Ysgrifennydd Cymru: Estyniad Heathrow’
Ysgrifennydd Gwladol Cymru, Alun Cairns, yn cynnal trafodaethau ynghylch Heathrow.
Alun Cairns
Ddydd Mawrth 25ain Hydref, bu Alun Cairns, Ysgrifennydd Gwladol Cymru, yn croesawu arbenigwyr o’r sector awyrofod i Dŷ Gwydyr yn Llundain i ddathlu llwyddiant y sector ac i drafod cyfleoedd ar gyfer y dyfodol.
Cynhaliwyd y digwyddiad yr un diwrnod ag y cyhoeddodd Llywodraeth y DU gynlluniau ar gyfer rhedfa newydd yn Heathrow.
Bydd datblygu Heathrow yn cysylltu’r DU yn well â chyrchfannau pell mewn marchnadoedd y byd sy’n tyfu, gan roi hwb i fasnach a chreu swyddi.
Gan fod rhai o gwmnïau awyrofod mwyaf y byd wedi ymgartrefu yng Nghymru, mae hyn yn cyflwyno cyfleoedd newydd i bobl Cymru.
Ar hyn o bryd, mae tua 14,000 o bobl yn cael eu cyflogi yn y sector awyrofod yng Nghymru, ac os bydd y rhedfa newydd yn creu 77,000 o swyddi ychwanegol dros y 14 mlynedd nesaf yn ôl y disgwyl, mae’n debyg y bydd y ffigur hwn yn cynyddu.
Gyda’r cyhoeddiad diweddar ynghylch rhedfa newydd yn Heathrow, mae’n sicr y bydd dyfodol i’r diwydiant awyrofod yng Nghymru. Caiff hyn ei ategu gan yr wyth prifysgol yng Nghymru lle mae cyfoeth o arbenigedd academaidd yn canolbwyntio ar y diwydiant awyrofod, gan gysylltu â’i gilydd i gynnig arbenigedd a hyfforddiant diguro.
Dywedodd Alun Cairns, Ysgrifennydd Gwladol Cymru:
Rwyf wrth fy modd gyda’r cyhoeddiad y bydd rhedfa newydd yn cael ei chreu yn Heathrow. Bydd y penderfyniad hwn yn cael effaith hynod gadarnhaol ar fusnesau yng Nghymru gyda mynediad at farchnadoedd a masnach newydd.
Gall canolfan yn Llundain ddarparu nifer o gysylltiadau i gyrchfannau rhyngwladol bob dydd.
Mae hyn yn newyddion gwych i Gymru a fydd yn ei galluogi i ehangu ei gorwelion drwy fwy o gysylltedd a sicrhau bod Cymru yn agored i fusnes.