‘Ailenwi un o Bontydd Hafren yn swyddogol fel Pont Tywysog Cymru’
Y Tywysog Charles a Duges Cernyw yn bresennol mewn seremoni i ddathlu ailenwi Ail Bont Hafren
Severn Crossing
Mae’r Tywysog Charles wedi nodi’n swyddogol ailenwi Ail Bont Hafren mewn seremoni yng Nghasnewydd heddiw (2 Gorffennaf).
Ymunodd Duges Cernyw â’i Uchelder Brenhinol ar ymweliad â De Cymru a oedd yn nodi dechrau taith flynyddol ‘Wythnos Cymru’ Eu Huchelderau Brenhinol.
Cyhoeddodd Ysgrifennydd Gwladol Cymru, Alun Cairns, yn gynharach eleni y penderfyniad i ailenwi’r bont yn ‘Bont Tywysog Cymru’ yn deyrnged i’w Uchelder Brenhinol yn y flwyddyn lle mae’n nodi 60 mlynedd fel Tywysog Cymru, ac fel dathliad o Dywysogion Cymru yn y gorffennol a’r presennol.
Croesawyd eu Huchelderau Brenhinol i Gymru heddiw gan Alun Cairns, Ysgrifennydd Gwladol Cymru, a Carwyn Jones, Prif Weinidog Cymru.
Mae’r penderfyniad i ailenwi Ail Bont Hafren wedi cael cefnogaeth lawn Llywodraeth Cymru.
Bu’r cwpl Brenhinol ar daith o gwmpas swyddfa dollau Pontydd Hafren gydag Ysgrifennydd Gwladol Cymru, gan gwrdd â staff Highways England a fu’n gyfrifol am y Pontydd ers iddyn nhw ddychwelyd i berchnogaeth gyhoeddus ym mis Ionawr eleni.
Yna, teithiodd y garfan i westy’r Celtic Manor ar gyfer derbyniad i ddathlu’r digwyddiad, lle dadorchuddiodd Tywysog Cymru blac seremonïol i nodi ailenwi’r Bont.
Wrth annerch y gwesteion o’r naill ochr a’r llall i’r bont, dywedodd Alun Cairns, Ysgrifennydd Gwladol Cymru:
Rydw i’n falch iawn bod Eu Huchelderau Brenhinol wedi gallu ymuno â ni ar ddechrau eu hwythnos o daith o gwmpas Cymru, ar yr achlysur arbennig hwn sy’n nodi dechrau cyfnod newydd o gyfleoedd trawsffiniol.
Drwy ei waith elusennol helaeth a’i gefnogaeth i fusnes a menter yng Nghymru, mae Ei Uchelder Brenhinol wedi rhoi degawdau o wasanaeth parhaus a phwrpasol i’n gwlad.
Rydw i’n gobeithio y bydd pont newydd Tywysog Cymru a’i chwaer bont yn cael eu gweld fel symbolau cadarnhaol o’r cyfleoedd economaidd, diwylliannol a chymdeithasol wedi eu bywiogi o’r newydd a ddaw i Gymru, gan helpu i sicrhau bod ein cenedl yn addas ar gyfer y dyfodol.
Daw’r ymweliad yn ystod y flwyddyn y mae disgwyl i Lywodraeth y Deyrnas Unedig ddileu’r tollau i ddefnyddio Pontydd Hafren.
Bydd y garreg filltir nodedig hon yn nodi cyflawni ymrwymiad Strategaeth Ddiwydiannol Llywodraeth y Deyrnas Unedig i ddatblygu coridorau twf cryfach ar draws y ffin rhwng Cymru a Lloegr, lledaenu ffyniant, a galluogi Cymru i gyflawni ei botensial ar y llwyfan byd-eang.
Dywedodd Chris Grayling, yr Ysgrifennydd Trafnidiaeth:
Mae Pont Tywysog Cymru yn borth gwych i dde Cymru, ac mae’r tollau is yn barod wedi arwain at fwy na £5 miliwn o arbediad i yrwyr.
Bydd Cymru a de orllewin Cymru yn cael hwb economaidd arall pan ddiddymir y tollau erbyn diwedd y flwyddyn, a bydd teuluoedd sy’n gweithio’n galed yn arbed dros fil o bunnoedd y flwyddyn.