Udhëzime

11 sëmundje fizike (ekografia e javës së 20-të) (Albanian)

Përditësuar 3 Qershor 2026

Applies to England

Kjo video e shkurtër shpjegon ekzaminimin për 11 sëmundje fizike në shtatzëni.

11 sëmundje fizike (ekografia e javës së 20-të)

Qëllimi i ekzaminimit

Kjo ekografi kryhet midis javës së 18-të dhe javës së 20-të plus 6 ditë të shtatzënisë. Zakonisht quhet ekografia e ekzaminimit të javës së 20-të.

Ekografia kontrollon për 11 sëmundje të ndryshme tek foshnja juaj. Nuk mund të gjejë gjithçka që mund të jetë e gabuar.

Rreth këtyre sëmundjeve

Ekografia do të shqyrtojë në detaje trurin, fytyrën, zemrën, kockat, shtyllën kurrizore, barkun (stomakun) dhe veshkat e foshnjës tuaj.

Në shumicën e rasteve, ekografia do të tregojë se foshnja juaj duket se po zhvillohet ashtu siç duhet. Megjithatë, ndonjëherë zbulohet ose dyshohet për ndonjë sëmundje. Disa gjëra mund të shihen më qartë se të tjerat. Për shembull, disa foshnje kanë një sëmundje të quajtur sëmundja e shpinës së ndarë (Spina Bifida), e cila prek palcën kurrizore.

Sëmundja e shpinës së ndarë zakonisht mund të shihet qartë në një ekografi. Për rreth 9 nga 10 foshnje (90%) që e kanë këtë sëmundje, ajo do të zbulohet nga ekografia.

Sëmundjet e zemrës janë më të vështira për t’u parë. Ekografia do të gjejë rreth gjysmën (50%) e atyre foshnjave që kanë sëmundje të zemrës.

Disa nga sëmundjet që mund të shihen në ekografi do të thotë që foshnja mund të ketë nevojë për trajtim ose ndërhyrje kirurgjikale pas lindjes (për shembull, buzë e çarë). Në një numër të vogël rastesh, gjenden disa sëmundje shumë të rënda. Për shembull, truri, veshkat, organet e brendshme ose kockat e foshnjës mund të mos jenë zhvilluar siç duhet. Në disa raste shumë të rënda, të rralla, ku trajtimi nuk është i mundur, foshnja do të vdesë menjëherë pas lindjes ose gjatë shtatzënisë.

Ka informacione më të detajuara rreth sëmundjeve kryesore që kërkohen gjatë kësaj ekografie në NHS.UK.

Testi i ekzaminimit

Shumica e ekografive kryhen nga një staf i trajnuar posaçërisht të quajtur sonografë.

Për të marrë pamje të qarta të foshnjës suaj, ekografia zhvillohet në një dhomë me ndriçim të zbehtë. Sonografit mund t’i duhet ta mbajë ekranin drejtpërdrejt përballë tij ose në një kënd.

1. Do t’ju kërkohet të shtriheni në një divan.
2. Do t’ju kërkohet të ngrini bluzën deri në kraharor dhe të ulni fundin ose pantallonat deri në vithe.
3. Një letër higjienike futet në rrobat tuaja për t’i mbrojtur nga xheli i ultratingullit. Xheli vendoset në barkun (stomakun) tuaj. Xheli mund të jetë i ftohtë.
4. Sonografi lëviz një pajisje dore të quajtur sondë mbi barkun (stomakun) tuaj për të kontrolluar me kujdes trupin e foshnjës suaj. Xheli siguron që të ketë kontakt të mirë midis sondës dhe lëkurës suaj.

Takimi zakonisht zgjat rreth 30 minuta.

Kryerja e ekografisë nuk ju dhemb. Megjithatë, sonografit mund t’i duhet të ushtrojë pak presion për të marrë pamje të qarta të foshnjës suaj. Kjo mund të jetë e parehatshme. Një fotografi bardh e zi e foshnjës suaj do të shihet më pas në ekranin e ultratingullit.

Sonografi mund të mos flasë gjatë ekografisë. Është e rëndësishme që ata të jenë të përqendruar në mënyrë që të kryejnë një ekografi me cilësi të mirë.

Gjatë ekografisë suaj, sonografi mund të kërkojë një mendim të dytë nga një anëtar tjetër i stafit.

Ndonjëherë është e vështirë të shikohet një pamje e qartë e foshnjës suaj. Kjo mund të ndodhë sepse foshnja juaj është shtrirë në një pozicion të vështirë, ose pesha juaj është mbi peshën mesatare. Kjo nuk do të thotë se ka diçka për t’u shqetësuar.

Nëse ndodh kjo, do t’ju ofrohet një ekografi e dytë deri në javën e 23-të të shtatzënisë. Sonografi do të përpiqet ta përfundojë ekografinë në këtë takim të radhës, por nuk është gjithmonë e mundur.

Shumë herë, kjo ekografi e dytë mund të mos përfundojë. Nëse ndodh kjo, nuk do t’ju ofrohet një ekografi tjetër. Fëmija juaj do t’i nënshtrohet një kontrolli fizik pas lindjes.

Kjo ekografi nuk ka për qëllim të zbulojë gjininë e foshnjës suaj, por shumica e spitaleve do t’ju tregojnë nëse është e lehtë për t’u parë. Nuk do t’ju ofrohet një ekografi tjetër nëse nuk shihet gjinia e foshnjës suaj.

Mund t’ju duhet ta keni fshikëzën plot kur të vini për takimin e ekografisë.  Kjo duhet të bëhet e qartë kur të caktoni takimin tuaj. Nëse nuk jeni të sigurt, mund të kontaktoni spitalin.

Ju mund të dëshironi që dikush të vijë me ju në takim. Shumica e spitaleve nuk lejojnë që fëmijët të marrin pjesë në ekografi. Ju lutemi të pyesni spitalin tuaj për këtë para takimit tuaj.

Siguria e testit

Nuk ka rreziqe të njohura për ju ose foshnjën tuaj nga kryerja e një ekografie me ultratinguj. Është e rëndësishme të mendoni me kujdes nëse doni ta bëni ekografinë apo jo. Ekografia mund t’ju ofrojë informacione që do të thotë se duhet të merrni vendime të mëtejshme dhe të rëndësishme. Për shembull, mund t’ju ofrohen teste të mëtejshme që kanë rrezik për dështim.

Ekzaminimi është zgjedhja juaj

Nuk keni nevojë ta bëni ekografinë. Disa njerëz duan të mësojnë nëse foshnja e tyre ka një nga 11 sëmundjet fizike dhe disa jo.

Nëse zgjidhni ta bëni këtë ekografi, mund t’ju duhet të merrni vendime të rëndësishme personale bazuar në rezultate. Çfarëdo që të vendosni, do të mbështeteni nga ekipi juaj i kujdesit shëndetësor.

Moskryerja e testit

Nëse zgjidhni të mos e bëni ekografinë, ju përsëri mund t’i kryeni të gjitha pjesët e tjera të kujdesit tuaj rutinë para lindjes.

Rezultatet e mundshme

Në shumicën e rasteve, ekografia do të tregojë se foshnja juaj duket se po zhvillohet siç duhet dhe nuk ka asnjë nga 11 sëmundjet fizike për të cilat është ekzaminuar.

Gjithmonë do t’ju njoftohet nëse gjendet diçka e papritur gjatë ekografisë suaj.

Ekografitë nuk mund t’i gjejnë të gjitha sëmundjet. Ekziston gjithmonë mundësia që një foshnjë të lindë me një sëmundje që nuk mund të shihet në ekografi.

Teste të mëtejshme

Mund t’ju ofrohet një test tjetër për të zbuluar me siguri nëse foshnja juaj ka një nga këto sëmundje.

Nëse ju ofrohen teste të mëtejshme, do t’ju jepen më shumë informacione rreth tyre në mënyrë që të vendosni nëse dëshironi t’i kryeni. Do të keni mundësi ta diskutoni këtë me maminë ose konsulentin tuaj. Nëse është e nevojshme, do të referoheni te një specialist, ndoshta në një spital tjetër.

Marrja e rezultateve të mia

Sonografi do të jetë në gjendje t’ju tregojë rezultatet e ekografisë në atë kohë.

Gjeni më shumë informacione dhe detaje mbi grupet e mbështetjes në NHS.UK.

Shihni më shumë informacione rreth ekografisë me ultratinguj 20-javëshe.