mis Hydref 2028.

Mae’r cymhwysedd manwl wedi’i nodi isod, ond mae’r Cynllun yn agored i gyflogwyr o bob maint a sector gyda chyflogwyr ledled Prydain Fawr sy’n recriwtio person ifanc cymwys:

• Rhwng 18–24

• Allan o waith ac ar Gredyd Cynhwysol am 6 mis ac nad ydynt yn gymwys ar gyfer Gwarant Swyddi (sydd fel arfer yn cael ei gyrchu o 18 mis)

Bydd y grant hwn yn ar gael mewn camau gyda £1,800 yn cael ei dalu ar ôl 6 wythnos a £1,200 ar ôl 18 wythnos ar ôl i’r enillion gael eu gwirio drwy Wybodaeth Amser Real (RTI) Cyllid a Thollau EF (CThEF).

2.2 Nodau ac amcanion y Cynllun

Amcanion y Grant Swyddi Ieuenctid yw darparu:

• Cyflogwyr cymwys gyda chymorth ariannol i recriwtio pobl ifanc gymwys i swyddi addas

• Pobl ifanc gymwys gyda’r cyfle i ddatblygu’r sgiliau a’r profiad sydd eu hangen arnynt i symud tuag at gyflogaeth barhaus

2.3 Ceisiadau a thaith y cynllun

I wneud cais am y Grant Swyddi Ieuenctid, dylai cyflogwr gael mynediad at Youth Jobs Grant - Find a Grant. Rhaid i chi gofrestru gyda GOV.UK One Login i ddefnyddio’r gwasanaeth hwn, a gallwch gofrestru ar ei gyfer fel rhan o’ch cais.

Mae 3 cham allweddol i’r Cynllun:

Cofrestru Cyflogwyr a diwydrwydd dyladwy

Disgwylir i’r cais cychwynnol i’r Cynllun gymryd tua 20 munud i’w gwblhau. Mae hyn yn gofyn i chi ddarparu’r wybodaeth sydd ei hangen i asesu eich cymhwysedd ar gyfer y Cynllun. Gweler Atodiad A o’r ddogfen hon am gynnwys y ffurflen gais a gwybodaeth am sut i’w llenwi.

Wrth wneud cais i ymuno â’r Cynllun, gofynnir i chi:

• Gadarnhau cywirdeb y wybodaeth rydych yn ei chyflwyno

• Derbyn datganiad sy’n datgan eich bod yn cytuno â Thelerau ac Amodau’r Cynllun a nifer o feini prawf allweddol eraill

Ar ôl cyflwyno pob swydd wag i’r Cynllun, byddwch yn cadarnhau bod y wybodaeth yn parhau i fod yn gywir ac yn cadarnhau eich bod yn derbyn Telerau ac Amodau’r Cynllun a fydd yn cynnwys unrhyw amrywiadau sydd wedi digwydd ers gwneud cais i fod yn gyflogwr ar y Cynllun.

Bydd y ffurflenni hyn hefyd yn nodi os oes newidiadau i Delerau ac Amodau’r Cynllun y mae angen eu derbyn gan eich sefydliad cyn i’r DWP dderbyn swyddi gwag ychwanegol. Dylech bob amser gyfeirio at Grant Swyddi Ieuenctid i gael y wybodaeth a’r fersiwn ddiweddaraf o’r Telerau ac Amodau.

Os oes problem gyda’ch ffurflen gais, byddwn yn cysylltu â chi drwy e-bost neu dros y ffôn fel y darperir yn eich cais. Yna bydd DWP yn cynnal Diwydrwydd Dyladwy ar eich cais, ein nod yw cadarnhau canlyniad eich cais trwy e-bost o fewn 10 diwrnod gwaith. Gweler adran 3.1 am fanylion ar wiriadau diwydrwydd dyladwy cyflogwyr. Dim ond unwaith y bydd yn rhaid cwblhau’r cam hwn; ni fydd yn rhaid i chi wneud hyn eto os byddwch yn cyflwyno swyddi gwag pellach yn y dyfodol.

Bydd y cadarnhad hwn yn cynnwys rhif cyfeirnod unigryw y cyflogwr y dylech ei gynnwys mewn unrhyw gyfathrebu â ni. Ar ôl i chi gael cadarnhad eich bod yn bodloni’r meini prawf ar gyfer y Grant Swyddi Ieuenctid, gallwch gyflwyno swyddi gwag drwy e-bost ar srt.youthjobsgrantteam@DWP.GOV.UK.

Os ydym yn cadarnhau nad ydych yn bodloni’r meini prawf neu wedi methu diwydrwydd dyladwy, byddwn yn anfon e-bost atoch yn nodi pam a’r camau nesaf. Bydd hyn, lle bo hynny’n briodol, yn cynnwys y cyfle i apelio yn erbyn y penderfyniad, gweler 5.4 apeliadau.

Swyddi Gwag

Gweler adran 3.2 sy’n manylu pa fath o swyddi gwag fydd yn addas.

Mae ffurflen ar gael yn Grant Swyddi Ieuenctid, sy’n caniatáu cyflwyno un neu nifer o swyddi gwag, mae’n cynnwys dolen i ffurflen i gadarnhau eich bod yn derbyn y fersiwn ddiweddaraf o’r Telerau ac Amodau a fydd yn berthnasol i’r swyddi gwag hyn.

Yna byddwn yn gwirio bod y swyddi gwag hyn yn bodloni meini prawf cymhwysedd ac addasrwydd y Cynllun ac yn anelu at gadarnhau os ydym yn derbyn yr holl swyddi gwag a gyflwynwyd o fewn 5 diwrnod gwaith. Os oes problem, byddwn yn cysylltu â chi i drafod trwy e-bost neu ffôn.

Ar y pwynt hwn byddwn yn rhoi rhif swydd wag unigryw i chi ar gyfer eich swyddi gwag. Defnyddiwch hyn pan fyddwch yn cyfathrebu â ni am swyddi gwag penodol.

Bydd swyddi gwag a dderbynnir wedyn ar gael drwy systemau DWP ar gyfer Anogwyr Gwaith i nodi a chyfeirio ymgeiswyr addas i’ch swydd wag lle gallwch gynnal eich dull recriwtio dewisol (CV, cyfweliad, ac ati).

Gellir cyflwyno nifer o swyddi gwag a swyddi gwag pellach drwy’r un dull, er gweler adran 3.2 am gyfyngiadau ar hyn.

Cychwyn a Thalu

Ar ôl i chi ddewis ymgeisydd, rhaid i chi roi gwybod i’r DWP trwy e-bostio ffurflen cyn dechrau i srt.youthjobsgrantteam@DWP.GOV.UK cyn i’r person ifanc ddechrau fel y gall DWP gadarnhau eu hunaniaeth a diweddaru cofnodion mewnol. Dylech bob amser gynnwys eich cyfeirnod cyflogwr a’ch cyfeirnod swydd wag, gan y bydd hyn yn ein helpu i’ch adnabod yn gywir.

Byddwn wedyn yn defnyddio Gwybodaeth Amser Real CThEF i ddilysu’r enillion ac, os yw person ifanc wedi cael digon o enillion, gwneud y taliad cyntaf ar ôl tua 6 wythnos a’r ail daliad ar ôl tua 18 wythnos. Gweler Telerau ac Amodau’r Grant am fanylion manwl.

Nid oes angen rhoi gwybod i ni am gyflogaeth barhaus person ifanc, fodd bynnag, os nad ydynt yn dechrau, neu’n gadael yn fuan ar ôl dechrau, gofynnwn i chi roi gwybod i’r DWP drwy gyflwyno’r ffurflen briodol at srt.youthjobsgrantteam@DWP.GOV.UK fel y gallwn ddiweddaru ein cofnodion.

Mae’r ddwy ffurflen yma ar gael ar Grant Swyddi Ieuenctid.

Nodwch nad yw derbyn i’r Cynllun, derbyn swydd wag a gyflwynwyd a/neu gyflogaeth o berson ifanc cymwys yn gwarantu taliad oni bai bod y meini prawf yn cael eu bodloni. Gweler Telerau ac Amodau’r Cynllun am ragor o fanylion.

Gwybodaeth Gyffredinol

Os oes gennych unrhyw ymholiadau am y Cynllun neu gynnydd eich cais am grant, cysylltwch â’r Llinell Gwasanaethau i Gyflogwyr (ESL) ar 0800 169 0178 neu ddefnyddio’r ffurflen ymholiad ar-lein Ffurflen Gyswllt ESL. Byddwn yn anelu at ymateb cyn gynted â phosibl.

Nid yw’r Cynllun yn cynnwys cynnig cymorth wedi’i deilwra i’r cyflogwr na’r person ifanc sy’n cymryd rhan, y tu hwnt i’r cymorth ‘Busnes Arferol’ a gynigir i hawlwyr Credyd Cynhwysol.

Os oes gan gyflogwr bryderon am unrhyw berson ifanc sy’n cymryd rhan yn y Cynllun ac o dan eu cyflogaeth, dylent gysylltu â’r Llinell Gwasanaethau i Gyflogwyr ar 0800 169 0178 neu ddefnyddio’r ffurflen ymholiad ar-lein Ffurflen Gyswllt ESL yn y lle cyntaf.

3. Proses Cyflogwr a Swyddi Gwag

3.1 Cyflogwyr Cymwys

Rydym wedi cynllunio’r Cynllun hwn i leihau’r baich gweinyddol a’r biwrocratiaeth. Fodd bynnag, rhaid i’r Adran hefyd sicrhau ein bod yn diogelu’r Llywodraeth rhag niwed cyfreithiol, ariannol ac enw da wrth weinyddu’r Cynllun hwn. Felly, rydym wedi rhoi amrywiaeth o reolaethau ar waith.

Byddwn yn ymgymryd â diwydrwydd dyladwy ar gyflogwyr gan ddefnyddio Spotlight, system platfform diwydrwydd dyladwy ac asesu risg awtomataidd Swyddfa’r Cabinet, yn ogystal â data gan CThEF.

Mae meini prawf cymhwysedd ac addasrwydd wedi’u nodi’n fanwl yn Nhelerau ac Amodau’r Cynllun yn Grant Swyddi Ieuenctid. Mae’r rhain yn rhwymol ac mae’n rhaid i chi gydymffurfio â’r amodau hyn, os yw’r Adran o’r farn nad yw cyflogwr wedi bodloni neu gynnal gofynion cymhwysedd neu addasrwydd, bydd hyn yn cael effaith ar eich ceisiadau am grant a/neu daliad a gallai arwain at adennill y grant neu gamau eraill yn cael eu cymryd.

Rydym yn cadw’r hawl i ddefnyddio disgresiwn os oes ansicrwydd o ystyried cydymffurfiaeth cyflogwr â chymhwysedd a meini prawf.

Rhaid i gyflogwyr:

• Fod yn sefydliad o unrhyw faint (gan gynnwys masnachwyr sengl sy’n bwriadu cyflogi), gyda gweithrediadau ym Mhrydain Fawr

• Wedi bod yn masnachu am y 6 mis cyn derbyn y Telerau ac Amodau ac yn disgwyl parhau i fasnachu am o leiaf cyfnod y swydd wag

• Peidio â bod yn Adran Llywodraeth Ganolog, eu Hasiantaethau Gweithredol neu Gyrff Cyhoeddus Anadrannol. Mae Awdurdodau Lleol a sefydliadau eraill nad ydynt yn ganolog yn y sector cyhoeddus yn gymwys

• Bod wedi’i gofrestru gyda CThEF, gyda Cyfeirnod Trethdalwr Unigryw (UTR) neu Rhif Cofrestru Unigryw Treth Gorfforaeth (CTUTR)

• Cael Cynllun Talu Wrth Ennill (PAYE) gweithredol

• Cael rhif System Data Rhifo Cyffredinol (D-U-N-S). Mae system dalu DWP yn defnyddio’r rhif hwn i adnabod cyflogwyr cyn y gellir gwneud y taliad:

  • os yw’ch sefydliad wedi’i gofrestru yn Nhŷ’r Cwmnïau, dylech eisoes gael rhif D-U-N-S wedi’i neilltuo

  • os yw’ch sefydliad yn elusen, byddwch dal angen Rhif D-U-N-S i dderbyn taliad

  • i gael Rhif D-U-N-S cysylltwch â D-U-N-S Number Questions: Start Here - Dun & Bradstreet. Nid oes unrhyw gost am y gwasanaeth hwn

Gofynnir i gyflogwyr hefyd ddarparu Rhif Cofrestru Tŷ Cwmnïau (CHRN) i hwyluso diwydrwydd dyladwy.

3.2 Swyddi gwag cymwys

Dylid cofrestru swyddi gwag gyda’r Cynllun drwy’r ffurflen swydd wag a’r ffurflen gychwyn sydd ar gael yn Grant Swyddi Ieuenctid. Gall cyflogwyr gyflwyno eu holl swyddi gwag ar un tro, er gweler yr adran ar Uchafswm nifer y swyddi gwag isod.

Rhaid i swyddi gwag:

• Gynnig gwaith dilys, â thâl am o leiaf 25 awr yr wythnos

• Parhau am o leiaf yr isafswm cyfnod o 16 wythnos

• Talu o leiaf yr Isafswm Cyflog Cenedlaethol neu Gyflog Byw Cenedlaethol sy’n berthnasol

• Bod yn debyg i rolau y mae’r cyflogwr yn eu cynnig y tu allan i’r Cynllun

• Peidio â disodli cyflogai, gweithwyr, prentisiaid neu gontractwyr presennol

• Peidio â bod yn cynnwys mwy na 50% o hyfforddiant ar-lein

Rhaid i swyddi gwag hefyd fodloni Telerau ac Amodau Dod o Hyd i Swydd, sydd ar gael ar Dod o hyd i swydd - Cyflogwyr neu fel PDF ar Grant Swyddi Ieuenctid.

Bydd unrhyw Gyflogaeth a Ariennir yn flaenorol hefyd yn cael ei wirio am arferion ecsbloetio a oedd yn torri’r Telerau ac Amodau.

Ar ôl i chi gyflwyno swyddi gwag, bydd DWP yn cynnal gwiriadau diwydrwydd dyladwy ar y swydd wag i sicrhau ei bod yn cyd-fynd â’r gofynion uchod. Bydd y gwiriadau hyn yn cymryd uchafswm o 5 diwrnod gwaith. Gall hyn gynyddu os yw cyflogwr yn cyflwyno nifer sylweddol o wahanol swyddi gwag ar yr un tro.

Os nad yw’r swydd wag yn bodloni’r gofynion cymhwysedd, bydd cyflogwyr yn cael eu hysbysu drwy e-bost gyda gwybodaeth am sut i apelio, gweler adran 5.4. Mae DWP yn cadw’r hawl i wrthod swyddi gwag i sicrhau bod y Cynllun yn parhau i fod o fewn y gyllideb ac yn cael ei gyflawni’n deg.

Unwaith y bydd swydd wag wedi pasio gwiriadau diwydrwydd dyladwy ac wedi cael ei derbyn, byddwn yn hysbysu’r cyflogwr perthnasol trwy e-bost. Bydd y swydd wag yn fyw o fewn 2 ddiwrnod gwaith. O fewn y 2 ddiwrnod gwaith hyn, os oes angen, bydd Ymgynghorwyr Recriwtio’r Adran yn gweithio gyda’r cyflogwr i fireinio’r swydd wag. Gall y broses hon gymryd mwy o amser os byddwch yn cyflwyno nifer o swyddi gwag.

Noder na ellir hawlio grant y Cynllun ar gyfer unrhyw weithiwr nad yw’n bodloni’r meini prawf cymhwysedd, ar gyfer unrhyw weithiwr a gyflogir yn uniongyrchol y tu allan i’r Cynllun, neu a gafodd eu recriwtio cyn i’r swydd gael ei derbyn i’r Cynllun.

Uchafswm nifer y swyddi gwag:

• Lle rydych yn cyflogi 0-3 o weithwyr uchafswm o 1 Gweithiwr a Ariennir ar unrhyw adeg

• Lle rydych yn cyflogi 4-9 o weithwyr uchafswm o 2 Weithiwr a Ariennir ar unrhyw adeg

• Lle rydych yn cyflogi 10 neu fwy o weithwyr dim mwy na nifer sy’n hafal i 20% o gyfanswm nifer y gweithwyr fel Gweithwyr a Ariennir

• Mae’r DWP yn ei gwneud yn ofynnol i gyflogwyr ddatgan na fydd ei grŵp o gwmnïau (neu strwythur cyfatebol) yn derbyn mwy na £25,000,000 ar draws y cymorth a gynigir drwy Grant Swyddi Ieuenctid a Gwarant Swyddi gyda chyfrifiadau yn seiliedig ar ganllawiau cymhorthdal - i gael rhagor o wybodaeth, gweler y telerau ac amodau a chanllawiau cysylltiedig Llywodraeth EF yn UK subsidy control regime: statutory guidance - GOV.UK

3.3 Paru Swyddi a Cheisiadau

Unwaith y bydd swyddi gwag cymwys yn fyw, bydd swyddi cymwys yn cael eu trosglwyddo i Anogwyr Gwaith a chydweithwyr gweithredol yr Adran Gwaith a Phensiynau i baru’r swydd wag gyda phobl ifanc cymwys ac addas. Bydd Anogwyr Gwaith yn ystyried parodrwydd gwaith y person ifanc sy’n cymryd rhan, dyheadau cyflogaeth penodol ac amgylchiadau (e.e. lleoliad, ffactorau teithio).

Bydd DWP yn gweithio tuag at gyfeirio nifer o bobl ifanc at bob swydd wag. Yna byddant yn mynd trwy broses ymgeisio’r cyflogwr. Mae’r broses ymgeisio hon yn ôl disgresiwn y cyflogwr a gallai gynnwys CV, Datganiad Personol a/neu gyfweliadau uniongyrchol.

Cyn i’r person ifanc ddechrau cyflogaeth, rhaid i gyflogwyr roi gwybod i’r Adran am yr ymgeisydd llwyddiannus a phryd y bydd y person ifanc yn dechrau eu cyflogaeth trwy e-bostio’r ffurflen cyn dechrau sydd ar gael yn Grant Swyddi Ieuenctid i’r cyfeiriad e-bost hwn srt.youthjobsgrantteam@DWP.GOV.UK.

Os yw swydd wag heb ei llenwi o fewn 8 wythnos, byddwn yn anfon e-bost atoch i drafod y camau nesaf.

3.4 Ôl-gynllun

Dyhead y Cynllun yw i gyflogwyr dderbyn pobl ifanc cymwys a chynnal eu cyflogaeth y tu hwnt i’r cyfnod isafswm o 16 wythnos. Mae’n ofynnol i’r cyfnod isafswm gael ei fodloni fel amod ar gyfer y taliad grant, ac os yw cyflogaeth yn parhau y tu hwnt i 16 wythnos nid yw’n destun i unrhyw gyllid grant pellach.

Pan fo’r Adran yn credu bod unrhyw Gyflogwr a Ariennir yn recriwtio Gweithwyr a Ariennir olynol i’r un Swydd Wag, rydym yn cadw’r hawl i wrthod derbyn yr un Swydd Wag a gyflwynir dro ar ôl tro.

4. Cyllid grant

4.1 Crynodeb o’r dull cyllido grant

Rhaid bodloni’r holl amodau ac ystyriaethau ychwanegol fel y’u nodir yn y Telerau ac Amodau er mwyn rhyddhau’r taliadau grant ac mae’r Adran yn cadw’r hawl i atal neu adennill taliadau grant pan ganfyddir nad yw cyflogwyr wedi gweithredu yn unol ag amodau’r Cynllun.

4.2 Gweinyddu’r Cyllid Grant

Bydd y Cynllun yn cael ei weinyddu’n ganolog gan yr Adran Gwaith a Phensiynau.

Yn y lle cyntaf, os oes gennych ymholiadau am y Cynllun, dylai cyflogwyr gysylltu â’r Llinell Gwasanaethau i Gyflogwyr ar 0800 169 0178 neu ddefnyddio’r ffurflen ymholiad ar-lein. Ar gyfer diwydrwydd dyladwy, swydd wag, neu ar gyfer apeliadau taliadau yn unig mae’r cyswllt trwy e-bost srt.yjgappeals@dwp.gov.uk.

Dylai Person Ifanc sydd ag ymholiadau am y Cynllun gysylltu â’u Hanogwr Gwaith neu ganolfan waith leol, yn unol ag amodau eu cais Credyd Cynhwysol.

Drwy gydol cyfranogiad y cyflogwr yn y Cynllun, bydd yn ofynnol iddynt ymgysylltu ag ystod o brosesau gweinyddu grantiau a chynlluniau. Dylai’r cyflogwr sy’n cymryd rhan anelu at sicrhau eu bod yn gwneud hynny’n brydlon er mwyn osgoi unrhyw effeithiau negyddol ar eu ceisiadau neu daliadau grant.

4.3 Y Broses Talu

Dim ond os bodlonir amodau grant y bydd taliadau grant yn cael eu rhyddhau, gan gynnwys cydymffurfio â gwirio cyflogaeth person ifanc drwy Gwybodaeth Amser Real gan CThEF sy’n rhannu’r wybodaeth enillion gyfredol gyda’r Adran Gwaith a Phensiynau.

Cyfeiriwch at y Telerau ac Amodau am y manylion talu penodol, ond yn gryno:

• Bydd y taliad cyntaf o £1,800 yn cael ei wneud os yw person ifanc wedi gweithio o leiaf 50 awr pan fydd DWP yn gwirio RTI yn wythnos 6

• Os nad yw’r trothwy wedi’i gyrraedd, bydd DWP yn ailadrodd y dilysiad 10 wythnos ar ôl y dyddiad cychwyn ac yn gwirio am o leiaf 100 awr o gyflogaeth

• Os nad oes enillion digonol ar wythnos 10 o’r Dyddiad Cychwyn, ni fyddwn yn gwneud y taliad hwn na’r ail daliad ar gyfer y person ifanc penodol, bydd hyn yn cael ei gadarnhau trwy e-bost

• Bydd yr ail daliad o £1,200 yn cael ei wneud os yw person ifanc wedi gweithio o leiaf 300 awr pan fydd DWP yn gwirio RTI ar wythnos 18

• Os nad yw’r data gofynnol wedi’i gofnodi ar RTI eto, bydd DWP yn ailadrodd y dilysiad 22 wythnos ar ôl y dyddiad cychwyn

• Os nad oes enillion digonol ar 22 wythnos o’r Dyddiad Cychwyn, ni fyddwn yn gwneud taliad, bydd hyn yn cael ei gadarnhau trwy e-bost

Ein nod yw rhyddhau taliad dim mwy na 10 diwrnod ar ôl i DWP wirio bod yr holl amodau wedi’u bodloni. Bydd DWP yn cadarnhau Taliad trwy e-bost unwaith y bydd y taliad wedi’i wneud.

Efallai y bydd DWP yn cysylltu â chi cyn i’r taliad gael ei ryddhau i wirio manylion banc.

Os yw cyflogwr o’r farn bod gwall, dylent ymateb i’r e-bost gan nodi pam, fodd bynnag, mae’r cyflogwr yn gyfrifol am ddata talu’r person ifanc a ddarperir i CThEF i’w llwytho ar RTI, ni fyddwn yn derbyn slipiau cyflog mewn unrhyw ffurf na thystiolaeth arall.

Ni fydd y Cynllun hwn yn destun cysoni costau a thaliadau grant yn fanwl, fodd bynnag, byddwn yn cynnal y gwiriadau RTI a ddisgrifir uchod i sicrhau bod meini prawf cyflogaeth a thâl wedi’u bodloni i gefnogi rhyddhau’r taliad grant.

Er bod y taliad grant wedi’i gynllunio i’w ddefnyddio’n hyblyg gan y cyflogwr, mae’r Grant Swyddi Ieuenctid yn daladwy mewn perthynas ag ad-daliad Costau Cyflogaeth Cymwys yn unig. Rhaid i chi beidio â hawlio Grant Swyddi Ieuenctid ar gyfer costau a ariennir eisoes gan DWP neu unrhyw Gorff y Goron neu Gorff Llywodraeth Leol arall.

5. Cydymffurfiaeth

5.1 Cydymffurfiaeth Gyfreithiol

Mae’n ofynnol i gyflogwyr sicrhau cydymffurfiaeth â’r holl ddeddfwriaeth berthnasol. Tynnir eich sylw at y canlynol:

• Deddf Hawliau Cyflogaeth 1996 a 2025

• Rheoliadau Amser Gwaith 1998

• Deddf Isafswm Cyflog Cenedlaethol 1998

• Iechyd a Diogelwch yn y Gwaith ac ati… Deddf 1974

• Rheoliad Diogelu Data Cyffredinol y DU a Deddf Diogelu Data 2018

• Deddf Cydraddoldeb 2010

• Deddf Caethwasiaeth Fodern 2015

Diogelu

Rhaid cadw at yr holl ddeddfwriaeth diogelu perthnasol. Rydym yn tynnu eich sylw yn arbennig at ddeddfwriaeth amddiffyn plant a Deddf Caethwasiaeth Fodern 2015. Rhaid i chi gael polisïau a/neu brosesau digonol ar waith er mwyn meithrin diogelu.

Iechyd a Diogelwch

Rhaid i chi sicrhau amgylchedd diogel i unrhyw Weithiwr a Ariennir a’r holl weithwyr ar ac oddi ar y safle, ac ar gyfer bodloni’r holl ofynion iechyd a diogelwch rheoleiddiol a deddfwriaethol.

Dylid cynnal asesiadau risg iechyd a diogelwch lle bo hynny’n briodol i sicrhau cydymffurfiaeth â’r holl rwymedigaethau iechyd a diogelwch.

Rhaid i asesiadau risg iechyd a diogelwch ystyried deddfwriaeth gydraddoldeb berthnasol. Pan all asesiad iechyd a diogelwch arwain at wahaniaethu, hynny yw, mae un person yn cael ei drin yn llai ffafriol nag eraill mewn perthynas â nodwedd a ddiogelir mewn deddfwriaeth (gan gynnwys, ond heb fod yn gyfyngedig i, anabledd, beichiogrwydd, mamolaeth neu ryw (gan gynnwys bwydo’r fron)), rhaid bod yn bosibl dangos bod hyn yn ffordd gymesur o gyflawni nod cyfreithlon.

Rydym yn cadw’r hawl i ofyn i chi gynnal asesiad risg diogelwch mewn achosion unigol lle gall iechyd a diogelwch fod yn broblem, ac i fonitro ac archwilio’r trefniadau gwirioneddol a wnaed. Os bydd digwyddiad difrifol (er enghraifft, marwolaeth) rydym yn gofyn i chi roi gwybod i ni at ddibenion risg.

Cydraddoldeb, amrywiaeth a chynhwysiant

Disgwylir i chi sicrhau bod cydraddoldeb, amrywiaeth a chynhwysiant yn cael eu hystyried a’u cefnogi ar bob cam trwy gydol perfformiad y Cynllun.

Rhaid i chi sicrhau bod unrhyw hyfforddiant a chyflogaeth yn cydymffurfio â darpariaethau Deddf Cydraddoldeb 2010 yng Nghymru, Lloegr a’r Alban.

Mae’n ofynnol i chi sicrhau bod yr holl staff gan gynnwys y person ifanc yn cael hyfforddiant, gwybodaeth a chymorth addas i sicrhau cydymffurfiaeth â’ch rhwymedigaethau o dan yr holl ddeddfwriaeth cydraddoldeb.

Bwlio ac aflonyddu

Rhaid i chi gael polisïau, prosesau a hyfforddiant clir a chyhoeddus mewn lle. Er mwyn rheoli’r risgiau sy’n gysylltiedig â’n cyllid, rhaid i sefydliadau ein hysbysu am unrhyw honiadau o gamfanteisio’n rhywiol, camdriniaeth, bwlio, cam-drin seicolegol, trais corfforol ac aflonyddu gan gynnwys mewn perthynas ag unrhyw un o’r nodweddion gwarchodedig fel y’u diffinnir gan Ddeddf Cydraddoldeb 2010, yn erbyn staff neu bersonél cysylltiedig sy’n ymwneud yn uniongyrchol â’r Cyflogwr a Ariennir.

5.2 Atal Twyll

Mae DWP yn cadw’r hawl i gymryd unrhyw gamau y mae’n ystyried eu bod yn briodol os oes unrhyw dystiolaeth neu amheuaeth o:

• Weithgaredd twyllodrus

• Camddefnyddio cyllid y llywodraeth gan unrhyw ochr

Rhaid i ymgeiswyr grant neu Gyflogwyr a Ariennir sy’n dod yn ymwybodol o unrhyw weithgaredd sy’n dwyllodrus neu a allai fod yn dwyllodrus neu nad yw’n cydymffurfio â gofynion y Cynllun Grant gysylltu â srt.yjgappeals@dwp.gov.uk.

Rhaid i chi ddarparu manylion am unrhyw honiadau, wedi’u profi neu beidio, o achosion o dwyll neu ymgais i dwyllo ac unrhyw gŵyn neu ymchwiliad arall i anonestrwydd, gweithgareddau twyllodrus neu gamymddwyn busnes, gan unrhyw gorff rheoleiddio neu’r heddlu i’ch gweithgareddau neu weithgareddau eich staff cyn gynted ag y daw hyn yn hysbys i chi.

Os yw’r Adran o’r farn bod gweithgaredd twyllodrus wedi digwydd, byddwn yn cyfeirio’r achos at dîm Twyll a Gwall canolog yr Adran i gymryd camau o dan rwymedigaethau statudol.

5.3 Archwiliad

Drwy wneud cais am grant neu hawlio grant o dan y Cynllun Grant Swyddi Ieuenctid, rydych yn cytuno i hwyluso archwiliadau fel y nodir yn Nhelerau ac Amodau’r Cynllun gan DWP a/neu sefydliad trydydd parti enwebedig.

Gall archwiliadau gael eu cynnal cyn neu ar ôl i gais gael ei dalu ac mae’n rhaid i chi gadw holl gofnodion Grant Swyddi Ieuenctid am 7 mlynedd unwaith nad yw’r gweithiwr bellach wedi’u cwmpasu gan y Cynllun.

5.4 Apeliadau

Os ydych chi neu’ch swydd wag yn cael eu gwrthod o’r Cynllun a’ch bod yn credu bod hyn oherwydd camgymhwyso’r meini prawf hyn neu nad yw gwybodaeth wedi’i ddarparu i gefnogi’r cais, gellir apelio yn erbyn y penderfyniad drwy gysylltu â: srt.yjgappeals@dwp.gov.uk.

Bydd DWP yn ystyried yr holl wybodaeth a gyflwynir ond nid yw hyn yn rhwystro disgresiwn DWP i wneud penderfyniadau i weithredu’r cynllun.

Diwydrwydd dyladwy cyflogwr

Bydd ein penderfyniad yn nodi pa ran (neu rannau) o’r cymhwysedd y mae eich sefydliad wedi methu, oni bai eich bod wedi methu ar un o wiriadau CThEF. Dylai eich apêl gadarnhau pam rydych yn meddwl bod eich sefydliad yn gymwys a pham mae’r data o fewn Spotlight yn anghywir neu sut roedd y wybodaeth a gyflwynwyd gennych yn anghywir a darparu’r wybodaeth gywir.

Bydd eich cyflwyniad yn cael ei adolygu gan banel gwneud penderfyniadau. Byddant yn penderfynu a yw’r sefydliad yn gymwys ac os felly, yn cadarnhau hyn trwy e-bost, os na byddant yn cadarnhau eich anghymwysedd.

Mae’r penderfyniad hwn yn derfynol, er bod croeso i chi wneud cais eto os bydd eich sefydliad yn gymwys yn ddiweddarach.

Os byddwch yn methu ar un o wiriadau CThEF yna bydd yr e-bost yn nodi eich opsiynau, fodd bynnag, byddwn yn gofyn i chi fynd yn ôl trwy ddiwydrwydd dyladwy CThEF unwaith y bydd y mater wedi’i ddatrys. Os bydd eich sefydliad yn methu am yr eildro, nid oes hawl bellach i apelio.

Diwydrwydd dyladwy swyddi gwag

Bydd ein penderfyniad yn nodi pa ran o’r cymhwysedd swydd wag y mae’r swydd wag wedi ei fethu.

Dylai eich apêl gadarnhau naill ai:

a) pa ran o’r cyflwyniad y byddwch yn ei newid i’w wneud yn gymwys neu

b) pam ein bod ni (DWP) wedi cymhwyso’r meini prawf cymhwysedd yn anghywir

Bydd eich cyflwyniad yn cael ei adolygu gan banel gwneud penderfyniadau. Byddant yn penderfynu a yw’r swydd wag yn gymwys ac os felly, yn cadarnhau hyn trwy e-bost, os na byddant yn cadarnhau eich anghymwysedd.

Mae’r penderfyniad hwn yn derfynol, er bod croeso i chi gyflwyno rhagor o swyddi gwag sy’n bodloni’r meini prawf cymhwysedd.

6. Gwerthuso

Mae’r Cynllun yn rhaglen a ariennir yn gyhoeddus ac felly dylai ddarparu gwerth am arian i’r trethdalwr. Er mwyn darparu atebolrwydd am y gwariant a ymrwymwyd iddo ar y cynllun hwn, bydd DWP yn cynnal gwerthusiad llawn o’r Grant Swyddi Ieuenctid i nodi a sefydlu graddfa ei effeithiau, ei allbynnau cyflawni a’i werth am arian.

Gall DWP gomisiynu elfennau o’r gwerthusiad hwn i drydydd parti (contractwr ymchwil), os felly, byddwn yn cadarnhau yn y dyfodol y darparwr ymchwil rydym wedi partneru â hwy.

Gofynnir i gyflogwyr gefnogi’r gwerthusiad proses hon trwy gymryd rhan weithredol a galluogi ymchwil, arolygon a gwerthuso.

Yn ogystal â’r gofynion data a nodir yn y dogfennau hyn a dogfennau eraill y Cynllun, efallai y gofynnir i gyflogwyr a phobl ifanc sy’n cymryd rhan yn y Cynllun am adborth ansoddol, gan gynnwys profiad y cyfranogwyr perthnasol o’r Cynllun.

7. Data

Rhaid i’r Adran Gwaith a Phensiynau a chyflogwyr sy’n cymryd rhan gydymffurfio â’r holl gyfreithiau diogelu data perthnasol mewn perthynas â data a gesglir ar gyfer gweinyddu, monitro a gwerthuso’r Cynllun hwn a’i daliadau grant.

Bydd unrhyw ddata personol (eich gweithwyr, cynrychiolwyr cwmni neu fel arall) a ddarperir gennych yn cael ei ddefnyddio yn unol â’r datganiadau preifatrwydd Find a Grant a Spotlight sydd wedi’u lleoli yn Find a Grant a Spotlight.

Rhaid i chi hefyd gydymffurfio ag unrhyw weithdrefnau diogelu data ychwanegol a hysbyswyd gennym ni a sicrhau:

1. Rydych wedi darparu ein datganiad preifatrwydd i weithwyr sy’n cymryd rhan, cynrychiolwyr cwmni neu bobl perthnasol eraill.

2. Rhoddwyd pob hysbysiad prosesu teg a/neu, fel y bo’n berthnasol, ceir caniatâd i’n galluogi i brosesu’r data perthnasol at ddibenion y Cynllun.

Efallai y byddwn hefyd yn gofyn i chi gydymffurfio â darpariaethau data ychwanegol os ydym yn penderfynu’n rhesymol bod y rhain yn angenrheidiol i alluogi’r Adran a chyflogwyr sy’n cymryd rhan i gydymffurfio â rhwymedigaethau priodol o dan gyfreithiau a pholisïau diogelu data.

Atodiad A: Cynnwys y ffurflen gais

Mae’r adran hon o’r ddogfen yn nodi’r cwestiynau penodol y gofynnir i chi yn ystod y cais Find a Grant ar draws 5 adran a sut rydym yn argymell eich bod yn eu cwblhau.

Adran	Sut i gwblhau
Adran 1: Cymhwysedd	Dyma flwch ticio i gadarnhau eich bod yn bodloni’r meini prawf cymhwysedd ar gyfer y cynllun.
Adran 2: Eich Manylion	Mae’r cwestiynau hyn yn cefnogi ein gwiriadau diwydrwydd dyladwy ac maent wedi’u hadeiladu i mewn i Find a grant.
Rhowch enw eich sefydliad	Dylai hwn fod yr enw rydych yn ei ddefnyddio at ddibenion busnes, nid eich enw masnachfraint ac ati.
Dewiswch eich math o sefydliad	Mae hwn yn gwymplen, dewiswch yr opsiwn cywir ar gyfer eich sefydliad. Os ydych chi’n fasnachwr sengl, dewiswch ‘Non-limited company’.
Rhowch gyfeiriad eich sefydliad	Rhowch eich cyfeiriad cofrestredig er mwyn caniatáu i ni eich paru â chofnodion eraill. Ar gyfer masnachwyr sengl, dylech gynnwys eich cyfeiriad trethdalwr.
Rhowch eich rhif Comisiwn Elusennau (os oes gennych un) (dewisol)	–
Rhowch eich rhif Tŷ Cwmnïau (os oes gennych un) (dewisol)	–
Adran 3: Cyllid	Mae’r cwestiynau hyn wedi’u hadeiladu i mewn i Find a Grant ac ni fyddant yn llywio ein penderfyniad ond yn helpu i lywio ein casglu data.
Faint o grant mae eich sefydliad ei angen ar eich sefydliad?	Ni chaiff y maes rhif hwn ei adolygu.
Ble bydd y cyllid hwn yn cael ei wario?	Mae hwn yn flwch gwymplen. Dewiswch pa ranbarth(au) o Brydain Fawr rydych yn bwriadu cyflogi ynddo i gefnogi ein casglu data. Ni fyddwn yn eich dal i’r rhanbarthau hyn os ydych eisiau recriwtio mewn ardaloedd eraill yn y dyfodol.
Adran 4: Manylion Sefydliad Ychwanegol	Mae’r cwestiynau hyn yn cefnogi ein diwydrwydd dyladwy a chasglu data.
Pa sector swyddi sy’n berthnasol i’ch sefydliad	Mae hwn yn gwestiwn dewis lluosog. Dewiswch yr holl sectorau sy’n berthnasol i’ch sefydliad o’r rhestr.
Os yw’ch sefydliad wedi gweithredu o’r blaen o dan enw gwahanol, rhowch fanylion isod	–
Os dechreuodd eich sefydliad lai na 2 flynedd yn ôl (o 05/04/2024), nodwch y dyddiad cychwyn isod	-
Rhowch rif ffôn cyswllt ar gyfer y cais	Dylai hwn fod yr unigolyn awdurdodedig sy’n arwain ar y recriwtio.
Rhowch enw’r unigolyn (Cyfarwyddwr) sydd wedi rhoi caniatâd i wneud cais am y grant hwn	-
Rhowch rif ffôn cyswllt yr unigolyn (Cyfarwyddwr) sydd wedi rhoi caniatâd i wneud cais am y grant hwn	-
Rhowch gyfeiriad e-bost yr unigolyn (Cyfarwyddwr) sydd wedi rhoi caniatâd i wneud cais am y grant hwn	-
5. Manylion Ariannol	Bydd y wybodaeth hon yn caniatáu i DWP gynnal gwiriadau cydymffurfio a diwydrwydd dyladwy ac atal twyll.
Rhowch eich cyfeirnod PAYE	Mae angen rhif PAYE ar gyfer y Cynllun.
Rhowch eich Cyfeirnod Trethdalwr Unigryw (UTR) neu UTR Treth Gorfforaeth (rhif CTUTR)	Mae angen rhif UTR i’r Cynllun gefnogi gwiriadau diwydrwydd dyladwy ac adnabod y sefydliad.
Rhowch eich rhif D-U-N-S (Data Universal Numbering System)	Mae angen rhif D-U-N-S er mwyn i’r Cynllun alluogi DWP i dalu’r grant. Byddwn yn gwirio hyn gyda Spotlight. Gall masnachwyr sengl ofyn am rif D-U-N-S os nad oes ganddynt un yn barod.
Rhowch enw’r banc	Rhowch fanylion banc cyfrif y sefydliad yr hoffech i’r grant gael ei dalu iddo. Bydd DWP yn gwirio bod y manylion hyn yn cyd-fynd â’r sefydliad.
Rhowch enw’r cyfrif	Rhowch fanylion banc cyfrif y sefydliad yr hoffech i’r grant gael ei dalu iddo. Bydd DWP yn gwirio bod y manylion hyn yn cyd-fynd â’r sefydliad.
Rhowch y cod didoli 6 digid	Rhowch fanylion banc cyfrif y sefydliad yr hoffech i’r grant gael ei dalu iddo. Bydd DWP yn gwirio bod y manylion hyn yn cyd-fynd â’r sefydliad.
Rhowch rif y cyfrif	Rhowch fanylion banc cyfrif y sefydliad yr hoffech i’r grant gael ei dalu iddo. Bydd DWP yn gwirio bod y manylion hyn yn cyd-fynd â’r sefydliad.
6. Datganiad	Mae hwn yn flwch ticio i ddatgan eich bod yn derbyn y Telerau ac Amodau.