Guidance

Civil penalty accreditation scheme (Albanian)

Updated 1 January 2026

1. Hyrje

Skema e Akreditimit të Sanksioneve Civile për Hyrësit Klandestinë njeh ata transportues që marrin masa për të pasur në funksionim një sistem të fortë për sigurimin e automjeteve të mallrave dhe për parandalimin e transportit të hyrësve klandestinë. Ajo gjithashtu njeh ato kompani të autobusëve që kanë në funksion një sistem të fortë për të parandaluar transportin e hyrësve klandestinë.

Sistemi është i hapur për të gjitha transportuesit dhe kompanitë e autobusëve që udhëtojnë në Mbretërinë e Bashkuar. Përfshirja në skemë është pa pagesë.

Nga data 1 Janar 2026, çdo drejtues mjeti që është i punësuar nga një kompani e akredituar në kohën e një incidenti mund të përfitojë gjithashtu nga skema.

2. Përfitimet

• Sanksionet civile mund të lëshohen si për drejtuesit e mjeteve ashtu edhe për transportuesit për shkeljet e dështimit për të siguruar një automjet mallrash dhe për transportin e hyrësve klandestinë. Anëtarët e Skemës së Akreditimit të Zyrës së Brendshme mund të përfitojnë nga një ulje e shumës së sanksionit që mund të merret për këto shkelje.

Ulja që mund të aplikohet për anëtarët e Skemës është 50% nga pikënisja maksimale e sanksionit për çdo shkelje. (Kodi i praktikës për nivelin e sanksionit).

• Në kohën e incidentit, nëse drejtuesi i mjetit është i punësuar nga kompania e akredituar, ata mund të përfitojnë gjithashtu nga ulja e shumës së sanksionit.

• Ata që kanë në funksionim një sistem të fortë sigurie kanë më pak gjasa të hasin incidente që përfshijnë hyrës klandestinë. Incidentet me hyrës klandestinë shpesh mund të çojnë në dëmtimin e mallrave dhe vonesave në Kufi.

• Emrat e kompanive të Akredituara vendosen në faqen e Internetit të Gov.

3. Çfarë është një ‘sistem i fuqishëm?’

Ne vlerësojmë efektivitetin e sistemit që funksionon në një kompani në 5 fusha të veçanta. Në mënyrë që një sistem të konsiderohet i fuqishëm dhe mjaftueshëm efektiv, kompania përgjegjëse duhet të plotësojë kërkesat e mëposhtme në këto fusha. Ato janë:-

3.1 Pajisjen dhe mirëmbajtjen e sigurisë së automjeteve

• Pajisjen e secilit drejtues të mjetit me drynë të mjaftueshëm ose vula me numër unik për të siguruar që automjeti të qëndrojë i sigurt gjatë gjithë udhëtimit.

• Pajisjen e secilit drejtues të një automjeti me anë të butë [mushama] një kabllo TIR ose rrip që është në gjendje të mirë pune.

3.2 Pajisjen me një dokument për regjistrimin e kontrolleve

Zyra e Brendshme ofron një listë kontrolli për kompanitë që t’ua japin drejtuesve të mjeteve të tyre e cila mbulon të gjitha kërkesat e Rregulloreve të Përgjegjësisë të Transportuesve 2023 (e Ndryshuar). (Siguria e automjeteve lista e kontrollit: kompanitë e transportit rrugor dhe drejtuesit e mjeteve - GOV.UK (www.gov.uk)). Ne ju rekomandojmë që t’u jepni drejtuesve të mjeteve këtë listë kontrolli.

• Pajiseni secilin drejtues të mjetit me një numër të mjaftueshëm listash kontrolli për të regjistruar kontrollet standarde të kërkuara për çdo udhëtim.

• Mbani një regjistër të numrit të listave të kontrollit që keni dhënë dhe të datës kur ato i janë lëshuar secilit drejtues mjeti.

• Mbani kopjet e listave të plotësuara të kontrollit për një periudhë prej 6 muajsh.

• Sigurohuni që lista e kontrollit të mundësojë kryerjen e të gjitha kontrolleve të kërkuara në bazë të Rregullores së Përgjegjësisë së Transportuesve (e Ndryshuar) 2023.

• Listat elektronike të kontrollit pranohen, ato duhet të përfshijnë të njëjtat kontrolle si kopja e letrës

3.3 Instruksionet për drejtuesin e mjetit

• Pajisni çdo drejtues mjeti (përfshirë drejtuesit e përkohshëm të mjeteve) me një sërë instruksionesh në gjuhën e tyre të preferuar duke detajuar në mënyrë specifike:

  • si të sigurojnë automjetin

  • si të regjistrojnë dhe kryejnë kontrollet e automjetit

  • si të plotësojnë dhe të mbajnë listën e kontrollit

  • çfarë duhet të bëjnë në rast se drejtuesi i mjetit dyshon se në automjet janë të pranishëm hyrës klandestinë.

• Këto instruksione duhet të jenë lehtësisht të arritshme për drejtuesit e mjeteve gjatë udhëtimit të tyre dhe mund të jenë ose në letër ose në format dixhital.

3.4 Trajnimi i drejtuesit të mjetit

Trajnimi duhet të jetë një ngjarje specifike që u mundëson drejtuesve të mjeteve të ndërveprojnë me një trajnues dhe ofron mundësinë për të bërë pyetje. Vetëm pajisja me një kopje të instruksioneve të mësipërme për drejtuesin e mjetit është një metodë trajnimi joadekuate.

• Jepini çdo drejtues mjeti (përfshirë drejtuesit e përkohshëm të mjeteve) trajnimin fillestar se si të sigurojë një automjet mallrash dhe si të parandalojë hyrësit klandestinë në përputhje me Rregulloret e Përgjegjësisë të Transportuesve (e Ndryshuar) 2023.

• Përfshini një kontroll të njohurive për të siguruar se drejtuesi i mjetit e ka kuptuar trajnimin.

• Mbani regjistrime për seancën e trajnimit të cilat japin detaje për emrat e pjesëmarrësve, kur ata janë trajnuar, vendndodhjen, detajet e mbuluara, rezultatet e kontrollit të njohurive.

• Kryeni trajnime rifreskues çdo vit. Kjo mund të jetë një seancë më e shkurtër se trajnimi origjinal që i është dhënë dhe të përqendrohet rreth kujtimit të drejtuesve të mjeteve në lidhje me përgjegjësitë e tyre.

3.5 Vlerësimi i performancës së drejtuesit të mjetit

• Mblidhni listat e plotësuara të kontrollit nga çdo drejtues mjeti.

• Shqyrtoni këto lista kontrolli brenda 30 ditëve nga koha e kthimit prej udhëtimit për të identifikuar dhe adresuar çdo gabim ose mosveprim.

4. Incidentet e mëparshme të hyrësve klandestinë

Pasja e incidenteve të mëparshme të hyrësve klandestinë në një automjet, nuk e pengon një kompani të aplikojë për Skemën.

Çdo sanksion i papaguar duhet të paguhet deri në datën e kërkuar para dorëzimit të një kërkese për t’u bashkuar me Skemën. Mospagimi i sanksioneve deri në datën e duhur të kërkuar mund të shkaktojë vonesa në aplikimin tuaj. Kur ka një kundërshtim ose një apel në proces, data e pagesës është në pritje dhe për këtë arsye ajo nuk përfshihet në këtë kërkesë.

Nëse jepet anëtarësimi në Skemë, çdo ulje për anëtarësimin do të zbatohet vetëm për incidentet në ose pas datës së pranimit në Skemë.

Ku ka pasur incidente:

• Çdo sanksion i vendosur në këto raste do të qëndrojë në të njëjtën shumë. Ulja nga anëtarësimi nuk do të bëhet në mënyrë retrospektive.

• Kur ende nuk është marrë një vendim për ndonjë rast, shuma e sanksionit do të pasqyrojë statusin e anëtarësimit në kohën e incidentit.

Ne do të rishikojmë detajet e rasteve brenda 5 viteve të fundit dhe provat e sistemit që është në funksion në ato raste për të ndihmuar në vendimin tonë nëse do të miratojmë një kërkesë. Nëse ka pasur përmirësime në sistemin që ka qenë në funksion që nga ato raste, kjo duhet të dokumentohet në Formularin e Aplikimit.

5. Si të aplikoni për t’iu bashkuar skemës

Ju lutemi plotësoni formularin e Aplikimit (Aplikimi për t’iu bashkuar skemës së akreditimit të sanksioneve civile) dhe paraqisni provat e kërkuara me email ose adresën postare të detajuar në atë formular. Preferohet email-i dhe ai mundëson përpunim më të shpejtë të një aplikimi, megjithatë pranohen edhe aplikimet me postë.

6. Rezultati i aplikimit

Ne do të japim konfirmim me shkrim për rezultatin e një aplikimi.

Kur miratohet një aplikim, ne do të japim një certifikatë anëtarësimi dixhitale dhe do të vendosim emrin e kompanisë në faqen e internetit të qeverisë.

Kur refuzohet një aplikim, ne do të japim arsyet pse është refuzuar aplikimi dhe fushat ku ku mund të përmirësohet sistemi i vënë në funksion. Një periudhë prej 3 muajsh duhet të kalojë para se të merret parasysh një aplikim i ri për t’u bashkuar.

Ne pranojmë aplikimet e paraqitura nga një palë e tretë në emër të kërkuesit. Megjithatë, ne kërkojmë leje nga kërkuesi që ne të kemi korrespondencë me palën e tretë. Ajo mund të jepet në këtë formular (Aplikimi për t’iu bashkuar skemës së akreditimit të sanksioneve civile).

7. Shqyrtimet e anëtarësisë, pezullimet dhe heqjet nga skema

Pasi të miratohet anëtarësimi, ai vazhdon përveç kur njoftohet ndryshe.

Ne rezervojmë të drejtën për të kryer në çdo kohë një rishikim të një anëtari të Skemës. Ngjarje specifike kur mund të kryhet një rishikim:

• Në rastet kur kompania ka pasur 3 ose më shumë raste të zbulimit të hyrësve klandestinë në automjetet e tyre brenda një periudhe 12-mujore.

• Kur ka një incident me hyrës klandestinë në një automjet të kompanisë dhe ka prova që sugjerojnë se kompania nuk po plotëson kërkesat e Skemës.

• Kur ndonjë automjet i kompanisë identifikohet si i pasigurt në 3 ose më shumë raste brenda një periudhe 12-mujore.

Nëse bëjmë një rishikim, ne do t’i shkruajmë anëtarit dhe do t’i kërkojmë që të dorëzojnë përsëri një formular aplikimi, së bashku me të dhënat e kërkuara. Nëse identifikojmë se anëtari nuk ka arritur të mbajë standardet e kërkuara, ne do t’i heqim ata nga Skema dhe do të shpjegojmë se ku duhet të përmirësohet anëtari.

Të gjithë anëtarët e Skemës duhet të paguajnë çdo sanksion që marrin deri në datën e kërkuar të pagesës.

Dështimi për ta bërë këtë do të rezultojë në një pezullim të menjëhershëm të anëtarësimit për një periudhë prej 28 ditësh. Ulja nga anëtarësimi nuk zbatohet gjatë ndonjë periudhe pezullimi.

Nëse pagesa nuk është marrë ende pas asaj periudhe 28-ditore, anëtari do të hiqet nga Skema.

Pasi një anëtar të jetë hequr nga Skema, ata nuk do të përfitojnë më nga ulja prej anëtarësimit për çdo sanksion që marrin.

Nëse një kompani hiqet nga Skema, duhet të kalojë një periudhë prej 3 muajsh para se të merret parasysh një aplikim për t’u bashkuar përsëri.

8. Më shumë mbështetje

Ne mund të ofrojmë këshilla dhe mbështetje për kompanitë në lidhje me Skemën e Akreditimit të Sanksioneve Civile për Hyrësit Klandestinë, përmes një takimi me telefon ose MS Teams. Ne nuk bëjmë takime për të diskutuar ndonjë çështje që mund të keni me vetë Skemën e Sanksioneve Civile për Hyrësit Klandestinë; ato duhet të drejtohen tek autoriteti juaj vendor, Deputeti ose tek shoqatat përkatëse të transportit.

Për të kërkuar një telefonatë përmes telefonit ose përmes MS Teams, ju lutemi dërgoni email BF.CPAS@homeoffice.gov.uk

Ju lutemi na njoftoni për çdo organizim të arsyeshëm për të cilin mund të keni nevojë.

Udhëzime të mëtejshme për sigurimin e automjeteve dhe për regjistrimin e kontrolleve mund të gjenden gjithashtu këtu. (Parandalimi i hyrësve klandestinë - GOV.UK (www.gov.uk))

Udhëzime të mëtejshme mbi kontrollet standarde dhe kërkesat e sigurisë janë të detajuara në Rregulloret e Përgjegjësisë së Transportuesve (e Ndryshuar) 2023 (legislation.gov.uk)

Njoftimi ynë për informacionin e privatësisë mund të gjendet në GOV.UK.

9. Pyetje të Bëra Shpesh

9.1 Pyetje: Kur do ta marr rezultatin? A ka ndonjë përditësim për aplikimin tim?

Përgjigje: Për sa kohë që aplikacioni është i plotë, në gjendje të mirë pune dhe përmban të gjithë informacionin e kërkuar, ne synojmë t’i përpunojmë aplikimet brenda 12 javësh. Ky afat kohor mund të zgjatet nëse duhet t’ju kontaktojmë për më shumë informacion, apo nëse ka ndonjë mospërputhje në dokumentet e dhëna.

9.2 Pyetje: A mund të kem një takim me një anëtar të ekipit?

Përgjigje: Ne mund të ofrojmë mbështetje dhe këshilla për kompanitë në lidhje me skemën e akreditimit përmes telefonit ose me MS Teams. Për të kërkuar një takim, ju lutemi dërgoni email BF.CPAS@homeoffice.gov.uk

9.3 Pyetje: Çfarë dokumentesh duhet të dorëzoj?

Përgjigje: Ju duhet të dorëzoni si më poshtë:

1. Formularin e plotësuar të aplikimit

2. Licenca Evropiane e Operatorit (EOL)

3. Prova për pajisjet e sigurisë që u jepen drejtuesve të mjeteve

4. Prova për trajnimin që iu është dhënë drejtuesve të mjeteve

5. Prova të listave të plotësuara të kontrollit që japin detaje mbi kontrollet e bëra nga drejtuesit e automjeteve.

9.4 Pyetje: Aplikimi im është refuzuar, kur mund të ri-aplikoj?

Përgjigje: Duhet të kalojë një periudhë prej 3 muajsh para se të shqyrtohet një aplikim i mëtejshëm për t’u bashkuar për tu siguruar që çdo këshillë e dhënë brenda letrës së refuzimit mund të zbatohet.

9.5 Pyetje: Si duhet ta dërgoj aplikimin tim?

Përgjigje: Ne punojmë me një sistem kryesisht dixhital; prandaj, preferohet email-i dhe mundëson një mënyrë më të shpejtë për të përpunuar një aplikim, megjithatë, aplikimet me postë pranohen. Adresa jonë e emailit është BF.CPAS@homeoffice.gov.uk, dhe adresa jonë postare është:

Clandestine Entrant Civil Penalty Team Border Force South East
Martello House, Second Floor Shearway Park, Shearway Road
Folkestone
Kent CT19 4RH
United Kingdom

9.6 Pyetje: Kam një rast në proces; a mund të aplikoj gjithsesi?

Përgjigje: Po, por çdo sanksion të papaguar mund të çojë në refuzimin e aplikimit tuaj.

9.7 Pyetje: A i pranoni si prova dokumentet video?

Përgjigje: Për arsye teknologjike, ne nuk mund të pranojmë si prova dokumentet video.

9.8 Pyetje: Pse drejtuesi i mjetit tim duhet të kontrollojë brenda automjetit në çdo ndalesë?

Përgjigje: Sipas legjislacionit, drejtuesve të mjetit u kërkohet të kryejnë ‘kontrolle standarde’ gjatë gjithë udhëtimit të tyre, të cilët përfshijnë një kontroll të brendshëm. Prandaj, duhet të jepen vula rezervë që drejtuesit e mjeteve ta bëjnë këtë kontroll aty ku kërkohet.

9.9 Pyetje: Unë nuk mund ta ndryshoj vulën në automjetin tim sepse është një vulë e klientit, a është kjo e pranueshme?

Përgjigje: Sipas legjislacionit, drejtuesve të mjetit u kërkohet të kryejnë ‘kontrolle standarde’ gjatë gjithë udhëtimit të tyre, të cilët përfshijnë një kontroll të brendshëm. Prandaj, kjo mund të kërkojë thyerjen e vulës së klientit. Duhet të jepen vula rezervë që drejtuesit e mjeteve t’i rivendosin pasi ta bëjnë këtë.

9.10 Pyetje: Kontrollet e brendshme në automjet kërkohen në çdo ndalesë gjatë rrugës për në MB, a është përdorimi i CCTV brenda rimorkios një kontroll i mjaftueshëm?

Përgjigje: Jo, CCTV mund të jetë e dobishme megjithatë shpesh mund të ketë pika të padukshme dhe nuk mund të zëvendësojë një kontroll fizik.

9.11 Pyetje: Çfarë duhet të bëjë drejtuesi i mjetit tim nëse dyshon se një hyrës klandestin ka hyrë në automjetin e tyre gjatë rrugës për në Mbretërinë e Bashkuar?

Përgjigje: Drejtuesi i mjetit nuk duhet të përballet apo të merret me individët për arsye sigurie. Në vend të kësaj, ata duhet të:

1. Sigurojnë automjetin duke mbyllur kabinën dhe duke mbajtur një distancë të sigurt.

2. Kontaktoni menjëherë autoritetet lokale dhe raportoni situatën, duke u dhënë detajet e vendndodhjes dhe informacionin e automjetit.

3. Informoni operatorin ose kompaninë e tyre të transportit sipas protokolleve të sigurisë së brendshme.

4. Mos vazhdoni për në kufi dhe prisni udhëzime nga autoritetet, duke shmangur lëvizjen e automjetit derisa të pastrohet.

5. Dokumentoni incidentin (koha, vendi, veprimet e ndërmarra) për qëllimet e zbatimit të rregullave dhe siguracionit.

9.12 Pyetje: Si mund të bashkohet drejtuesi i mjetit tim me skemën e akreditimit?

Përgjigje: Drejtuesit e mjeteve nuk mund të bashkohen ende me skemën e akreditimit në mënyrë të pavarur; megjithatë, një drejtues mjeti i cili është i kontraktuar për të punuar për një kompani të akredituar dhe ka marrë trajnim të përshtatshëm në kohën e një incidenti mund të përfitojë gjithashtu nga një ulje prej 50% e sanksionit të tyre.