Ysgrifennydd Cymru yn croesawu’r Ysgrifennydd Amddiffyn i ganolfannau yng Nghymru sydd ar y blaen o ran hyfforddiant ac addysg
Mae Ysgrifennydd Cymru a Gweinidog Llywodraeth y DU dros Gymru yn ymuno â’r Ysgrifennydd Gwladol dros Amddiffyn ar ei ymweliad cyntaf â chanolfan yng Nghymru
Defence Secretary, Welsh Secretary and Minister Adams meet trainees at RAF St. Athan
Bydd Gavin Williamson, Alun Cairns a Nigel Adams yn teithio ar hyd a lled Cymru yn ymweld â rhai o’r canolfannau yng Nghymru sy’n cyfrannu at allu hanfodol y DU i amddiffyn. Drwy siarad â’r rheini sy’n cael hyfforddiant mewn hedfan jetiau cyflym mewn awyrennau Hawk yn RAF Y Fali a gweld yr hyn sydd ar gael yn yr Ysgol Hyfforddiant Technegol yn Sain Tathan, bydd Gweinidogion Llywodraeth y DU yn cael gweld drostynt eu hunain beth sydd gan Gymru i’w gynnig o ran amddiffyn, diogelwch ac arloesi.
Yn ystod eu hymweliad ag RAF Sain Tathan, bydd Gweinidogion Llywodraeth y DU yn cwrdd â chynrychiolwyr sydd ar reng uchel o’r RAF a’r fyddin yng Nghymru. Byddant yn trafod eu huchelgais ar gyfer dyfodol canolfan De Cymru yn y cyfarfodydd.
Mae Ysgol Hyfforddiant Hedfan Rhif 4 yn RAF Y Fali ar Ynys Môn, ac mae’n gyfrifol am hyfforddi cenhedlaeth nesaf y DU o beilotiaid awyrennau ymladd o’r radd flaenaf. Dyma’r tro cyntaf y bydd yr Ysgrifennydd Amddiffyn yn ymweld â’r ganolfan, a bydd Gweinidogion Llywodraeth y DU yn cael cyfle i gwrdd â rhai o’r 2,210 o bersonél rheolaidd Lluoedd Arfog y DU yng Nghymru a chlywed am eu profiadau yng nghanolfan Ynys Môn a’r tu hwnt. Mae Gweinyddiaeth Amddiffyn Llywodraeth y DU wedi buddsoddi cyfanswm o £945 miliwn mewn busnesau yng Nghymru yn 2016/17, felly erbyn hyn, Cymru yw un o’r llefydd mwyaf cystadleuol yn y byd i arloesi, adeiladu busnes a darparu diogelwch. Wrth siarad â chomanderiaid yn RAF Y Fali a Sain Tathan, bydd Gweinidogion Llywodraeth y DU yn atgyfnerthu’r cymorth hanfodol hwn ar gyfer y sector amddiffyn yng Nghymru ac yn amlinellu eu gweledigaethau ar gyfer ei ddyfodol.
Dywedodd Gavin Williamson, yr Ysgrifennydd Gwladol dros Amddiffyn:
Mae’r 2,210 o bersonél rheolaidd a’r 1,080 wrth gefn yn y Lluoedd Arfog yng Nghymru yn gwneud cyfraniad aruthrol i ddiogelwch a ffyniant y Deyrnas Unedig. Yng Nghymru mae Pencadlys ein 160fed Brigâd, yn ogystal â’r uned troedfilwyr ysgafn. Mae’r ysgol hyfforddiant i beilotiaid mewn hedfan jetiau cyflym yn RAF Y Fali, eu hysgol ar gyfer peirianneg maes yn y Weinyddiaeth Amddiffyn yn Sain Tathan heb anghofio’r cyfleusterau hyfforddi yn ardal Aberhonddu.
Mae’r sector amddiffyn yn buddsoddi £945 miliwn mewn busnesau yng Nghymru bob blwyddyn, gan gefnogi 6,300 o swyddi, o General Dynamics ym Merthyr Tudful, sy’n adeiladu cerbydau arfog ar gyfer y Fyddin, i waith uwch dechnoleg Qinetiq yn Aberporth, a’r Asiantaeth Electroneg a Chydrannau Amddiffyn yn Sir y Fflint, sy’n cefnogi ein jetiau cyflym RAF F-35 sydd gyda’r gorau yn y byd.
Dywedodd Alun Cairns, Ysgrifennydd Gwladol Cymru:
Mae RAF Y Fali a Sain Tathan yn enghreifftiau gwych o sut mae sector amddiffyn y DU yn ein gwarchod ni rhag bygythiadau byd-eang yn ogystal â meithrin ffyniant, creu miloedd o swyddi medrus a chynhyrchu miliynau o bunnau mewn allforion.
Ar ôl gweld y doniau o safon fyd-eang yma yn ein canolfannau yn ogystal â’r milwyr sydd gennym yn barhaus yn Afghanistan, rwy’n fwy penderfynol nag erioed o sicrhau a chryfhau ôl troed milwrol Cymru.
Dywedodd Nigel Adams, Gweinidog Llywodraeth y DU dros Gymru:
Mae’r hyfforddiant o’r radd flaenaf sydd ar gael yn y canolfannau ledled Cymru wir yn brawf o gryfder y sector amddiffyn yng Nghymru. Gyda milwyr, criwiau awyr a llongwyr o Gymru yn gweithio ar hyd a lled y byd, mae modd gweld a theimlo’r sgiliau a’r arbenigedd sy’n cael eu meithrin yma ar lefel fyd-eang. Mae Llywodraeth y DU wedi ymrwymo i ddiogelu enw da Cymru am ddarparu rhagoriaeth filwrol, ac rwy’n edrych ymlaen at weithio’n agos gyda’r Ysgrifennydd Amddiffyn er mwyn hybu’r llwyddiant yma.
Bydd Gweinidogion Llywodraeth y DU yn dysgu am y cymorth amhrisiadwy sy’n cael ei roi i gyn-filwyr yn Ne Cymru ar ôl ymweld â’r ddwy ganolfan RAF. Mae Woody’s Lodge yn helpu cyn-filwyr i ailgysylltu â’u teuluoedd a’u cymunedau. Mae hefyd yn lle croesawus i gyn-filwyr fynd i gael cymorth a chyngor.
Dywedodd Alun Cairns, Ysgrifennydd Gwladol Cymru:
Ar ôl i Lywodraeth y DU, Llywodraeth Yr Alban, Llywodraeth Cymru a Swyddfa Gogledd Iwerddon lansio Strategaeth Cyn-filwyr y DU gyfan yn ddiweddar, mae’n galonogol ymweld â mudiad sydd wedi bod yn gweithio tuag at gyflawni rhai o brif nodau’r strategaeth yma yn Ne Cymru ers blynyddoedd.
Mae Woody’s Lodge yn cefnogi cyn-filwyr i wynebu rhai o’r heriau a’r problemau amrywiol sy’n eu hwynebu pan fyddant yn gadael y lluoedd arfog. Drwy ymweld â mudiadau o’r fath, gall Llywodraeth y DU ddeall yr heriau hyn yn well a sicrhau bod gennym yr wybodaeth i gyd er mwyn darparu strategaeth sy’n gweithio.