Gwarant Swyddi Llywodraeth y DU yn gwireddu’r addewid o gyflogaeth i bobl ifanc yng Nghymru
Mae’r bobl ifanc gyntaf yng Nghymru i gael eu cefnogi gan raglen newydd gan Lywodraeth y DU ar gyfer pobl ifanc sy’n ddi-waith yn hirdymor wedi dechrau ar eu swyddi.
Jobs Guarantee Scheme. 3,500 young people in Wales will be helped into work.
- Mae’r garfan gyntaf o bobl ifanc yng Nghymru yn dechrau gweithio drwy Warant Swyddi Llywodraeth y DU, gan weithredu ar flaenoriaeth Prif Weinidog y DU i fynd i’r afael â diweithdra ymysg pobl ifanc
- Nod y cynllun yw creu cyfleoedd i’r rheini sydd bellaf oddi wrth y farchnad swyddi ac mae’n cael ei gefnogi gan fusnesau mawr yn y diwydiannau adeiladu, manwerthu a lletygarwch.
- Bydd y Warant Swyddi yn creu dros 90,000 o swyddi wedi’u hariannu’n llawn ledled y DU erbyn 2029, yn rhan allweddol o ymgyrch gwerth £2.5 biliwn Llywodraeth y DU i fynd i’r afael â diweithdra ymysg pobl ifanc
Mae’r bobl ifanc gyntaf yng Nghymru i gael eu cefnogi gan raglen newydd gan Lywodraeth y DU ar gyfer pobl ifanc sy’n ddi-waith yn hirdymor wedi dechrau ar eu swyddi.
Lansiwyd y cynllun Gwarant Swyddi yr haf yma, ac mae’n cynnig llwybr uniongyrchol i waith i bob person ifanc 18–24 oed sydd wedi bod yn hawlio Credyd Cynhwysol ac yn chwilio am waith ers 18 mis.
Mae’r swyddi sydd ar gael yn cael eu paru â sgiliau unigolion, gyda Llywodraeth y DU yn ariannu hyd at 25 awr o waith cyflogedig yn llawn am chwe mis fel bod unigolion yn dod yn rhan o’r farchnad lafur.
Bydd y cynllun yn helpu 3,500 o bobl ifanc yng Nghymru i gael gwaith yn ystod y tair blynedd nesaf, gyda’r garfan gyntaf o bobl ifanc wedi dechrau ar swyddi yng Nghaerdydd, Casnewydd, Merthyr Tudful, Pen-y-bont ar Ogwr, Abertawe, Caerffili a Rhondda Cynon Taf.
Gan gydnabod mai’r hiraf y mae pobl yn ddi-waith, yr anoddaf yw hi i ddechrau gweithio eto, mae pobl ifanc ar y cynllun yn cael cymorth pwrpasol i fynd i’r afael â rhwystrau – o feithrin hyder i hyfforddiant sgiliau yn y gwaith. Mae hyn yn golygu bod pobl ifanc yn cyrraedd eu cyflogwr newydd yn barod i weithio ac yna’n parhau i ffynnu.
Y Warant Swyddi yw’r ymyriad diweddaraf yng nghymorth cyflogaeth helaeth a pharhaus Llywodraeth y DU i bobl ifanc, ac mae’n cael ei gefnogi gan fuddsoddiad o £2.5 biliwn. Mae’n gam mawr yn ymgyrch y Prif Weinidog i gael mwy o bobl ifanc i mewn i waith ac i ddod â gobaith i’r 56,000 a mwy o bobl ifanc yng Nghymru nad ydynt yn ennill cyflog nac yn dysgu.
Dywedodd yr Ysgrifennydd Gwaith a Phensiynau, Pat McFadden:
Mae pobl ifanc eisiau symud ymlaen mewn bywyd ond mae gormod ohonynt wedi cael eu hamddifadu o’r cyfle hwnnw ers amser rhy hir. Mae’r Warant Swyddi yn helpu i newid hynny.
Mae gweld y bobl ifanc gyntaf yng Nghymru yn dechrau ar eu swyddi yn dod â hanfod y cynllun hwn yn fyw: swyddi go iawn, cyflogau go iawn, a llwybr go iawn at yrfa.
Wrth i ni gyflwyno hyn i ddegau o filoedd yn fwy o bobl ifanc yng Nghymru a ledled y wlad, rydyn ni’n cefnogi’r genhedlaeth nesaf i lwyddo ac yn cefnogi busnesau Prydain i dyfu gyda’r doniau sydd eu hangen arnyn nhw.”
Dywedodd Ysgrifennydd Gwladol Cymru, Stephen Kinnock:
Mae’r cyhoeddiad heddiw yn dangos ein hymddiriedaeth mewn pobl ifanc yng Nghymru.
Bydd y Warant Swyddi yn helpu pobl ifanc yng Nghymru i gyflawni’r cam cyntaf hollbwysig hwnnw ar yr ysgol yrfa, gan eu helpu i feithrin hyder a sgiliau gyda llwybr uniongyrchol i fyd gwaith.
Mae’r cynllun yn un o blith nifer o fesurau y mae Llywodraeth y DU yn eu cymryd i roi hwb i gyflogaeth ymysg pobl ifanc yng Nghymru. Mae 20 o Ganolfannau Ieuenctid yn cael eu cyflwyno ledled y wlad i gefnogi pobl i gael gwaith, gyda’r Grant Swyddi i Bobl Ifanc yn cynnig cymorth i helpu busnesau i gyflogi pobl ifanc.”
Cyflwynwyd un o’r cynlluniau peilot Gwarant Swyddi cyntaf yn Ne Ddwyrain a De Orllewin Cymru.
Yn ddiweddarach eleni, bydd y cynllun yn cael ei ehangu i gynnwys pob person ifanc 18–24 oed cymwys sydd ar Gredyd Cynhwysol ac sydd wedi bod yn chwilio am waith ers 18 mis.
Bydd partneriaid cyflenwi lleol yn gweithio gyda chyflogwyr i baru pobl ifanc â swyddi a darparu cefnogaeth barhaus i helpu’r lleoliadau gwaith i lwyddo.
Mae’r Warant Swyddi yn rhan o fuddsoddiad ehangach Llywodraeth y DU o £2.5 biliwn mewn cyflogaeth ieuenctid a fydd yn cefnogi bron i filiwn o bobl ifanc ac yn creu 500,000 o gyfleoedd i ennill neu ddysgu dros dair blynedd, gan ledaenu’r cyfle i bob cod post.