Adroddiad corfforaethol

Strategaeth CMA 2026 i 2029

Cyhoeddwyd 20 Tachwedd 2025

Cipolwg: ein Strategaeth 2026 i 2029

Ein pwrpas: Byddwn yn hyrwyddo cystadleuaeth ac yn diogelu defnyddwyr gyda nod terfynol clir - sbarduno twf economaidd a gwella ffyniant aelwydydd.

Byddwn yn canolbwyntio ar 5 amcan strategol:

1. Hyrwyddo cystadleuaeth effeithiol

Byddwn yn parhau i fod yn eiriolwr cryf dros gystadleuaeth effeithiol ar draws economi’r DU, ac yn orfodwr annibynnol ohoni - gan gael gwared ar rwystrau i gystadleuaeth a hefyd yn cynyddu camau gweithredu i alluogi cydweithrediad busnes cyfreithlon sy’n hybu twf.

2. Cefnogi defnyddwyr

Byddwn yn diogelu pobl rhag niwed ac yn helpu busnesau i wneud y peth iawn dros eu cwsmeriaid.

3. Helpu’r llywodraeth i ddefnyddio ymyriadau wedi’u teilwra sy’n cefnogi cystadleuaeth, i gefnogi polisïau sy’n gysylltiedig â thwf, arloesedd a buddsoddiad

Byddwn yn cryfhau ein rôl fel galluogwr cystadleuaeth, gan ddarparu cyngor ac argymhellion arbenigol i’r llywodraeth gyda ffocws penodol ar gaffael cyhoeddus a rhwystrau rheoleiddio.

4. Meithrin tirwedd reoleiddio yn y DU sy’n denu buddsoddiad ac yn meithrin hyder busnesau

Byddwn yn parhau i weithredu ein dull sy’n canolbwyntio ar y 4P (Cyflymder, Rhagweladwyedd, Cymesuredd a Phroses), gan sicrhau bod y cyfundrefnau diogelu defnyddwyr a chystadleuaeth yn cyfrannu at enw da’r DU fel lle gwych i wneud busnes a buddsoddiadau.

5. Blaenoriaethu buddiannau’r DU

Ar draws ein holl waith, byddwn yn canolbwyntio’n ddi-baid ar gyflawni manteision pendant i economi’r DU, ei dinasyddion a’i busnesau.

Bydd y rhain yn cyfrannu at set o ganlyniadau sy’n atgyfnerthu ei gilydd:

• mae marchnadoedd deinamig, cystadleuol yn sbarduno buddsoddiad, arloesedd a thwf
• gall marchnadoedd strategol bwysig a busnesau sy’n tyfu ffynnu
• mae prisiau is a chanlyniadau tecach, yn enwedig mewn marchnadoedd hanfodol, yn lleddfu’r beichiau ar gyllidebau aelwydydd
• gall defnyddwyr ymgysylltu’n hyderus mewn marchnadoedd, heb ofni bod yn destun camfanteisio
• gall busnesau sy’n bargeinio’n deg gystadlu gydag amodau teg
• mae ein cyngor arbenigol a’n hargymhellion i’r llywodraeth yn llunio polisïau cystadleuol sy’n sbarduno twf, yn cefnogi defnyddwyr ac yn sicrhau gwerth am arian mewn gwasanaethau cyhoeddus

Er mwyn cyflawni’r amcanion hyn, rydym yn gwneud newidiadau sylfaenol i’r ffordd rydym yn gweithio:

• ymgorffori fframwaith y 4P ar draws pob maes o’r CMA
• esblygu sut rydym yn gweithredu i wneud y mwyaf o ystwythder a chynhyrchiant
• cyflawni newid sylweddol yn y ffordd rydym yn mesur perfformiad ac effaith

Ein Strategaeth 2026 i 2029: Wedi’i seilio ar gyd-destun byd go iawn i gyflawni canlyniadau byd go iawn

“Ar adeg dyngedfennol i economi’r DU, rhaid i Strategaeth y CMA fod wedi’i seilio mewn cyd-destun byd go iawn.”

Doug Gurr, Cadeirydd Dros Dro

Dros y 3 blynedd nesaf, rhaid i’r DU achub ar y cyfle i drawsnewid ein heconomi - gan harneisio manteision technolegau newydd a Strategaeth Ddiwydiannol Fodern y llywodraeth i ysgogi buddsoddiad, cynyddu cynhyrchiant a gyrru twf. Bydd hyn yn sicrhau safonau byw gwell, gwasanaethau cyhoeddus gwell, ac economi fwy ffyniannus sy’n gweithio i bobl ledled y DU.

Er mwyn gwireddu potensial economi’r DU yn y dyfodol, rhaid goresgyn heriau strwythurol hirhoedlog. Mae cyfyngiadau cyllidol, cynhyrchiant sy’n llonyddu a thanfuddsoddi parhaus yn golygu bod hwn yn gyfnod o bwysau economaidd difrifol i’r DU. Mae chwyddiant parhaus a phwysau costau byw yn parhau i bwyso ar aelwydydd, tra bod gwasanaethau cyhoeddus dan straen digynsail. Ar yr un pryd, mae diogelwch ein heconomi yn dibynnu ar ailadeiladu seilwaith hanfodol, datblygu strategaeth fasnach ryngwladol newydd a chryfhau ein gwydnwch i ddigwyddiadau annisgwyl mewn amgylchedd geo-wleidyddol sy’n gynyddol anwadal.

Gan adlewyrchu’r cyd-destun hwnnw, prif genhadaeth y llywodraeth yw ysgogi twf economaidd - codi safonau byw, datgloi gwasanaethau cyhoeddus gwell a gosod y DU ar y llwybr tuag at ddyfodol mwy sefydlog a llewyrchus.

Mae rhai galluogwyr allweddol yn sylfaenol i’r genhadaeth twf: mynediad at gyfalaf, data, a gweithlu medrus; seilwaith gwydn o ansawdd uchel; marchnadoedd cystadleuol sy’n sbarduno cynhyrchiant ac arloesedd; dull mwy gweithredol o greu’r amodau i gwmnïau’r DU lwyddo; defnyddwyr hyderus, sy’n barod i ymgysylltu â marchnadoedd a mabwysiadu cynhyrchion a gwasanaethau newydd; a thirwedd reoleiddio wedi’i huwchraddio sy’n denu buddsoddiad o bob cwr o’r byd.

Mae rhai o’r galluogwyr hyn y tu allan i gylch gwaith y CMA. Ond mae llawer ohonynt yn gysylltiedig yn agos â’r cyfundrefnau diogelu defnyddwyr a chystadleuaeth, sy’n rhan graidd o fframwaith polisi economaidd ehangach y DU. Yn y dirwedd polisi bresennol, mae hyn yn cynnwys y cydgysylltiad cynyddol rhwng polisïau masnach, diwydiant a chystadleuaeth y DU.

“Mae Strategaeth 2026 i 2029 y CMA wedi’i lleoli’n uniongyrchol yng nghyd-destun y realiti hwn – gan gyflawni ein mandad i hyrwyddo cystadleuaeth a diogelu defnyddwyr gyda nod terfynol clir mewn golwg: gyrru twf economaidd a gwella ffyniant aelwydydd.”

Sarah Cardell, Prif Weithredwr

Sut mae’r CMA yn helpu i sbarduno twf:

• drwy hyrwyddo cystadleuaeth, rydym yn helpu i ysgogi arloesedd, buddsoddiad a chynhyrchiant - gan agor mynediad i farchnadoedd a sicrhau amodau teg i fusnesau o bob siâp a maint arloesi a thyfu.
• mae diogelu defnyddwyr yn effeithiol yn hybu hyder defnyddwyr a gwydnwch ariannol aelwydydd, gan greu’r amodau gorau ar gyfer twf economaidd
• drwy gyfrannu at amgylchedd rheoleiddio cymesur a rhagweladwy, rydym yn helpu i sicrhau bod y DU yn lle gwych i wneud busnes a buddsoddiadau

Sut mae’r CMA yn helpu i wella ffyniant aelwydydd:

• drwy hyrwyddo cystadleuaeth, rydym yn helpu i gadw prisiau’n isel ac ansawdd yn uchel, gan ddarparu’r gwerth gorau posibl ar gyfer cyllidebau aelwydydd dan bwysau
• mae diogelu defnyddwyr yn eu trafodion o ddydd i ddydd yn rhoi arian yn ôl ym mhocedi pobl ac yn helpu busnesau i wneud y peth iawn dros eu cwsmeriaid
• drwy hyrwyddo cystadleuaeth, rydym yn helpu i ysgogi effeithlonrwydd a gwerth am arian wrth ddarparu gwasanaethau cyhoeddus

Drwy weithio’n uniongyrchol i gefnogi twf economaidd, gan gynnwys drwy gyfrannu at lefelau uwch o fuddsoddiad busnes ac amgylchedd rheoleiddio rhagweladwy a chymesur yn y DU sy’n denu cyfalaf byd-eang, mae’r CMA yn helpu i gyflawni manteision tymor hwy’r twf hwnnw i bawb yn y DU. Mae hyn yn golygu cyllid aelwydydd a chyhoeddus mwy gwydn, gwasanaethau cyhoeddus gwell, a mwy o swyddi.

Ein hamcanion strategol

Nid yw hanfodion mandad y CMA - hyrwyddo cystadleuaeth a diogelu defnyddwyr, gan wneud ein penderfyniadau’n annibynnol ac yn wrthrychol - wedi newid. Ond rhaid i’r ffordd rydym yn cyflawni’r mandad hwnnw adlewyrchu cyd-destun y DU, heddiw ac yn y blynyddoedd i ddod.

Dyna pam mai ein pwrpas dros y 3 blynedd nesaf yw hyrwyddo cystadleuaeth a diogelu defnyddwyr gyda nod terfynol clir mewn golwg: sbarduno twf economaidd a gwella ffyniant aelwydydd.

Mae ein Strategaeth yn rhoi eglurder i’r pwrpas hwn a’r canlyniadau penodol yr ydym yn ceisio eu cyflawni. Mae’n cynnig gweledigaeth sefydlog o’r llwybr o’n blaenau, gan adael dim amheuaeth y byddwn yn parhau i esblygu a bod yn ystwyth wrth i ni ymateb i’r cyd-destun allanol hwnnw. Bob blwyddyn byddwn yn ymgynghori ar Gynllun Blynyddol ac yn ei gyhoeddi, gan nodi sut y byddwn yn gweithredu’r Strategaeth hon.

Mae ein Strategaeth 2026 i 2029 wedi’i seilio ar 5 amcan craidd:

1. Hyrwyddo cystadleuaeth effeithiol

Byddwn yn parhau i fod yn eiriolwr cryf dros gystadleuaeth effeithiol ar draws economi’r DU, ac yn orfodwr annibynnol ohoni - gan gael gwared ar rwystrau i gystadleuaeth a hefyd yn cynyddu camau gweithredu i alluogi cydweithrediad busnes cyfreithlon sy’n hybu twf.

Mae marchnadoedd deinamig, cystadleuol, wedi’u hategu gan orfodaeth effeithiol, yn sbarduno cynhyrchiant, arloesedd a buddsoddiad. Mae cystadleuaeth yn hwyluso amodau teg, gan alluogi busnesau o bob maint i ffynnu, ehangu a denu buddsoddiad. Mae hefyd yn sicrhau bod defnyddwyr yn elwa o brisiau teg, ansawdd gwell ac arloesedd deinamig; ac mae’n diogelu’r pwrs cyhoeddus trwy sbarduno effeithlonrwydd a gwerth mewn meysydd allweddol o wariant cyhoeddus. Mae meithrin a chynnal yr amodau hyn yn parhau i fod yn flaenoriaeth i’n gweithgarwch gorfodi cystadleuaeth, marchnadoedd a rheoli’r broses o fusnesau’n uno.

Ond nid yw cystadleuaeth effeithiol yn rhwystro cydweithio busnes cyfreithlon, a all gefnogi buddsoddiad, arloesedd a thwf. Felly, byddwn hefyd yn cryfhau ein camau gweithredu i hwyluso’r cydweithio hwnnw sy’n hybu twf.

Yn yr un modd, nid yw’r mwyafrif helaeth o gwmnïau’n uno yn codi pryderon ynghylch cystadleuaeth, a dylai pob bargen y gellir ei chlirio’n ddiamod neu gyda rhwymedïau effeithiol gael ei chlirio. Mae ein dull cyfredol o ran rhwymedïau uno busnesau a’r modd rydym wedi cynnwys y dull 4P drwy’r broses uno yn adlewyrchu hyn.

Wrth i dechnoleg newydd dreiddio i bob agwedd ar ein bywydau, mae cystadleuaeth effeithiol mewn marchnadoedd digidol yn allweddol. Dros y 3 blynedd nesaf, bydd y CMA yn gweithredu cyfundrefn gystadleuaeth ar gyfer marchnadoedd digidol newydd y DU. Bydd ein dull pwrpasol a pragmatig yn manteisio ar ddyluniad unigryw cyfundrefn y DU i sicrhau manteision pendant i economi’r DU. Ein nod yw cefnogi amgylchedd lle gall pob cwmni, mawr a bach, ffynnu. Byddwn yn blaenoriaethu cyfleoedd i ddatgloi mwy o arloesedd a buddsoddiad, gan gefnogi mwy o ddewis i bobl a busnesau a galluogi twf ar draws yr economi.

2. Cefnogi defnyddwyr

Byddwn yn diogelu pobl rhag niwed ac yn helpu busnesau i wneud y peth iawn dros eu cwsmeriaid.

Drwy ddiogelu defnyddwyr yn eu trafodion o ddydd i ddydd, byddwn yn:

• rhoi arian yn ôl ym mhocedi pobl a gwella ffyniant aelwydydd
• cymryd gofal arbennig i atal niwed i ddefnyddwyr mewn meysydd gwariant hanfodol ac ar adegau o fregusrwydd
• sicrhau y gall pobl gymryd rhan yn hyderus ac yn weithredol yn yr economi, gan feithrin hyder defnyddwyr sy’n sail i dwf

Dros y 3 blynedd nesaf, bydd y CMA yn gweithredu cyfundrefn well ar gyfer diogelu defnyddwyr. Mae hyn yn cynnwys defnyddio ein pwerau newydd i benderfynu a yw cyfreithiau diogelu defnyddwyr wedi’u torri, i orchymyn camau unioni i ddefnyddwyr yr effeithiwyd arnynt ac i gosbi busnesau nad ydynt yn cydymffurfio. Mae’r pwerau hyn yn caniatáu inni weithredu’n fwy uniongyrchol i sicrhau y gall defnyddwyr siopa gyda hyder a bod busnesau sy’n bargeinio’n deg yn gallu cystadlu gydag amodau teg.

Lle gwelwn ymddygiad difrifol sy’n niweidio defnyddwyr ac yn rhoi busnesau sy’n bargeinio’n deg dan anfantais, byddwn yn gweithredu’n bendant, gan gymryd camau gorfodi uniongyrchol a gweithio’n agos gyda phartneriaid ar draws y dirwedd diogelu defnyddwyr yn ôl yr angen.

I’r rhan fwyaf o fusnesau sydd â bwriadau da, rydym yn cydnabod mai’r llwybr mwyaf effeithiol i gydymffurfio â chyfraith diogelu defnyddwyr yw trwy ganllawiau a chyngor. Byddwn yn parhau i wella’r ffordd rydym yn gwneud hyn, gan aros yn agored ac yn adeiladol a lleihau beichiau lle bo modd.

Drwy hyrwyddo cystadleuaeth effeithiol mewn marchnadoedd (gan gynnwys marchnadoedd digidol), byddwn hefyd yn cyflawni canlyniadau tecach i ddefnyddwyr, gan ddatgloi mwy o ddewis, ansawdd gwell a gwerth gwell.

3. Helpu’r llywodraeth i ddefnyddio ymyriadau wedi’u teilwra sy’n cefnogi cystadleuaeth, i gefnogi polisïau sy’n gysylltiedig â thwf, arloesedd a buddsoddiad

Byddwn yn cryfhau ein rôl fel galluogwr cystadleuaeth, gan ddarparu cyngor ac argymhellion arbenigol i’r llywodraeth gyda ffocws penodol ar gaffael cyhoeddus a rhwystrau rheoleiddio.

Mae gan y CMA rôl statudol o ran rhoi cyngor ac argymhellion i’r llywodraeth ac awdurdodau cyhoeddus, gan sicrhau bod cystadleuaeth a diogelu defnyddwyr yn cael eu hystyried yn briodol wrth lunio polisïau ehangach.

Ar adeg hollbwysig i economi’r DU, rhaid i’r CMA fod yn alluogwr cystadleuaeth gymaint ag y mae’n orfodwr cystadleuaeth. Drwy gyngor ac argymhellion arbenigol, byddwn yn helpu llywodraethau a chyrff cyhoeddus ledled gwledydd a rhanbarthau’r DU i ddefnyddio ymyriadau sy’n cefnogi cystadleurwydd - i gefnogi mwy o arloesedd, buddsoddiad ac ehangu busnesau’r DU, yn ogystal â lleddfu’r pwysau ar gyllid aelwydydd a chyhoeddus.

Byddwn yn blaenoriaethu camau gweithredu ar gaffael cyhoeddus, gan weithio gyda llywodraethau a chyrff cyhoeddus i gael gwared ar rigio cynigion gwrth-gystadleuol, helpu cwmnïau’r DU i ehangu a chyflawni gwydnwch mewn cadwyni cyflenwi hanfodol.

Byddwn yn cefnogi’r llywodraeth i ddileu rheoleiddio gwrth-gystadleuol sy’n rhwystro twf, buddsoddiad ac arloesedd - yn enwedig mewn sectorau â blaenoriaeth ar gyfer y Strategaeth Ddiwydiannol. Byddwn yn helpu i nodi cyfleoedd i ddatgloi galluogwyr twf traws-economi, yn cynnwys mynediad gwell at ddata hanfodol a’r gallu i ryngweithredu’n well.

Byddwn yn parhau i helpu llywodraethau a chyrff cyhoeddus ledled y DU i ddatblygu a chyflawni canlyniadau polisi gwell, drwy gyngor arbenigol annibynnol ac adrodd ar gymorthdaliadau a marchnad fewnol y DU.

4. Meithrin tirwedd reoleiddio yn y DU sy’n denu buddsoddiad ac yn meithrin hyder busnesau

Byddwn yn parhau i weithredu ein dull sy’n canolbwyntio ar y 4P (Cyflymder, Rhagweladwyedd, Cymesuredd a Phroses), gan sicrhau bod y cyfundrefnau cystadleuaeth a diogelu defnyddwyr yn cyfrannu at enw da’r DU fel lle gwych i wneud busnes a buddsoddiadau.

Mewn byd o sgiliau a chyfalaf symudol, rhaid i’r DU weithio i ddenu’r buddsoddiad a’r dalent sydd eu hangen i yrru twf. Drwy ein rhaglen 4P ac ymgysylltu ehangach â rhanddeiliaid, byddwn yn cyfrannu at amgylchedd rheoleiddio sy’n meithrin hyder busnesau a buddsoddwyr - gan atgyfnerthu’r amodau ar gyfer twf economaidd a denu cyfalaf byd-eang.

Byddwn yn gweithio gyda’r llywodraeth a chyrff eraill yn nhirwedd reoleiddio’r DU i alluogi aliniad a chydlyniant. Byddwn hefyd yn gweithio gyda’r llywodraeth i ymgorffori’r dull 4P ymhellach trwy ei chynigion ar gyfer diwygio deddfwriaethol sy’n ceisio moderneiddio cyfundrefnau diogelu defnyddwyr a chystadleuaeth y DU.

5. Blaenoriaethu buddiannau’r DU

Ar draws ein holl waith, byddwn yn canolbwyntio’n ddi-baid ar gyflawni manteision pendant i economi’r DU, ei dinasyddion a’i busnesau.

Prif gyfrifoldeb y CMA yw’r DU. Byddwn yn blaenoriaethu marchnadoedd a materion sy’n cael yr effaith gadarnhaol fwyaf ar economi, dinasyddion a busnesau’r DU yn fwriadol, gan osod y DU ar lwybr tuag at ddyfodol mwy sefydlog a llewyrchus.

Byddwn yn manteisio ar ddyluniad unigryw cyfundrefnau diogelu defnyddwyr a chystadleuaeth y DU i gyflawni canlyniadau sy’n gwneud gwahaniaeth gwirioneddol i’r wlad; ac i feithrin enw da byd-eang am ddull Prydeinig pwrpasol a phragmatig.

Byddwn yn cefnogi twf a chystadleurwydd yn sectorau’r DU sy’n arwyddocaol yn strategol - gan ddatgloi cyfleoedd ar gyfer buddsoddi, arloesi ac ehangu busnesau’r DU.

Byddwn yn blaenoriaethu materion lle rydym yn y sefyllfa orau i weithredu a lle gallwn gyflawni canlyniadau cadarnhaol i’r DU. Byddwn yn ystyried lle gallai camau gweithredu ar faterion byd-eang sy’n cael eu cymryd gan ein cymheiriaid rhyngwladol fynd i’r afael â’n pryderon, a byddwn yn osgoi dyblygu diangen.

Canlyniadau pendant i economi’r DU, ei dinasyddion a’i busnesau

Gan weithredu’r 5 amcan strategol hyn ar draws pob maes o’n gwaith, byddwn yn cyfrannu at set o ganlyniadau sy’n atgyfnerthu ei gilydd, gan helpu i ysgogi twf economaidd a ffyniant aelwydydd:

• mae marchnadoedd deinamig, cystadleuol yn sbarduno buddsoddiad, arloesedd a thwf
• gall marchnadoedd strategol bwysig a busnesau sy’n tyfu ffynnu
• mae prisiau is a chanlyniadau tecach, yn enwedig mewn marchnadoedd hanfodol, yn lleddfu’r beichiau ar gyllidebau aelwydydd
• gall defnyddwyr ymgysylltu’n hyderus mewn marchnadoedd, heb ofni bod yn destun camfanteisio
• gall busnesau sy’n bargeinio’n deg gystadlu gydag amodau teg
• mae ein cyngor arbenigol a’n hargymhellion i’r llywodraeth yn llunio polisïau cystadleuol sy’n sbarduno twf, yn cefnogi defnyddwyr ac yn sicrhau gwerth am arian mewn gwasanaethau cyhoeddus

Annibyniaeth y CMA a’r Cyfeiriad Strategol

Mae annibyniaeth y CMA wrth wneud penderfyniadau ynghylch achosion wedi’i ymgorffori mewn statud. Mae hyn yn ganolog i ragweladwyedd cyfundrefn reoleiddio lle mae penderfyniadau unigol yn cael eu gwneud gan gorff annibynnol, sy’n arbenigol yn dechnegol.

Mae’r llywodraeth yn gyfrifol am y cyd-destun polisi economaidd cyffredinol y mae’r CMA yn gweithredu ynddo. Mater i’r llywodraeth yw nodi’r amcanion polisi ehangach y dylai’r CMA eu hystyried, heb danseilio’r annibyniaeth weithredol honno.

Mae Cyfeiriad Strategol y llywodraeth i’r CMA yn darparu tryloywder pwysig ynghylch y blaenoriaethau polisi y gall y CMA helpu i’w hyrwyddo, gan gydnabod yn benodol ein hannibyniaeth statudol. Mae’r blaenoriaethau hynny wedi llywio’r Strategaeth hon. Mae dyfyniadau allweddol o’r Cyfeiriad Strategol yn cynnwys:

Rôl y CMA

“Rhaid i’r CMA bob amser weithredu ei swyddogaethau statudol yn briodol ac yn annibynnol i hyrwyddo cystadleuaeth a diogelu defnyddwyr.”

Twf economaidd

“Mae’r llywodraeth yn disgwyl i’r CMA gefnogi… twf a buddsoddiad wrth iddi gyflawni ei swyddogaethau statudol.”

Canolbwyntio ar y DU

“Dylai’r CMA roi ystyriaeth briodol i… ganolbwyntio ar farchnadoedd a niwed sy’n effeithio’n benodol ar ddefnyddwyr a busnesau yn y DU.”

Strategaeth ddiwydiannol

“Dylai’r CMA roi ystyriaeth briodol i… gefnogi twf a chystadleurwydd yn yr 8 sector sy’n sbarduno twf yn y strategaeth ddiwydiannol.”

Cynghori’r llywodraeth

“Dylai’r CMA barhau i ddarparu tystiolaeth a chyngor i’r llywodraeth ar faterion polisi allweddol, gan gynnwys drwy ddarparu ymchwil a chyngor ar bolisi.”

Cefnogi gwasanaethau cyhoeddus

“Lle bo modd, dylai’r CMA flaenoriaethu’r defnydd o offer mewn meysydd lle gall cystadleuaeth chwarae rhan bwysig wrth yrru effeithlonrwydd a phrofiad gwell i’r defnyddiwr wrth ddarparu gwasanaethau cyhoeddus allweddol.”

Diogelu defnyddwyr

“Dylai’r CMA ddefnyddio ei ystod o offer, gan gynnwys ei bwerau…sydd ar ddod o dan y DMCCA, i dyfu’r economi drwy hyrwyddo ymddiriedaeth a hyder defnyddwyr, lle bo’n briodol, gan atal arferion corfforaethol gwael.”

Cystadleuaeth

“Yn unol â’r ddyletswydd brydlonrwydd newydd, dylai’r CMA fynd i’r afael cyn gynted â phosibl ag ymddygiad gwrth-gystadleuol sy’n niweidio busnesau a defnyddwyr, ac yn cyfyngu ar botensial ein heconomi.”

Marchnadoedd Digidol

“Dylai’r CMA ddefnyddio’r… gyfundrefn ar gyfer marchnadoedd digidol newydd yn annibynnol, yn hyblyg, yn gymesur ac yn gydweithredol i ddatgloi cyfleoedd ar gyfer twf ar draws economi ddigidol y DU a’r economi ehangach.”

Cystadleurwydd rhyngwladol y DU

“Mae’r llywodraeth yn disgwyl i ddull y CMA adlewyrchu’n glir, ac yn ddiamwys, yr angen i wella atyniad y DU fel cyrchfan ar gyfer buddsoddiad rhyngwladol.”

Sut mae’r CMA yn cyflawni ei waith

“Mae gan reoleiddwyr rôl allweddol i’w chwarae wrth gynnal a hyrwyddo enw da’r DU fel canolbwynt rheoleiddio sicr, cymesur a thryloyw… Rydym yn disgwyl i gamau gweithredu’r CMA fod yn gyflym, yn rhagweladwy, yn annibynnol ac yn gymesur.”

Ymgysylltu â rhanddeiliaid

“Dylai’r CMA ddarparu ymgysylltiad rhagweithiol, tryloyw, amserol, rhagweladwy ac ymatebol â busnesau… bydd y llywodraeth hefyd yn diwygio cytundeb fframwaith y CMA i fynnu adborth rheolaidd gan randdeiliaid y CMA, gan gynnwys busnesau a defnyddwyr.”

Effaith

“Dylai’r CMA barhau i ddatblygu sylfaen dystiolaeth gyfoes i ddangos ei heffaith ar economi’r DU mewn amgylchedd masnachu byd-eang sy’n gynyddol ddarniog.”

Cydlynu ac ymgysylltu byd-eang

“Dylai’r CMA ystyried camau sy’n cael eu cymryd gan asiantaethau diogelu cystadleuaeth a/neu ddefnyddwyr mewn awdurdodaethau eraill yn rhyngwladol, a, lle bo’n briodol, ceisio sicrhau bod camau rheoleiddio cyfochrog yn amserol, yn gydlynol ac yn osgoi dyblygu, lle mae’r camau cyfochrog hyn yn mynd i’r afael yn effeithiol â materion sy’n codi ym marchnadoedd y DU… Dylai’r CMA barhau i chwarae rhan weithredol mewn fforymau rhyngwladol i gefnogi materion o ddiddordeb cyffredin.”

Cyflawni ein Strategaeth

Rydym yn gwneud newidiadau sylfaenol i’r ffordd rydym yn gweithredu a fydd yn hanfodol i weithredu’r Strategaeth hon.

Ymgorffori fframwaith y 4P

Ein rhaglen 4P yw’r rhaglen drawsnewid fwyaf arwyddocaol ers i’r CMA agor ei ddrysau, gyda dros 75 o ymrwymiadau ar y gweill neu wedi’u cwblhau hyd yn hyn. Tarddiad y rhaglen hon oedd adborth uniongyrchol ar sut y gallai’r CMA wneud gwelliannau yn y meysydd sydd bwysicaf i hyder busnes a buddsoddwyr – cyflymder, rhagweladwyedd, cymesuredd a phroses. Rydym yn parhau i fod wedi ymrwymo i ymgorffori’r 4P ym mhopeth a wnawn a bydd yr egwyddorion hyn yn sylfaenol i weithredu Strategaeth y CMA dros y 3 blynedd nesaf.

Cyflymder - gwneud penderfyniadau da cyn gynted â phosibl

I fusnesau yr effeithir arnynt yn uniongyrchol gan ymchwiliad neu adolygiad CMA, gall ansicrwydd ac oedi gael effaith negyddol wrth wneud penderfyniadau a buddsoddi. Rhaid inni symud cyn gynted â phosibl i gael y canlyniadau cywir. Mewn adolygiadau uno busnesau, er enghraifft, rydym wedi cyflwyno dangosyddion perfformiad allweddol newydd i leihau hyd ein cyfnod cyn-hysbysu a’n hadolygiad o achosion cam 1 uniongyrchol. Yn fwy cyffredinol, er mwyn cyflawni ar gyflymder cynyddol, rydym yn symleiddio ein dull a’n prosesau, fel ein bod yn canolbwyntio ar y meysydd diddordeb pwysicaf yn gynnar.

Rhagweladwyedd – darparu eglurder ar ein dull gweithredu a’n canlyniadau disgwyliedig

Gall ansicrwydd rwystro’r broses o wneud penderfyniadau a gwanhau hyder busnesau a buddsoddwyr. Ni ellir rhagweld canlyniad unrhyw ymchwiliad penodol ymlaen llaw bob amser. Felly, rydym wedi ymrwymo i weithredu mewn ffordd sy’n darparu cymaint o sicrwydd ymlaen llaw â phosibl – ynglŷn â’n prosesau a’n dull gweithredu, y cyfyngiadau ar ein pwerau a’r egwyddorion arweiniol sy’n fframio’r canlyniadau yr ydym yn ceisio eu cyflawni.

Cymesuredd – sicrhau bod ein gweithredoedd yn gytbwys ac wedi’u targedu

Mae ymyriadau beichus mewn perygl o fygu arloesedd, felly rydym wedi ymrwymo i weithredu’n gymesur a lleihau costau lle bynnag y bo modd. Cyn lansio gwaith marchnadoedd newydd er enghraifft, byddwn yn ystyried yn ofalus y costau posibl i fusnesau, yn ogystal â’r manteision y gallai eu cynhyrchu. Mae cymesuredd hefyd yn golygu blaenoriaethu materion sy’n effeithio fwyaf uniongyrchol ar ddinasyddion a busnesau’r DU. Mae angen i bob dewis a wnawn ynghylch ble i weithredu a sut i ymyrryd fod yn gysylltiedig yn glir â budd uniongyrchol, pendant i’r DU.

Proses – trawsnewid ein hymgysylltiad â rhanddeiliaid allweddol ar draws ein swyddogaethau

Rydym yn trawsnewid sut rydym yn ymgysylltu ag ystod ehangach o randdeiliaid nag erioed o’r blaen. Rydym yn cynnig mwy o ddeialog uniongyrchol gyda busnesau, buddsoddwyr a grwpiau defnyddwyr; cynnwys a chanllawiau gwe cliriach a mwy hygyrch; a rhaglenni allgymorth wedi’u targedu. Rydym wedi sefydlu Cyngor Twf a Buddsoddi (GIC), gan ddod ag arweinwyr llawer o gyrff diwydiant cynrychioliadol mawr y DU ynghyd, i sicrhau bod ein gwaith wedi’i seilio ar realiti masnachol busnes yn y DU. Rydym hefyd yn sefydlu Fforwm Defnyddwyr newydd, gan ddod â sefydliadau sy’n cynrychioli defnyddwyr ynghyd i gadw safbwyntiau defnyddwyr wrth wraidd ein gwaith. Rydym yn lansio arolygon rhanddeiliaid newydd i gasglu adborth a chanfyddiadau gwerthfawr gan bob un o’n rhanddeiliaid.

Esblygu sut rydym yn gweithredu

Uchelgais y CMA yw sicrhau ein bod yn darparu’r gwerth mwyaf posibl gyda’r adnoddau cyfyngedig sydd ar gael i ni. Gyda phwysau parhaus ar gyllid cyhoeddus, a’r cyfle i hybu ein cynhyrchiant trwy ddefnyddio technoleg yn amlach, rhaid i ni uwchraddio sut rydym yn gweithredu, gyda ffocws clir ar ystwythder a chynhyrchiant ym mhopeth a wnawn.

Ystwythder

Rhaid inni fod yn ystwyth yn y ffordd rydym yn gweithio, gan wneud y defnydd mwyaf posibl o’r ystod lawn o gamau gweithredu posibl sydd ar gael inni i gyflawni canlyniadau effeithiol cyn gynted ac mor gymesur â phosibl. Mae gennym nifer o lwybrau posibl, yn amrywio o: ymchwiliadau ffurfiol ac adolygiadau anffurfiol; datrys setliadau ac ymgyfreitha; cyngor ac arweiniad i fusnesau a defnyddwyr; eiriolaeth, cyngor ar bolisi ac argymhellion i’r llywodraeth. Wrth inni weithredu’r Strategaeth hon, byddwn yn gwneud dewisiadau ymwybodol ac ystwyth ynghylch y llwybr gorau i gyflawni’r effaith fwyaf - ar y dechrau ac yn ystod prosiect penodol.

Er mwyn mynd i’r afael yn well â’n portffolio esblygol a’n hamcanion strategol, rydym wedi ymrwymo i gynyddu hyblygrwydd yn y ffordd rydym yn dyrannu ac yn rheoli ein pobl. Drwy alluogi cydweithwyr i gyfrannu ar draws ystod o weithgareddau CMA, gallwn ymateb yn fwy effeithiol i flaenoriaethau newidiol a chyfleoedd sy’n dod i’r amlwg yn ein sefydliad. Bydd y dull hwn yn gwella ein hystwythder, yn ogystal â chynnig y cyfle i’n pobl ddatblygu eu gyrfaoedd a chael effaith ystyrlon ar ystod o brosiectau.

Cynhyrchiant

Mae ein heffaith gadarnhaol, nawr ac yn y dyfodol, yn dibynnu ar barhau i ddenu a chadw pobl dalentog ac ymroddedig. Mae gweithio mewn sefydliad sy’n chwarae rhan sylweddol yn economi’r DU yn parhau i ysbrydoli llawer o weithwyr proffesiynol medrus i ymuno â’r CMA. Mewn marchnad lafur gystadleuol iawn, rhaid i ni barhau i fuddsoddi mewn sgiliau a datblygiad gyrfa ein cydweithwyr, a darparu’r offer gorau sy’n cael eu galluogi gan dechnoleg i wella eu cynhyrchiant a chefnogi eu datblygiad.

Rydym wedi ymrwymo i sicrhau bod popeth - o’n gofod swyddfa i’n defnydd o ddata a deallusrwydd artiffisial - yn tynnu i’r un cyfeiriad, gan rymuso ein pobl i gyflawni buddion go iawn ar draws economi’r DU. Mae camau sylfaenol eisoes wedi’u datblygu’n dda, gan gynnwys ein fframwaith 4P, ein rhaglen trawsnewid digidol, a’n ffocws penodol parhaus ar gynhyrchiant i yrru cyflymder ein darpariaeth a sicrhau bod amser staff yn cael ei ddefnyddio mor effeithiol â phosibl. Dros y 3 blynedd nesaf, byddwn yn mynd ymhellach ac yn gyflymach, gan barhau i harneisio pŵer deallusrwydd artiffisial sy’n esblygu ac offer digidol ehangach.

Cyflawni effaith a mesur perfformiad

Atebolrwydd am gyflawni yn erbyn y Strategaeth hon

Mae’r Strategaeth hon yn nodi ein pwrpas dros y 3 blynedd nesaf, yr amcanion strategol yr ydym yn eu dilyn, y canlyniadau yr ydym yn ceisio eu cyflawni, a’r ffordd yr ydym yn bwriadu gweithredu. Mae’n hanfodol ar gyfer ymddiriedaeth a hyder yn y CMA bod gan randdeiliaid linell weld glir ynghylch a ydym wedi cyflawni ein hymrwymiadau.

Er mwyn cefnogi atebolrwydd a thryloywder ynghylch yr effaith a gawsom, a’r ffordd yr ydym wedi perfformio fel sefydliad, byddwn yn:

• cael ein harwain gan amcanion a chanlyniadau strategol y Strategaeth hon wrth nodi blaenoriaethau ein Cynlluniau Blynyddol
• adrodd ar ein gwaith i gyflawni’r blaenoriaethau hynny yn ein Hadroddiad Blynyddol a Chyfrifon (ARA), gan egluro sut mae ein gwaith wedi helpu i gyfrannu at y canlyniadau hyn

Mae’r canlyniadau eu hunain yn cynnwys amodau eang, traws-economi lle gall y CMA chwarae rhan bwysig, ond nid unigryw. Gall gwerthuso ein cyfraniad penodol fod yn heriol. Byddwn yn gwneud ein gorau i angori ein hadroddiadau i brosiectau penodol, perthnasol, gan werthuso’r effaith y mae ein gwaith wedi’i chael ac unrhyw brofiadau rhanddeiliaid perthnasol.

Mesur ein heffaith

Mae mesur ein heffaith yn effeithiol yn rhan allweddol o’n hatebolrwydd am y Strategaeth hon, ac am y manteision yr ydym yn ceisio eu cyflawni i’r DU. Mae gan y CMA ddull sefydledig ac uchel ei barch yn rhyngwladol o werthuso’r ‘budd ariannol uniongyrchol’ i ddefnyddwyr o’n gwaith. Rydym yn adrodd yn flynyddol ar y budd uniongyrchol hwn yn ein Hasesiad o Effaith (IA), o ran ein targed gan y Llywodraeth i gyflawni o leiaf £10 o fudd am bob £1 o arian trethdalwyr a werir arnom. Rydym yn cyflawni ymhell y tu hwnt i’r targed hwn - nododd ein hasesiad effaith diwethaf gymhareb budd uniongyrchol i gost o 24.5:1 fel cyfartaledd o’r 3 blynedd diwethaf.

Fodd bynnag, nid yw ein Hasesiad o Effaith yn cwmpasu ystod lawn ein gwaith ac nid yw’n mynd i’r afael â budd anuniongyrchol ein gweithgarwch (gan gynnwys yr effaith ataliol), a all fod yn sylweddol. Mae hefyd wedi’i bwysoli’n drwm tuag at effaith ein camau gorfodi. Mae hyn yn golygu nad yw’n adlewyrchu pwysigrwydd cynyddol ein rôl wrth alluogi cystadleuaeth, cefnogi cydymffurfiaeth a chynghori’r llywodraeth.

Rydym yn diweddaru ein methodoleg IA i adlewyrchu’n well ehangder ac effaith lawn ein portffolio gwaith esblygol, yn enwedig fel a geir yn amcan strategol 4. Yn yr IA nesaf, y disgwylir ei gyhoeddi ochr yn ochr ag Asesiad Effaith 2025 i 2026, bwriadwn ehangu ein hasesiad craidd o ‘effaith uniongyrchol’ i adlewyrchu mwy o’n gweithgarwch. Byddwn hefyd yn rhoi darlun cliriach o effeithiau anuniongyrchol tebygol, gan gynnwys ataliaeth.

Olrhain ein perfformiad

Mae’r Strategaeth hon yn anelu at gyflawni newid sylweddol yn y ffordd rydym yn perfformio fel sefydliad ac rydym yn benderfynol o fod yn atebol am y cynnydd a wnawn. Rydym am fod yn dryloyw ynglŷn â sut rydym yn gwneud, yn agored i adborth ar sut y gallwn wella, ac yn rhagweithiol wrth nodi cyfleoedd i wneud pethau’n well.

Yn ei Chyfeiriad Strategol i’r CMA, a’r Cynllun Gweithredu Rheoleiddio ehangach, mae’r llywodraeth wedi gosod disgwyliadau clir o ran perfformiad. Mae’r rhain yn cynnwys adrodd yn rheolaidd yn erbyn dangosyddion perfformiad allweddol, lleihau’r baich a roddwn ar fusnesau, a gwrando ar adborth gan ein rhanddeiliaid.

Bydd y CMA yn defnyddio cyfres newydd o ddangosyddion perfformiad allweddol (KPI) i olrhain cynnydd a chryfhau atebolrwydd:

• mae’r effaith a gyflawnwn yn fesur hollbwysig o’n perfformiad cyffredinol. Bydd ein KPI newydd yn cynnwys metrigau a dynnwyd o’n IA gwell, gan fynd i’r afael â’n heffaith uniongyrchol ac anuniongyrchol.
• byddwn yn cynnwys metrigau sy’n ymwneud â chyflymder ac effeithlonrwydd ein gwaith, gan gynnwys sut mae ein rhaglen 4P yn lleihau’r baich rheoleiddio ar fusnesau
• byddwn yn olrhain ac yn adrodd ar brofiad a chanfyddiadau ein rhanddeiliaid, gan gynnwys grwpiau busnes a defnyddwyr, yn ogystal â phartïon sydd wedi ymgysylltu’n uniongyrchol â ni. Byddwn yn cynnal nifer o arolygon rhanddeiliaid newydd, rheolaidd at y diben hwn.

Byddwn yn lansio’r KPI hyn ac yn adrodd ar ganlyniadau ein harolygon yn ein ARA 2025 i 2026, gan ddefnyddio canlyniadau cychwynnol i bennu llinell sylfaen ein perfformiad.