ਤੁਹਾਡੇ ਸਕ੍ਰੀਨਿੰਗ ਨਤੀਜੇ: ਤੁਹਾਨੂੰ ਦਰਮਿਆਨਾ ਪੇਟ ਵਿਚਲਾ ਏਓਰਟਿਕ ਐਨਿਉਰਿਜ਼ਮ (AAA) ਹੈ
ਅੱਪਡੇਟ ਕੀਤਾ 28 July 2022
©ਕ੍ਰਾਊਨ ਕਾਪੀਰਾਈਟ 2022
ਇਹ ਪ੍ਰਕਾਸ਼ਨ ਓਪਨ ਗਵਰਨਮੈਂਟ ਲਾਇਸੈਂਸ v3.0 ਦੀਆਂ ਸ਼ਰਤਾਂ ਦੇ ਅਧੀਨ ਲਾਇਸੈਂਸਸ਼ੁਦਾ ਹੈ, ਸਿਵਾਏ ਜਿੱਥੇ ਹੋਰ ਨਹੀਂ ਕਿਹਾ ਗਿਆ ਹੈ। ਇਸ ਲਾਇਸੈਂਸ ਨੂੰ ਦੇਖਣ ਲਈ, nationalarchives.gov.uk/doc/open-government-licence/version/3 ਜਾਂ ਸੂਚਨਾ ਨੀਤੀ ਟੀਮ, ਦਿ ਨੈਸ਼ਨਲ ਆਰਕਾਈਵਜ਼, ਕੇਵ, ਲੰਡਨ TW9 4DU, ਜਾਂ ਈਮੇਲ ਨੂੰ ਲਿਖੋ: psi@nationalarchives.gov.uk।
ਜਿੱਥੇ ਅਸੀਂ ਕਿਸੇ ਤੀਜੀ ਧਿਰ ਦੀ ਕਾਪੀਰਾਈਟ ਜਾਣਕਾਰੀ ਦੀ ਪਛਾਣ ਕੀਤੀ ਹੈ ਤੁਹਾਨੂੰ ਸਬੰਧਤ ਕਾਪੀਰਾਈਟ ਧਾਰਕਾਂ ਤੋਂ ਇਜਾਜ਼ਤ ਲੈਣ ਦੀ ਜ਼ਰੂਰਤ ਹੋਏਗੀ।
ਇਹ ਪ੍ਰਕਾਸ਼ਨ https://www.gov.uk/government/publications/monitoring-your-medium-abdominal-aortic-aneurysm/195f7b4f-806b-4a0e-a7dc-7d000417ccd2 ਤੇ ਉਪਲਬਧ ਹੈ
ਪਬਲਿਕ ਹੈਲਥ ਇੰਗਲੈਂਡ (PHE) ਨੇ ਇਹ ਜਾਣਕਾਰੀ NHS ਦੀ ਤਰਫ਼ੋਂ ਤਿਆਰ ਕੀਤੀ ਹੈ। ਇਸ ਜਾਣਕਾਰੀ ਵਿੱਚ, ਸ਼ਬਦ ‘ਅਸੀਂ’ ਦਾ ਮਤਲਬ ਉਸ NHS ਸੇਵਾ ਤੋਂ ਹੈ ਜੋ ਸਕ੍ਰੀਨਿੰਗ ਮੁਹੱਈਆ ਕਰਦਾ ਹੈ।
ਐਨਿਉਰਿਜ਼ਮ ਵਾਲੀ ਏਓਰਟਾ (ਮਹਾਧਮਣੀ) ਦਿਖਾ ਰਿਹਾ ਚਿੱਤਰ
1. ਇਹ ਪਰਚਾ ਕਿਸਦੇ ਲਈ ਹੈ
ਇਹ ਪੰਨਾ ਉਹਨਾਂ ਮਰਦਾਂ ਲਈ ਜਾਣਕਾਰੀ ਮੁਹੱਈਆ ਕਰਦਾ ਹੈ ਜਿਨ੍ਹਾਂ ਨੂੰ ਪੇਟ ਵਿਚਲੇ ਦਰਮਿਆਨੇ ਐਨਿਉਰਿਜ਼ਮ ਦੀ ਸਕ੍ਰੀਨਿੰਗ (Abdominal Aortic Aneurysm ਜਾਂ AAA ਸਕ੍ਰੀਨਿੰਗ ਵੀ ਕਿਹਾ ਜਾਂਦਾ ** ਹੈ) ਰਾਹੀਂ ਪਤਾ ਲੱਗਾ ਹੈ ਕਿ ਉਹਨਾਂ ਨੂੰ ** ਛੋਟਾ ਐਨਿਉਰਿਜ਼ਮ ਹੈ।
1.1 ਤੁਹਾਡੇ AAA ਸਕ੍ਰੀਨਿੰਗ ਦਾ ਨਤੀਜਾ
ਜਦੋਂ ਤੁਹਾਡੀ ਸਕ੍ਰੀਨਿੰਗ ਕੀਤੀ ਗਈ ਸੀ ਤਾਂ ਸਾਨੂੰ ਪਤਾ ਲੱਗਾ ਕਿ ਤੁਹਾਡੀ ਏਓਰਟਾ (ਮਹਾਧਮਣੀ) ਆਮ ਨਾਲੋਂ ਜ਼ਿਆਦਾ ਚੌੜੀ ਹੈ। ਇਸਦਾ ਮਤਲਬ ਹੈ ਕਿ ਤੁਹਾਨੂੰ ਦਰਮਿਆਨਾ ਪੇਟ ਵਿਚਲਾ ਏਓਰਟਿਕ ਐਨਿਉਰਿਜ਼ਮ ਹੈ।
- ਛੋਟਾ AAA: 3.0 ਸੈਂਟੀਮੀਟਰ ਤੋਂ 4.4 ਸੈਂਟੀਮੀਟਰ
- ** ਦਰਮਿਆਨਾ AAA: 4.5 ਸੈਮੀ ਤੋਂ 5.4 ਸੈਮੀ**
- ਵੱਡਾ AAA: 5.5 ਸੈਂਟੀਮੀਟਰ ਜਾਂ ਵੱਡਾ
ਸਕ੍ਰੀਨ ਕੀਤੇ ਗਏ 500 ਵਿੱਚੋਂ ਲਗਭਗ 1 ਮਰਦ ਨੂੰ ਦਰਮਿਆਨਾ AAA ਹੁੰਦਾ ਹੈ। ਇਹ ਦੇਖਣ ਲਈ ਕਿ ਕੀ ਇਹ ਵੱਡਾ ਹੋ ਰਿਹਾ ਹੈ ਅਸੀਂ ਹਰੇਕ 3 ਮਹੀਨਿਆਂ ਬਾਅਦ ਤੁਹਾਨੂੰ ਸਕ੍ਰੀਨਿੰਗ ਲਈ ਬੁਲਾਵਾਂਗੇ।
2. ਪੇਟ ਵਿਚਲਾ ਏਓਰਟਿਕ ਐਨਿਉਰਿਜ਼ਮ ਕੀ ਹੈ
ਏਓਰਟਾ (ਮਹਾਧਮਣੀ) ਤੁਹਾਡੇ ਸਰੀਰ ਨੂੰ ਖੂਨ ਪਹੁੰਚਾਉਣ ਵਾਲੀ ਖੂਨ ਦੀ ਮੁੱਖ ਨਾੜੀ ਹੈ। ਇਹ ਤੁਹਾਡੇ ਦਿਲ ਤੋਂ ਹੇਠਾਂ ਤੁਹਾਡੀ ਛਾਤੀ ਅਤੇ ਪੇਟ ਵਿੱਚੋਂ ਦੀ ਹੋ ਕੇ ਜਾਂਦੀ ਹੈ।
ਕੁਝ ਲੋਕਾਂ ਵਿੱਚ, ਜਿਵੇਂ-ਜਿਵੇਂ ਉਹਨਾਂ ਦੀ ਉਮਰ ਵੱਧਦੀ ਹੈ, ਪੇਟ ਵਿੱਚ ਏਓਰਟਾ ਦੀ ਕੰਧ ਕਮਜ਼ੋਰ ਹੋ ਸਕਦੀ ਹੈ।
ਉਸ ਤੋਂ ਬਾਅਦ ਇਹ ਫੈਲ ਸਕਦੀ ਹੈ ਅਤੇ ਪੇਟ ਵਿਚਲੇ ਏਓਰਟਿਕ ਐਨਿਉਰਿਜ਼ਮ ਦਾ ਰੂਪ ਲੈ ਸਕਦੀ ਹੈ।
3. ਦਰਮਿਆਨਾ AAA ਕਿੰਨਾ ਗੰਭੀਰ ਹੁੰਦਾ ਹੈ
ਜੇ ਦਰਮਿਆਨਾ AAA ਵੱਧਦਾ ਰਹੇ ਤਾਂ ਇਹ ਗੰਭੀਰ ਬਣ ਸਕਦਾ ਹੈ, ਇਸ ਲਈ ਇਸਦੇ ਆਕਾਰ ਦੀ ਨਿਗਰਾਨੀ ਕਰਨੀ ਮਹੱਤਵਪੂਰਨ ਹੈ। ਜੇ ਇਹ ਵੱਧ ਕੇ 5.5 ਸੈਂਟੀਮੀਟਰ ਦਾ ਹੋ ਜਾਂਦਾ ਹੈ (ਵੱਡਾ ਐਨਿਉਰਿਜ਼ਮ) ਤਾਂ ਅਸੀਂ ਹੋਰ ਟੈਸਟ ਅਤੇ ਸੰਭਾਵੀ ਇਲਾਜ, ਜੋ ਕਿ ਆਮ ਤੌਰ ‘ਤੇ ਆਪਰੇਸ਼ਨ ਹੁੰਦਾ ਹੈ, ਬਾਰੇ ਗੱਲ ਕਰਨ ਲਈ ਤੁਹਾਡੇ ਵਾਸਤੇ ਇੱਕ ਮਾਹਰ ਨਾਲ ਅਪਾਇੰਟਮੈਂਟ ਦਾ ਪ੍ਰਬੰਧ ਕਰਾਂਗੇ। ਵੱਡਾ ਐਨਿਉਰਿਜ਼ਮ ਬਹੁਤ ਗੰਭੀਰ ਹੋ ਸਕਦਾ ਹੈ ਕਿਉਂਕਿ ਜਿਵੇਂ-ਜਿਵੇਂ ਏਓਰਟਾ ਦੀ ਕੰਧ ਫੈਲਦੀ ਹੈ, ਇਹ ਕਮਜ਼ੋਰ ਹੋ ਜਾਂਦੀ ਹੈ ਅਤੇ ਫੱਟ ਸਕਦੀ ਹੈ, ਜਿਸਦੇ ਕਾਰਨ ਸਰੀਰ ਅੰਦਰ ਖੂਨ ਵੱਗ ਸਕਦਾ ਹੈ।
ਜਦੋਂ ਐਨਿਉਰਿਜ਼ਮ ਫੱਟਦਾ ਹੈ ਤਾਂ 100 ਵਿੱਚੋਂ ਲਗਭਗ 85 ਲੋਕਾਂ ਦੀ ਮੌਤ ਹੋ ਜਾਂਦੀ ਹੈ।
ਜ਼ਿਆਦਾਤਰ ਐਨਿਉਰਿਜ਼ਮ ਹੌਲੀ-ਹੌਲੀ ਵਧਦੇ ਹਨ, ਇਸ ਲਈ ਹੋ ਸਕਦਾ ਹੈ ਕਿ ਤੁਹਾਨੂੰ ਕਦੇ ਵੀ ਇੰਨਾ ਵੱਡਾ AAA ਨਾ ਹੋਵੇ ਜਿਸਦੇ ਲਈ ਇਲਾਜ ਦੀ ਲੋੜ ਹੋਵੇ।
4. ਇਸ ਤੋਂ ਬਾਅਦ ਕੀ ਹੋਵੇਗਾ
- ਅਸੀਂ ਹਰੇਕ 3 ਮਹੀਨਿਆਂ ਬਾਅਦ ਤੁਹਾਨੂੰ ਸਕੈਨ ਲਈ ਬੁਲਾਵਾਂਗੇ।
- ਤੁਹਾਡੇ ਅਗਲੇ ਸਕੈਨ ਦੀ ਮਿਤੀ ਤੋਂ ਥੋੜ੍ਹਾ ਜਿਹਾ ਪਹਿਲਾਂ, ਅਸੀਂ ਤੁਹਾਨੂੰ ਇੱਕ ਅਪਾਇੰਟਮੈਂਟ ਲੈਟਰ ਭੇਜਾਂਗੇ।
- ਅਸੀਂ ਤੁਹਾਡੀ ਕਿਸੇ ਮਾਹਰ ਨਰਸ ਨਾਲ ਗੱਲ ਕਰਵਾਉਣ ਦਾ ਪ੍ਰਬੰਧ ਕਰਾਂਗੇ। ਉਹ ਤੁਹਾਨੂੰ ਤੁਹਾਡੇ ਐਨਿਉਰਿਜ਼ਮ ਦੇ ਸਬੰਧ ਵਿੱਚ ਤੁਹਾਡੀ ਆਮ ਸਿਹਤ ਬਾਰੇ ਸਲਾਹ ਦੇ ਸਕਣਗੇ।
5. ਆਪਣੀ ਸਿਹਤ ਦਾ ਧਿਆਨ ਰੱਖਣਾ
ਹੇਠਾਂ ਦਿੱਤੇ ਸੁਝਾਅ ਤੁਹਾਡੀ ਸਿਹਤ ਦਾ ਧਿਆਨ ਰੱਖਣ ਵਿੱਚ ਤੁਹਾਡੀ ਮਦਦ ਕਰ ਸਕਦੇ ਹਨ:
- ਜੇ ਤੁਸੀਂ ਤਮਾਕੂਨੋਸ਼ੀ ਕਰਦੇ ਹੋ ਤਾਂ ਤੁਸੀਂ ਇਸ ਨੂੰ ਘਟਾਓ ਜਾਂ ਬੰਦ ਕਰਨ ਦੀ ਕੋਸ਼ਿਸ਼ ਕਰਨ ਲਈ ਮਦਦ ਲਵੋ
- ਯਕੀਨੀ ਬਣਾਓ ਕਿ ਤੁਹਾਡਾ ਬਲੱਡ ਪ੍ਰੈਸ਼ਰ ਸਧਾਰਨ ਹੈ – ਜੇ ਤੁਸੀਂ ਹਾਲ ਵਿੱਚ ਇਸ ਦੀ ਜਾਂਚ ਨਹੀਂ ਕਰਵਾਈ ਹੈ, ਤਾਂ ਇਸ ਦੀ ਜਾਂਚ ਕਰਵਾਉਣੀ ਚੰਗੀ ਗੱਲ ਹੈ
- ਸਿਹਤਮੰਦ, ਸੰਤੁਲਿਤ ਖੁਰਾਕ ਖਾਓ ਅਤੇ ਚਰਬੀਦਾਰ ਭੋਜਨ ਨੂੰ ਘਟਾਓ
- ਜੇ ਤੁਹਾਡਾ ਭਾਰ ਵੱਧ ਹੈ ਤਾਂ ਭਾਰ ਘਟਾਉਣ ਦੀ ਕੋਸ਼ਿਸ਼ ਕਰੋ
- ਨਿਯਮਿਤ ਤੌਰ ‘ਤੇ ਕਸਰਤ ਕਰੋ
- ਜੇ ਤੁਸੀਂ ਸ਼ਰਾਬ ਪੀਂਦੇ ਹੋ ਤਾਂ ਸਮਝਦਾਰੀ ਵਾਲੀਆਂ ਸੀਮਾਵਾਂ ਦੇ ਅੰਦਰ ਰਹੋ
ਤੁਹਾਨੂੰ ਆਪਣੀ ਜੀਵਨਸ਼ੈਲੀ ਵਿੱਚ ਕੋਈ ਹੋਰ ਤਬਦੀਲੀਆਂ ਕਰਨ ਦੀ ਲੋੜ ਨਹੀਂ ਹੈ ਅਤੇ ਕਿਸੇ ਵੀ ਖੇਡਾਂ ਜਾਂ ਸ਼ੌਕਾਂ ਨੂੰ ਜਾਰੀ ਰੱਖਣਾ ਚਾਹੀਦਾ ਹੈ।
ਤੁਹਾਡੀ ਜੀਪੀ ਪ੍ਰੈਕਟਿਸ ਤੁਹਾਨੂੰ ਉਪਰੋਕਤ ਸਾਰੀਆਂ ਗੱਲਾਂ ਬਾਰੇ ਸਲਾਹ ਦੇ ਸਕੇਗੀ ਅਤੇ ਹੋ ਸਕਦਾ ਹੈ ਕਿ ਉਹ ਤੁਹਾਨੂੰ ਦਵਾਈ ਦੇਣਾ ਜਾਂ ਤੁਹਾਡੀ ਵਰਤਮਾਨ ਦਵਾਈ ਦੀ ਸਮੀਖਿਆ ਕਰਨੀ ਚਾਹੇ।
6. ਤੁਹਾਨੂੰ ਕਿੰਨੀ ਵਾਰ ਵਾਪਸ ਆਉਣ ਦੀ ਲੋੜ ਹੁੰਦੀ ਹੈ
ਹਰੇਕ ਵਿਅਕਤੀ ਵੱਖਰਾ ਹੁੰਦਾ ਹੈ, ਇਸ ਲਈ ਇਹ ਕਹਿਣਾ ਸੰਭਵ ਨਹੀਂ ਹੈ ਕਿ ਤੁਹਾਨੂੰ ਸਹੀ-ਸਹੀ ਕਿੰਨੇ ਸਕੈਨਾਂ ਵਾਸਤੇ ਵਾਪਸ ਆਉਣ ਦੀ ਲੋੜ ਪਵੇਗੀ।
ਅਸੀਂ ਹਰ 3 ਮਹੀਨਿਆਂ ‘ਤੇ ਤੁਹਾਨੂੰ ਸਕੈਨ ਲਈ ਬੁਲਾਉਣਾ ਜਾਰੀ ਰੱਖਾਂਗੇ ਜਦ ਤਕ ਕਿ ਤੁਹਾਡੀ ਏਓਰਟਾ ਦਾ ਆਕਾਰ ਵੱਧ ਕੇ 5.5 ਸੈਂਟੀਮੀਟਰ ਜਾਂ ਜ਼ਿਆਦਾ ਨਹੀਂ ਹੋ ਜਾਂਦਾ। ਉਸ ਤੋਂ ਬਾਅਦ ਅਸੀਂ ਹੋਰ ਟੈਸਟਾਂ ਅਤੇ ਸੰਭਾਵੀ ਇਲਾਜ ਬਾਰੇ ਗੱਲ ਕਰਨ ਲਈ ਇੱਕ ਮਾਹਰ ਨਾਲ ਅਪਾਇੰਟਮੈਂਟ ਦਾ ਪ੍ਰਬੰਧ ਕਰਾਂਗੇ।
6.1 ਤੁਸੀਂ ਹੁਣ ਆਪਰੇਸ਼ਨ ਕਿਉਂ ਨਹੀਂ ਕਰਵਾ ਸਕਦੇ ਹੋ
ਸਾਰੇ ਆਪਰੇਸ਼ਨਾਂ ਦੇ ਜੋਖਮ ਹੁੰਦੇ ਹਨ ਅਤੇ ਪੇਟ ਵਿਚਲਾ ਏਓਰਟਿਕ ਐਨਿਉਰਿਜ਼ਮ ਕੋਈ ਵੱਖਰਾ ਨਹੀਂ ਹੈ।
ਰਿਸਰਚ ਦਿਖਾਉਂਦੀ ਹੈ ਕਿ ਦਰਮਿਆਨੇ ਐਨਿਉਰਿਜ਼ਮ ਦਾ ਇਲਾਜ ਕਰਨ ਦੇ ਜ਼ਿਆਦਾ ਜੋਖਮ ਹਨ, ਬਜਾਏ ਇਸਦੇ ਕਿ ਐਨਿਉਰਿਜ਼ਮ ਦੀ ਨਿਗਰਾਨੀ ਕੀਤੀ ਜਾਵੇ ਅਤੇ ਇਸਦਾ ਸਿਰਫ ਤਾਂ ਇਲਾਜ ਕੀਤਾ ਜਾਵੇ ਜੇ ਇਸਦਾ ਆਕਾਰ ਵੱਧ ਕੇ 5.5 ਸੈਂਟੀਮੀਟਰ ਜਾਂ ਵੱਧ ਹੋ ਜਾਂਦਾ ਹੈ।
7. ਲੱਛਣ
ਜੇ ਤੁਹਾਨੂੰ ਐਨਿਉਰਿਜ਼ਮ ਹੈ, ਤਾਂ ਆਮ ਤੌਰ ‘ਤੇ ਤੁਸੀਂ ਕੋਈ ਲੱਛਣ ਨਹੀਂ ਦੇਖੋਗੇ, ਇਸ ਲਈ ਤੁਹਾਨੂੰ ਦਰਮਿਆਨੇ ਐਨਿਉਰਿਜ਼ਮ ਦੇ ਕਾਰਨ ਕੋਈ ਦਰਦ ਜਾਂ ਬੇਆਰਾਮੀ ਹੋਣ ਦੀ ਸੰਭਾਵਨਾ ਨਹੀਂ ਹੈ।
ਜੇ ਤੁਸੀਂ ਕਿਸੇ ਵੀ ਕਾਰਨ ਕਰਕੇ ਹਸਪਤਾਲ ਜਾਂਦੇ ਹੋ, ਤਾਂ ਤੁਹਾਨੂੰ ਸਟਾਫ ਨੂੰ ਦੱਸਣਾ ਚਾਹੀਦਾ ਹੈ ਕਿ ਤੁਹਾਨੂੰ ਸਕ੍ਰੀਨਿੰਗ ਰਾਹੀਂ ਪੇਟ ਵਿਚਲੇ ਏਓਰਟਿਕ ਐਨਿਉਰਿਜ਼ਮ ਦਾ ਪਤਾ ਲੱਗਾ ਹੈ।
ਜੇ ਸਕ੍ਰੀਨਿੰਗ ਦੇ ਨਤੀਜੇ ਬਾਰੇ ਤੁਹਾਡੇ ਕੋਈ ਪ੍ਰਸ਼ਨ ਹੋਣ, ਤਾਂ ਤੁਸੀਂ ਆਪਣੇ ਸਥਾਨਕ ਸਕ੍ਰੀਨਿੰਗ ਪ੍ਰੋਗਰਾਮ ਨੂੰ ਫੋਨ ਕਰ ਸਕਦੇ ਹੋ। ਜੇ ਤੁਸੀਂ ਆਮ ਤੌਰ ‘ਤੇ ਬਿਮਾਰ ਮਹਿਸੂਸ ਕਰਦੇ ਹੋ, ਤਾਂ ਤੁਹਾਨੂੰ ਆਪਣੇ ਜੀਪੀ ਨਾਲ ਗੱਲ ਕਰਨੀ ਚਾਹੀਦੀ ਹੈ।
7.1 ਐਨਿਉਰਿਜ਼ਮ ਫੱਟ ਜਾਣ ਦੇ ਲੱਛਣ
ਕਿਸੇ ਦਰਮਿਆਨੇ AAA ਦੇ ਫੱਟ ਜਾਣ ਦੀ ਬਹੁਤ ਹੀ ਘੱਟ ਸੰਭਾਵਨਾ ਹੁੰਦੀ ਹੈ, ਪਰ ਇਹ ਮਹੱਤਵਪੂਰਨ ਹੈ ਕਿ ਤੁਹਾਨੂੰ ਫੱਟ ਗਏ AAA ਦੇ ਲੱਛਣਾਂ ਦਾ ਪਤਾ ਹੋਵੇ।
ਜੇ ਤੁਹਾਨੂੰ ਪੇਟ ਅਤੇ/ਜਾਂ ਪਿੱਠ ਦੇ ਹੇਠਲੇ ਹਿੱਸੇ ਵਿੱਚ ਗੰਭੀਰ ਅਤੇ ਲਗਤਾਰ ਦਰਦ ਦੇ ਲੱਛਣ ਹੋਣ, ਤਾਂ ਤੁਹਾਨੂੰ ਐਕਸੀਡੈਂਟ ਐਂਡ ਇਮਰਜੇਂਸੀ ਡਿਪਾਰਟਮੈਂਟ ਰਾਹੀਂ ਤੁਰੰਤ ਡਾਕਟਰੀ ਸਹਾਇਤਾ ਲੈਣੀ ਚਾਹੀਦੀ ਹੈ ਯਕੀਨੀ ਬਣਾਓ ਕਿ ਤੁਸੀਂ ਡਾਕਟਰੀ ਸਟਾਫ ਨੂੰ ਦੱਸਦੇ ਹੋ ਕਿ ਤੁਹਾਨੂੰ AAA ਹੈ।
ਜੇ ਸਕ੍ਰੀਨਿੰਗ ਦੇ ਨਤੀਜੇ ਬਾਰੇ ਤੁਹਾਡੇ ਕੋਈ ਪ੍ਰਸ਼ਨ ਹੋਣ, ਤਾਂ ਤੁਸੀਂ ਆਪਣੇ ਸਥਾਨਕ ਸਕ੍ਰੀਨਿੰਗ ਪ੍ਰੋਗਰਾਮ ਨੂੰ ਫੋਨ ਕਰ ਸਕਦੇ ਹੋ। ਜੇ ਤੁਸੀਂ ਆਮ ਤੌਰ ‘ਤੇ ਬਿਮਾਰ ਮਹਿਸੂਸ ਕਰਦੇ ਹੋ, ਤਾਂ ਤੁਹਾਨੂੰ ਆਪਣੇ ਜੀਪੀ ਨਾਲ ਗੱਲ ਕਰਨੀ ਚਾਹੀਦੀ ਹੈ।
8. ਨਜ਼ਦੀਕੀ ਪਰਿਵਾਰ
ਜੇ ਤੁਹਾਡੇ ਭਰਾ, ਭੈਣ ਜਾਂ ਮਾਤਾ/ਪਿਤਾ ਨੂੰ ਪੇਟ ਵਿਚਲਾ ਏਓਰਟਿਕ ਐਨਿਉਰਿਜ਼ਮ ਹੈ, ਜਾਂ ਹੋਇਆ ਸੀ ਤਾਂ ਤੁਹਾਨੂੰ AAA ਹੋਣ ਦਾ ਜੋਖਮ ਵੱਧ ਜਾਂਦਾ ਹੈ।
ਇਸ ਲਈ ਤੁਹਾਨੂੰ ਆਪਣੇ ਭਰਾਵਾਂ, ਭੈਣਾਂ ਜਾਂ ਬੱਚਿਆਂ ਨੂੰ ਦੱਸ ਦੇਣਾ ਚਾਹੀਦਾ ਹੈ ਕਿ ਤੁਹਾਨੂੰ AAA ਹੋਣ ਦਾ ਮਤਲਬ ਹੈ ਕਿ ਉਹਨਾਂ ਨੂੰ ਵੀ ਇਸਦਾ ਜੋਖਮ ਹੈ। ਉਹ, ਜਿਸ ਉਮਰ ‘ਤੇ ਤੁਹਾਡੇ AAA ਦਾ ਪਤਾ ਲੱਗਾ ਸੀ, ਉਸ ਨਾਲੋਂ 5 ਸਾਲ ਘੱਟ ਉਮਰ ‘ਤੇ ਆਪਣੇ ਜੀਪੀ ਨੂੰ ਸਕੈਨ ਕਰਵਾਉਣ ਬਾਰੇ ਪੁੱਛ ਸਕਦੇ ਹਨ।
9. ਡ੍ਰਾਇਵਿੰਗ
ਕਾਰ ਦੇ ਡ੍ਰਾਈਵਰ:
- ਜੇ ਤੁਹਾਡਾ ਐਨਿਉਰਿਜ਼ਮ 6 ਸੈਂਟੀਮੀਟਰ ਤੋਂ ਵੱਧ ਜਾਂਦਾ ਹੈ ਤਾਂ ਤੁਹਾਡੇ ਲਈ DVLA ਨੂੰ ਦੱਸਣਾ ਜ਼ਰੂਰੀ ਹੁੰਦਾ ਹੈ।
- ਜੇ ਤੁਹਾਡਾ ਐਨਿਉਰਿਜ਼ਮ ਵੱਧ ਕੇ 6.5 ਸੈਂਟੀਮੀਟਰ ਹੋ ਜਾਂਦਾ ਹੈ ਤਾਂ ਤੁਹਾਡਾ ਲਾਇਸੈਂਸ ਮੁਲਤਵੀ ਕਰ ਦਿੱਤਾ ਜਾਵੇਗਾ।
- ਤੁਹਾਡੇ ਐਨਿਉਰਿਜ਼ਮ ਦਾ ਸਫਲਤਾ ਨਾਲ ਇਲਾਜ ਕਰ ਦਿੱਤੇ ਜਾਣ ਬਾਅਦ ਤੁਹਾਡਾ ਲਾਇਸੈਂਸ ਬਹਾਲ ਕਰ ਦਿੱਤਾ ਜਾਵੇਗਾ।
ਬੱਸ, ਕੋਚ ਅਤੇ ਲਾਰੀ ਡ੍ਰਾਈਵਰ:
- ਤੁਹਾਡੇ ਲਈ DVLA ਨੂੰ ਇਹ ਸੂਚਿਤ ਕਰਨਾ ਜ਼ਰੂਰੀ ਹੈ ਕਿ ਤੁਹਾਨੂੰ ਐਨਿਉਰਿਜ਼ਮ ਹੈ।
- ਜੇ ਤੁਹਾਡਾ ਐਨਿਉਰਿਜ਼ਮ ਵੱਧ ਕੇ 5.5 ਸੈਂਟੀਮੀਟਰ ਹੋ ਜਾਂਦਾ ਹੈ ਤਾਂ ਤੁਹਾਡਾ ਲਾਇਸੈਂਸ ਮੁਲਤਵੀ ਕਰ ਦਿੱਤਾ ਜਾਵੇਗਾ।
- ਤੁਹਾਡੇ ਐਨਿਉਰਿਜ਼ਮ ਦਾ ਸਫਲਤਾ ਨਾਲ ਇਲਾਜ ਕਰ ਦਿੱਤੇ ਜਾਣ ਬਾਅਦ ਤੁਹਾਡਾ ਲਾਇਸੈਂਸ ਬਹਾਲ ਕਰ ਦਿੱਤਾ ਜਾਵੇਗਾ।
10. ਸਿਹਤ-ਸੰਬੰਧੀ ਬੀਮਾ
ਯਾਤਰਾ ਜਾਂ ਸਿਹਤ ਨਾਲ ਸਬੰਧਤ ਕਿਸੇ ਹੋਰ ਬੀਮੇ ਲਈ ਦਰਖਾਸਤ ਦਿੰਦੇ ਸਮੇਂ ਜੇ ਤੁਸੀਂ ਆਪਣੇ AAA ਬਾਰੇ ਦੱਸਦੇ ਹੋ ਤਾਂ ਤੁਹਾਡੇ ਤੋਂ ਵਾਧੂ ਪ੍ਰੀਮਿਅਮ ਲਿਆ ਜਾ ਸਕਦਾ ਹੈ ਜਾਂ ਤੁਹਾਡੀ ਬਿਮਾਰੀ ਨੂੰ ਬੀਮਾ ਕਵਰ ਤੋਂ ਬਾਹਰ ਕਰ ਦਿੱਤਾ ਜਾਵੇਗਾ। ਬੀਮਾ ਕਵਰ ਲੱਭਦੇ ਸਮੇਂ, ਕੋਈ ਬ੍ਰੋਕਰ ਮਦਦ ਕਰ ਸਕਦਾ ਹੈ। ਬ੍ਰਿਟਿਸ਼ ਇਨਸ਼ੋਰੈਂਸ ਬ੍ਰੋਕਰਸ ਐਸੋਸਿਏਸ਼ਨ ਇੱਕ ‘ਬ੍ਰੋਕਰ ਲੱਭੋ’ ਸੇਵਾ ਚਲਾਉਂਦੀ ਹੈ। [their website] ‘ਤੇ ਜਾਓ(https://www.biba.org.uk) ਜਾਂ 0370 950 1790 ‘ਤੇ ਕਾਲ ਕਰੋ।
11. ਵਧੇਰੇ ਜਾਣਕਾਰੀ
ਤੁਹਾਨੂੰ ਹੋਰ ਜਾਣਕਾਰੀ ਇੱਥੇ ਮਿਲ ਸਕਦੀ ਹੈ:
- ਤੁਹਾਡੀ GP ਪ੍ਰੈਕਟਿਸ
- ਤੁਹਾਡਾ ਸਥਾਨਕ ਸਕ੍ਰੀਨਿੰਗ ਪ੍ਰੋਗਰਾਮ
- NHS ਚੋਇਸੀਜ਼
- ਸਰਕੁਲੇਸ਼ਨ ਫਾਉਂਡੇਸ਼ਨ
- ਬ੍ਰਿਟਿਸ਼ ਹਾਰਟ ਫਾਉਂਡੇਸ਼ਨ
ਇਹ ਪਤਾ ਲਗਾਓ ਕਿ ਪਬਲਿਕ ਹੈਲਥ ਇੰਗਲੈਂਡ ਅਤੇ NHS ਤੁਹਾਡੀ ਸਕ੍ਰੀਨਿੰਗ ਜਾਣਕਾਰੀ ਦੀ ਵਰਤੋਂ ਅਤੇ ਰੱਖਿਆ ਕਿਵੇਂ ਕਰਦੇ ਹਨ।
ਪਤਾ ਕਰੋ ਕਿ ਸਕ੍ਰੀਨਿੰਗ ਤੋਂ ਬਾਹਰ ਹੋਣ ਦੀ ਚੋਣ ਕਿਵੇਂ ਕਰਨੀ ਹੈ।