Gwirio a yw e-bost rydych wedi’i gael gan CThEF yn ddilys
Gwiriwch restr o negeseuon e-bost diweddar gan CThEF i’ch helpu i benderfynu a yw’r e-bost a gawsoch yn sgam.
Os nad yw’ch e-bost wedi’i restru yma, gwiriwch yr ohebiaeth gan CThEF sy’n defnyddio mwy nag un dull o gyfathrebu.
Crynodeb Treth Blynyddol
Mae tîm Hunanasesiad CThEF yn anfon e-byst hysbysu at rai cwsmeriaid i roi gwybod iddynt fod eu Crynodeb Treth Blynyddol ar gael i fwrw golwg drosto. Teitl yr e-byst yw ‘Mae’ch Crynodeb Treth Blynyddol yn barod’ neu ‘Your Annual Tax Summary is ready’.
Mae’r e-byst hefyd yn esbonio’r hyn sydd yn y crynodeb blynyddol ac ni fyddant byth yn gofyn i chi am wybodaeth bersonol nac ariannol.
Goruchwyliaeth gwrth-wyngalchu arian — gwasanaethau asiant treth
Gall CThEF anfon e-bost atoch os ydych yn defnyddio ein gwasanaethau asiant treth ac nad ydych bellach yn cael eich goruchwylio gan CThEF ar gyfer gwrth-wyngalchu arian.
Bydd yr e-bost yn egluro beth sydd angen i chi ei wneud ac yn rhoi’r canlynol i chi:
- cysylltiadau i arweiniad i wirio sut i adnewyddu’ch goruchwyliaeth gwyngalchu arian gyda CThEF
- cyfeiriad e-bost i gysylltu â CThEF os ydych chi gyda chorff goruchwylio arall
- cyfeiriad e-bost i hysbysu CThEF os nad ydych bellach yn gweithredu fel asiant treth
- cysylltiadau i’r arweiniad ar GOV.UK
Busnesau sy’n gwerthu nwyddau drwy farchnadoedd ar-lein yn y DU
Mae CThEF yn cysylltu â busnesau sy’n gwerthu nwyddau i gwsmeriaid yn y DU drwy farchnadoedd ar-lein. Mae’r e-byst yn cyfeirio at ymrwymiadau o ran TAW yn y DU. Bydd yr e-bost cyntaf yn egluro pam y mae CThEF yn cysylltu â chi ac yn gofyn i chi gysylltu â CThEF.
Y diweddaraf ynghylch hawlio Budd-dal Plant
Mae’n bosibl y bydd CThEF yn cysylltu â chi os ydych wedi gwneud hawliad am Fudd-dal Plant i gadarnhau bod eich hawliad wedi dod i law a’i fod yn symud yn ei flaen. Bydd CThEF yn defnyddio’r cyfeiriad e-bost yr ydych wedi’i ddarparu. Teitl yr e-byst yw ‘Diolch — rydym wedi cael eich hawliad am Fudd-dal Plant’.
Ni fydd yr e-byst hyn byth yn gofyn i chi am wybodaeth bersonol nac ariannol o unrhyw fath.
Os ydych eisoes wedi cysylltu â CThEF ynghylch Budd-dal Plant, gallwch wirio statws eich hawliad.
Treth Gorfforaeth — mandadu cofrestru ymgynghorwyr treth (MMTAR)
O 5 Awst 2026 hyd at a chan gynnwys 17 Tachwedd 2026, mae’n bosibl y bydd CThEF yn cysylltu â chi drwy e-bost.
Efallai y byddwch chi’n cael e-bost os ydych yn ymgynghorydd treth. Bydd yr e-bost yn cadarnhau bod y cyfnod cofrestru gorfodol i wneud cais am gyfrifon gwasanaethau asiant ar agor o 18 Awst 2026 hyd at 18 Tachwedd 2026. Bydd yr e-bost yn gwneud y canlynol hefyd:
- gofyn i chi wirio a ydych eisoes wedi’ch cofrestru ar gyfer cyfrif gwasanaethau asiant
- eich darparu â chyfarwyddiadau os oes angen i chi gofrestru ar gyfer cyfrif gwasanaethau asiant
- rhoi gwybod i chi’r hyn fydd yn digwydd os nad gennych gyfrif gwasanaethau asiant cyn 18 Tachwedd 2026
Cylchlythyr ar gyfer cyfryngwyr tollau
Bydd CThEF yn anfon cylchlythyr bob chwe wythnos drwy e-bost at y sector cyfryngwyr tollau — er enghraifft, trefnwyr anfon nwyddau, broceriaid tollau, a weithredwyr cyflym.
Bydd yr e-byst yn rhoi’r newyddion diweddaraf sy’n effeithio ar y sector cyfryngwyr tollau.
Ni fydd yr e-byst hyn byth yn gofyn i chi am wybodaeth bersonol nac ariannol o unrhyw fath.
Bwletinau’r Cyflogwr
Mae CThEF yn anfon bwletin gwybodaeth sawl gwaith y flwyddyn at gyflogwyr sydd wedi’u cofrestru i’w gael. Ni fydd yr e-byst hyn byth yn gofyn i chi am wybodaeth bersonol nac ariannol.
Bydd e-byst a anfonir gan CThEF:
-
efallai’n cynnwys y teitl ‘Gwybodaeth bwysig i gyflogwyr’ neu ‘Important information for employers’
-
yn cynnwys cysylltiadau i dudalennau CThEF ar wefan GOV.UK, gan gynnwys cyngor ar ddiogelwch ar-lein
Help a chymorth
Mae CThEF yn anfon negeseuon e-bost at gwsmeriaid i gynnig help a chymorth. Bydd yr e-byst weithiau’n cynnwys cysylltiadau i gynhyrchion digidol ar-lein, fel gweminarau, fideos YouTube neu ganllawiau ar-lein CThEF.
Ni fydd yr e-byst hyn byth yn gofyn i chi am wybodaeth bersonol nac ariannol.
Cymorth i Gynilo — talu i mewn i’ch cyfrif
Mae’n bosibl y bydd CThEF yn e-bostio rhai cwsmeriaid sydd wedi agor cyfrifon Cymorth i Gynilo. Bydd yr e-byst yn atgoffa cwsmeriaid sydd heb dalu unrhyw arian i’w cyfrif o fanteision defnyddio’r gwasanaeth hwn.
Ni fydd yr e-byst hyn yn gofyn am unrhyw wybodaeth bersonol nac ariannol.
Cymorth i Gynilo — efallai eich bod yn gymwys
O 1 Ionawr 2025 hyd at a chan gynnwys 31 Mawrth 2027, efallai y bydd CThEF yn cysylltu â chi drwy e-bost.
Mae CThEF yn anfon e-byst at gwsmeriaid Credyd Cynhwysol, a allai fod yn gymwys, i roi gwybod iddynt y gallant agor cyfrif Cymorth i Gynilo a chael hyd at £1200 o fonws di-dreth.
Bydd yr e-bost yn:
- peidio â gofyn am wybodaeth bersonol nac ariannol o unrhyw fath
- eich arwain i chwilio am ‘Help to Save’ ar GOV.UK
Helpu i wella gwefan GOV.UK
Bydd CThEF yn e-bostio cwsmeriaid sy’n cofrestru i helpu i wella GOV.UK er mwyn gwella gwasanaethau’r llywodraeth.
Yn yr e-bost cyntaf, bydd cysylltiad y dylech ei ddilyn er mwyn cwblhau’r broses gofrestru.
Ar ôl i chi gofrestru, caiff ail e-bost ei anfon a fydd yn cynnwys cysylltiad i flog ymchwil. Efallai y byddwch wedyn yn cael e-byst eraill sy’n cynnwys cysylltiadau i arolygon byr ynghylch gwaith ymchwil.
Ni fydd yr e-byst hyn byth yn gofyn i chi am wybodaeth bersonol nac ariannol. Byddant hefyd yn cynnwys cysylltiad ar gyfer dad-danysgrifio rhag cael e-byst yn y dyfodol.
Ymchwil adolygiadau diduedd
O 08 Mehefin 2026 hyd at a chan gynnwys 31 Awst 2026, mae’n bosibl y bydd CThEF yn cysylltu â chi drwy e-bost.
Mae labordy cwsmeriaid CThEF yn gwahodd pobl sydd wedi derbyn canlyniad adolygiad diduedd i gymryd rhan mewn ymchwil am y broses hon.
Mae’n bosibl y byddwn yn eich gwahodd i ymuno â sesiwn ymchwil, naill ai wyneb yn wyneb neu ar-lein gan ddefnyddio Microsoft Teams.
Mae cymryd rhan yn wirfoddol ac os gwnewch hynny, byddwn yn gwneud y canlynol:
- cadw’ch ymatebion a’ch manylion personol yn gyfrinachol
- storio’ch gwybodaeth yn ddiogel yn unol â rheoliadau diogelu data
Ni fydd yr e-byst hyn yn gofyn am wybodaeth bersonol nac ariannol o unrhyw fath.
Ystadegau masnach data mewnforio ac allforio
Mae Uned Ystadegau Masnach CThEF yn anfon e-byst at gwsmeriaid busnes yn rheolaidd, ynghylch data ystadegol o ran mewnforio ac allforio, yn ogystal â gwybodaeth am y gwasanaethau cysylltiedig sydd ar gael ar wefan ystadegau masnach CThEF (yn agor tudalen Saesneg).
Mae’r rhain yn cynnwys:
- hysbysiadau i fusnesau
- diweddariadau i wasanaethau
- nodynnau i’ch atgoffa am ddyddiadau cau
- adolygiadau o ansawdd data
- ceisiadau i gymryd rhan mewn arolygon
Mae’n bosibl y bydd gan yr e-byst hyn gysylltiadau i ragor o wybodaeth, cynnwys addysgol neu arolwg.
Ni fyddant yn gofyn am wybodaeth bersonol, na gwybodaeth sy’n ymwneud â thaliadau neu drethi.
Rhestr o asiantau tollau a weithredwyr cyflym ar GOV.UK
Bydd CThEF yn anfon e-bost misol ynghylch cofrestr o asiantau tollau a weithredwyr cyflym ar GOV.UK.
Mae’r gofrestr yn offeryn defnyddiol sy’n helpu i baru cyfryngwyr tollau â masnachwyr sy’n chwilio am gymorth gyda’u trefniadau mewnforio ac allforio. Mae’n ffordd o ddangos y gwasanaethau y mae’ch busnes yn eu cynnig.
Bydd yr e-bost yn gofyn i chi wneud un o’r canlynol:
-
diweddaru’ch manylion
-
rhoi’ch manylion i’w cynnwys yn y gofrestr
Bydd yr e-bost yn cynnwys cysylltiad at y gofrestr o gyfryngwyr tollau a weithredwyr cyflym ar GOV.UK. Ni fydd yr e-byst hyn byth yn gofyn i chi am wybodaeth bersonol nac ariannol.
Troi Treth yn Ddigidol ar gyfer Treth Incwm — Asiantau
Bydd tîm ymgysylltu Troi Treth yn Ddigidol ar gyfer Treth Incwm CThEF yn anfon ffurflen ar-lein at asiantau treth drwy e-bost i gynnig cymorth i baratoi ar gyfer Troi Treth yn Ddigidol.
Ar ôl i chi lenwi’r ffurflen, bydd y tîm ymgysylltu Troi Treth yn Ddigidol ar gyfer Treth Incwm yn cysylltu â chi am y canlynol:
-
i hyrwyddo ymwybyddiaeth o’r cynhyrchion Troi Treth yn Ddigidol ar gyfer Treth Incwm i chi
-
i gynnig addysg ar y cynllun Troi Treth yn Ddigidol
-
i’ch arwain drwy’r camau i gofrestru â’r cynllun Troi Treth yn Ddigidol ar gyfer Treth Incwm
-
i’ch helpu i ddeall yn ôl gofynion y gyfraith
Mae cymryd rhan yn wirfoddol ac os gwnewch hynny, bydd unrhyw wybodaeth a roddwch yn cael ei thrin yn gyfrinachol.
Troi Treth yn Ddigidol ar gyfer TAW
Bydd CThEF yn anfon e-bost at gwsmeriaid sydd wedi cofrestru ar gyfer Troi Treth yn Ddigidol.
Bydd CThEF yn cadarnhau eich bod yn gallu cyflwyno Ffurflenni TAW cyn pen 72 awr gan ddefnyddio’r cyfeiriad e-bost a roddwyd gennych. Ni fydd yr e-bost yn gofyn i chi am unrhyw wybodaeth ariannol.
Isafswm Cyflog Cenedlaethol
Bydd CThEF yn anfon e-byst i gynnig help a chymorth gyda’r Isafswm Cyflog Cenedlaethol.
Gall yr e-bost gynnwys cysylltiadau i’r canlynol:
- arweiniad ar-lein
- ffurflenni digidol
- gweminarau
Gall yr e-bost hefyd ofyn am eich barn ar yr Isafswm Cyflog Cenedlaethol. Os bydd yn gwneud hynny, bydd yn cynnwys y canlynol:
- cysylltiad i gymryd rhan mewn arolwg ar-lein
- cyfeiriad at yr arweiniad hwn fel y gallwch wirio bod yr e-bost yn ddilys
Ni fydd yr e-byst hyn byth yn gofyn am unrhyw wybodaeth bersonol nac ariannol heb fod CThEF yn ysgrifennu atoch yn gyntaf.
Hyrwyddo Cyfrif Treth Personol
Gofynnir i gwsmeriaid sy’n cysylltu â llinellau cymorth CThEF a ydynt yn dymuno cofrestru ar gyfer cyfrif treth personol. Cynigir rhagor o wybodaeth drwy e-bost i gwsmeriaid nad ydynt yn dymuno cofrestru dros y ffôn.
Os byddwch yn cytuno i roi cyfeiriad e-bost, bydd rhywfaint o wybodaeth yn cael ei hanfon atoch drwy e-bost tra ydych ar y ffôn. Bydd yr e-bost yn rhoi gwybodaeth gefndirol ynghylch buddion cofrestru ar gyfer cyfrif treth personol, a sut i wneud hynny.
Ni fydd yr e-bost yn gofyn am wybodaeth bersonol nac ariannol o unrhyw fath.
Cymorth rhyddhad treth Ymchwil a Datblygu (R&D)
Bydd CThEF yn anfon e-byst at gwsmeriaid i roi cymorth iddynt wrth wneud hawliadau Ymchwil a Datblygu (R&D).
Bydd yr e-byst yn cael eu hanfon ar ôl cyflwyno’r canlynol:
- hysbysiad hawlio Ymchwil a Datblygu
- ffurflenni gwybodaeth ychwanegol
Bydd yr e-byst yn amrywio yn dibynnu ar ba ffurflen sy’n cael ei chyflwyno, ond byddant yn cynnwys:
- cysylltiadau i arweiniad neu fanylion ar-lein newydd a phresennol i’w chwilio ar wefan GOV.UK
- cysylltiadau i fideos YouTube CThEF a’r Cyfleuster Datgelu Ymchwil a Datblygu newydd
- y cyfeiriad e-bost i gysylltu os nad oeddech yn ymwybodol bod y ffurflenni’n cael eu cyflwyno ar ran y cwmni
Nid oes gofyniad i ymateb i’r e-byst hyn ac ni fyddant byth yn gofyn am unrhyw wybodaeth bersonol nac ariannol.
Gweithgarwch amheus mewn cyfrifon ar-lein CThEF
O 1 Medi 2026 ymlaen, mae’n bosibl y bydd CThEF yn cysylltu â chi drwy e-bost.
Gall Canolfan Atal Twyll CThEF anfon e-bost atoch os ydych wedi rhoi gwybod am unrhyw weithgarwch amheus yn eich cyfrif ar-lein CThEF, neu os ydym wedi sylwi ar unrhyw weithgarwch a allai fod yn amheus.
Byddwn yn egluro beth rydym wedi’i wneud i ddiogelu’ch cyfrif ac yn rhoi gwybod i chi a oes unrhyw beth sydd angen i chi ei wneud.
Ni fyddwn byth yn gofyn i chi am wybodaeth bersonol, gwybodaeth am y busnes na gwybodaeth ariannol.
Gweithredu Polisi Tariff a Chwota
Mae’n bosibl y bydd CThEF yn cysylltu â chi fel rhan o broses archwilio barhaus. Mae’n bosibl y bydd rhywun yn cysylltu â chi os ydym wedi nodi camgymhariad â’ch gwybodaeth i wneud yn siŵr bod ein cofnodion yn gywir ac yn gyfredol.
Mae’n bosibl y byddwn yn gofyn i chi anfon gwybodaeth i tariffmanagement@hmrc.gov.uk i wneud y naill neu’r llall o’r canlynol:
- cadarnhau bod y manylion sydd gennym ar eich cyfer yn gywir
- darparu manylion diwygiedig
Bydd unrhyw wybodaeth rydych yn ei darparu:
- yn cael ei thrin yn gyfrinachol
- yn cael ei chadw’n ddiogel
Gwasanaeth Gofal Plant sy’n Rhydd o Dreth
Mae gwasanaeth Gofal Plant sy’n Rhydd o Dreth CThEF yn anfon e-byst yn rheolaidd i roi gwybod i rieni y gallent fod yn colli allan ar gyfraniadau gan Lywodraeth y DU tuag at gostau gofal plant.
Ad-daliad treth — P800
Mae’n bosibl y bydd CThEF yn anfon llythyr atoch yn rhoi gwybod bod ad-daliad treth yn ddyledus i chi (a elwir hefyd yn ‘ad-daliad P800’). Os na fydd ymateb i’r llythyr, efallai y bydd CThEF yn anfon e-bost dilynol atoch.
Ni fydd yn:
- gofyn i chi am wybodaeth bersonol nac ariannol
- cynnwys unrhyw gysylltiadau i wefannau
Dysgwch sut i hawlio’ch ad-daliad.
Nodynnau atgoffa ar gyfer dyledion TAW
Mae’n bosibl y bydd CThEF yn anfon e-bost at gwsmeriaid pan fydd eu taliadau TAW yn hwyr. Bydd CThEF yn defnyddio’r cyfeiriadau e-bost a roddwyd gan gwsmeriaid eisoes, ac yn argymell bod cwsmeriaid yn talu ar-lein i osgoi camau pellach yn eu herbyn. Ni fydd yr e-byst hyn byth yn gofyn i chi am wybodaeth bersonol nac ariannol.
Methu’r gwiriad dilysu ar gyfer gwasanaeth ad-daliadau TAW yr UE
Efallai y bydd cwsmeriaid sy’n defnyddio gwasanaeth ad-daliadau TAW yr UE yn cael e-bost os yw eu hawliad wedi methu’r gwiriad dilysu. Bydd yr e-bost yn egluro pam y mae’r hawliad wedi methu.
Ni fydd yr e-byst hyn yn gofyn am wybodaeth bersonol nac ariannol o unrhyw fath.
Cofrestru ar gyfer TAW
Pan fyddwch yn cofrestru ar gyfer TAW, mae’n bosibl y bydd CThEF yn anfon e-bost atoch os oes angen gwybodaeth ychwanegol er mwyn dilysu pwy ydych neu i ddilysu’ch busnes.
Gall hyn gynnwys ceisiadau am wybodaeth personol neu ariannol. Byddwn yn defnyddio’r cyfeiriad e-bost a nodwyd ar eich cais i gofrestru ar gyfer TAW er mwyn cysylltu â chi.
Bydd CThEF yn anfon e-bost atoch pan fydd eich cais i gofrestru am TAW wedi cael ei brosesu er mwyn rhoi gwybod i chi’r hyn i’w wneud nesaf.
Ceisiadau am gofrestriad TAW a gyflwynwyd gan asiantau
Bydd CThEF yn cysylltu â chi drwy e-bost pan fyddwch yn cyflwyno cais am gofrestriad TAW sy’n dangos eich bod yn asiant. Byddwn yn gwneud hyn gan fod angen i ni ddilysu’ch manylion.
Byddwn yn gofyn i chi gadarnhau sut yr ydych yn gweithredu, yn ogystal â gofyn am fanylion ynghylch eich busnes, gan gynnwys:
- yn ym mha rôl yr ydych yn cyflwyno ceisiadau TAW
- manylion eich busnes, gan gynnwys enw, cyfeiriad a manylion cyswllt eich busnes
- eich cyfeirnodau a rhifau cofrestru CThEF
- eich cyfeirnod asiant
- manylion cofrestru ar gyfer Goruchwyliaeth Gwrth-wyngalchu Arian (AMLS), os yw’n berthnasol
Ni fydd eich ceisiadau yn cael eu hoedi os byddwch yn rhoi’r wybodaeth a gofynnir amdani erbyn y dyddiad cau.
Nodynnau atgoffa ar gyfer Ffurflenni TAW
Bydd CThEF yn anfon e-bost at gwsmeriaid i’w hatgoffa o’r dyddiad cau ar gyfer cyflwyno’u Ffurflenni TAW os ydynt wedi’u cofrestru i gael e-byst atgoffa. Mae’r e-byst yn dwyn y teitl ‘Nodyn i’ch atgoffa i gyflwyno’ch Ffurflen TAW’ neu ‘Reminder to file your VAT return’, ac yn cynnwys cysylltiadau i dudalen sy’n rhoi rhagor o wybodaeth, yn ogystal â chysylltiad i’r dudalen fewngofnodi ar wefan GOV.UK.
Ni fydd yr e-byst hyn byth yn gofyn i chi am wybodaeth bersonol nac ariannol.
TAW — newid eich manylion
Bydd CThEF yn anfon e-bost at gwsmeriaid os ydynt:
- wedi cofrestru ar gyfer TAW gan ddefnyddio gwasanaethau ar-lein CThEF
- wedi gwneud newidiadau i fanylion drwy’r Cyfrif Treth Busnes (BTA)
Byddwn yn defnyddio’r cyfeiriad e-bost a nodwyd pan wnaethoch gofrestru ar gyfer TAW i ofyn i chi fewngofnodi i’ch cyfrif treth ar-lein a bwrw golwg dros neges yn y man ar gyfer negeseuon diogel.
Ni fydd yr e-byst hyn byth yn gofyn am wybodaeth bersonol nac ariannol.
TAW — rhywun yn actifadu’ch cyfrif heb eich caniatâd
Mae’n bosibl y byddwch yn cael e-bost gan CThEF os yw’ch cyfrif TAW yn cael ei actifadu gan rywun heb eich caniatâd.
Bydd yr e-bost yn rhoi gwybod i chi am y camau yr ydym wedi’u cymryd i ddiogelu eich cyfrif, a’r camau y bydd angen i chi eu cymryd nesaf.
Ni fydd yr e-bost hwn yn gofyn am unrhyw wybodaeth amdanoch chi, am y cwmni, na chwaith am unrhyw wybodaeth ariannol.
E-byst eraill y dylech eu gwirio
Gallwch hefyd wirio’r e-byst a restrir ar y dudalen gohebiaeth CThEF sy’n defnyddio mwy nag un dull cyfathrebu.