Canllawiau

Trosolwg o'r rhaglen Erasmus+

Cyhoeddwyd 16 Ebrill 2026

Ynglŷn ag Erasmus+

Mae’r Deyrnas Unedig (DU) a’r Undeb Ewropeaidd (UE) wedi cytuno i’r DU ymuno â’r rhaglen Erasmus+ o 2027 ymlaen.

Mae Erasmus+ yn rhaglen yr UE sy’n darparu cyllid grant ar gyfer lleoliadau rhyngwladol a phrosiectau partneriaeth ar gyfer sefydliadau sy’n gweithio yn:

• addysg
• hyfforddiant
• ieuenctid
• chwaraeon

Nod y rhaglen yw helpu unigolion i ddatblygu eu gwybodaeth, ennill profiad gwaith ac adeiladu sgiliau personol a phroffesiynol drwy gyfleoedd i astudio, dysgu a gweithio mewn gwledydd cymwys.

I sefydliadau, mae Erasmus+ yn darparu cyfleoedd i adeiladu partneriaethau rhyngwladol sy’n annog arloesedd ac yn cryfhau arfer, gan greu manteision parhaol i:

• staff
• dysgwyr
• pobl ifanc
• cymunedau

Mae’r partneriaethau hyn yn helpu i gryfhau enw da byd-eang y DU mewn addysg a hyfforddiant.

I bwy mae hyn

Mae Erasmus+ ar agor i ddysgwyr gan gynnwys hyfforddeion a staff ym meysydd:

• addysg uwch (AU)

• addysg bellach (AB)

• addysg a hyfforddiant galwedigaethol (VET)

• ysgolion ac addysg oedolion

Mae hefyd ar agor i:

• pobl ifanc a gweithwyr ieuenctid yn y sector ieuenctid

• staff (gan gynnwys gwirfoddolwyr) mewn sefydliadau chwaraeon

Mae’n cefnogi ymrwymiad y llywodraeth i gynyddu cyfranogiad mewn gweithgarwch corfforol a chynyddu mynediad at gyfleoedd chwaraeon ar lawr gwlad.

Beth allwch chi ei wneud

• gall disgyblion ysgol dreulio amser yn astudio dramor, naill ai fel rhan o ddosbarth neu grŵp, neu’n unigol

• gall myfyrwyr a phrentisiaid mewn AU, AB a VET astudio, hyfforddi, gwirfoddoli neu wneud lleoliad gwaith dramor

• gall dysgwyr sy’n oedolion dreulio amser mewn sefydliad dysgu oedolion dramor neu astudio dramor fel rhan o grŵp

• gall pobl ifanc sy’n gweithio neu’n gwirfoddoli i sefydliadau ieuenctid deithio i gael hyfforddiant neu gyfnewidiad ieuenctid a chymryd rhan mewn gweithdai, trafodaethau a gweithgareddau awyr agored

• gall gweithwyr ieuenctid a staff sy’n gweithio mewn ysgolion, addysg bellach, addysg uwch neu addysg oedolion hyfforddi neu addysgu dramor a chymryd rhan mewn gweithgareddau datblygiad proffesiynol

• gall staff chwaraeon ar lawr gwlad dreulio amser dramor yn cysgodi swyddi neu ar aseiniad hyfforddi

Sefydliadau

Gall sefydliadau hefyd gymryd rhan yn Erasmus+ drwy ffurfio prosiectau cydweithredol gyda phartneriaid dramor. Nod y prosiectau hyn yw datblygu a rhannu arferion arloesol a gwella’r addysg, hyfforddiant, gweithgareddau ieuenctid neu chwaraeon y mae sefydliadau’n eu cynnig.

Am ragor o wybodaeth am gyfleoedd ar gyfer pob sector a sut i wneud cais gweler canllawiau rhaglen Erasmus+ ar gyfer:

• ysgolion

• addysg a hyfforddiant galwedigaethol

• ar gyfer addysg oedolion

• addysg uwch

• ieuenctid

• chwaraeon

Diffiniad Erasmus+ o brosiect

Pan yw sefydliad yn gwneud cais am gyllid Erasmus+, mae’n gwneud cais am ‘brosiect’.

Mae prosiect yn nodi:

• y gwaith y mae’r sefydliad yn bwriadu ei gyflawni gyda’r cyllid

• a yw hyn yn cynnwys lleoliadau rhyngwladol neu bartneriaeth â sefydliadau eraill dramor

Mae’n amlinellu’r gweithgareddau a gynllunir a’r nodau y bwriedir iddynt eu cyflawni. Mae enghreifftiau o nodau a gweithgareddau yn cynnwys:

• datblygu sgiliau staff

• cefnogi myfyrwyr i gryfhau eu galluoedd iaith a’u dealltwriaeth ddiwylliannol

Ble allwch chi fynd

Fel rhan o Erasmus+, gall cyfranogwyr ym mhob sector deithio i unrhyw aelod-wladwriaeth o’r Undeb Ewropeaidd, yn ogystal â:

• Gwlad yr Iâ

• Liechtenstein

• Norwy

• Gogledd Macedonia

• Serbia

• Türkiye

Gall deiliaid grantiau yn y sectorau addysg uwch ac ieuenctid hefyd ddyrannu hyd at 20% o gyllid prosiect i gefnogi symudeddau rhyngwladol i wledydd nad ydynt yn gysylltiedig â’r rhaglen.

Pwy all wneud cais am gyllid

Ni all dysgwyr na staff wneud cais yn uniongyrchol am gyllid Erasmus+. Rhaid i chi wneud cais drwy sefydliad sy’n cymryd rhan fel eich ysgol, prifysgol, coleg AB neu weithle.

Mae sefydliadau a all wneud cais am gyllid yn cynnwys:

• ysgolion

• darparwyr AU

• darparwyr AB

• darparwyr VET

• darparwyr addysg oedolion

• sefydliadau ieuenctid a chwaraeon

• sefydliadau nid-er-elw

Mae Canllaw Rhaglen Erasmus+ yn cynnwys rhagor o wybodaeth am ba sefydliadau all wneud cais am gyllid. Mae’n ddogfen dechnegol, wedi’i chynllunio’n bennaf ar gyfer sefydliadau sy’n paratoi ceisiadau am gyllid.

Camau gweithredu allweddol Erasmus+

Mae cyllid ar gyfer prosiectau Erasmus+ wedi’i rannu ar draws 4 cham gweithredu allweddol a bydd angen i sefydliadau nodi pa gam gweithredu allweddol y mae eu prosiect yn ymwneud ag ef.

Cam gweithredu allweddol 1: prosiectau symudedd

Yn cefnogi myfyrwyr, pobl ifanc a staff sy’n gweithio ym maes addysg, ieuenctid a chwaraeon ar lawr gwlad i deithio dramor i astudio, hyfforddi, addysgu neu wirfoddoli. Gelwir hyn yn ‘symudedd’.

Enghraifft: Mae grŵp o ddisgyblion ysgol uwchradd yn teithio i ysgol bartner mewn gwlad arall ar gyfer ymweliad astudio byr i brofi dysgu mewn system addysg a diwylliant gwahanol.

Cam gweithredu allweddol 2: partneriaethau

Yn cefnogi partneriaethau ac adeiladu capasiti ar gyfer ysgolion, darparwyr AB, darparwyr addysg uwch, a grwpiau eraill i gydweithio ar flaenoriaethau ar y cyd a rhannu syniadau.

Enghraifft: Mae coleg AB yn gweithio gyda phartneriaid dramor i ddatblygu a threialu deunyddiau hyfforddi digidol newydd.

Cam gweithredu allweddol 3: datblygu polisi a chydweithredu

Yn cefnogi gwledydd i gydweithio i wella addysg, gwaith ieuenctid a chwaraeon ledled Ewrop drwy brosiectau datblygu polisi.

Enghraifft: Mae sefydliadau o sawl gwlad yn cydweithio i ymchwilio i sut mae cynhwysiant ac amrywiaeth yn cael eu hyrwyddo mewn systemau addysg. Maent yn defnyddio’r canfyddiadau i lunio argymhellion ar gyfer gwella polisi ac arfer.

Camau Gweithredu Jean Monnet

Yn cefnogi pobl i ddysgu mwy am yr UE a’i pholisïau, yn enwedig mewn ysgolion a phrifysgolion.

Enghraifft: Mae prifysgol yn datblygu cwrs byr sy’n esbonio sut mae polisïau allweddol yr UE yn gweithio a sut maen nhw’n dylanwadu ar gydweithrediad rhyngwladol â gwledydd y tu allan i’r UE.

Blaenoriaethau Erasmus+

Mae Erasmus+ yn cael ei arwain gan 4 blaenoriaeth lorweddol sy’n berthnasol ar draws y gwahanol gamau gweithredu allweddol.

Dylai ceisiadau am brosiectau arddangos sut maent yn ymateb i o leiaf un o’r blaenoriaethau hyn.

Blaenoriaeth 1: cynhwysiant ac amrywiaeth

Nod y flaenoriaeth hon yw sicrhau mynediad cyfartal i Erasmus+ drwy hyrwyddo gweithgareddau prosiect cynhwysol a hygyrch a thrwy gefnogi pobl sy’n wynebu rhwystrau, gan gynnwys:

• cymdeithasol
• economaidd
• diwylliannol
• daearyddol
• addysgol

Mae hyn yn cefnogi Cenhadaeth Cyfle y llywodraeth drwy flaenoriaethu cyfranogiad gan grwpiau difreintiedig ac yn parhau â’r uchelgais a osodwyd gan Gynllun Turing i ehangu mynediad at gyfleoedd rhyngwladol.

Blaenoriaeth 2: yr amgylchedd a’r frwydr yn erbyn newid hinsawdd

Mae’r flaenoriaeth hon yn cefnogi’r newid gwyrdd drwy annog ymwybyddiaeth amgylcheddol, ymddygiadau cynaliadwy a datblygu sgiliau sy’n gysylltiedig â gweithredu ar yr hinsawdd ar draws addysg, hyfforddiant a gweithgareddau ieuenctid.

Blaenoriaeth 3: trawsnewid digidol

Mae’r flaenoriaeth hon yn canolbwyntio ar wella sgiliau digidol a chefnogi’r defnydd o offer a dulliau digidol mewn addysg, hyfforddiant a gweithgareddau ieuenctid, gan gynnwys dulliau cymysg ac ar-lein.

Blaenoriaeth 4: cyfranogiad mewn bywyd democrataidd, gwerthoedd cyffredin ac ymgysylltiad dinesig

Mae’r flaenoriaeth hon yn hyrwyddo cyfranogiad mewn bywyd democrataidd ac yn cefnogi cyfleoedd ystyrlon i bobl rannu eu barn a chymryd rhan mewn gwneud penderfyniadau.

Mae canllaw rhaglen Erasmus+ yn rhoi rhagor o wybodaeth am flaenoriaethau Erasmus+.

Beth mae’r Asiantaeth Genedlaethol yn ei wneud

Yr Adran Addysg (DfE) yw Awdurdod Cenedlaethol y DU ar gyfer Erasmus+.

Fel yr Awdurdod Cenedlaethol, mae’r Adran Addysg yn goruchwylio’r rhaglen yn y DU ac yn gyfrifol am fonitro a goruchwylio ei rheolaeth.

I gymryd rhan yn Erasmus+, rhaid i’r DU hefyd benodi Asiantaeth Genedlaethol nad yw’n adran o’r llywodraeth.

Mae’r Asiantaeth Genedlaethol hon yn gyfrifol am gyflwyno Erasmus+ yn y DU a rheoli gweithgareddau rheoli anuniongyrchol y rhaglen, sy’n cyfrif am tua 80% o’r cyllid ar gyfer:

• Cam Gweithredu Allweddol 1 (symudedd dysgu)

• Cam Gweithredu Allweddol 2 (prosiectau cydweithredu)

Mae eu cyfrifoldebau’n cynnwys:

• darparu gwybodaeth am y rhaglen

• adolygu ceisiadau a gyflwynwyd yn eu gwlad

• monitro a gwerthuso gweithrediad y rhaglen yn eu gwlad

• cefnogi pobl a sefydliadau sy’n cymryd rhan yn Erasmus+

• hyrwyddo’r rhaglen a’i gweithgareddau ar lefel leol a chenedlaethol

• rheoli dyrannu arian a sicrhau ei fod yn cael ei wario’n briodol

Mae’r DfE wedi dechrau trafodaethau gyda’r Cyngor Prydeinig gyda’r bwriad o’u penodi’n Asiantaeth Genedlaethol.

Sut mae cyllid yn gweithio

Mae cyllid Erasmus+ yn cael ei reoli mewn dwy ffordd:

• yn uniongyrchol gan Asiantaeth Weithredol Addysg a Diwylliant (EACEA) yr UE

• yn anuniongyrchol drwy Asiantaeth Genedlaethol y DU

Bydd Cam Gweithredu Allweddol eich prosiect yn pennu a fyddwch yn gwneud cais am gronfeydd a reolir yn uniongyrchol neu’n anuniongyrchol.

Mae sefydliadau, fel prifysgolion neu golegau, yn gwneud cais am gyllid. Nid yw unigolion, fel myfyrwyr a staff, yn gwneud cais yn uniongyrchol ac yn hytrach maent yn derbyn cyllid trwy eu sefydliad.

Rheolaeth anuniongyrchol drwy’r Asiantaeth Genedlaethol

Mae’r rhan fwyaf o weithgareddau Erasmus+ yn cael eu rheoli’n anuniongyrchol drwy Asiantaeth Genedlaethol y DU, mae hyn yn cynnwys:

• Cam Gweithredu Allweddol 1: cyllid i bobl astudio, hyfforddi neu weithio dramor

• Cam Gweithredu Allweddol 2: y rhan fwyaf o’r cyllid i sefydliadau gydweithio ar brosiectau ar y cyd

Os yw eich prosiect yn dod o dan y camau gweithredu allweddol hyn, rhaid i chi wneud cais i’r Asiantaeth Genedlaethol.

Bydd yr Asiantaeth Genedlaethol yn gyfrifol am asesu eich cais ac, os bydd yn llwyddiannus, am ddyfarnu cyllid a goruchwylio eich prosiect.

Ar gyfer prosiectau symudedd Cam Gweithredu Allweddol 1, gall cyllid gwmpasu:

• teithio

• costau byw

• ffioedd cwrs

• costau fisa a mynediad

• dysgu iaith

• cymorth sefydliadol

• ymweliadau paratoadol

Mae cyllid ychwanegol ar gael ar gyfer pobl ag anableddau, anghenion dysgu ychwanegol a’r rhai o gefndiroedd difreintiedig. Mae Canllaw Rhaglen Erasmus+ yn rhoi rhagor o wybodaeth am y rheolau a’r symiau ariannu.

Gall cyllid prosiect partneriaeth Cam Gweithredu Allweddol 2 gwmpasu unrhyw weithgaredd sy’n berthnasol i gyflawni’r prosiect, megis:

• rheoli prosiectau (cynllunio, cyllid, cydlynu a chyfathrebu rhwng partneriaid, monitro a goruchwylio)

• gweithgareddau dysgu

• gweithgareddau addysgu a hyfforddi

• cyfarfodydd a digwyddiadau

• cyflawniadau prosiect (cyhoeddiadau, deunyddiau, dogfennau, offer a chynhyrchion)

• gweithgareddau sydd â’r nod o wneud y mwyaf o effaith canlyniadau’r prosiect

• gweithgareddau sydd wedi’u hanelu at rannu canlyniadau’r prosiect

Rheolaeth uniongyrchol

Rheolir gweithgareddau Erasmus+ eraill yn uniongyrchol gan yr UE drwy’r EACEA. Mae hyn yn cynnwys:

• Cam Gweithredu Allweddol 2: rhywfaint o’r cyllid i sefydliadau gydweithio ar brosiectau mwy ar y cyd

• Cam Gweithredu Allweddol 3: cyllid ar gyfer prosiectau datblygu polisi a chydweithredu

• Camau Gweithredu Jean Monnet: cyllid ar gyfer addysgu ac ymchwil ar bynciau’r UE

Os yw eich prosiect yn dod o dan unrhyw un o’r camau gweithredu hyn, rhaid i chi wneud cais yn uniongyrchol i EACEA, nid Asiantaeth Genedlaethol y DU. Bydd yr EACEA yn gyfrifol am asesu eich cais ac, os bydd yn llwyddiannus, am ddyfarnu cyllid a goruchwylio eich prosiect. 

Mae Canllaw Rhaglen Erasmus+ yn esbonio’n fanylach:

• pa weithgareddau sy’n dod o dan bob cam gweithredu allweddol

• unrhyw ofynion cymhwysedd

• sut i wneud cais

Amserlenni a pharatoi

Disgwylir i’r cylch ariannu nesaf agor ym mis Tachwedd 2026 a chau ym mis Chwefror 2027. 

Bydd dyddiadau union yn cael eu cadarnhau yng Nghanllaw Rhaglen Erasmus+ 2027, sy’n debygol o gael ei gyhoeddi yn hydref 2026.

Bydd dyddiadau cau ceisiadau yn dibynnu ar y math o brosiect Erasmus+ rydych chi’n gwneud cais amdano.

Bydd gwefan gyda rhagor o wybodaeth yn cael ei lansio gan Asiantaeth Genedlaethol y DU erbyn Haf 2026. Tan hynny, anogir sefydliadau sydd â diddordeb i ddechrau:

• meddwl am ba fathau o brosiectau yr hoffent gymryd rhan ynddynt

• adeiladu neu ehangu partneriaethau â phartneriaid yr UE yn y sector perthnasol

Mae’r camau isod yn amlinellu’r camau nodweddiadol sy’n gysylltiedig â datblygu a chyflwyno cais prosiect Erasmus+, i’ch helpu i ddechrau meddwl am yr hyn y bydd angen i chi ei baratoi.

Cam 1: Penderfynnu ar eich syniad am brosiect

Penderfynwch ar y math o brosiect rydych chi am ei redeg, er enghraifft gallai fod yn brosiect symudedd neu’n brosiect partneriaeth

Mae cronfa ddata ar-lein o brosiectau Erasmus+ blaenorol (https://erasmus-plus.ec.europa.eu/projects) a allai fod yn ddefnyddiol ar gyfer archwilio prosiectau blaenorol a chasglu syniadau.

Cam 2: Gwirio ei fod yn cyd-fynd â blaenoriaethau Erasmus+

Gwnewch yn siŵr bod eich syniad yn cefnogi o leiaf un o flaenoriaethau’r rhaglen

Cam 3: Cofrestru eich sefydliad

Cofrestrwch eich sefydliad er mwyn i chi allu gwneud cais am gyllid:

• Ar gyfer prosiectau a reolir yn uniongyrchol (a reolir gan Asiantaeth Weithredol Addysg a Diwylliant Ewrop, EACEA): cofrestrwch yn Porth Cyllid a Thendrau’r UE i gael PIC (Cod Adnabod Cyfranogwr).

• Ar gyfer prosiectau a reolir yn anuniongyrchol (a reolir gan yr Asiantaeth Genedlaethol): cofrestrwch drwy’r System Gofrestru Sefydliadau i dderbyn OID (Rhif Adnabod Sefydliad)

Os yw eich sefydliad wedi cymryd rhan mewn rhaglen arall gan yr UE, gallwch ailddefnyddio ei PIC neu ei OID presennol.

Cam 4: Dod o hyd i bartner(iaid) mewn gwlad gymwys sy’n cymryd rhan

Nodwch sefydliad mewn gwlad sy’n cymryd rhan sy’n rhannu eich nodau ac sydd â diddordeb mewn datblygu’r prosiect gyda chi.

I bori ceisiadau partneriaid a phostio eich syniadau prosiect eich hun gweler:

• Ar gyfer Ysgolion: Llwyfan Addysg Ysgolion Ewropeaidd

• Ar gyfer Addysg Oedolion: Chwilio am Bartner EPALE

• Ar Gyfer Ieuenctid:  SALTO‑YOUTH

Cam 5: Datblygu cynnig y prosiect yn fanylach

Gweithiwch gyda’ch partneriaid i gytuno ar amserlen y prosiect, y gweithgareddau, y canlyniadau bwriadedig a sut y bydd y prosiect yn cyflawni’r rhain.

Cam 6: Cwblhau a chyflwyno’r cais

Cwblhewch eich cais yn unol â’r canllawiau cyhoeddedig a’i gyflwyno erbyn y dyddiad cau yng Nghanllaw Rhaglen Erasmus+.