Cyflwyno Bil Cymru Drafft i’r Senedd
Mae Ysgrifennydd Gwladol Cymru, David Jones wedi cyhoeddi Bil Cymru drafft heddiw
Draft Wales Bill
Heddiw (18 Rhagfyr), cyhoeddodd Ysgrifennydd Gwladol Cymru, David Jones, Fil Cymru drafft a fydd yn galluogi llywodraethu datganoledig yng Nghymru i ddod yn fwy atebol.
Mae’r Bil drafft yn dilyn cyhoeddi ymateb Llywodraeth y DU i adroddiad cyntaf Comisiwn Silk ynglŷn â datganoli pwerau trethu a benthyca i Gynulliad Cenedlaethol Cymru a Llywodraeth Cymru. Yn ei hymateb, cytunodd Llywodraeth y DU, yn gyfan gwbl neu yn rhannol, i bron pob un o’r argymhellion.
O ganlyniad, bydd y Bil drafft yn:
- galluogi i’r Cynulliad ddeddfu ynglŷn â threthiant datganoledig, yn benodol treth dir y dreth stamp a threth tirlenwi
- darparu ar gyfer refferendwm yng Nghymru i holi a ddylai elfen o’r dreth incwm gael ei datganoli
- caniatau i’r Cynulliad, yn amodol ar bleidlais o blaid mewn refferendwm, sefydlu cyfradd Gymreig at ddibenion cyfrifo cyfraddau treth incwm i’w talu gan drethdalwyr Cymru
- ehangu’r amgylchiadau lle gall Gweinidogion Cymru fenthyca yn y tymor byr i reoli cyllideb Llywodraeth Cymru, a dyfarnu pwerau newydd i Weinidogion Cymru i fenthyca ar gyfer gwariant cyfalaf
Bydd y newidiadau hyn yn peri i’r Cynulliad a Llywodraeth Cymru fod yn fwy atebol i bobl Cymru am yr arian a wariant.
Bydd y Bil drafft hefyd yn:
- ehangu tymor y Cynulliad yn barhaol o bedair blynedd i bump, gan ei gwneud hi’n llai tebygol y bydd etholiadau’r Cynulliad yn cyd-daro ag etholiadau seneddol San Steffan i’r dyfodol
- dileu’r gwaharddiad ar ymgeiswyr yn etholiadau’r Cynulliad i sefyll mewn etholaeth ac ar restr ranbarthol
- gwahardd “swyddi deuol”, drwy atal Aelodau Cynulliad rhag bod yn ASau hefyd
Mae cyhoeddi’r Bil Cymru drafft heddiw yn dilyn manylion pecyn pwerau ariannol y Llywodraeth ar gyfer Cymru a gyhoeddwyd y mis diwethaf.
Gan siarad wedi’r cyhoeddiad, dywedodd Ysgrifennydd Cymru David Jones:
Bydd y ddeddfwriaeth ddrafft hon a gyhoeddwyd gennym heddiw’n caniatau i lywodraethu datganoledig yng Nghymru ddod yn fwy atebol ac yn fwy abl i gefnogi twf economaidd yng Nghymru.
Rwy’n awyddus iawn i yrru’r diwygiadau hyn yn eu blaen, a dyna pam yr wyf wedi cyhoeddi’r bil yma mor gyflym. Bydd hyn yn galluogi i’r craffu cyn-deddfu ddigwydd yn y Flwyddyn Newydd.
Drwy gyfrwng y Bil hwn, bydd y Llywodraeth yn cyflenwi pecyn uchelgeisiol ar ran Cymru. Fodd bynnag, cyfrifoldeb Llywodraeth Cymru yw manteisio ar y cyfle i yrru twf economaidd Cymru yn ei flaen gyda’r pwerau a gynigir iddi heddiw.
Nodyn i Olygyddion:
Mae copi o’r Bil Cymru drafft i’w weld yma
Mae Datganiad Ysgrifenedig y Gweinidog i’w weld yma